Malɛkɛ 3

Kɛ́ min bolo faanin tɛɛ a ma

Matiyu 12.9-14; Luka 6.6-11

1Isa ka don Aladalibon na kɔtunun. Kɛ́ dɔ tɛɛ je min bolo faanin tɛɛ a ma. 2Mɔɔ dɔlu tɛɛ Isa lakɔlɔsila, k'a ye ni a kɛtɔ kɛ́ wo lakɛnɛyala Nɔningɛlon, fɔsa ai yi dailu sɔlɔn a jalakiko lɔ. 3Ado Isa k'a fɔ kɛ́ yɛ, min bolo faanin tɛɛ a ma, a vɛɛ: «I wuli, i lɔ jama tɛma.» 4Wo fɔ Isa bolo, a ka jama maɲininga, a vɛɛ: «A yi di? A ladaanyine ka kokein kɛ Nɔningɛlon, baa koyon? Ka mɔɔ lakisi, baa k'a faa?»

Kɛɛ ai bɛ ka jeden tue. 5Wo kɛ, Isa v'i ɲa kaana ai lɔ mɔnɛya boloma. A niila ka fin ka bɛn aiya josokunja ma. Wo lɔ, Isa vɛɛ kɛ́ yɛ: «I bolo lɔsama.» Kɛ́ k'a bolo lɔsama mingɛ, a bolo ka kɛnɛya telemanin. 6Wo kɛ, Falisilu ka bɔ je telemanin, ka taa ai kun bilin Masakɛ Helodi kɔmɔɔ dɔlu ma ka bɛn Isa faako ma.

Jama ba ka bila Isa kɔ teme

7Wo kɔ, Isa ni a kɔbiladennu ka bɔ je ka taa Galile kɔɔ kawun na. Ado mɔɔ siyama ka bila a kɔ, minu bɔnin tɛɛ Galile ni Jude koovilu lɔ, 8ani Jelusalɛmu so kɔnɔ, ani Idume duu kɔnɔ, ani Julidɛn kɔɔkɔma solu la, ani Tili ni Sidɔn solu fannɔ. Jama ba wo ka na a ma, kamasɔlɔn ai k'a kɛkolu mɛn. 9#Malɛkɛ 4.1; Luka 5.1-3.Ka bɛn jama ba ma, Isa k'a fɔ a kɔbiladennu yɛ ko ai yi kulun lɔbɛn a yɛ, fɔsa jama kana a lɔgbalin. 10Kamasɔlɔn a tɛɛ vɛ ban jangalotɔ siyama lakɛnɛyala, ado dɔ jangalotɔlu t'i ɲɔɔ lasusula, fɔsa ai y'a ɲa sɔlɔn k'ai bolo tuu Isa la. 11Jinajuutɔlu tɛɛ vɛ Isa yena waate suu suu, ai tɛɛ ai ten bilinna a kɔlɔ ka gbanɔ, ai vɛɛ: «Ala Denkɛ le i le le!» 12A do tɛɛ a fɔla ai yɛ k'a magbeleya ko ai kà a mangan lajɛzɛn.

Isa ka aa keladen mɔɔ tan ni fila (12) ta teme

Matiyu 10.1-4; Luka 6.12-16

13Wo kɔ, Isa ka jɛlɛ tini dɔ kɔkan. A tɛɛ a fɛ mɔɔ minu yi bila a kɔ, a ka wolu kili, wolu do ka na a ma. 14Wo kɛ, a ka mɔɔ tan ni fila (12) ta ai lɔ k'a fɔ ai ma ko keladennu, fɔsa ai yi bila a kɔ, ani ka Samakan Kein lase, 15ani ka see sɔlɔn jinalu gbɛnko lɔ k'ai bɔ mɔɔlu lɔ. 16A ka mɔɔ tan ni fila (12) minu kɛ keladennu le, wolu tɔɔ le ne: Simɔn (Isa tɛɛ a fɔla min ma ko Piyɛli), 17Zebede denkɛ Janguba ni wo dɔɔni Yohana (Isa tɛɛ a fɔla minu ma ko Bowanɛgɛsi, min kɔlɔ yi ko Sanfɛlɛkan Dennu), 18Andele, Filipe, Batolomu, Matiyu, Tomasi, Alife denkɛ Janguba, Tade, Fasokanuba Simɔn, 19ani Judasi Isekaliyɔti, min ka Isa janva.

Isa ya seetiiya bɔnin min ne?

Matiyu 12.22-32; Luka 11.14-23; 12.10

20Wo kɔ, Isa k'i kɔsei bon na. Mɔɔ siyama k'i ladɛn je kɔtunun haan fɔɔ ale ni a kɔbiladennu ma dɔnnikɛko gbu masɔlɔn. 21Isa balamɔɔlu ka wo mɛn mingɛ, ai vɛ taala a minaya lɔ, kamasɔlɔn ai tɛɛ a fɔ yi la, ko: «Fa vɛ bila a lɔ!»

22 # Matiyu 9.34; 10.25. Seliya kalanmɔɔ minu bɔnin Jelusalɛmu ka na, wolu tɛɛ a fɔla, ai vɛɛ: «Biyɛzɛbɔ le y'a kɔ! Jinalu ya kuntiiba le na see dila a ma, fɔsa a yi jinalu gbɛn k'ai bɔ mɔɔlu lɔ.»

23Wo fɔ, Isa k'ai kili ka kuma ai fɛ sanalu lɔ, a vɛɛ: «Soitana sentɔ a jɛlɛ gbɛnna di? 24Ni jamana min mɔɔlu ka falan a ma k'i ɲɔɔ kɛlɛ, wo jamana yi tiɲale fefe. 25Ni do bonnamɔɔlu ka falan a ma k'i ɲɔɔ kɛlɛ, wo bon tɛ se tola je. 26Wo boloɲa kelen ma, ni Soitana ya bɔidennu ka falan a ma k'i ɲɔɔ kɛlɛ, aa seetiiya tɛ se tola a ma, a do yi banne feu.

27«Mɔɔ tɛ se donna kɛ́ fangama ya bon na k'a bolofennu suɲa, ni a ma kɛ́ fangama mina kunfɔlɔ le k'a sili. Wo vɛ kɛla, a yi sene wo tii ya bon latɛla tɛtɛ.

28«Ǹ'i tuɲa fɔ ài yɛ, mɔɔlu yi julumbu min bɛ tala, ani ai yi lafeyalikan suu suu fɔla, wo bɛ lɔ yi sene kotola. 29#Luka 12.10.Kɛɛ mɔɔ mɔɔ vɛ lafeyalikan fɔla Nii Sɛnɛyanin ma, wo tii ma tɛ koto dunuɲa min nɔ. Julumbu wo totɔle wo tii ma kudein.»

30Isa ka wo fɔ kamasɔlɔn ai tɛɛ a fɔla ko jinajuu le y'a lɔ.

Isa ba ni a dɔɔkɛlu

Matiyu 12.46-50; Luka 8.19-21

31Isa ka to bon na je, a ba ni a dɔɔkɛlu ka na k'i lɔ luu ma ka mɔɔ dɔ lɔ a kilila. 32Wo k'a talan, jama siinin tɛɛ a laminin nɔ. Ai do vɛɛ a yɛ: «I ba ni i dɔɔkɛlu lɔnin luu ma. Ai y'a fɛ k'i ye.»

33Kɛɛ Isa do vɛɛ ai yɛ: «Jene yi m̀ ba le? Ǹ dɔɔkɛ yi jene ni jenelu le?» 34A v'i ɲa kaana mɔɔlu lɔ minu siinin tɛɛ a laminin nɔ, k'a fɔ, a vɛɛ: «M̀ ba ni ǹ dɔɔkɛlu le ve. 35Kamasɔlɔn mɔɔ mɔɔ vɛ Ala sawo kɛla, wo tii yi ǹ dɔɔkɛ ni ǹ dɔɔmoso ni m̀ ba le le.»

Currently Selected:

Malɛkɛ 3: MBT2023

Highlight

Copy