Malɛkɛ 2

Isa ka falifaamatɔ lakɛnɛya teme

Matiyu 9.1-8; Luka 5.17-26

1Tele dana timinnin kɔ, Isa ka seikɔ Kapɛlɛnamu so kɔnɔ. Mɔɔlu do k'a mɛn mingɛ ko a yi bon na je, 2ai siyama vɛ ai ladɛnna je haan fɔɔ lɔya ma sɔlɔn hali bonnada la. Ado Isa tɛɛ Ala kumakan lasena ai ma. 3Wo waate kelen nɔ, kɛ́ naani vɛ nala falifaamatɔ dɔ le a fɛ. 4Kɛɛ ai ma se ai madonna Isa la ka bɛn jama wala jate ma. Wo le k'a kɛ, ai ka woo bila bon kɔkan Isa siiya ɲatelenma lɔ, ka ban ka jangalotɔ ni aa dɛvɛ lajii woo wo la. 5Isa k'aiya limaniya ye mingɛ, a vɛɛ jangalotɔ yɛ: «Ǹ den, iya julumbulu lɔ vɛ koto.»

6Wo k'a talan seliya kalanmɔɔ dɔlu siinin tɛɛ je. Ai do v'a fɔla ai miliya lɔ, ai vɛɛ: 7«Mindɛ lɔ kɛ́ min yi Alalafeyakan fɔla yi ne? Jene yi se julumbulu lɔkotola ni Ala tɛ?» 8Isa do k'ai miliya lɔn telemanin. Wo lɔ, a vɛɛ ai yɛ: «Mindɛ y'a kɛla vɛ miliya suu wo y'ài josokun nɔ? 9A yi di? K'a fɔ falifaamatɔ yɛ, ko: ‹Iya julumbulu lɔ vɛ koto›, niwotɛ k'a fɔ: ‹I wuli, iya dɛvɛ ta ka taama,› wo fila lɔ, mindɛ le fɔ diyanin? 10Kɛɛ do, fɔ ài y'a lɔn a see yi Mɔɔnivin Tanin yɛ ka julumbulu lɔkoto dunuɲa.» Wo fɔ Isa bolo, a vɛɛ falifaamatɔ yɛ: 11«I wuli, i iya dɛvɛ ta ka taa iya bon na.»

12Kɛ́ do v'i wulila telemanin ka aa dɛvɛ ta ka taa aa bon na mɔɔ bɛ ɲakɔlɔ. Ai bɛ ka kawakoya ka Ala tanu, ai vɛɛ: «Mɔ ma min ɲɔɔzii ye ba bene feu!»

Isa ka Levi kili teme

Matiyu 9.9-13; Luka 5.27-32

13Isa ka taa kɔɔ kawun na kɔtunun. Jama ba ka na a ma, a do vɛ ai kalanna. 14A timintɔla, a ka Alife denkɛ Levi siinin ye niisɔɔnminaya lɔ. Isa do vɛɛ a yɛ: «Bila ǹ kɔ.» A do k'i wuli ka bila a kɔ.

15Wo kɔ, Isa ni a kɔbiladennu siinin ka to dɔnnikɛya lɔ Levi ya bon na, niisɔɔnminaba ni julumbutɔ siyama siinin tɛɛ ai fɛ, kamasɔlɔn wo siyama bilanin tɛɛ a kɔ. 16Seliya kalanmɔɔlu minu tɛɛ Falisilu le, wolu k'a ye mingɛ ko Isa ni a kɔbiladennu yi dɔnni kɛla niisɔɔnminaba ni julumbutɔlu fɛ, ai k'a fɔ a kɔbiladennu yɛ, ai vɛɛ: «Mindɛ lɔ àiya kalanmɔɔ yi dɔnni kɛla niisɔɔnminaba ni julumbutɔlu fɛ?»

17Isa ka wo mɛn k'ai javi, a vɛɛ: «Kɛnɛyabatɔ mako tɛ basibɔba la, mafɔ jangalotɔ. M̀ ma na mɔɔ telenninu kiliko lɔ, mafɔ julumbutɔlu.»

Ai ka Isa maɲininga ka bɛn sundonko ma teme

Matiyu 9.14-17; Luka 5.33-35

18Lon dɔ, Yaya kɔbiladennu ni Falisilu kɔbiladennu ka to sundonna, mɔɔ dɔlu ka na Isa ma k'a maɲininga, ai vɛɛ: «Yaya kɔbiladennu ani Falisilu kɔbiladennu, wolu deinin sundonna. Mindɛ lɔ i kɔbiladennu tɛ sundonna?»

19Isa k'ai javi, a vɛɛ: «A yi di? Ka kɔɲɛfa to a tɔvalu dafɛ kɔɲɛmalɔ lɔ, jalasa a tɔvalu yi sene sundonna? Damanda kɔɲɛfa y'ai dafɛ, ai tɛ se sundonna. 20Kɛɛ lon dɔ natɔ, mɔɔlu kɛtɔ kɔɲɛfa bɔla ai tɛma. Wo lon ne, ai kɛtɔ sundonna.

21«Mɔɔ tɛ faani kula kulunkulun tala ka faani kɔlɔ labalin a le. Niwotɛ, faani kula kɛtɔ faani kɔlɔ masamana k'a fala. A do falaɲa kɛwonyatɔle ka timin a kunfɔlɔ ta la. 22Wo boloɲa kelen ma, mɔɔ tɛ gbɛ kula kɛla gbɛbɔlɔ kɔlɔ lɔ. Niwotɛ, a fununtɔ ka bɔlɔ te ka gbɛ bɛ bɔn. Mɔɔ yi gbɛ kula kɛla gbɛbɔlɔ kula le lɔ.»

Isa le Kuntii le Nɔningɛlon kunna

Matiyu 12.1-8; Luka 6.1-5

23Nɔningɛlon dɔ, Isa nu timintɔla sɛnɛlu tɛma, a kɔbiladennu vɛ sɛnɛfen tizan dɔ bɔla. 24Wo lɔ, Falisilu vɛɛ Isa yɛ: «A ye, mindɛ lɔ i kɔbiladennu yi ko kɛla yi ne min ladaannin tɛ Nɔningɛlon?»

25Isa k'ai javi, a vɛɛ: «A yi di? Masakɛ Dawuda na min kɛla ale ni a taamaɲɔɔlu ya kɔɔn waate lɔ, ài ma wo kalan? 26Abiyata tɛɛ salakalase kuntiiba le waate min nɔ, Dawuda ka don mingɛ Alabatobon na, a ka bulu dɔlu ta, minu lasenin tɛɛ Ala ma. A ka wo dɔ dɔn, k'a dɔ di a taamaɲɔɔlu ma, k'a talan wolu ladaannin tɛɛ tɛ mɔɔ suu suu yɛ, mafɔ salakalasebalu dein.»

27Isa k'a fɔ ai yɛ kɔtunun, a vɛɛ: «Ala na Nɔningɛlon ladanna ka bɛn mɔɔlu ya ko le ma. A ma mɔɔlu ladan ka bɛn Nɔningɛlon ya ko ma. 28Wo le y'a ma, Mɔɔnivin Tanin le Kuntii le hali Nɔningɛlon gbu kunna.»

Currently Selected:

Malɛkɛ 2: MBT2023

Highlight

Copy