Malɛkɛ 6

Nazalɛtikalu k'i ban Isa lɔ teme

Matiyu 13.53-56; Luka 4.16-30

1Isa ni a kɔbiladennu ka bɔ je ka taa a fɛso. 2Nɔningɛlon senin, a ka mɔɔlu kalan damina Aladalibon na. A lamɛnba siyama ka kawakoya, ai vɛɛ: «A yi ko minu fɔla yi ne, a na wolu kalanna min ne? Jene na hangilimaya min dila a ma? Kawananko see min y'a bolo, a na wo sɔlɔnna min ne? 3Jilisaba le tɛ? Mɔyamu den ne tɛ? A dɔɔkɛlu le tɛ Janguba ni Jose ni Jude ni Simɔn ne? A dɔɔmosolu tɛ siinin mɔ tɛma jan ne?» Miliya suu wo le k'a kɛ ai kunnɔtɛɛ dailu le Isa ma.

4 # Yohana 4.44. Isa do vɛɛ ai yɛ: «Kela tɛ dɔɔyala dingila suu suu lɔ, mafɔ ale gbu fɛso ani a badenmalu ni a balamɔɔlu tɛma.» 5A ma se kawananko kɛla je, mafɔ k'a bolo la jangalotɔ dana kɔkan k'ai lakɛnɛya. 6A do ka kawakoya ka bɛn aiya limaniyabaliya ma.

Isa ka aa keladen mɔɔ tan ni fila (12) kelaya teme

Matiyu 10.5-15; Luka 9.1-6

Wo waate, Isa tɛɛ timintiminna so ni solu wotɛ ka mɔɔlu kalan. 7A do ka aa keladen mɔɔ tan ni fila (12) kili, ka seetiiya di ai ma fɔsa ai yi se jinajuulu gbɛnna mɔɔlu lɔ, ka ban ka aa keladennu lataa fila fila le. 8A do k'ai jamali, a vɛɛ: «Ài kà fen fen si ta ài taamanko lɔ, mafɔ àiya taamabele dein. Ài kà dɔnnifen ta, niwotɛ bɔlɔ. Ài kà wɔli bila ài kun. 9Ài yi samala don ài sen na, kɛɛ ài kà faaniba fila bila ài kanna.»

10A vɛɛ ai yɛ kɔtunun: «Ai vɛ ài jiyala bon suu suu la, ài yi to woja haan fɔɔ ài taa waate. 11#Kɛkolu 13.51.#Luka 10.4-11.Ni mɔɔlu k'i ban ài lɔminala tɛɛ o tɛɛ lɔ ani k'i ban ai tolomalɔla ài la, wo vɛ kɛla, ài yi bɔ je ka je gbangban bɔ ài sen ma, ka wo kɛ ai ban tɔɔmase le.»

12Wo lɔ, keladennu vɛ bɔla je ka taa mɔɔlu kawani ko ai y'ai dajoo mafalin. 13#Janguba 5.14.Ai ka jina siyama gbɛn k'ai bɔ mɔɔlu lɔ, ani ka tulu kɛ jangalotɔ siyama kun nɔ k'ai lakɛnɛya.

Masakɛ Helodi ka Yaya faa teme

Matiyu 14.1-12; Luka 9.7-9

14 # Matiyu 16.14; Malɛkɛ 8.28; Luka 9.19. Masakɛ Helodi ka Isa mangutu mɛn, kamasɔlɔn a tɔɔ tɛɛ vɛ jɛzɛn fan bɛ lɔ. Mɔɔ dɔlu tɛɛ a fɔla, ai vɛɛ: «Makolikɛba Yaya v'i wuli ka bɔ saya lɔ. Wo le n'a kɛla, kawananko see y'a yɛ.»

15A dɔlu tɛɛ a fɔla ko Nabi Iliya le a le.

A dɔlu fana tɛɛ a fɔla ko kela le a le, iwo kela kɔlɔkɔlɔ dɔ.

16Kɛɛ Masakɛ Helodi ka wo mɛn mingɛ, a vɛɛ: «Ǹ na Yaya min kun tɛɛla a la, wo le v'a wuli ka bɔ saya lɔ.» 17#Luka 3.19, 20.Masakɛ Helodi gbu tɛɛ vɛ Yaya mina k'a sili k'a bila kaso la, kamasɔlɔn a dɔɔkɛ Filipe moso fɛ, min tɔɔ tɛɛ ko Helodiyasi, a na min fulula. 18Yaya do tɛɛ a fɔla a yɛ, a vɛɛ: «A ladaannin tɛ i i dɔɔkɛ moso fulu!»

19Wo le k'a kɛ, Helodiyasi tɛɛ Yaya lagbeyaɲɛla. A do tɛɛ a fɛ ka a faa, kɛɛ a ma se, 20kamasɔlɔn a kɛ́ Helodi tɛɛ siyanna Yaya ɲa k'a lakana kobɛn. A tɛɛ k'a lɔn ko wo tɛɛ mɔɔ telennin ne le, ani mɔɔ sɛnɛyanin. Helodi tɛɛ v'a tolomalɔla Yaya la kotan, a hangili tɛɛ ɲaami. Wo bɛ n'a kɛ, Yaya kumakan diyayine tɛɛ a yɛ.

21Kɛɛ a laban nɔ, Helodiyasi sawonan lon ka se. Masakɛ Helodi sɔlɔnlon sanɲɔɔmɛn ka kɛ lon min na, a ka tolon ba kɛ ka aa ɲamɔɔlu kili, ani sɔdasi kuntiilu, ani Galile mɔɔbalu. 22Helodiyasi denmoso ka na mingɛ tolonkɛya lɔ, a vɛ dɔn kɛla ai ɲakɔlɔ. Wo do ka diya Masakɛ Helodi ni aa mɔɔ kilinin bɛ yɛ. Wo lɔ, masakɛ vɛɛ singbilini yɛ: «I vɛ kɛla fen fen si kɔ, i y'a fɔ, ǹ kɛtɔ wo dila i ma.» 23A do k'i kalin a yɛ, a vɛɛ: «I vɛ kɛla fen fen si kɔ, ǹ kɛtɔ wo dila i ma, hali a ka kɛ ǹa jamana fan kelen ne le.»

24Wo fɔ masakɛ bolo, singbilini ka bɔ je ka taa a ba maɲininga, a vɛɛ: «Ǹ'i mindɛ dali masakɛ la?»

A ba do vɛɛ a yɛ: «A fɔ, a yi Makolikɛba Yaya kun di i ma.»

25Wo lɔ, singbilini k'a lateleja ka seikɔ Helodi fɛlɔ ɲagba le. A do vɛɛ masakɛ yɛ: «Ǹ'a fɛ i yi Makolikɛba Yaya kun di m̀ ma yi ne seti lɔ.»

26Kuma wo ka masakɛ niilafin bubale, kɛɛ komi a tɛɛ vɛ ban a kalinna aa mɔɔ kilininnu ɲakɔlɔ, wo le k'a kɛ, a tɛɛ tɛ a fɛ k'a kalinnikan tiɲa singbilini yɛ. 27A ka aa bɔiden dɔ lɔ telemanin ko wo yi na Yaya kun ne. Wo do vɛ taala kasobon na ka Yaya kun tɛɛ a la, 28k'a bila seti lɔ ka na a le singbilini fɛ. Wo do ka taa a di a ba ma. 29Yaya kɔbiladennu ka a faako mɛn mingɛ, ai ka na k'a fuleni ta k'a sudoon.

Isa ka mɔɔ waa loolu (5 000) balo teme

Matiyu 14.13-21; Luka 9.10-17; Yohana 6.1-14

30Isa ya keladennu seikɔnin a fɛlɔ, ai k'ai kɛkolu bɛ dandɛɛli kɛ a yɛ, ani ai tɛɛ vɛ mɔɔlu kalan teme. 31Wo waate kelen nɔ, mɔɔ siyama tɛɛ taa ni seila. Hali dɔnnikɛko gbu, ai ma wo masɔlɔn. Wo lɔ, Isa vɛɛ a kɔbiladennu yɛ: «Ài m'i taa mɔ ta fan dingila lɔkolon dɔ lɔ, fɔsa m'i mɔ nɔningɛ dɔni ne.»

32Wo lɔ, ailu gbaanzan vɛ donna kulun kɔnɔ ka taa se dingila lɔkolon dɔ lɔ. 33Kɛɛ mɔɔ siyama ɲa ka to ai la ai taa waate. Wo kɛ, ai vɛ bɔlila ka bɔ aiya solu bɛ la, ka taa se Isa ni a kɔbiladennu ɲa ai taaya lɔ.

34 # Matiyu 9.36. Isa ka bɔ kulun kɔnɔ ka jama ba ye mingɛ, ai hena k'a mina, kamasɔlɔn ai kɛyine tɛɛ iwo saa minu bilanin ai jɛlɛ ma, saakunnasiiba tɛ minu la. Wo ma, Isa k'ai kalan damina ko siyama la. 35Wulala, a kɔbiladennu ka na a fɔ a yɛ, ai vɛɛ: «Dingila lɔkolon ne min ne, ado su kotɔle. 36Jama labila fɔsa ai yi taa balo sanya lɔ tooda ni solu la jan laminin nɔ.»

37Kɛɛ Isa vɛɛ ai yɛ: «Àilu gbu yi balo di ai ma.»

Ai do vɛɛ a yɛ: «Jalasa m'i taa wɔligbɛ gbana kɛmɛ fila (200) bulu le san k'a di jama ma?»

38Wo fɔ, Isa k'ai maɲininga, a vɛɛ: «Bulukala jein ne ài bolo? Ài yi taa, ài ɲa kaa.»

Ai ka wo lɔn mingɛ, ai vɛɛ a yɛ: «Bulukala loolu, ani jɛɛ fila.»

39Wo lɔ, Isa k'ai lɔ mɔɔlu lasiila kpɛkpɛ duu ma bin kɛnɛ kɔkan. 40Mɔɔlu k'ai sii mɔɔ kɛmɛ kɛmɛ (100) jate, ani mɔɔ biloolu (50) loolu jate. 41Wo kɛ, Isa ka bulukala loolu ni jɛɛni fila wolu ta, k'a ɲa lajɛlɛ sanma ka balika bɔ Ala yɛ. A do ka bulu ni jɛɛ lɔkalikali, k'a di a kɔbiladennu ma ko ai y'a lɔtala jama wotɛ. 42Mɔɔ bɛ ka dɔnni kɛ k'ai fa kpekpe. 43Ai wɔlinin, Isa kɔbiladennu ka bulu ni jɛɛ kulunkulun tɔlu ladɛn, ka gbɔlɔ ɲa tan ni fila (12) lafa. 44Kɛ́ mɔɔ waa loolu (5 000) le ka dɔnni wo kɛ.

Isa ka taama kɔɔ kɔkan teme

Matiyu 14.22-33; Yohana 6.15-21

45Telemanin, Isa k'a kɔbiladennu lɔ ko ai yi don kulun kɔnɔ ka taa a ɲa Betisaida so la kɔɔ kɔma, a vɛ jama labilala. 46Isa wɔlinin mɔɔlu lasalanala, a vɛ taala Aladaliya lɔ tini dɔ kɔkan. 47Su ka ko k'a kɔbiladennu to kulun kɔnɔ kɔɔ tɛma. Ado Isa kelen ka to gbele ma. 48A k'a ye ko a kɔbiladennu vɛ tɔlɔya kulun bɔli bolo, kamasɔlɔn ai ɲatiliminnin tɛɛ fɔɲɛ le la. Wo lɔ subama, Isa vɛ taamana kɔɔ kɔkan ka taa ai ma. A do ka se ai ma k'a kɛ iwo a vɛ timin boloma ai la. 49Ai ka a taamantɔla ye kɔɔ kɔkan mingɛ, a tɛɛ ai kɔnɔ sugboloni le. Ai do vɛ gbanɔla, 50baa ai bɛ ka a ye ka siyan. Wo lɔ, Isa ka kuma ai yɛ telemanin, a vɛɛ: «Ài y'ài josolagbeleya! Ǹe le. Ài kà siyan!»

51A do ka don ai fɛ kulun kɔnɔ. Wo kɛ telemanin, fɔɲɛ lɔ ka sumaya tue. Ai do vɛ kawakoyala bubale, 52kamasɔlɔn ai tɛɛ ma bulu lasiyayako ɲaye ba bene. Ai hangili gbeleyayine tɛɛ.

Isa ka jangalotɔlu lakɛnɛya Genesalɛti teme

Matiyu 14.34-36

53Ai wɔlinin kɔɔ tɛɛla, ai ka se Genesalɛti duu kɔnɔ, ka kulun lalɔ kawun na je. 54Ai bɔ kulun kɔnɔ, je mɔɔlu ɲanɔ ka to a ma telemanin ko Isa le. 55Wo lɔ, ai vɛ bɔlila ka taa duu fan bɛ lɔ. Ai tɛɛ v'a mɛnna ko Isa yi tɛɛ o tɛɛ lɔ, ai tɛɛ taala jangalotɔlu le dɛvɛ kɔkan a fɛ. 56Isa tɛɛ vɛ sena tɛɛ o tɛɛ lɔ, so o, tooda o, tuu kɔlɔ o, mɔɔlu tɛɛ na jangalotɔlu le k'ai lala bala lɔ, ai v'a madiyala ko ai y'ai bolo tuu aa faaniba dagbolo gbu la. Mɔɔ minu bɛ tɛɛ ai bolo tuula a la, wolu bɛ tɛɛ kɛnɛyala.

Currently Selected:

Malɛkɛ 6: MBT2023

Highlight

Copy