Malɛkɛ 15

Isa k'i lɔ Pilati ɲakɔlɔ teme

Matiyu 27.1-2, 11-14; Luka 23.1-5; Yohana 18.28-38

1Kɛnɛ bɔnin, salakalase kuntiibalu ni kɛmɔbalu ni seliya kalanmɔɔlu ni kititɛɛjama bɛ k'i kun bilin i ɲɔɔ ma, ka ban ka Isa sili, ka taa a le Pilati fɛlɔ. 2Wo lɔ, Pilati k'a maɲininga, a vɛɛ: «Ile le Jahudiyalu ya masakɛ le?»

Isa k'a javi, a vɛɛ: «Ile gbu vɛ wo fɔ.»

3Salakalase kuntiibalu tɛɛ Isa jalakila ka bɛn ko siyama ma. 4Pilati ka Isa maɲininga kɔtunun, a vɛɛ: «Ai v'i jalaki ko siyama lɔ. I ma wo mɛn? I tɛ ai javila?»

5Kɛɛ Isa ma diɲa ka javili suu suu di. Wo do ka Pilati kawakoya.

Jahudiyalu ka Isa faako jatesii teme

Matiyu 27.15-26; Luka 23.13-25; Yohana 18.29–19.16

6Timinkunna Selilon tɛɛ vɛ sena kotan, jamanatii deinin tɛɛ kasoden kelen ne bilala. Jama tɛɛ v'a dalila mɔɔ min na, a tɛɛ wo tii le bilala. 7Wo k'a talan, kɛ́ dɔ tɛɛ je, min tɔɔ tɛɛ ko Balabasi. Ale ni mɔɔlamulutuba dɔlu tɛɛ kaso la, kamasɔlɔn ai tɛɛ vɛ mɔɔ dɔlu faa mɔɔlamulutu waate dɔ lɔ. 8Jama k'i madon Pilati la k'a madiya, ko a yi kasoden dɔ bila ai yɛ iwo a deinin a kɛla teme. 9A do k'ai maɲininga, a vɛɛ: «Ài y'a fɛ ǹ'i Jahudiyalu ya masakɛ le bila?» 10Pilati tɛɛ k'a lɔn ko salakalase kuntiibalu na Isa donna a bolo ka bɛn ɲangbeya le ma.

11Kɛɛ salakalase kuntiibalu ka jama lɔsun ko a yi Balabasi bila ai yɛ. 12Wo lɔ, Pilati ka kuma jama fɛ kɔtunun, a vɛɛ: «Ài y'a fɛ ǹ'i mindɛ le kɛ Isa la wo lɔ, ài y'a fɔla min ma ko Jahudiyalu ya masakɛ?»

13Ai bɛ ka gbanɔ, ai vɛɛ: «A gbaan kɔlɔman ma!»

14Pilati k'ai maɲininga, a vɛɛ: «Mindɛ lɔ? A na koyon mindɛ kɛla?»

Kɛɛ ai do k'a dɔ la aiya gbanɔ kɔkan, ai vɛɛ: «A gbaan kɔlɔman ma!»

15Komi Pilati tɛɛ a fɛ ka jama ladiyananko le kɛ, wo le k'a kɛ, a ka Balabasi bila, ka sɔdasilu lɔ Isa gbasila gbusan na, ka ban ko ai yi taa a le a gbaanya lɔ kɔlɔman ma.

Sɔdasilu ka Isa lafeya teme

Matiyu 27.27-30; Yohana 19.2-3

16Wo kɛ, sɔdasilu ka taa Isa le jamanatii ya luu ma, ado sɔdasi jama ba bɛ k'i ladɛn a ma. 17Ai ka masayafaani wulɛn bila a kanna, ka wonin julu dɔ milinmilin k'a kɛ masayafula sawula le, ka wo bilin a kun na. 18Wo kɔ, ai v'a fola, ai vɛɛ: «Jahudiyalu ya masakɛ, m'i fola.» 19Ai ka to a gbasila a kun nɔ bele le, k'ai daji bɔn a kan. Ai k'i mabilin a kɔlɔ k'a kɛ iwo ai v'a buɲala. 20Ai wɔlinin a lafeyala, ai ka masayafaani wulɛn bɔ a kanna, k'a jɛlɛkanu ya faanilu bila a kanna. Wo kɛ, ai ka bɔ ka taa a le a gbaanya lɔ kɔlɔman ma.

Ai ka Isa gbaan kɔlɔman ma teme

Matiyu 27.31-44; Luka 23.27-43; Yohana 19.17-27

21 # Lɔmukalu 16.13. Ai taatɔla, ai k'i ɲɔɔmɛn Silɛnika kɛ́ dɔ le, a vɛ bɔla sɛnɛ lɔ, min tɔɔ tɛɛ ko Simɔn, min taanin kɛla Alɛzandele ni Lufɔ fa le. Sɔdasilu k'a lɔ ko a yi Isa gbaankɔlɔman ta diyanigbeya boloma. 22Ai ka taa Isa le dingila dɔ lɔ, min tɔɔ yi ko Gɔligota. Wo kɔlɔ le ko Kunkolo Dingila. 23Ai tɛɛ a fɛ ka gbɛ dɔ di Isa ma, min ɲaaminin tɛɛ milu le. A do k'i ban a lɔ. 24Ai k'a gbaan kɔlɔman ma. Wo kɔ, ai ka kalabila kɛ ka bɛn aa faanilu lɔtalako ma i ɲɔɔ wotɛ. 25Ai do k'a gbaan kɔlɔman ma siintele waate le lɔ. 26Wala dɔ bilanin tɛɛ Isa kunma, a faa dailu sɛvɛnin tɛɛ min kan, ko: «Jahudiyalu ya masakɛ.» 27Ai ka Isa ni benkannikɛba fila gbaan kɔlɔmannu ma waate kelen nɔ: a kelen tɛɛ a bolokini fannɔ, a tɔ kelen tɛɛ a bolonunma fannɔ.#15.27 Sɛvɛli kɔlɔ dɔlu ka haya min la a kɔkan: 15.28

29 # Malɛkɛ 14.58; Yohana 2.19. Timinsennɔmɔɔlu tɛɛ a jɛvɛla, k'ai kun lafilifili a ma. Ai do vɛɛ a yɛ: «Bɔɔ! Ile min y'a ko i yi sene lɔhɔlɔmabonba tela k'a lɔ kɔtunun tele sawa kɔlɔ, 30i yi jii vɛ ka bɔ kɔlɔman ma k'i jɛlɛ lakisi!»

31Wo boloɲa kelen ma, salakalase kuntiibalu ni seliya kalanmɔɔlu fana tɛɛ a lafeyala, k'a kɛ a fɔle i ɲɔɔ yɛ, ai vɛɛ: «A na dɔlu lakisila, kɛɛ a do tɛ se a jɛlɛ lakisila! 32Ni ale le Masa Tɔɔmasenin ne ani Bani Isilankalu ya masakɛ, wo vɛ kɛla, a yi jii vɛ ka bɔ kɔlɔman ma. Mɔ vɛ wo yena, m'i limaniyale a ma.»

Mɔɔ fila minu gbaannin tɛɛ Isa tɔɔfɛ, wolu fana tɛɛ a lafeyala.

Isa ka sa teme

Matiyu 27.45-56; Luka 23.44-49; Yohana 19.28-30

33Telelatelen waate senin, divi ka don jamana fan bɛ lɔ lɛlɛ sawa kɔlɔ. 34Wuladala lɛlɛ sawa waate, Isa ka gbanɔ, a vɛɛ: «Eloi, Eloi, lama sabakatani?» (Wo kɔlɔ le ko: «Ǹ Tii, ǹ Tii, mindɛ lɔ i vɛ ǹ labila?»)

35Kolɔgbɛnba dɔlu ka wo mɛn mingɛ, ai do vɛɛ: «A ye, a yi Nabi Iliya le kilila.» 36Ai lɔ mɔɔ kelen vɛ bɔlila ka fu dɔ ta k'a sun gbɛ kumunnin nɔ. A do ka fu wo sili kɔlɔman ma, k'a lataa Isa ma ko a a min. A do vɛɛ dɔlu yɛ: «Ài y'a to je. M'a mafɛlɛn ni Nabi Iliya kɛtɔ nala k'a lajii ka bɔ kɔlɔman ma!»

37Isa do ka gbanɔ bakɛ ka sa.

38Wo waate kelen nɔ, lɔhɔlɔmabonba daladɛnfaani ka fala fila le, ka damina sanma ka jii duuma. 39Sɔdasi kuntii min lɔnin tɛɛ Isa ɲakɔlɔ je, wo k'a saɲa ye mingɛ, a vɛɛ: «Tuɲa le, kɛ́ min tɛɛ Ala Denkɛ le le!»

40 # Luka 8.2, 3. Moso dɔlu tɛɛ je fana, minu ka to poon kolasaala. Mɔyamu Magidalaka tɛɛ ai lɔ, ani a tɔɔma min tɛɛ Janguba dɔɔmaninda ni Jose ba le, ani Salome. 41Moso wolu bilanin tɛɛ Isa kɔ, ka kɛ a madɛmɛnne ka damina aa kawanili waate ma Galile. Moso siyama gbɛlɛ lɔnin tɛɛ je, minu nanin tɛɛ Isa malɔya lɔ Jelusalɛmu.

Ai ka Isa sudoon teme

Matiyu 27.57-61; Luka 23.50-56; Yohana 19.38-42

42Wo lon tɛɛ Nɔningɛlon ɲasiilon ne le, ado wula magbɛn ne tɛɛ. 43Wo k'a talan, mɔɔba dɔ tɛɛ je, min fɛ tɛɛ kititɛɛjama la, ai tɛɛ a fɔla min ma ko Jusufu Alimateka. A do tɛɛ Ala ya masaya waate makɔnɔna. Jusufu k'a josolagbeleya ka taa Pilati fɛlɔ ko a yi Isa fuleni don a bolo. 44Pilati k'a mɛn mingɛ ko Isa vɛ ban sala, a ka kawakoya ka sɔdasi kuntii kili k'a maɲininga ni bikoma a sa. 45Sɔdasi kuntii ka wo ɲafɔ a yɛ mingɛ, Pilati ka diɲa a ma ko Jusufu yi taa Isa fuleni ta. 46Wo lɔ, Jusufu ka faani gbɛ san, ka fuleni kasange, ka taa a sudoon kawawoo kabulu lɔ, mɔɔlu tɛɛ vɛ min sen. Wo kɔ, a ka kawa makulukulu ka kabulu datuun. 47Ai ka Isa sudoon tɛɛminja, Mɔyamu Magidalaka ni Jose ba Mɔyamu ka je ye.

Currently Selected:

Malɛkɛ 15: MBT2023

Highlight

Copy