Mataio 24

Kua Tautala ia Iehu e uiga ki te Fakakinoga o te Mālumalu

(Maleko 13.1-2; Luka 21.5-6)

1Kua fano kehe ia Iehu mai te Mālumalu, ma ka koi havali kehe atu, kae ōmamai nā hoko o ia ma fakahinohino ki ei nā fale o te Mālumalu. 2Kae kua tali atu ia Iehu ki a te ki lātou, “E kitea e koutou nā mea uma iēnei ni? E takutino atu e au ki a te koutou, ka hē toe i ei i kinei he fatu e fokotahi e tū i luga o hētahi fatu; ko nā fatu takitahi uma lele ka togi kehe uma ki lalo.”

Ko nā Puapuagā ma nā Fakahāuāga

(Maleko 13.3-13; Luka 21.7-19)

3E nofo ia Iehu i luga o te Mauga o Ōlive, kae ōmai ki a te ia nā hoko o ia nā ko ki lātou, ma fehili vē atu ki a te ia, “Taku mai ake ki a te ki mātou pe ko āfea te ka fakataunuku ai te mea tēnei, ma pe he ā foki he fakailoga ke iloa ai e ki mātou te taimi e haele mai ai koe, ma te taimi e uma ai te ōlaga tēnei?”

4Kua tali atu ia Iehu, “Koutou ke mataala kae ke nahe fakahehēa ai koutou e he tino. 5Auā e tokalahi nā tino ka ōmamai i toku igoa ma lea vē atu, ‘Ko au ko te Mehia,’ ma ka ki lātou fakahehēa te tokalahi o tagata. 6Ka lagona e koutou te faitapiha mai o nā taua e pili mai ma nā fakamatalaga e uiga ki ni taua i nā mea mamao, kae ia koutou nahe mātataku. Ko nā mea iēnei e tatau lava ke tutupu, kae e hē vēake ai la ko te ikuga kua pa mai. 7Ka hiki taua tētahi fenua ki tētahi fenua, ma tētahi mālō ki tētahi mālō. Ka i ei nā oge ma nā mafuie i nā koga kehekehe uma. 8Ko nā mea uma iēnei e vē lava ko nā tīgā muamua o he fafine e fānau.

9 # Mat 10.22 “Oi ko koutou ka puke ma tuku atu ke fakahāuāgia ma tāmate. Ka inohia koutou e mālō uma o te lalolagi ona ko au. 10E tokalahi nā tino ka fakavāivai i to lātou fakatuatua i te taimi tēnā; ka fakalata e tētahi tētahi ma inoino tētahi ki tētahi. 11E tokalahi foki nā pelofeta pepelo ka huhula mai ma pelogia e ki lātou te tokalahi o tagata. 12Ona ko te tuputupu pea o te āmiokino, ka hē toe lagona ai e te tokalahi o tagata he alofa. 13#Mat 10.22Kae ko te tino e onohai pea lava ke pa ki te ikuga, ka fakaolagia. 14Ma ko te Tala Lelei tēnei e uiga ki te Mālō o te Atua, ka tālaki atu ki te lalolagi kātoa ke fai ma fakamāoniga ki mālō uma oi fātoā pa mai ai loa te gataaga.

Ko te Mea Matakutia te Kino ma te Inohia

(Maleko 13.14-23; Luka 21.20-24)

15 # Tan 9.27; 11.31; 12.11 “Ka kitea e koutou ‘Te Mea Matakutia te Kino ma te Inohia’ e tū i loto o te Nofoaga Paia, e vē oi tākua e te pelofeta ko Tanielu.” (Ke mālamalama te tino faitau ki te uiga o te mea tēnei!) 16“Ko koutou la e nonofo i Iutea, e tatau ke hōhola ki luga o nā mauga. 17#Luk 17.31Ko te tino e i luga o te tuākaukau o tona fale, nahe māumau te taimi ke fanaifo ki lalo ke kave ana mea mai loto o te fale. 18Ko te tino e galue i te fatoaga, nahe toe foki ki tona fale ke kaumai tona kofu loloa. 19Kai te fakaalofa o te mea ka pa ki ei nā fafine e manavakīkī ma nā mātua koi fakahuhu a lātou pepe, kāfai e pa kinā aho iēnā! 20Tatalo ki te Atua ke nahe hōhola kehe koutou i nā aho o te taumālūlū pe i he Hāpati.#24.20: Hāpati: Ko te tūlāfono Epelu, e fakahā he tino e malaga e ova atu i te āfa maila i te Hāpati. 21#Tan 12.1; Fkl 7.14Auā ko nā puapuagā ka pa ki ei i te taimi tēnā, ka hili lele atu te kino i lo ni iētahi puapuagā na kua pa ki ei ia tagata, mai te kāmataga o te lalolagi, ke pa mai lava ki te taimi nei. Ka hē toe mafai lele foki ke toe tupu he mea vēnei. 22Kae kua uma te fakaitiitia e te Atua te nūmela o nā aho; anei ake e hēki ia faia te mea tēnei, e hēai he tino fokotahi na mafai ke ola. Kae ona ko te alofa o te Atua ki ona tagata kua uma te ia filifilia, ka fakaitiitia ai e ia te nūmela o nā aho.

23“Kāfai la he tino e lea atu ki a te koutou, ‘Kikila, tēnei te Keliho!’ pe lea vē, ‘Tēnā te Keliho!’ — koutou nahe talitonu ki ei. 24Auā ka ōmamai nā Keliho pepelo ma nā pelofeta pepelo; ka ki lātou faia ni vāvega uiga kehe ma ni mea ofoofogia ke fakahehē ai ia tagata, ke pa lava ki tagata kua filifilia e te Atua, pe kāfai e mafai. 25Fakalogo lelei mai koutou! Ko au kua lea atu i nā mea iēnei, ka ko hēki pa ki te taimi e tutupu ai.

26 # Luk 17.23-24 “Kāfai nā tino e lea atu, ‘Kikila, ko te Keliho ei te vao!’ — koutou nahe olo ki ei; pe lea atu foki, ‘Kikila, tēnei e mumuni i kinei!’ — koutou nahe talitonu ki ei. 27Auā e vē ona napa te uila ma māinafia haukatoa ai te lagi mai hahae ki hihifo, ka vēnā foki lava kāfai te Ataliki o te Tagata e hau.

28 # Luk 17.37 “Pe ko fea lava te i ei ai he tino oti, ka tumu atu foki ki ei nā āeto.#24.28: āeto: Kupu Eleni e fakaaga ki nā manulele vē ko te āeto e kaia ia kanofi o manu kāfai e mamate.

Kāfai te Ataliki o te Tagata e Haele mai

(Maleko 13.24-27; Luka 21.25-28)

29 # Iha 13.10; 34.4; Ehk 32.7; Ioe 2.10, 31; 3.15; Fkl 6.12-13 “E uma atu loa nā fakahāuāga o nā aho iēnā, oi gaholo loa e pōuli te la, ka hē toe huhulu te māhina, ka pakukū ia fetu mai te lagi, ma ko nā mālohiaga o te vāteatea, ka lūlū kehe mai o lātou alāvaka tūmau. 30#Tan 7.13; Hkl 12.10-14; Fkl 1.7Ka kitea te fakailoga i te lagi, e iloa ai ko te Ataliki o te Tagata kua haele mai; ma ko tagata uma i te lalolagi ka faitatagi, ma ka ki lātou kitea atu te Ataliki o te Tagata e haele mai i luga o nā ao o te lagi, ma te mana, ma te mamalu hilihili kehe. 31Ka ili lahi te pu, ma uga atu ai e ia ana agelu, ma ka ki lātou fakamāopoopo maia nā tino kua uma te ia filifilia mai nā itū e fa o te lalolagi, mai tētahi itūlagi ki tētahi.

Ko te Akoakoga mai i te Mati

(Maleko 13.28-31; Luka 21.29-33)

32“Ke kavea te mati ke maua ai he akoakoga mo koutou. E kāmata loa oi lanu meamata ma vavai nā lālā, ma kāmata oi tutupu ake ona lau, e iloa e koutou ko te tau māfanafana kua tāli pa mai. 33E vēnā foki lava kāfai e koutou kitea nā mea uma iēnei, ka koutou iloa ai kua tāli pa mai te taimi, kua hāuni ka kāmata.#24.33: tāli pa mai te taimi kua hāuni ka kāmata; pe kua tāli pa mai ia, kua hāuni ka hau. 34E takutino atu e au ki a te koutou, ko nā mea uma iēnei e tutupu, ka ko hēki feoti uma nā tino o te tupulaga tēnei. 35E mou kehe atu te lagi ma te lalolagi, ka ko aku kupu e tūmau pea lava.

E hēai he Tino e ia iloa te Aho ma te Itūlā

(Maleko 13.32-37; Luka 17.26-30, 34-36)

36“Kae e hēai he tino e ia iloa, pe pa mai āfea te aho tēnā ma te itūlā — e hē iloa e nā agelu i te lagi oi hē iloa foki e te Ataliki;#24.36: hē iloa foki e te Ataliki: Ko iētahi tuhituhiga anamua e hē tūhia ai te fakakupuga tēnei. kae nā ko te Tamana oioti te ia iloa. 37#Ken 6.5-8E vē ko nā mea na tutupu i nā aho o Noa, ka vēnā foki lava nā mea ka tutupu kāfai te Ataliki o te Tagata ka haele mai. 38Auā i nā aho ka ko hēki tupu te lolo, nae fai lava e tagata nā mea nae māhani ai; nae kakai ma inu, nae āvavaga ia tamāloloa ma fafine, ke pa lava ki te aho na fano ai ia Noa ki luga o te vaka; 39#Ken 7.6-24kae e hēki ki lātou iloa lele te mea kua tupu ke pa lava ki te taimi na hau ai te lolo ma tāfefea uma ai ki lātou. Ka vēnā foki lava nā mea ka tutupu kāfai te Ataliki o te Tagata e haele mai. 40I te taimi tēnā, e toka lua ia tamāloa ka gālulue i te fatoaga; e fokotahi ka kave, kae tuku tētahi. 41E toka lua ia fafine ka tuki haito fakatahi i te mea e tuki ai te haito; e fokotahi ka kave, kae tuku tētahi.

42“Koutou la ke mataala, auā e hē koutou iloa pe ko he ā te aho ka hau ai te koutou Aliki. 43#Luk 12.39-40Ka na he mea na iloa e te tino e o ia te fale te taimi e hau ai te tino kaihohoa, e mautinoa lelei lava e hēki moe lele, ma hē ia tukua he avanoa ke kaihohoa ai tona fale. 44Ko te mea ia, ko koutou foki e tatau ke nonofo hāuni; auā ko te Ataliki o te Tagata e hau i he taimi e hē manatu koutou e hau ai.

Ko te Kaukauna Fakamāoni pe ko te Kaukauna hē Fakamāoni

(Luka 12.41-48)

45“Ko ai la te kaukauna e fakamāoni ma poto? Ko ia tē e tōfia e tona matai ke pule i ana kaukauna, ma fakahoa a lātou meakai i te taimi tatau? 46Amutia te kaukauna tēnei kāfai e maua mai e tona matai, koi galue lava i tona tofi na tuku ki ei! 47E takutino atu e au ki a te koutou, ka tōfia ia e tona matai ke pule i ana mea uma lele. 48Kae kāfai ko ia ko he kaukauna kino, ka lea vē ifo ki a te ia lava, ‘ko toku matai e tuai mai,’ 49ma kāmata ai oi kini e ia ona hoā kaukauna, ma kakai ma inu fakatahi ma nā tino konanā. 50Kae ka toe foki mai tona matai i he aho e hēki manatu te kaukauna e foki mai ai, ma i he taimi e hē ia iloa. 51Ka tukimomo lele ia#24.51 tukimomo lele ia; pe togi ia ki fano. e tona matai oi tuku atu ai ki te mea e i ei ai nā tino fakagutugutulua. I kinā, ka tagi ai ma katigū ona nifo.

Currently Selected:

Mataio 24: TNT

Highlight

Copy