Luka 17

Mɔɔlafilikolu

Matiyu 18.6-7, 21-22; Malɛkɛ 9.42

1Wo kɔ, Isa vɛɛ a kɔbiladennu yɛ: «Fɔ kolu yi na minu kɛtɔ mɔɔlu lafilila, kɛɛ gbalo yi mɔɔ wo yɛ min vɛ kɛla ko wolu sabu le! 2A tɛɛ bɛnne wo tii ma ka kawa ba sili a kanna k'a lafili kɔɔ lɔ, jani a yi kɛ sabu le ka denni minu kelen lɔ julumbu tala. 3#Matiyu 18.15.Wo lɔ, ài y'ài jando ài jɛlɛ lɔ!

«Ni i badenma dɔ ka hakɛ ta i la, i y'a makuma. Ni a do k'a dajoo mafalin, i y'a makoto. 4Ni wo tii ka to hakɛ tala i la haan fɔɔ siɲa wolowulan tele kelen kɔlɔ, ni a ka hakɛ madali i la wo kelenkelenna bɛ lɔ, i y'a makoto.»

Limaniya

5Mɔ Kuntii ya keladennu k'a fɔ a yɛ, ai vɛɛ: «I y'a dɔ la maa limaniya kɔkan.»

6Mɔ Kuntii do k'ai javi, a vɛɛ: «Hali ni àiya limaniya buɲa jate ka kɛ iwo mutaadi kolo yi teme, ài yi sene a fɔla jiliju min yɛ ko a yi bɔ a nɔ lɔ ka taa sɛnɛ kɔɔji lɔ, a do tɛɛ ài kumakan labatole.»

Bɔidennu ka kan ka min kɛ

7«Ni a k'a talan ài dɔ ya bɔiden ka na luu ma ka bɔ sɛnɛ buluwaya lɔ, niwotɛ saa kunnasiiya lɔ, jene kɛtɔ a fɔla bɔiden wo yɛ ko: ‹Na telemanin, i yi dɔnni kɛ›? 8Wo tɛ kɛ! Fɔ a a fɔle a yɛ, a vɛɛ ‹Taa ǹa wulala lɔbɛn ǹ yɛ. I mafalin kobɛn, i yi na ǹa dɔnnifen ne. Fɔ m̀'ɛ banna dɔnnila ka m̀ min, wo vɛ kɛla, i ta dɔn ne vɛ k'i min.› 9A do tɛnala wo balika bɔla ka bɛn baale ma, a na wo lɔla min na, kɛlɛ? 10Àilu fana yi wo boloɲa le ma. Ni ài ka àiya baale dafa, ài lɔnin min na, ài y'a fɔ ko: ‹Ǹu yi bɔiden jɛlɛla le le. Mɔ na maa ke le kɛla dein.› »

Isa ka kunatɔ mɔɔ tan lasɛnɛya teme

11Isa taatɔla Jelusalɛmu, a tɛɛ timinna Samaliya ni Galile dan na. 12A dontɔla soni dɔ la, kunatɔ mɔɔ tan ka na a kunkɔlɔbɛn. Ai ka to poon, 13k'ai kan labɔ bakɛ, ai vɛɛ: «Isa! Kalanmɔɔ! Hena mɔ la!»

14Isa k'ai ye mingɛ, a vɛɛ ai yɛ: «Ài yi taa ài jɛlɛ jiya salakalasebalu la.»

Ai taatɔla, ai bɛ la ka sɛnɛya. 15Ai lɔ mɔɔ kelen k'a ye mingɛ ko a la vɛ sɛnɛya, a do ka seikɔ, a vɛ Ala tanula kan ba lɔ. 16A k'i kɛ Isa sen kɔlɔ ka balika bɔ a yɛ. Ado Samaliyaka le tɛɛ a le. 17Wo kɛ, Isa k'a maɲininga, a vɛɛ: «Mɔɔ tan ne la na sɛnɛyala, kɛlɛ? A tɔ kɔnɔ do? 18Jalasa ai dɔ pa ma se seikɔla ka balika bɔ Ala yɛ, fɔ lona min kelenpesa?» 19Wo fɔ, Isa do vɛɛ a yɛ: «I wuli, i yi taa, iya limaniya v'i lakɛnɛya!»

Ala ya masaya waate tɔɔmaselu

Matiyu 24.23-28, 37-41

20Lon dɔ, Falisi dɔlu ka Isa maɲininga, ai vɛɛ: «Ala ya masaya lankɛnɛmayatɔ waate mindɛ?»

Isa k'ai javi, a vɛɛ: «Ala ya masaya la tɛ nkɛnɛmayala tɔɔmase le, mɔɔ yi min yena i ɲa la. 21A tɛnala fɔla ko: ‹A ye, a yi jan ne!› niwotɛ ko: ‹A yi jannɔ ve!›, kamasɔlɔn Ala ya masaya y'ài tɛma le.»

22Isa do vɛɛ a kɔbiladennu yɛ: «Lon dɔ sentɔ, a lɔɔ kɛtɔ ài la ka lon kelen gbu ye Mɔɔnivin Tanin ya lonnu lɔ, kɛɛ ài tɛnala a yena. 23Mɔɔlu kɛtɔ a fɔla ài yɛ ko: ‹A ye, a yi jan ne!› niwotɛ ko: ‹A ye, a yi jan ve!› Àilu koni kà bila wolu kɔ. 24Kamasɔlɔn sanmɛnɛn yi bɔla teme sangbolo kun dɔ la ka taa a kun dɔgbɛlɛ la, Mɔɔnivin Tanin nalon kɛtɔ ten ne. 25Kɛɛ fɔ a yi tɔlɔya siyama masɔlɔn kunfɔlɔ le, ani bi mɔɔlu yi ban a lɔ.

26«Mɔɔnivin Tanin nalon kɛtɔle iwo kolu ka kɛ teme Sedina Nuho tele lɔ. 27Mɔɔlu tɛɛ dɔnni kɛla k'i min, ani ka fulusili ni kɔɲɛmalɔ kɛ. Ai ka to wo bɛ la haan fɔɔ Sedina Nuho ka don kulunba kɔnɔ lon min na. Ado ji ba ka na k'ai bɛ halaki.

28«Wo boloɲa kelen ma, Sedina Luti tele lɔ, mɔɔlu tɛɛ dɔnni kɛla k'i min, ka sanni ni fele kɛ, ka sɛnɛ kɛ, ani ka bonnu lɔ. 29Kɛɛ Sedina Luti ka bɔ Sɔdɔmu so kɔnɔ lon min na, taa ni timiliki kawa ɲɛninninu vɛ benbenna ka bɔ sangbolo lɔ, k'ai bɛ halaki. 30Mɔɔnivin Tanin vɛ bɔla gbɛ la lon min na, a kɛtɔ wo boloɲa kelen ne ma. 31#Matiyu 24.17, 18; Malɛkɛ 13.15, 16.Ni wo lon ka mɔɔ min talan bon kɔkan, wo tii kà jii bon kɔnɔ a bolofennu tako lɔ. Ni wo do ka mɔɔ min talan sɛnɛ lɔ, wo tii kà a kɔsei. 32Ko min na kɛla Sedina Luti moso la, ài y'ài hangili to wo lɔ. 33#Matiyu 10.39; 16.25; Malɛkɛ 8.35; Luka 9.24; Yohana 12.25.Mɔɔ min y'a fɛ ka a nii matanga, wo tii bɔnɔtɔ a la. Ni do mɔɔ min vɛ bɔnɔla a nii la ka bɛn ǹe ma, wo tii nii ma yi tangale. 34Ǹ'a fɔ ài yɛ, su wo lɔ, mɔɔ fila kɛtɔ lafen kelen nɔ, a kelen minatɔ k'a dɔ to je. 35Moso fila kɛtɔ kɛla malo tuula i ɲɔɔ fɛ, a kelen minatɔ k'a dɔ to je.»#17.35 Sɛvɛli kɔlɔ dɔlu ka haya min la a kɔkan: 17.36

37Wo fɔ Isa bolo, a kɔbiladennu k'a maɲininga, ai vɛɛ: «Mɔ Kuntii, wo kɛtɔ min ne?»

Isa k'ai javi, a vɛɛ: «Ni soo su ka kɛ tɛɛ o tɛɛ lɔ, duwalu y'ai ladɛnna wo le ja.»

Currently Selected:

Luka 17: MBT2023

Highlight

Copy