Luka 4

Soitana ka Isa lɔsuma teme

Matiyu 4.1-11; Malɛkɛ 1.12-13

1Nii Sɛnɛyanin ka to Isa fɛ kosɛvɛ. A tɛɛ seikɔla mingɛ ka bɔ Julidɛn kɔɔ dala, Nii Sɛnɛyanin ka bila a ɲa ka taa a le fuwa lɔ, 2Soitana k'a lɔsuma tɛɛminja tele binaani (40) kɔlɔ. A do ma fen dɔn wo waate. Tele binaani (40) dafanin, kɔɔn k'a mina.

3Ado Soitana vɛɛ a yɛ: «Ni Ala Denkɛ le i le, i y'a fɔ kawakulun min yɛ ko a yi jɛlɛma ka kɛ bulu le.»

4Kɛɛ Isa k'a javi, a vɛɛ: «A sɛvɛnin kitabu kɔnɔ, ko: ‹Mɔɔ tɛ balola bulu la dein.› »

5Wo kɔ, Soitana ka taa a le dingila lajaannin dɔ lɔ, ka dunuɲa jamana bɛ jiya a la waate kelen nɔ. 6A do vɛɛ a yɛ: «Ǹ kɛtɔ a kuntiiya bɛ dila i ma, ani aa magbiliyali. Kamasɔlɔn wo bɛ dinin m̀ ma, ǹe do yi sene a dila mɔɔ mɔɔ ma min vɛ ǹ diyala. 7Wo lɔ, ni i ka diɲa k'i ten bilin ǹ kɔlɔ m̀ batoko lɔ, wo bɛ kɛtɔ i ta le le.»

8Isa do k'a javi, a vɛɛ: «A sɛvɛnin kitabu kɔnɔ, ko: ‹I i Tii Ala le bato ka baale kɛ ale kelen yɛ dein.› »

9Wo kɛ, Soitana ka Isa ta ka taa a le Jelusalɛmu k'a lalɔ lɔhɔlɔmabonba kun tɛma poon k'a fɔ a yɛ, a vɛɛ: «Ni Ala Denkɛ le i le, i i bolotɛɛ i jɛlɛ la k'i gban, 10kamasɔlɔn a sɛvɛnin kitabu kɔnɔ, ko: ‹Ala kɛtɔ aa mɛlɛkalu jamalila ka bɛn i ma, ko ai i lakana. 11Wo vɛ kɛla, ai kɛtɔ ai bolo siila i kɔlɔ, fɔsa i sen kana tuu kawa la.› »

12Kɛɛ Isa do vɛɛ a yɛ: «A sɛvɛnin kitabu kɔnɔ, ko: ‹I k'i Tii Ala lɔsuma.› »

13Soitana wɔlinin a lɔsumana boloɲa bɛ ma, a k'i majaanya Isa la ka waate gbɛlɛ makɔnɔ.

Isa ka aa baale damina Galile koovi lɔ teme

Matiyu 4.12-17; Malɛkɛ 1.14-15

14Wo kɔ, Isa vɛ seikɔla Galile Nii Sɛnɛyanin ya seetiiya lɔ. A do mangutu vɛ jɛzɛnna koovi wo fan bɛ lɔ. 15A tɛɛ mɔɔlu kalanna aiya Aladalibonnu la, ado bɛ tɛɛ a matɔɔla.

Nazalɛtikalu k'i ban Isa lɔ teme

Matiyu 13.53-58; Malɛkɛ 6.1-6

16Wo kɔ, Isa ka taa Nazalɛti so kɔnɔ, a buɲanin tɛɛminja. Nɔningɛlon senin, a ka taa Aladalibon na, iwo a deinin tɛɛ a kɛla teme. A k'i lɔ mingɛ kalankɛko lɔ, 17ai ka Nabi Ezayi ya kitabu di a ma. A ka kafa lɔfɔlin ka se dingila ma, a sɛvɛnin tɛɛminja, ko:

18«Mɔ Tii Nii Sɛnɛyanin yi ǹ kɔkan,

kamasɔlɔn a na ǹ tala Samakan Kein lasenko lɔ fandannilu ma.

A do na ǹ kelayala ko ǹ'a fɔ kasodennu yɛ ko ai la vɛ bila,

k'a fɔ ɲagbɛlu yɛ ko ai ɲa la vɛ ka,

k'a fɔ mɔɔ tɔlɔninnu yɛ ko ai la vɛ fɛlɛ ka bɔ ai tɔlɔyabalu bolo,

19ani k'a fɔ mɔɔlu yɛ ko mɔ Tii ya san vɛ se,

a kɛtɔ nɛɛma kɛla san min na.»

20Isa wɔlinin wo kalanna, a ka kafa mamɔlɔmɔlɔ k'a don a ladaloba bolo k'i sii. Mɔɔ bɛ ɲa tɛɛ a lɔ Aladalibon na. 21A do vɛɛ ai yɛ: «Ài na kitabu dingila min mɛnna, wo ma vɛ fa ài ɲakɔlɔ bi.»

22Ai bɛ tɛɛ a matɔɔla ka kawakoya ka bɛn aa kuma ɲumalu ma. Ai do vɛɛ: «Jusufu denkɛ le tɛ min ne?»

23Wo lɔ, Isa vɛɛ ai yɛ: «Sika t'a lɔ, ài kɛtɔ sana min lala m̀ ma, ko: ‹Basibɔba, i i jɛlɛ basi,› k'a fɔ ǹ yɛ kɔtunun, ko: ‹Mɔ na iya ko kɛnin minu mɛnna ka bɔ Kapɛlɛnamu, wo suu kɛ vɛ i fɛso.› »

24 # Yohana 4.44. Isa k'a fɔ ai yɛ kɔtunun, a vɛɛ: «Ǹ'i tuɲa fɔ ài yɛ, kela foi tɛɛ je, bolo yi siila min kɔlɔ a fɛso. 25Ǹ'i tuɲa fɔ ài yɛ, kɛsamosolu walanin tɛɛ Isilan jamana lɔ Nabi Iliya tele lɔ, sanji lɔ ka tɛɛ waate min nɔ haan fɔɔ sanji sawa kalo wɔɔlɔ, ado kɔɔn fitina ka don jamana fan bɛ lɔ. 26Kɛɛ Nabi Iliya la ma taa ai foi madɛmɛnko lɔ, mafɔ kɛsamoso dɔ min siinin tɛɛ Zalɛfata so kɔnɔ, Sidɔn duu kɔnɔ. 27Kunatɔ walanin tɛɛ fana Isilan jamana lɔ Nabi Aliyasa ya tele lɔ. Kɛɛ ai suu suu la ma sɛnɛya Nabi Aliyasa bolo, mafɔ Naaman ka bɔ Siliya jamana lɔ.»

28Aladalibonnamɔɔ bɛ ka kuma wo mɛn mingɛ, ai ka mɔnɛ bubale. 29Ai do v'i wulila ka Isa lasusu k'a labɔ so kɔnɔ. Aiya so lɔnin tɛɛ tini min kɔkan, ai vɛ taala a le tini wo da kan, ko ai y'a lasusu, a yi ben. 30Kɛɛ a ka timin ai tɛma ka taa.

Isa ka jina gbɛn k'a bɔ kɛ́ dɔ lɔ teme

Malɛkɛ 1.21-28

31Wo kɔ, Isa ka taa Kapɛlɛnamu so kɔnɔ, min yi Galile koovi lɔ. A do vɛ mɔɔlu kalanna Nɔningɛlon. 32#Matiyu 7.28, 29.Aa kalan k'ai kawakoya, kamasɔlɔn a tɛɛ kumala seetiiya bolo le ma. 33Wo waate kelen, kɛ́ jinajuutɔ dɔ tɛɛ Aladalibon na je. A do v'i wulila ka gbanɔ, a vɛɛ: 34«Ɛɛ Isa Nazalɛtika! Mindɛ le ile ni ǹu wotɛ? I nanin mɔ halakiko le lɔ? Ǹ k'a lɔn mɔɔ min i le. Ala ya Mɔɔ Sɛnɛyanin ne ile le.»

35Wo lɔ, Isa vɛ jina majamanna, a vɛɛ: «Jeden! Bɔ kɛ́ min nɔ!» Jina do ka kɛ́ laben duu ma jama bɛ ɲakɔlɔ, ka ban ka bɔ a lɔ, ado koyon ma kɛ a la.

36Mɔɔ bɛ ka kawakoya ka kɛ a fɔle i ɲɔɔ yɛ, ai vɛɛ: «Kuma suu mindɛ le min ne? Kamasɔlɔn a yi jinajuulu jamalila fangamaya ni seetiiya le boloma, ado wolu yi bɔla mɔɔlu lɔ!» 37Wo le k'a kɛ, Isa mangutu ka jɛzɛn koovi wo fan bɛ lɔ.

Isa ka jangalotɔ siyama lakɛnɛya teme

Matiyu 8.14-17; Malɛkɛ 1.29-34

38Isa k'i wuli ka bɔ Aladalibon na ka taa don Simɔn ya bon na. Wo k'a talan Simɔn bilanmoso tɛɛ vɛ tɔlɔya nɛnɛgbani bolo bubale. Ai do ka Isa madiya ko a yi moso madɛmɛn. 39Wo lɔ, Isa ka t'i lɔ a kunna ka nɛnɛgbani jamali, wo do ka bɔ moso lɔ. Moso do v'i wulila telemanin ka gbadon ai yɛ.

40Teleben waate, mɔɔlu vɛ nala jangalotɔ suu bɛ dɔ le Isa fɛ. A do tɛɛ a bolo lala ai kelenkelenna bɛ kan k'ai lakɛnɛya. 41Jinalu tɛɛ bɔla mɔɔ siyama lɔ fana. Ai bɔ waate, ai tɛɛ gbanɔla, ai vɛɛ: «Ala Denkɛ le i le le!» Kɛɛ Isa do tɛɛ ai majamanna ko ai yi jeden. A ma diɲa ai yi kuma, kamasɔlɔn ai tɛɛ k'a lɔn ko ale le Masa Tɔɔmasenin ne.

Isa ka taa kawanili kɛ Jude koovi lɔ teme

42Wo dusagbɛ, Isa ka bɔ so kɔnɔ ka taa dingila lɔkolon dɔ lɔ. Ado jama v'a ɲininna. Ai ka a ye mingɛ, ai v'a madiyala ko a kà bɔ ai fɛ. 43Kɛɛ Isa vɛɛ ai yɛ: «Fɔ ǹ'i taa so gbɛlɛlu la fana ka Samakan Kein lase je mɔɔlu ma ka bɛn Ala ya masaya ma, kamasɔlɔn ǹ kelayanin ka bɛn wo le ma.» 44Wo lɔ, Isa tɛɛ Jude koovi fan bɛ lɔtaamana ka mɔɔlu kawani Aladalibonnu la.

Currently Selected:

Luka 4: MBT2023

Highlight

Copy