Malɛkɛ 14

Isa juulu k'a minako ɲaɲininna teme

Matiyu 26.1-5; Luka 22.1-2; Yohana 11.45-53

1A tɛɛ vɛ to tele fila, Timinkunna Selilon tɛɛ se, ani Bulufununbali Selilon. Wo ma, salakalase kuntiibalu ni seliya kalanmɔɔlu tɛɛ Isa minako ɲaɲininna doon nɔ a faako lɔ. 2Ai vɛɛ: «Mɔ kà a mina selilon, niwotɛ mɔɔlu yi mulutule.»

Moso dɔ ka tulu sumadiyanin kɛ Isa kun nɔ teme

Matiyu 26.6-13; Yohana 12.1-8

3 # Luka 7.37, 38. Isa ka to dɔnnikɛya lɔ kunatɔ kɔlɔ Simɔn ya bon na Betani, moso dɔ ka na baabɔlɔn ne, min ladannin kawa kein ne. A lafanin tɛɛ tulu sumadiyanin daagbɛlɛn na, min tɔɔ yi ko naladu. A do ka baabɔlɔn kan kali, ka tulu wo kɛ Isa kun nɔ. 4Wo kɛnin, je mɔɔ dɔlu ka mɔnɛ k'a fɔ i ɲɔɔ yɛ, ai vɛɛ: «Tiɲali min kun yi mindɛ le? 5Tulu min tɛɛ sene felela wɔligbɛ gbana kɛmɛ sawa (300) la, ka wo kɛ bolokolonnu madɛmɛlifen ne.» Ai do tɛɛ moso makumala bubale.

6Kɛɛ Isa do vɛɛ ai yɛ: «Ài yi moso to je! A yi di ài y'a ɲagbala? A na kokein ne kɛla ǹ yɛ. 7Bolokolonnu totɔ ài tɛma waate bɛ. Waate suu suu v'ài diyala, ài yi sene ai madɛmɛnna. Kɛɛ ǹe do tɛnala tola ài tɛma waate bɛ. 8Moso min n'a senko le kɛla. A na tulu sumadiyanin min kɛla ǹ fali kan, ka ǹ lɔbɛn ka bɛn ǹ sudoonko le ma, jani wo waate yi se. 9Ǹ'i tuɲa fɔ ài yɛ, Samakan Kein la vɛ sena dunuɲa tɛɛ o tɛɛ lɔ, moso na min kɛla, wo yi fɔle je, fɔsa mɔɔlu hangili yi to ale fana lɔ.»

Judasi ka Isa janva teme

Matiyu 26.14-16; Luka 22.3-6

10Wo kɔ, Judasi Isekaliyɔti, min tɛɛ Isa ya keladen mɔɔ tan ni fila (12) dɔ le, wo ka taa salakalase kuntiibalu fɛlɔ Isa donko lɔ ai bolo. 11Wo mɛn ai bolo, ai k'ai kɔnɔlɔdiya ka lahedi ta a yɛ, ko ai kɛtɔ wɔli dila a ma. Ka ta wo waate ma, Judasi tɛɛ Isa donko ɲaɲininna ai bolo.

Isa ni a kɔbiladennu ka Timinkunna Selilon kɛ teme

Matiyu 26.17-25; Luka 22.7-14, 21-23; Yohana 13.21-30

12Bulufununbali Selilon tele kunfɔlɔ, Jahudiyalu deinin tɛɛ saa bolan ne kannatɛɛla ka Timinkunna Selilon salaka bɔ. Wo lon na, Isa kɔbiladennu k'a maɲininga, ai vɛɛ: «I y'a fɛ m'i Timinkunna Selilon dɔnnifen lɔbɛn i yɛ mineja?»

13A do k'a kɔbiladen fila kelaya k'a fɔ ai yɛ, a vɛɛ: «Ài yi taa so kɔnɔ. Ài kɛtɔ ài ɲɔɔmɛnna kɛ́ dɔ le, jidaa yi min kun. Ài yi bila a kɔ. 14A vɛ donna bon min na, ài y'a fɔ lutii wo yɛ, ài vɛɛ: ‹Kalanmɔɔ bolo ko a jiyabon yi min ne, ale ni a kɔbiladennu kɛtɔ Timinkunna Selilon dɔnni kɛla tɛɛminja?› 15Kɛ́ wo kɛtɔ sangaso sanmabon ba dɔ jiyala ài la min lɔbɛnnin kobɛn. Mɔ mako yi fen minu la, wo bɛ kɛtɔ je. Ài yi dɔnnifen lɔbɛn mɔ yɛ woja.»

16Ai ka bɔ je ka taa se so wo la mingɛ, ai ka kolu talan iwo Isa k'a fɔ ai yɛ teme. Ai do ka Timinkunna Selilon dɔnnifen lɔbɛn je.

17Teleben waate, Isa ni aa keladen mɔɔ tan ni fila (12) ka se je. 18Ai siinin ka to dɔnnila, Isa vɛɛ ai yɛ: «Ǹ'i tuɲa fɔ ài yɛ, ài lɔ mɔɔ kelen kɛtɔ ǹ janvala. Wo tii yi dɔnnila ǹ fɛ jan.» 19Ai do niila ka fin ka bɛn kuma wo ma. Ai bɛ v'a fɔla a yɛ kelen kelen ne, ai vɛɛ: «Ǹe le wo le?»

20Isa vɛɛ ai yɛ: «Wo tii y'ài mɔɔ tan ni fila (12) dɔ le le. Ǹe ni ale bolo yi tasa kelen nɔ. 21Ado Mɔɔnivin Tanin faatɔle iwo a sɛvɛnin kitabu kɔnɔ teme ka bɛn a ma. Kɛɛ mɔɔ min kɛtɔ a janvala, gbalo yi wo tii ma yɛ. Hali ni wo tii tɛɛ ma sɔlɔn, wo tɛɛ bɛnne a ma feu.»

Mɔ Tii ya dɔnni laban

Matiyu 26.26-30; Luka 22.14-23

22Ai ka to dɔnnila, Isa ka bulu ta ka balika bɔ Ala yɛ. A do ka bulu lɔkalikali, k'a di ai ma, k'a fɔ ai yɛ, a vɛɛ: «Ài yi min mina. Ǹ falikolo le min ne.»

23Wo kɔ, a ka jiyafɛ ta, lɛzɛnji tɛɛ min nɔ. A ka balika bɔ Ala yɛ, ka ban ka jiyafɛ di ai ma. Ai bɛ k'a dɔ min a lɔ. 24A do vɛɛ ai yɛ: «Ǹ jeli le min ne, salatikan jeli, min bɔnnin mɔɔ siyama yɛ. 25Ǹ'i tuɲa fɔ ài yɛ, ǹ tɛnala lɛzɛnji minna butu, haan fɔɔ m̀'ɛ a kula minna lon min na ǹ Fa ya masaya lɔ.»

26Wo kɔ, ai ka baiti la, ka bɔ je ka taa Zeituna tini kɔkan.

Isa k'a fɔ ko Piyɛli kɛtɔ i banna a lɔ

Matiyu 26.31-35; Luka 22.31-34; Yohana 13.36-38

27Wo kɔ, Isa k'a fɔ ai yɛ, a vɛɛ: «Ài bɛ kɛtɔ ài banna ǹ nɔ, kamasɔlɔn a sɛvɛnin kitabu kɔnɔ, ko:

‹Ǹ kɛtɔ saakunnasiiba gbasila,

ado aa saalu jɛzɛntɔ.›

28 # Matiyu 28.16. Kɛɛ m̀'ɛ m̀ wulila ka bɔ saya lɔ, ǹ taatɔ ài ɲa Galile koovi lɔ.»

29Wo fɔ Isa bolo, Piyɛli vɛɛ a yɛ: «Hali bɛ k'i ban i lɔ, kɛɛ ǹe tɛnala m̀ banna i lɔ feu!»

30Isa do vɛɛ a yɛ: «Ǹ'i tuɲa fɔ i yɛ, bi su min nɔ, jani donon yi kumun, i kɛtɔ a fɔla siɲa sawa le ko i ma ǹ lɔn.»

31Kɛɛ Piyɛli k'a fɔ k'a magbeleya kosɛvɛ, a vɛɛ: «Hali a ka sii saya la, ǹ tɛnala m̀ banna i lɔ feu!»

Isa kɔbiladen tɔlu bɛ ka wo ɲɔɔzii fɔ.

Isa ka Ala dali Gɛtɛsɛmɛni teme

Matiyu 26.36-46; Luka 22.39-46

32Ai ka se dingila dɔ lɔ, min tɔɔ yi ko Gɛtɛsɛmɛni. Isa do vɛɛ a kɔbiladennu yɛ: «Ài sii, ài yi m̀ makɔnɔ jan. Ǹ taatɔ Ala dalila.»

33A do ka taa Piyɛli ni Janguba ni Yohana le. Isa niila ka fin, a do joso ka tɔlɔya bubale. 34A vɛɛ ai yɛ: «Ǹ niila vɛ fin bubale k'a kɛ iwo ǹ satɔle. Ài yi to jan, ka to ài ɲana.»

35Wo kɛ, a ka taa ɲafɛ dɔni ne, k'a ten bilin duu ma. A vɛ Ala dalila ko ni a yi sene kɛla, tɔlɔya wo waate yi timin a kunna. 36A vɛɛ: «Ǹ Fa, i yi sene ko bɛ la. I kà ǹ lamin jiyafɛ min nɔ. Kɛɛ ǹe gbu sawo kà kɛ, mafɔ i sawo.»

37Wo kɔ, Isa ka seikɔ a kɔbiladen sawa fɛlɔ, k'ai talan sunɔɔ lɔ. A do vɛɛ Piyɛli yɛ: «Simɔn, i yi sunɔɔ lɔ? I ma se tola i ɲana hali lɛlɛ kelen gbu? 38Ài yi to ài ɲana ka Ala dali, fɔsa ài ma kana nɛɛ k'ài bila koyon nɔ. Koɲumakɛ miliya yi mɔɔ la, kɛɛ wo see tɛ a falikolo yɛ.»

39Isa ka bɔ ai fɛ ka taa Ala dali kɔtunun, a vɛ kuma kelen wolu fɔla. 40A seikɔnin a kɔbiladennu fɛlɔ, a k'ai talan sunɔɔ lɔ kɔtunun, kamasɔlɔn sunɔɔ ba le tɛɛ ai ɲa la. Ai tɛɛ m'a lɔn ai yi min fɔ a yɛ.

41A do ka seikɔ a kɔbiladennu fɛlɔ a siɲa sawana lɔ k'a fɔ ai yɛ, a vɛɛ: «Hali bi ài yi sunɔɔ lɔ, ani k'ai nɔningɛ? A ye, waate vɛ se. Mɔɔnivin Tanin yi don bolo le ma julumbutɔlu bolo. 42Ài wuli, ài ndaa vɛ! Ǹ janvaba vɛ se.»

Isa minako

Matiyu 26.47-56; Luka 22.47-53; Yohana 18.3-12

43Isa ka to kumala, Judasi min tɛɛ aa keladen mɔɔ tan ni fila (12) dɔ le, wo ka se je telemanin. Jama tɛɛ a kɔ siyamifan ni kɔlɔmankulunnu le. Ai kelayanin tɛɛ salakalase kuntiibalu ni seliya kalanmɔɔlu ni kɛmɔbalu le bolo. 44Isa janvaba tɛɛ vɛ tɔɔmase jiya jama la, a vɛɛ: «M̀'ɛ ǹ filila mɔɔ min nɔ k'a sumu a tama lɔ, wo tii le. Ài yi wo tii mina k'a lakana.»

45Judasi se je feeya, a k'i madon Isa la k'a fɔ a yɛ, a vɛɛ: «Kalanmɔɔ!» A do vɛ Isa sumuna a tama lɔ. 46Wo kɛ, ai k'i kɛ Isa kan k'a mina. 47Mɔɔ minu lɔnin tɛɛ je, wolu lɔ mɔɔ kelen ka aa siyamifan labɔ aa ɲaa lɔ ka salakalase kuntiiba ya jɔn gbasi, k'a tolo tɛɛ a la. 48Isa do k'a fɔ jama yɛ, a vɛɛ: «Mindɛ kɛnin ài nanin m̀ minaya lɔ siyamifan ni kɔlɔmankulunnu le iwo mɔɔlu yi bɔla benkannikɛba kanma teme? 49#Luka 19.47; 21.37.Lon bɛ, ǹ tɛɛ mɔɔlu kalanna ài fɛ lɔhɔlɔmabonba luu kɔnɔ, ài do ma m̀ mina je. Kɛɛ min sɛvɛnin kitabulu kɔnɔ, fɔ wo ma yi fa teme.»

50Wo kɛ, Isa kɔbiladennu bɛ ka bɔli ka ale kelen to. 51Kavelen dɔ tɛɛ Isa kɔ, bilingan ne mɔlɔmɔlɔnin tɛɛ a ma dein. Ai do k'a mina, 52kɛɛ a ka bilingan to a kɔ ka bɔli a falimakolon ne.

Ai ka taa Isa le kititɛɛya lɔ teme

Matiyu 26.57-68; Luka 22.54-55, 63-71; Yohana 18.13-14, 19-24

53Ai ka taa Isa le salakalasebalu ya kuntiiba fɛlɔ, ado salakalase kuntiiba tɔlu ni kɛmɔbalu ni seliya kalanmɔɔlu k'ai ladɛn je.

54Piyɛli tɛɛ Isa kɔ poon, haan fɔɔ ka se salakalase kuntiiba ya luu ma. A do ka don je k'i sii lakanalibalu tɛma taa dafɛ, a v'a jala.

55Wo waate kelen, salakalase kuntiibalu ni kititɛɛbalu bɛ tɛɛ seleyakan ɲininna Isa kanma, min yi se kɛla a faa kun ne, kɛɛ ai do ma foi sɔlɔn. 56Kamasɔlɔn mɔɔ siyama tɛɛ faɲafɔ seleyakan dila a kanma, kɛɛ aiya seleyakan ma kɛ kelen ne. 57A dɔlu k'i lɔ ka faɲafɔ seleyakan min fɔ a kanma, a vɛɛ: 58#Yohana 2.19.«Mɔ na a kan mɛnna ko lɔhɔlɔmabonba min lɔnin mɔɔlu bolo, ko a kɛtɔ wo tela k'a dɔgbɛlɛ lɔ tele sawa kɔlɔ, mɔɔ ma min lɔ.» 59Kɛɛ sele wolu kumakan ma kɛ kelen ne.

60Wo kɛ, salakalase kuntiiba k'i lɔ jama tɛma ka Isa maɲininga, a vɛɛ: «Mɔɔ minu yi min fɔla ka bɛn i ma, i tɛ wo javila?» 61Kɛɛ Isa ka jeden. A ma javili kɛ. Salakalasebalu ya kuntiiba k'a maɲininga kɔtunun, a vɛɛ: «Jalasa ile le Masa Tɔɔmasenin ne? Tanuli yi min yɛ, wo denkɛ?»

62Isa k'a javi, a vɛɛ: «Ǹe le wo le, ado ài kɛtɔ Mɔɔnivin Tanin siinin yena Seebɛtii Ala bolokini fannɔ, ani ka a natɔla ye sanbiliya lɔ ka bɔ sangbolo lɔ.»

63Wo fɔ Isa bolo, salakalase kuntiiba vɛ aa faaniba lɔfalafalala mɔnɛya boloma, a vɛɛ: «Mɔ mako tɛ mɔɔ ya seleyakan na butu. 64Àilu gbu vɛ aa Alalafeyakan mɛn. Ài miliya yi mindɛ le butu?»

Ai bɛ do k'a jobaliya wo lɔ, ai v'a fɔla ko a ka kan ka faa.

65Ai dɔlu v'i wulila k'ai daji bɔn a kan, k'a ɲa lasili, ani k'a gbuun. Ai do vɛɛ: «Kelaya kɛ vɛ! Mɔɔ min n'i gbasila, i yi wo tii tɔɔ fɔ!» Lakanalibalu fana k'a mina k'a tolo te.

Piyɛli k'i ban Isa lɔ teme

Matiyu 26.69-75; Luka 22.56-62; Yohana 18.15-18, 25-27

66Piyɛli ka to luu ma sangaso kɔlɔ, salakalase kuntiiba ya bɔidenmoso dɔ ka na. 67A do ka Piyɛli ye mingɛ a jala taa dafɛ, a k'i ɲa kaa a lɔ k'a fɔ a yɛ, a vɛɛ: «Ile fana tɛɛ Isa fɛ, Nazalɛtika wo.»

68Kɛɛ Piyɛli k'i ban a ma, a vɛɛ: «M̀ m'iya kuma ɲaye.» A bɔ k'i lɔ luu da la feeya, donon ka kumun.

69Bɔidenmoso ka Piyɛli ye je mingɛ, a k'a fɔ a dafɛ mɔɔlu yɛ kɔtunun, a vɛɛ: «Ai dɔ le kɛ́ min ne.» 70A do k'i ban a ma kɔtunun.

A lɔ ma mɛn, Piyɛli dafɛmɔɔlu k'a fɔ a yɛ, ai vɛɛ: «Tuɲa le, ile fana yi mɔɔ wolu dɔ le le, kamasɔlɔn Galileka le i le.»

71Wo fɔ ai bolo, Piyɛli k'i kalin haan fɔɔ k'a jɛlɛ daan, a vɛɛ: «Ài kan yi kɛ́ min ma, m̀ ma wo tii lɔn feu!»

72Wo fɔ Piyɛli bolo, donon ka kumun telemanin a siɲa filana lɔ. A hangili ka bila Isa kumakan nɔ, ko: «Jani donon yi kumun siɲa fila le bi, i kɛtɔ a fɔla siɲa sawa le ko i ma ǹ lɔn.» Ado Piyɛli ka kasi kosɛvɛ.

Currently Selected:

Malɛkɛ 14: MBT2023

Highlight

Copy