Malɛkɛ 4

Malofalinba ma sana

Matiyu 13.1-9; Luka 8.4-8

1 # Luka 5.1-3. Isa ka mɔɔlu kalan damina kɔtunun kɔɔ kawun na. Jama ba k'i ladɛn a laminin nɔ mingɛ, a k'i sii kulun dɔ kɔnɔ, k'a dɔni mataa gbele la. Jama ka to kawun na, 2a v'ai kalanna ko siyama la sana lɔ, a vɛɛ: 3«Ài y'ài tolomalɔ! Sɛnɛkɛba dɔ ka taa malofalinya lɔ. 4A ka to malo falinna, a dɔlu ka ben siya dala. Kɔnɔnilu ka na ka wolu dɔn. 5Malo dɔlu ka ben fala kɔkan, fulumuu siyayanin tɛɛ tɛ tɛɛminja. Malo wolu ka fɛlɛn jona, kɛɛ ai lilen ma don duu kɔlɔ kosɛvɛ. 6Tele ba ka bɔ mingɛ, ai ka ja, kamasɔlɔn ai lilen tɛɛ ma don duu kɔlɔ kosɛvɛ. 7Malo dɔlu ka ben wonilu tɛma, minu ka buɲa ka malo wolu lɔgbalin, ai do m'ai den kɛ. 8Malo dɔlu fana ka ben duu kein nɔ. Wolu ka sawati kosɛvɛ. A dɔlu k'ai den bisawa (30) kɛ, a dɔlu biwɔɔlɔ (60), a dɔlu kɛmɛ (100).»

9Isa vɛɛ ai yɛ kɔtunun: «Tolo yi mɔɔ min kun, wo tii y'a tolomalɔ kuma min ma.»

Isa ka sanalu la dailu min na

Matiyu 13.10-17; Luka 8.9-10

10Wo kɔ, Isa kelen ka to, a dafɛ mɔɔlu ni aa keladen mɔɔ tan ni fila (12) ka na a ma k'a maɲininga, ai vɛɛ: «Sana wolu kɔlɔ yi mindɛ le?» 11A do vɛɛ ai yɛ: «Ala vɛ aa masaya gbonokolu lɔnni di ài ma, kɛɛ ko bɛ yi fɔla dɔlu yɛ sana le lɔ. 12Wo lɔ,

‹Ai y'ai ɲa kaana, kɛɛ ai tɛ foi yena.

Ai y'ai tolomalɔla, kɛɛ ai tɛ foi ɲayena,

ai tɛɛ vɛ koɲayena, ai tɛɛ ai jɛlɛ lasei le Ala ma,

Ala do tɛɛ ai makoto le.› »

Isa ka malofalinba ma sana kɔlɔ fɔ teme

Matiyu 13.18-23; Luka 8.11-15

13Isa vɛɛ ai yɛ kɔtunun: «Ài ma malofalinba ma sana kɔlɔ ɲaye? Ài do kɛtɔ dɔ sanalu ɲayena di? 14Malofalinba le Ala kumakan laseba le. 15Malo minu na benna siya dala, wolu le mɔɔlu le minu yi Ala kumakan mɛnna, ado Soitana yi nala telemanin ka kuma wo bɔ ai josokun nɔ. 16Malo minu na benna fala kɔkan, wolu le mɔɔlu le minu yi Ala kumakan mɛnna, k'ai bolo sii a kɔlɔ telemanin sawa boloma. 17Kɛɛ do, kuma wo lilen tɛ donna ka jaanfa ai josokun nɔ. A do tɛ tola ai kɔnɔ. Gbeleya vɛ ai masɔlɔnna, niwotɛ mɔɔlu vɛ ai jangatala ka bɛn Ala kumakan ma, ai yi limaniya siya bilala telemanin. 18Malo minu na benna wonilu tɛma, wolu le mɔɔlu le minu yi Ala kumakan mɛnna, 19kɛɛ do dunuɲakolu le hamin ni nafolo ladiyaɲɛ ani fen kaijakaijalu lɔɔ yi donna ai josokun nɔ ka Ala kumakan lɔgbalin, a do tɛ sawatila ai ma. 20Malo minu na benna duu kein nɔ, wolu le mɔɔlu le minu yi Ala kumakan mɛnna k'ai bolo sii a kɔlɔ. Kumakan wo yi donna ai josokun nɔ ka kɛ iwo malo minu yi sawatila k'ai den bisawa (30) kɛ, niwotɛ biwɔɔlɔ (60), niwotɛ kɛmɛ (100).»

Fitina ma sana

Luka 8.16-18

21 # Matiyu 5.15; Luka 11.33. Isa vɛɛ ai yɛ kɔtunun: «Jalasa mɔɔ yi fitina lamɛnɛnna k'a sii tasa kɔlɔ, niwotɛ lafen kɔlɔ? I t'a siila fitinasiiya le lɔ? 22#Matiyu 10.26; Luka 12.2.Kamasɔlɔn ko doonnin tɛ je, min la tɛnala nkɛnɛmayala, kumatɛ gbonoko ma, min tɛnala bɔla gbɛ la. 23Tolo yi mɔɔ min kun, wo tii y'a tolomalɔ kuma min ma.»

24 # Matiyu 7.2; Luka 6.38. Isa vɛɛ ai yɛ kɔtunun: «Ài tolomalɔ kobɛn k'ài mili min ma. Ài yi sumali kɛla ài mɔɔɲɔɔlu yɛ teme, Ala fana kɛtɔ sumali kɛla ài yɛ ten ne, k'a dɔ la wo kɔkan. 25#Matiyu 13.12; 25.29; Luka 19.26.Kamasɔlɔn ni fen ka kɛ mɔɔ min bolo, a dɔ latɔ wo tii ma ta kɔkan ka siyaya. Kɛɛ ni fen ma kɛ mɔɔ min bolo, hali minni y'a bolo, wo minatɔle a la.»

Malo fɛlɛn ma sana

26Isa vɛɛ kɔtunun: «Ala ya masaya kɛyine iwo kɛ́ min yi malo falinna aa sɛnɛ lɔ. 27A yi sunɔɔla su lɔ, k'i wuli sɔɔma. Su ni tele, malo yi fɛlɛnna ka buɲa. Kɛɛ a tii m'a lɔn wo yi kɛla teme. 28Malo yi fɛlɛnna ka bɔ duu kɔlɔ a jɛlɛ ma. A do yi buɲala ka kɛ a gban ne, ka ban k'a tizan labɔ. Wo kɔ, a kama yi kɛ a tizan na. 29Malo kama wolu vɛ mɔnna, a tii yi wɔlɔtɔ tala k'a kali damina, kamasɔlɔn a kali waate vɛ se.»

Mutaadi kolo ma sana

Matiyu 13.31-32; Luka 13.18-19

30Isa vɛɛ kɔtunun: «M'i se Ala ya masaya lala mindɛ ma? A kɛnin teme, m'i sana mindɛ la ka wo jiya? 31A kɛyine iwo mutaadi kolo. Hali a dɔɔyanin ka kɛ ka timin sɛnɛfen kolo bɛ la duukolo kɔkan, 32a vɛ sɛnɛna, a yi fɛlɛnna ka buɲa ka timin gbelelɔfen bɛ la. A do bololu yi jaanyala, kɔnɔnilu y'ai ɲaa lɔla a duulen kɔlɔ.»

33Isa tɛɛ Ala kumakan lasena ai ma sana min ɲɔɔzii siyama le lɔ. Mɔɔlu tɛɛ se koɲayena teme, a tɛɛ ai kalanna wo boloɲa le ma. 34A ma ko ko si fɔ ai yɛ, ni a ma min fɔ sana lɔ, kɛɛ ale ni a kɔbiladennu tɛɛ vɛ kɛla ai ta fan, a tɛɛ sanalu bɛ kɔlɔ fɔla ai yɛ.

Isa ka fɔɲɛ ba lɔsumaya teme tue

Matiyu 8.23-27; Luka 8.22-25

35Wo lon wulala, Isa vɛɛ a kɔbiladennu yɛ: «Ài ndaa kɔɔ kɔma.» 36Ai ka bɔ jama lɔ mingɛ, Isa siinin tɛɛ kulun min kɔnɔ, a kɔbiladennu ka taa a fɛ kulun kelen wo lɔ. Ado kulun gbɛlɛlu tɛɛ ai kɔ. 37Wo lɔ, sanfɔɲɛ ba vɛ bɔla telemanin ka kɔɔ lajaman, haan fɔɔ ji vɛ donna kulun kɔnɔ. 38Wo k'a talan, Isa tɛɛ v'i la sunɔɔ lɔ k'a kun la kunkɔlɔlabɔlɔ kɔkan kulun ju la. A kɔbiladennu ka na a lakunun, ai vɛɛ: «Kalanmɔɔ, mɔ satɔle! Wo tɛ i ɲana ko le?»

39Wo kɛ, Isa ka kunun ka fɔɲɛ jamali k'a fɔ kɔɔ yɛ, a vɛɛ: «I lɔ, i yi jeden!» Ado fɔɲɛ ni kɔɔ lɔ ka sumaya tue. 40Isa do vɛɛ a kɔbiladennu yɛ: «Mindɛ y'a kɛla vɛ ài yi siyanna tan? Hali bi limaniya tɛ ài bolo?»

41Ai do ka siyan bubale k'a kɛ a fɔle i ɲɔɔ yɛ, ai vɛɛ: «Mɔɔ suu mindɛ le min ne? Hali fɔɲɛ ni kɔɔ gbu y'a kumakan labatola!»

Currently Selected:

Malɛkɛ 4: MBT2023

Highlight

Copy