Mataio 23
23
Kua Fakailoa e Iehu te Hehē o nā Faiakoga o te Tūlāfono ma te kau Falehaio
(Maleko 12.38-39; Luka 11.43, 46; 20.45-46)
1Oi lea atu ai ia Iehu ki te kaifenua ma nā hoko o ia. 2“Ko nā faiakoga o te Tūlāfono ma te kau Falehaio, ni tino kua mālamalama i te Tūlāfono a Mohe. 3Ko koutou la e tatau ke fakalogo ma mulimuli ki nā mea uma e lea atu ai ki lātou ke koutou faia; kae ia koutou lele nā fakatakitaki ki a lātou mea e fai, auā e hē fakatinoa e ki lātou a lātou kupu e tautatala ai. 4E tanoa e ki lātou nā kavega mamafa ma amo gatā ki nā tua o tagata, oi kae e hē fia fehoahoani lele ki te amoga o nā kavega iēnā. 5#Nūm 15.38; Teu 6.8; Mat 6.1Ko a lātou mea uma e fai kae ke kitea ai ki lātou e tagata. Kikila ki te fuaefa o nā taga ei loto ai nā fuaikupu mai nā tuhituhiga paia e tanoa ki o lātou muāulu ma o lātou lima, vēnā ma te loloa o nā mea e fakapipiki ki nā pito o nā kofutatao, ke fakailoa ai ko ki lātou e fakatuatua ki te Atua! 6E fiafia oi nonofo i nā nofoa tāua i nā kaiga lalahi ma tāofi mo ki lātou nā nofoa fakapitoa i loto o nā hūnako; 7e fofou foki ke fakafeiloaki aloakia ake ki lātou e tagata i nā māketi, ma ke takua ki lātou ni ‘Faiakoga.’ 8Kae ko koutou e hē takua lele ni ‘Faiakoga,’ auā e tutuha uma koutou, ma e fokotahi oioti lava te koutou Faiakoga. 9Ia koutou foki nahe lea lele ki he tino i te lalolagi nei ‘Te Tamana,’ auā e fokotahi oioti lava te koutou Tamana i te lagi. 10Ke vēnā foki ona hē takua lele koutou ni ‘Takitaki,’ auā e fokotahi oioti lava te koutou takitaki ko te Mehia. 11#Mat 20.26-27; Mlk 9.35; 10.43-44; Luk 22.26Ko te tino e hili te tāua ia te koutou, e tatau ke fai ia ma autou kaukauna. 12#Luk 14.11; 18.14Ko ai lava e loto fakamaualuga ka fakamaulalogia, ka ko ai lava e lotomaulalo, ka fakaeke ki luga ma kavea ma tino takutakua.
Ko te Fakagutugutulua o nā Faiakoga o te Tūlāfono ma te kau Falehaio
(Maleko 12.40; Luka 11.39-42, 44, 52; 20.47)
13-14“Kae hāloa la koutou nā faiakoga o te Tūlāfono ma te kau Falehaio! Ko koutou ni tino fakagutugutulua. E koutou tapunia te faitotoka ki te Mālō o te lagi ki tagata, ka ko koutou e hē mafai ke olo ki loto, ma e hē koutou fakataga foki nā tino e taumafai ke olo ki loto.#23.13 Ko iētahi tuhituhiga e fakaopoopo ki ei te fuaikupu 14: Kae hāloa la koutou faiakoga o te Tūlāfono ma te kau Falehaio! Ko koutou ni tagata fakagutugutulua. E fakavalea e koutou ia fafine kua oti a lātou tāne ma hamu e koutou o lātou fale, ma fai e koutou nā tatalo loloa ke tau punipuni ai nā uiga iēnā. Ona ko nā mea iēnei, ka hili atu lele ai te kino o te koutou fakahalaga! (Kikila ki te Mlk 12.40).
15“Kae hāloa la koutou faiakoga o te Tūlāfono ma te kau Falehaio! Ko koutou ni tagata fakagutugutulua. E faimalaga koutou i luga o te moana ki te lahi o atunuku, ke koutou maua he tino e fokotahi ke fakaliliu ki te koutou talitonuga; kae kāfai e maua e koutou, ko autou akoakoga ka fakaluaina ai te faigōfie oi fano te tino tēnā ki kēna, e vē foki lava ko koutou.
16“Kae hāloa la koutou nā takitaki tāuaho! E akoako e koutou vēia, ‘kāfai he tino e tautō i te igoa o te Mālumalu, e hē fuhifuhia i tana tautōga; kae kāfai e tautō i te igoa o nā aulo i loto o te Mālumalu, e fuhifuhia.’ 17Koutou tagata vālelea ma te tāuaho. Ko he ā te hili atu te tāua, ko nā aulo pe ko te Mālumalu e fakapaiagia ai nā aulo? 18E akoako foki e koutou vēia, ‘Kāfai he tino e tautō i te igoa o te fata faitāulaga, e hē fuhifuhia i tana tautōga; kae kāfai e tautō i te igoa o te meaalofa i luga o te fata faitāulaga, e fuhifuhia.’ 19Kai te tāuaho ātili o koutou! Ko he ā te hili atu te tāua, ko te meaalofa pe ko te fata faitāulaga e fakapaiagia ai te meaalofa? 20Ko te mea ia, kāfai he tino e tautō i te igoa o te fata faitāulaga, e aofia ai lava ma nā meaalofa uma i luga; 21ma kāfai he tino e tautō i te igoa o te Mālumalu, e aofia ai ma te Atua, e nofo i kinā; 22#Iha 66.1; Mat 5.34ma kāfai he tino e tautō i te igoa o te lagi, e tautō ia i te igoa o te nofoāliki o te Atua, ma tē e tiketike ai.
23 #
Lev 27.30
“Kae hāloa la koutou nā faiakoga o te Tūlāfono ma te kau Falehaio. Ko koutou ni tagata fakagutugutulua. E fōki e koutou mo te Atua te tahi vaehefulu o nā mea fakamanogi meakai e vē ko te mineti, te tili ma te kumini,#23.23 te mineti, te tili ma te kumini: ni tamā lākau e fakaaogā nā lau ma nā fua ke fakamanogi ai nā meakai. kae kua hē mulimuli koutou ki nā akoakoga tāua o te Tūlāfono, vē ko te fakatutuha o tagata uma i te tūlāfono, te agalelei ma te fakamāoni. Ko nā mea iēnei e tatau ke fai e koutou, kae hē tiakia ai iētahi mea. 24Koutou nā takitaki tāuaho! E fakamamā kehe e koutou he lago mai autou vai inu, kae e folo e koutou he kāmela e aunoa ma te koutou iloagia!
25“Kae hāloa la koutou nā faiakoga o te Tūlāfono ma te kau Falehaio! Ko koutou ni tagata fakagutugutulua. E fufulu e koutou ia fafo o autou iputi ma autou ipukai, kae ko loto e tumu i nā mea na koutou maua i te tuinanau ma te mānumanu. 26Koutou nā Falehaio tāuaho! Fufulu muamua ia loto o autou iputi ma autou ipukai, oi ka mamā ai foki ma fafo!
27 #
Gāl 23.3
“Kae hāloa la koutou nā faiakoga o te Tūlāfono ma te kau Falehaio! Ko koutou ni tagata fakagutugutulua! Ko koutou e vēia ko nā tugamau kua vali paepae, e manaia mai ia fafo ka ko loto e tumu i te pogāivi ma nā tino oti kua pala. 28E vēnā foki lava te kikila atu ki a te koutou i fafo, e āmiotonu i te kikilaga a tagata, ka ko loto e tumu i te fakagutugutulua ma te agahala.
29“Kae hāloa la koutou nā faiakoga o te Tūlāfono ma te kau Falehaio! Ko koutou ni tagata fakagutugutulua! E fau e koutou nā tugamau mānanaia mo nā pelofeta ma teuteu nā mea ke fakamanatu ai ki lātou nae ola āmiotonu; 30ma lea vē koutou, ‘Anei ki mātou na ola ake i nā aho o ō mātou tupuna, e hēki kau fakatahi ki mātou ma ki lātou i te tāmatega o nā pelofeta.’ 31Ma kua takutino lava e koutou, ko koutou ni lāpuna e o nā tino na tāmate e ki lātou nā pelofeta! 32He ā la te koi fakatali ai koutou, fai fakauma nā mea na kāmata e o koutou tupuna! 33#Mat 3.7; 12.34; Luk 3.7Koutou nā gata ma fānau a gata! E vēhea nei ona fakahao koutou mai te afi o kēna. 34Ko te mea ia, ka kō uga atua ki a te koutou nā pelofeta ma nā tino popoto ma nā faiakoga; ka koutou tāmatea iētahi o ki lātou, ka fakahātaulo iētahi, ma kini iētahi i loto o nā hūnako ma tuli mai tētahi kakai ki tētahi kakai. 35#Ken 4.8; 2 NT 24.20-21Ona ko te mea tēnei, ka pakū atu ai ki o koutou luga te fakahalaga mo te fakamaligiga o te toto o nā tino āmiotonu i te lalolagi, mai te toto o Apelu e aunoa ma hana hala ki te toto o Hakalia te ataliki o Palakia,#23.35: Ko te Kenehe te Tuhi muamua i nā Tuhituhiga Epelu, ma e takua ai ia Apelu ko te tino muamua ia na tāmate. Ko te 2 Fakahologā Tupu ko te Tuhi mulimuli ia i nā Tuhituhiga Epelu, ma ko te tino mulimuli e takua na fahioti ko Hakalia. na koutou tāmatea i te va o te fata faitāulaga ma te Nofoaga Paia i loto o te Mālumalu. 36E takutino atu e au ki a te koutou: ko te fakahalaga mo nā tāmate tino uma iēnei, ka pakū lava ki luga o nā tino o nā aho nei!
Ko te Alofa o Iehu mo Ieluhalema
(Luka 13.34-35)
37“Ieluhalema, Ieluhalema! Kua tāmate e koe nā pelofeta ma fetogi nā kavefekau kua uga atu e te Atua ki a te koe! E lahi lele nā taimi na fia ōpoipoi mai ai i oku lima au fānau, e vē oi fakamāopoopo mai e te kaumatua moa tana ōfaga ki lalo o ona kapahau, kae ko koutou e mumuhu! 38#Iel 22.5Ma ko te mea ia ka tīaki ai te Mālumalu o koe ma hē toe i ei ni tino e olo ki loto. 39#Hal 118.26Auā e lea atu au ki a te koe, e kāmata atu nei, ka hē toe kē kiteagia au, heiloga kua pa ki te taimi e lea vē ai koe, ‘Ke fakamanuia e te Atua tē e hau i te igoa o te Aliki’ ”
Currently Selected:
Mataio 23: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
