Luka 11

Mɔ ka kan ka Ala dali teme

Matiyu 6.9-13; 7.7-11

1Lon dɔ, Isa tɛɛ Ala dalila dingila dɔ lɔ. A wɔlinin, a kɔbiladen dɔ vɛɛ a yɛ: «Ǹ Kuntii, i yi mɔ kalan Aladali la, iwo Yaya ka a kɔbiladennu kalan teme.»

2Wo lɔ, Isa vɛɛ ai yɛ: «Ài vɛ kɛla Ala dalila, ài y'a fɔ ko:

Mɔ Fa, i tɔɔ sɛnɛyanin yi buɲa.

Iya masaya la yi nkɛnɛmaya.

3I yi bi balo di mɔ ma.

4I yi maa koyonnu lɔkoto,

baa ǹu gbu yi mɔɔlu makotola minu yi koyon kɛla mɔ la.

I do kà diɲa mɔ ma yi nɛɛ ka bila koyon nɔ.»

5Isa k'a fɔ a kɔbiladennu yɛ kɔtunun, a vɛɛ: «Ni a k'a talan tɔva v'i bolo, i do k'i wuli sutɛma ka taa wo fɛlɔ k'aa da makɔnkɔn, i vɛɛ a yɛ: ‹Ǹ tɔva, i jon, i yi ǹ dɔnɔ bulukala sawa la, 6kamasɔlɔn ǹ tɔva dɔ bɔnin taama na k'a jiya ǹ fɛlɔ, kɛɛ foi tɛ m̀ bolo ka kɛ a fana le.› 7I tɔva totɔ bon kɔnɔ ka javili kɛ, a vɛɛ: ‹I kà ǹ ɲagba. M̀'ɛ ban da sɔɔla. Ǹe ni ǹ dennu v'i la butu. Ǹ tɛ se m̀ wulila k'i sɔ fen na.› 8Ǹ'a fɔ ài yɛ, hali a ma diɲa k'i wuli k'i sɔ ka bɛn àiya diɲɔɔya ma, kɛɛ ni i ka to a ɲagbala, a yi wulile k'i sɔ i mako yi fen min na.

9«Ǹ'a fɔ ài yɛ wo lɔ, ài yi daili kɛ, ài do y'a sɔlɔnne. Ài y'a ɲinin, ài do y'a yene. Ài yi da makɔnkɔn, da do la yi kale ài yɛ. 10Kamasɔlɔn ni mɔɔ min ka daili kɛ, wo tii y'a sɔlɔnne. Ni mɔɔ min do v'a ɲininna, wo tii y'a yene. Ado ni mɔɔ min ka da makɔnkɔn, da la yi kale wo tii yɛ.

11«Denfa mindɛ le ài tɛma, ni a den k'a dali jɛɛ la, a yi jɛɛ tola je ka sa ɲɛnɛma di a ma? 12Niwotɛ, ni a den k'a dali sisɛkili la, a kɛtɔ wanzosa dila a ma? 13Àilu ni àiya sɔn kɛwonya bɛ, ni ài k'a lɔn ài ka kan k'ài dennu sɔ fen ɲuma minu la, a lagbɛyine feu ko ài Fa min yi haijɛnɛ, wo yi Nii Sɛnɛyanin dila a dailibalu ma!»

Isa ya seetiiya bɔnin min ne?

Matiyu 12.22-30; Malɛkɛ 3.20-27

14Lon dɔ, Isa tɛɛ jina gbɛnna ka bɔ kɛ́ dɔ lɔ, jina tɛɛ vɛ min kɛ bobo le. Jina bɔnin a lɔ, a do vɛ kumala. Jama ka kawakoya wo lɔ. 15#Matiyu 9.34; 10.25.Kɛɛ a dɔlu tɛɛ a fɔla, ai vɛɛ: «A yi jinalu gbɛnna mɔɔlu lɔ Biyɛzɛbɔ ya seetiiya le lɔ, min kɛnin jinalu ya kuntii le.» 16#Matiyu 12.38; 16.1; Malɛkɛ 8.11.A dɔlu fana tɛɛ a lɔsumana ko a yi kawananko dɔ kɛ ai ɲakɔlɔ min bɔnin Ala fɛ.

17Kɛɛ Isa tɛɛ k'ai miliya lɔn. A do vɛɛ ai yɛ wo lɔ: «Ni jamana min mɔɔlu ka falan a ma k'i ɲɔɔ kɛlɛ, wo jamana yi tiɲale fefe. Ni do bonnamɔɔ minu ka falan a ma k'i ɲɔɔ kɛlɛ, wo bon yi tele. 18Wo boloɲa kelen ma, ni Soitana ya bɔidennu ka falan a ma k'i ɲɔɔ kɛlɛ, aa masaya yi to a ma di wo lɔ? Kamasɔlɔn ài y'a fɔla ko ǹ'i jinalu gbɛnna mɔɔlu lɔ Biyɛzɛbɔ ya seetiiya le lɔ. 19A yi di? Ni ǹe yi jinalu gbɛnna mɔɔlu lɔ Biyɛzɛbɔ ya seetiiya le lɔ, wo lɔ, ài kɔbiladennu do? Wolu yi jinalu gbɛnna mɔɔlu lɔ jene ya seetiiya lɔ? Wo le y'a ma, ài kɔbiladennu gbu le kɛtɔ àiya kiti tɛɛla. 20Kɛɛ ni a ka talan ǹ'i jinalu gbɛnna mɔɔlu lɔ Ala ya seetiiya le lɔ, wo vɛ kɛla, Ala ya masaya vɛ ban sena ài tɛma.

21«Ni kɛ́ fangama k'a jɛlɛ lɔbɛn kɛlɛkɛfennu la aa bon lakanako lɔ, a bolofennu lakanatɔle. 22Kɛɛ ni mɔɔ dɔgbɛlɛ ka na min fanga walanin a ta le, ni wo tii k'i ben a kan ka see sɔlɔn a ma, a kɛtɔ aa kɛlɛkɛfennu bɛ bɔla a bolo, ka ban ka a bolofennu lɔtala.»

23 # Malɛkɛ 9.40. «Mɔɔ min tɛ ǹ fɛ, wo tii yi ǹ juu le le. Mɔɔ min do tɛ m̀ madɛmɛnna mɔɔlu ladɛnko lɔ, wo tii yi mɔɔlɔjɛzɛnba le le.»

Jina seikɔko

Matiyu 12.43-45

24«Ni jinajuu ka bɔ mɔɔ dɔ lɔ, a yi timintiminna fuwa lɔ k'a nɔningɛya ɲinin. Ni a do ka koli, a kɛtɔ a fɔla a jɛlɛ yɛ, a vɛɛ: ‹Fɔ ǹ'i seikɔ m̀ bɔya lɔ.› 25A do vɛ nala, a kɛtɔ bon lakolon yena, je matɛnin vɛ k'a lɔbɛn. 26Wo vɛ kɛla, jina taatɔ jina wolowulan ladɛnna minu yonyanin ale gbu le, ai natɔ donna k'ai makɛ je. Ado jinatɔ wo laban kɛwonyatɔle ka timin a kunfɔlɔ ta la.»

Mɔɔ minu yi duwawuden ne

27Isa ka to kumala, moso dɔ ka to jama tɛma k'a kan labɔ, a vɛɛ: «Duwawu yi moso yɛ min na i sɔlɔnna ka sin di i ma.» 28A do vɛɛ a yɛ: «Mɔɔ minu y'ai tolomalɔla Ala kumakan na k'a labato, wolu le koni yi duwawuden ne.»

Mɔɔlu k'a fɔ ko Isa yi kawananko tɔɔmase dɔ kɛ

Matiyu 12.38-42; Malɛkɛ 8.12

29 # Matiyu 16.4; Malɛkɛ 8.12. Jama walatɔla Isa laminin nɔ, a vɛɛ ai yɛ: «Bi mɔɔlu yi limaniyabali le le. Ai yi kawananko tɔɔmase dɔ ɲininna, kɛɛ tɔɔmase foi tɛnala jiyala ai la mafɔ Nabi Yunusa ta. 30Kamasɔlɔn Nabi Yunusa gbu ka kɛ tɔɔmase le Ninivekalu yɛ teme, Mɔɔnivin Tanin fana kɛtɔ tɔɔmase le bi mɔɔlu yɛ ten ne. 31Kititɛɛlon, Seba jamana mosomasa wulitɔ ka bi mɔɔlu jobaliya, kamasɔlɔn ale ka bɔ haan fɔɔ dunuɲa dan na ka na a tolomalɔ Masakɛ Sulimana ya hangilimaya la. Tandainɔ yi ne, dɔ vɛ jan min fisayanin Sulimana le. 32Kititɛɛlon, Ninivekalu wulitɔ ka bi mɔɔlu jobaliya, kamasɔlɔn Nabi Yunusa ka wolu kawani waate min nɔ, ai k'ai dajoo mafalin. Tandainɔ yi ne, dɔ vɛ jan min fisayanin Yunusa le.»

Fitina ni ɲaden ma sana

Matiyu 5.15; 6.22-23

33 # Matiyu 5.15; Malɛkɛ 4.21; Luka 8.16. «Mɔɔ tɛ fitina lamɛnɛnna k'a sii dingila doonnin nɔ niwotɛ tasa kɔlɔ. Fɔ i y'a sii fitinasiiya lɔ, fɔsa mɔɔ minu yi donna bon na, wolu yi kɛnɛya ye. 34Mɔɔ ɲaden kɛyine a falikolo ma iwo fitina. Ni i ɲaden kɛnɛyanin, kɛnɛya yi kɛle i falikolo fan bɛ lɔ. Ni do i ɲaden kɛnɛyanin tɛ, i falikolo fan bɛ kɛtɔ divi le lɔ. 35Wo le y'a ma, ài y'ài jando ài jɛlɛ lɔ, alako àiya kɛnɛya kana ban ka kɛ divi le. 36Ni kɛnɛya ka kɛ mɔɔ fali fan bɛ lɔ, divi ma talan a fan suu suu lɔ, wo vɛ kɛla, kɛnɛya yi kɛle a falikolo fan bɛ lɔ gbesekele, iwo fitina kɛnɛya yi kɛla teme ài ma.»

Isa ka Falisilu ni seliya kalanmɔɔlu jobaliya teme

Matiyu 23.1-36; Malɛkɛ 12.38-40; Luka 20.45-47

37Isa ka to kumala, Falisi kɛ́ dɔ k'a kili telelɔ dɔnko lɔ aa bon na. Wo lɔ, Isa ka taa je k'i sii dɔnnikɛya lɔ. 38Falisi kɛ́ ka kawakoya, kamasɔlɔn a k'a ye ko Isa ma a bolo lako kunfɔlɔ le ka bɛn aiya laana ma. 39Mɔ Kuntii do vɛɛ a yɛ: «Àilu Falisilu yi jiyafɛ ni tasa kɔkala mako yi la kobɛn, ka àilu gbu kɔnɔlɔ nɔɔnin to natabaya ni koyon na. 40Àilu hangilindannu! Min na a kɔkala ladanna, wo kelen ne ma a kɔnɔla fana ladan? 41Kɛɛ fɔ ài y'ài josokun lɔgbɛnin di fandannilu ma. Wo vɛ kɛla, àiya ko bɛ yi sɛnɛyale.

42«Gbalo y'àilu seliya kalanmɔɔlu ni Falisilu yɛ! Àilu filangafolu! Ài àiya nanai ni àiya gbelelɔfen mɛsɛnmɛsɛnnin tɔ bɛ jaa bɔla, ka telenmandeya ni Ala ya kanundeya to je. Ài tɛɛ ka kan ka wolu kɛ kunfɔlɔ le, k'a tɔ la wolu kɔkan.

43«Gbalo yi àilu Falisilu yɛ! Kamasɔlɔn ài vɛ taala Aladalibon na, ɲamɔɔ siiyalu le diyanin ài yɛ. Ài do vɛ taala bala lɔ, a diyanin ài yɛ mɔɔlu y'ài fo buɲali boloma. 44Gbalo yi àilu Falisilu yɛ! Kamasɔlɔn ài kɛyine iwo kabulu tɔɔmasebali, mɔɔlu yi taamana min kɔkan, ai do m'a lɔn ko kabulu le.»

45Seliya kalanmɔɔ dɔ k'a fɔ Isa yɛ, a vɛɛ: «Kalanmɔɔ, i vɛ kumala ten, i vɛ ǹu fana jɛvɛ!»

46Kɛɛ Isa do vɛɛ a yɛ: «Gbalo yi àilu seliya kalanmɔɔlu yɛ fana! Kamasɔlɔn ài yi donilu siila mɔɔlu kun minu tako gbeleyanin. Ài do tɛ diɲa hali k'ài bolokɔni kelen gbu tuu doni wo la. 47Gbalo yi ài yɛ! Kamasɔlɔn ài bemanu na kela minu faala, ài yi wolu kabululu lɔla. 48Àilu gbu le ài jɛlɛkanu masele le wo lɔ, ko ài diɲanin ài bemanu kɛkolu ma. Kamasɔlɔn ài bemanu na kelalu faala, k'a talan ài yi wolu kabululu lɔla. 49Wo le n'a kɛla, Ala n'a fɔla aa hangilimaya lɔ, a vɛɛ: ‹Ǹ kɛtɔ kela ni keladennu lataala ai ma. Ai do kɛtɔ a dɔlu faala k'a dɔlu jangata.› 50Wo lɔ, kela minu jeli vɛ bɔn ka ta dunuɲa dan waate ma, wo bɛ hakɛ bilatɔ bi mɔɔlu kɔ, 51ka ta Habila ma, haan fɔɔ ka na sii Zakaliya la, min na faala lɔhɔlɔmabonba ni salakagbalan wotɛ. Ǹ'i tuɲa fɔ ài yɛ, mɔɔ wolu bɛ faako hakɛ bilatɔ bi mɔɔlu kɔ. 52Gbalo yi àilu seliya kalanmɔɔlu yɛ! Kamasɔlɔn ài vɛ lɔnni koɲii ta k'a bila ài kun. Àilu gbu tɛ donna a lɔ, ài do yi je donbalu dansiila ai donko lɔ.»

53Isa bɔtɔla je, seliya kalanmɔɔlu ni Falisilu v'a dakɔlɔbɔla ɲiningali suu bɛ dɔ le. 54Ai tɛɛ sɔɔ siila a ɲa, min yi kɛ a mina kun ne ka bɛn a jɛlɛkanu kumakan ma.

Currently Selected:

Luka 11: MBT2023

Highlight

Copy