Matiyu 21

Isa ka don Jelusalɛmu sofalini kɔkan teme

Malɛkɛ 11.1-11; Luka 19.28-38; Yohana 12.12-19

1Isa nu masulunyatɔla Jelusalɛmu la, ai ka se Betifase so la, min yi Zeituna tini kɔkan. Ai ka to je, Isa ka aa keladen mɔɔ fila lataa ai ɲa. 2A do vɛɛ ai yɛ: «Soni min yi mɔ ɲa ve, ài yi taa je. Ài vɛ donna so kɔnɔ feeya, ài kɛtɔ sofalinimoso dɔ silinin yena je, a den y'a dafɛ. Ài y'ai fɔlin ka na ai le jan. 3Ni mɔɔ dɔ k'ài maɲininga, ài vɛɛ wo tii yɛ: ‹Mɔ Kuntii le mako y'ai la.› Wo vɛ kɛla, a kɛtɔ sofalinilu tola ài bolo telemanin.» 4A ka kɛ ten fɔsa kuma min fɔnin kela bolo, wo ma yi fa teme, ko:

5«A fɔ Ziyɔn sodennu yɛ, ko:

‹Ài y'a ye, àiya masakɛ yi nala ài ma.

A do siinin sofalinimoso kɔkan fanmajii boloma,

sofalini bolan, sofalinimoso den koni.› »

6Wo lɔ, Isa kɔbiladennu ka taa a kɛ iwo a k'a fɔ ai yɛ teme. 7Ai ka na sofalinimoso ni a den ne, k'aiya faanilu lala sofalinilu kɔkan, ado Isa k'i sii a kɔkan. 8Jama ba vɛ aiya faanilu lɔfɛzɛnna siya kɔkan Isa ɲa. Dɔlu vɛ kɔlɔman bolo mɛsɛnnilu tɛɛtɛɛla ka wolu lɔfɛzɛn siya kɔkan a ɲa. 9Jama tɛɛ Isa ɲafɛ ani a kɔfɛ, ai vɛ ai kan labɔla, ai vɛɛ:

«Tanuli yi Dawuda Bɔzɔn yɛ!

Duwawu yi wo le yɛ min yi nala mɔ Tii tɔɔ lɔ!

Tanuli yi kɛ haijɛnɛ dingila kɔlɔtanin nɔ!»

10Isa ka don Jelusalɛmu mingɛ, so bɛ la ka maamaa, ado mɔɔlu v'a fɔla i ɲɔɔ yɛ, ai vɛɛ: «Jene yi min ne?» 11Jama k'ai javi, ai vɛɛ: «Nabi Isa le ve ka bɔ Nazalɛti so kɔnɔ, Galile koovi lɔ.»

Isa ka taa lɔhɔlɔmabonba luu kɔnɔ teme

Malɛkɛ 11.15-19; Luka 19.45-48; Yohana 2.13-22

12Wo kɔ, Isa ka don lɔhɔlɔmabonba luu kɔnɔ ka julalu ni sannikɛbalu gbɛn k'ai labɔ je. A do ka wɔlifalinbalu ya tabalilu labenben, ani bilini julalu ya siifennu. 13A vɛɛ ai yɛ: «A sɛvɛnin kitabu kɔnɔ, ko: ‹Ai kɛtɔ a fɔla ǹa bon ma ko Aladalibon.› Kɛɛ ài do vɛ je kɛ sonnu doonya le.»

14Ɲagbɛ ni namalanilu tɛɛ nala Isa ma lɔhɔlɔmabonba luu kɔnɔ, a do ka wolu lakɛnɛya. 15Salakalase kuntiibalu ni seliya kalanmɔɔlu ka Isa ya kawananko kɛninnu ye, ani denni minu tɛɛ ai kan labɔla lɔhɔlɔmabonba luu ma, ai vɛɛ: «Tanuli yi Dawuda Bɔzɔn yɛ!» Wo do k'ai josolakuna. 16Ai vɛɛ Isa yɛ: «Dennilu yi min fɔla, i tɛ wo mɛnna?» Isa k'ai javi, a vɛɛ: «Aan, ǹ'a mɛnna. Min sɛvɛnin kitabu kɔnɔ, ài ma wo kalan ba? A sɛvɛnin ko:

‹I vɛ dennilu ni sinmindennu lɔ tanulikan fɔla i jɛlɛ ma.› »

17Wo fɔ Isa bolo, a k'ai to je ka bɔ so kɔnɔ, ka taa si Betani.

Isa ka toloju daan teme

Malɛkɛ 11.12-14, 20-24

18Isa seikɔtɔla so kɔnɔ sɔɔmadanina, kɔɔn k'a mina. 19A ka toloju dɔ ye mingɛ siya dala, a k'i madon a la, kɛɛ a ma a den ye a la, mafɔ filabulu gbaanzan. Wo kɛ, a k'a fɔ toloju yɛ, a vɛɛ: «Ile t'i den butu tuun!» Ado toloju ka ja telemanin.

20A kɔbiladennu ka wo ye mingɛ, ai ka kawakoya, ai vɛɛ: «Ɛɛ! Mindɛ le na toloju jala telemanin?»

21 # Matiyu 17.20; 1 Kolɛntikalu 13.2. Isa do k'ai javi, a vɛɛ: «Ǹ'i tuɲa fɔ ài yɛ, ni limaniya ka kɛ ài bolo, ni ài do ma sika, ǹ na min kɛla toloju la yi ne, ài yi sene wo suu kɛla. Hali ni ài k'a fɔ tini min yɛ ko a yi bɔ a nɔ lɔ ka taa a ben kɔɔji lɔ, a yi kɛle ten. 22Ni ài ka ko ko dali Ala la limaniya boloma, ài yi wo sɔlɔnne.»

Isa ya seetiiya bɔnin min ne?

Malɛkɛ 11.27-33; Luka 20.1-8

23Isa ka don mingɛ lɔhɔlɔmabonba luu kɔnɔ ka mɔɔlu kalan damina, salakalase kuntiibalu ni kɛmɔbalu ka na a ma. Ai do vɛɛ a yɛ: «I yi ko minu kɛla yi ne, jene n'i lɔla wo la? Jene na seetiiya wo dila i ma?» 24Isa k'ai javi, a vɛɛ: «Ǹe fana y'ài maɲiningala ko kelen na. Ni ài ka ǹ javi, min na seetiiya dila m̀ ma ko minu kɛko lɔ, ǹ kɛtɔ wo fɔla ài yɛ. 25Jene ka seetiiya di Yaya ma makoliko lɔ: Ala, baa adamadennu?»

Wo fɔ, ai v'i ɲɔɔ sɔsɔla, ai vɛɛ: «Ni mɔ k'a fɔ ko Ala le, a kɛtɔ a fɔla mɔ yɛ, a vɛɛ: ‹Ni wo le, mindɛ lɔ ài ma la a la?› 26Kɛɛ ni mɔ k'a fɔ adamadennu le, wo tɛ bɛn. M'i siyanna jama ɲa, kamasɔlɔn ai bɛ yi Yaya jatela kela le le.»

27Wo le k'a kɛ, ai ka Isa javi, ai vɛɛ: «Mɔ m'a lɔn.»

Isa do vɛɛ ai yɛ: «Ni wo le, ǹe fana tɛnala a fɔla ài yɛ min na seetiiya dila m̀ ma ko minu kɛko lɔ.»

Denkɛ fila ma sana

28«Ài miliya yi di? Kɛ́ dɔ tɛɛ je, denkɛ fila tɛɛ min bolo. A vɛɛ a denkɛ kunfɔlɔ yɛ: ‹Ǹ denkɛ, taa baale gbele lɔ bi.› 29A denkɛ do vɛɛ: ‹Ǹ tɛ taala,› kɛɛ kɔfɛ, a ka nimisa ka taa gbele lɔ. 30A fa ka kuma kelen wo fɔ denkɛ filana yɛ. Wo do vɛɛ: ‹Ǹ fa, ǹ'i taale,› kɛɛ a ma taa. 31Denkɛ fila wolu lɔ, jene na a fa sawo kɛla?»

Ai ka Isa javi, ai vɛɛ: «Denkɛ kunfɔlɔ.»

Wo lɔ, Isa vɛɛ ai yɛ: «Ǹ'i tuɲa fɔ ài yɛ, niisɔɔnminabalu ni sungulunbalu dontɔle àilu ɲa Ala ya masaya lɔ. 32#Luka 3.12; 7.29, 30.Kamasɔlɔn Makolikɛba Yaya na nala ka siya telennin jiya ài la. Ài do ma la a la, kɛɛ niisɔɔnminabalu ni sungulunbalu le ka la a la. Ài na wo bɛ yena, kɛɛ wo bɛ n'a kɛ, ài ma ài miliya mafalin ka la a la.»

Gbelekunnasiiba yonnu ma sana

Malɛkɛ 12.1-12; Luka 20.9-19

33«Ài y'ài tolomalɔ sana gbɛlɛ la. A ka kɛ duutii dɔ le le, min ka lɛzɛn gbele kɛ k'a laminin jɔsɔ le. A do ka diɲa sen ka kɛ lɛzɛnjibɔya le, ani k'a kunmagbɛn gbalan lɔ. A wɔlinin wo bɛ la, a k'a kalifa gbelekunnasiiba dɔlu la, ka taa jamana gbɛlɛ lɔ. 34Lɛzɛn bɔ waate ma ka sulunya mingɛ, gbeletii ka aa bɔidennu lataa gbelekunnasiibalu ma, ko ai y'a ta nii di a ma. 35Kɛɛ gbelekunnasiibalu ka aa bɔidennu mina, k'a dɔ gbasi, k'a dɔ faa, ani k'a dɔgbɛlɛ bon kawakulun na. 36Wo kɛ, gbeletii ka aa bɔiden gbɛlɛlu lataa kɔtunun ka timin kunfɔlɔ talu la. Ai do ka wolu mina wo boloɲa kelen ne ma. 37A laban nɔ, a k'a jɛlɛkanu denkɛ lataa ai ma. A do vɛɛ: ‹Ai kɛtɔ ǹ denkɛ buɲala jɔ.› 38Kɛɛ gbelekunnasiibalu ka a denkɛ natɔla ye mingɛ, ai do vɛɛ i ɲɔɔ yɛ: ‹Kɛɛtaba le ve. Ài m'a faa fɔsa a fa kɛɛ yi kɛ mɔ ta le!› 39Wo lɔ, ai k'a mina k'a fɔnfɔn gbele kɔma, ka ban k'a faa.

40«A yi di wo lɔ? Ni gbeletii ka na waate min nɔ, a kɛtɔ mindɛ kɛla gbelekunnasiiba wolu la?»

41Ai do ka Isa javi, ai vɛɛ: «A kɛtɔ mɔɔ kolon wolu halakila henabaliya boloma. Wo vɛ kɛla, a kɛtɔ gbele kalifala mɔɔ gbɛlɛlu la, minu kɛtɔ a ta nii dila a ma a waate bɛlɛ lɔ.»

42Isa vɛɛ ai yɛ: «Jalasa ài ma kitabu dingila min kalan ba? Ko:

‹Bonlɔbalu n'ai banna kawakulun min nɔ,

wo le kɛnin bon tongun kawakulun ne.

Mɔ Tii le na wo kɛla,

wo kɛnin mɔ ɲana kawananko le le.›

43«Wo lɔ saa, ǹ'a fɔ ài yɛ, Ala kɛtɔ ài fɛ bɔla aa masaya la, k'a di mɔɔ gbɛlɛlu ma minu kɛtɔ a lasawatila. 44[Ni mɔɔ min do k'i ben kawakulun wo kɔkan, wo tii lɔkalitɔle. Ni do kawakulun wo k'i ben mɔɔ mɔɔ kɔkan, wo tii lɔgbɛnɛngɛtɔle.]»

45Salakalase kuntiibalu ni Falisilu ka Isa ya sanalu mɛn mingɛ, ai k'a ɲaye ko a kan tɛɛ ailu le ma. 46Ai tɛɛ a minako ɲaɲininna, kɛɛ ai tɛɛ siyanna jama ɲa, kamasɔlɔn mɔɔlu tɛɛ Isa jatela kela le le.

Currently Selected:

Matiyu 21: MBT2023

Highlight

Copy