Malɛkɛ 5

Isa ka jina siyama gbɛn kɛ́ dɔ lɔ teme

Matiyu 8.28-34; Luka 8.26-39

1Isa nu ka se kɔɔ kɔma Gelasekalu makɛya lɔ. 2Isa jiinin ka bɔ kulun kɔnɔ feeya, kɛ́ jinajuutɔ dɔ ka bɔ kabuluso la, ka na a labɛnya lɔ. 3Jinatɔ wo tɛɛ a makɛla kabuluso le la, ado mɔɔ tɛɛ tɛ se fanga sɔlɔnna a ma butu a siliko lɔ, hali jɔlɔkɔ gbu le. 4Siɲa siyama lɔ, mɔɔlu tɛɛ v'a bolo sili jɔlɔkɔ le, k'a sen gbaan kulun na. Wo bɛ n'a kɛ, a tɛɛ jɔlɔkɔ tɛɛla ka kulun lɔkali. Ado fanga tɛɛ tɛ mɔɔ suu suu la ka se a la. 5Su ni tele, a tɛɛ timintiminna kabululu tɛma ani tinima dingilalu lɔ, a vɛ gbanɔla k'a jɛlɛ madimin kawakulunnu le.

6Jinatɔ ka to poon ka Isa ye mingɛ, a do v'i bɔlila ka na k'i mabilin a sen kɔlɔ. 7A ka gbanɔ, a vɛɛ: «Isa, Masa Taala Denkɛ, mindɛ le ile ni ǹe wotɛ? Ǹ'i madiyala Ala tɔɔ lɔ, i kà ǹ jangata.» 8A ka wo fɔ kamasɔlɔn Isa tɛɛ v'a fɔ a yɛ, a vɛɛ: «Ile jinajuu, bɔ kɛ́ min nɔ!»

9Wo lɔ, Isa k'a maɲininga, a vɛɛ: «I tɔɔ di?»

A ka Isa javi, a vɛɛ: «Ǹ tɔɔ le Jamaba, kamasɔlɔn mɔ walayine.»

10A do ka to Isa madiyala ko a kà ai gbɛn duu wo lɔ.

11Wo k'a talan kɔsɛ kulu ba tɛɛ dɔnnila tini kɔkan ai dafɛ. 12Jinalu vɛ Isa madiyala, ai vɛɛ: «I yi mɔ lataa kɔsɛlu lɔ, m'i don ai lɔ.» 13A do ka diɲa wo ma. Wo kɛ, jinajuulu vɛ bɔla kɛ́ lɔ ka taa don kɔsɛlu lɔ. Ado kɔsɛlu bɛ vɛ tini lajiila bɔli le, ka don kɔɔ kɔlɔ k'ai bɛ faa, kɔsɛ waa fila (2 000) jate.

14Wo kɛnin, kɔsɛkunnasiibalu vɛ bɔlila, ka taa wo ɲafɔ so ni toodalu la mɔɔ bɛ yɛ. Mɔɔlu v'i wulila wo lɔ ka na kolasaaya lɔ. 15Ai senin Isa ma, ai ka kɛ́ wo masumanin siinin ye, jina siyama tɛɛ min nɔ kɔlɔman ne. Faani tɛɛ a kanna, a do hangili la tɛɛ vɛ sei a ma. Wo lɔ, ai bɛ ka siyan.

16Mɔɔ minu ka ko wolu ye minu kɛnin jinatɔ ni kɔsɛlu la, wolu ka dandɛɛli kɛ mɔɔ tɔlu yɛ.

17Wo kɛ, ai vɛ Isa madiyala ko a yi bɔ ai makɛya lɔ.

18Isa dontɔla kulun kɔnɔ, jinatɔ kɔlɔ wo v'a madiyala, a vɛɛ: «Ǹ'a fɛ ǹ'i to i fɛ.» 19Kɛɛ Isa ma diɲa. A do vɛɛ a yɛ: «Taa i fɛso. Mɔ Tii na ko ba min kɛla i yɛ ka hena i la teme, i yi taa wo lase i balamɔɔlu ma.»

20Wo lɔ, Isa na min kɛla kɛ́ yɛ, a do vɛ taala ka wo lase damina So Tan laminin nɔ, ado mɔɔ bɛ ka kawakoya.

Moso jangalotɔ ni Jailusi denmoso

Matiyu 9.18-26; Luka 8.40-56

21Isa ni a kɔbiladennu ka kɔɔ tɛɛ mingɛ kulun kɔnɔ kɔtunun, jama ba k'i madon a la kawun na. 22Wo kɛ, Aladalibon ɲamɔɔ dɔ ka na, min tɔɔ tɛɛ ko Jailusi. A ka Isa ye mingɛ, a k'i majii a kɔlɔ, 23k'a madiya kosɛvɛ, a vɛɛ: «Ǹ denmoso yi sa bolo le ma. I jaani le, i yi na, i bolo la a kan, fɔsa a yi kɛnɛya ka to a nii la.» 24Isa do vɛ taala a fɛ. Wo kɛ, jama ba ka bila a kɔ minu tɛɛ a lɔgbalinna ai tɛma.

25Wo k'a talan moso jangalotɔ dɔ tɛɛ je, min tɛɛ vɛ san tan ni fila (12) kɛ maa jangalo lɔ. 26A tɛɛ vɛ tɔlɔya bubale basibɔba siyama bolo, minu tɛɛ v'a bolo latɛ. Kɛɛ aa jangalo ma basi, mafɔ ka to kɛwonyala tuun. 27Moso wo ka Isa ya ko mɛn mingɛ, a ka don jama tɛma ka na Isa kɔma, k'a bolo tuu aa faaniba la. 28Kamasɔlɔn a tɛɛ a fɔla a kɔnɔ, a vɛɛ: «Hali ni ǹ ka se m̀ bolo tuula aa faaniba la gbu, ǹ'i kɛnɛyale.»

29Ado aa jelibɔ la ka lɔ telemanin. A do k'a lɔn ko aa jangalo vɛ basi. 30Isa do k'a lɔn a jɛlɛ ma telemanin ko fanga dɔ vɛ bɔ a lɔ. Wo lɔ, a ka to jama tɛma k'a ɲa tilimin a kɔma. A do vɛɛ: «Jene n'a bolo tuula ǹa faani la?»

31A kɔbiladennu do vɛɛ a yɛ: «I t'a yena i lɔgbalinnin teme jama bolo? I yi se a fɔla di, ko: ‹Jene n'a bolo tuula ǹ na?› »

32Kɛɛ Isa ka to a ɲa kaana jama lɔ, fɔsa a yi wo mɔɔ ye min na tuula a la. 33Moso wo lɔ tɛɛ jaajaala siyan boloma, kamasɔlɔn a tɛɛ k'a lɔn min kɛnin a la. Wo lɔ, a v'i bilinna Isa sen kɔlɔ ka tuɲa bɛ fɔ a yɛ. 34Isa do vɛɛ a yɛ: «Ǹ denmoso, iya limaniya v'i lakɛnɛya. Taa hɛlɛ lɔ. I vɛ kɛnɛya ka bɔ iya jangalo lɔ.»

35Isa ka to kumala, mɔɔ dɔlu ka na ka bɔ ɲamɔɔ wo ya bon na k'a fɔ a yɛ, ai vɛɛ: «I denmoso vɛ sa. I kà kalanmɔɔ ɲagba butu.»

36Kɛɛ Isa ma ai kumakan ta foi le. A do vɛɛ Aladalibon ɲamɔɔ yɛ: «I jei kà tɛɛ. I yi limaniya le kɛ dein.» 37Isa ma diɲa mɔɔ yi taa a malɔ fɔ Piyɛli ni Janguba ni a dɔɔni Yohana. 38Ai senin Aladalibon ɲamɔɔ ya bon na, Isa ka mɔɔlu talan sayakasila ani gbanɔ. 39Isa donnin, a vɛɛ je mɔɔlu yɛ: «Mindɛ y'a kɛla vɛ ài yi sɔɔnsɔɔnna, ani ài yi kasila? Denni sanin tɛ, a yi sunɔɔ le lɔ.»

40Ai do ka jɛlɛbɔ a lɔ. Kɛɛ a k'ai bɛ labɔ luu ma. Wo kɔ, a ka denni fa ni a ba ta ani a taamaɲɔɔlu, ka don sibon na, denni fuleni tɛɛ tɛɛminja. 41Isa ka denni mina a bolo ma k'a fɔ a yɛ ai balakan nɔ, a vɛɛ: «Talita kumi.» Wo kɔlɔ le ko: «Singbilini, ǹ'a fɔ i yɛ, i wuli.»

42Singbilini k'i wuli telemanin ka taama damina. Ai bɛ ka kawakoya bubale. Singbilini sɔlɔn tɛɛ vɛ san tan ni fila (12) bɔ. 43Isa k'a fɔ ai yɛ k'a magbeleya, ko ai kà ko wo fɔ mɔɔ suu suu yɛ. A do vɛɛ ko ai yi dɔnnifen dɔ di singbilini ma.

Currently Selected:

Malɛkɛ 5: MBT2023

Highlight

Copy