Luki 1
1
Fʋ paar
1Tɩbɩl jɔjʋɔ kɔɔ ˈlire dʋʋr bʋɔ, a khere thɩ̃ɛsɔɔkɛ cʋɛnɩ asɩ thɩ̃thɩɩn, 2mɔ̃kɛ tɩbɩlaakɛ dɔnɩ sobɔ so jɩdara gbanɩ mɩɩ sɩ dɩɩ ha, kɛ dɔnɩ wɩrɛ kɔɔ yɛ gɩnɩ na yire dɩɩ fʋna ga fʋ bɔɔ, wɩ dor dakha Thãgbaa thɩmɩɩ mɩɩdara. 3Mɛrɛ dakha, mɩ jɩɛ ˈlo bɔɔbɔɔ, a jɩ mɔ̃ thɩ̃ɛɛlera kɔɔ ɩɩrnɩ fʋ paarrakɛ kɛkɛkɛ, dɩ mɩ yɩɛrɛ dɩɩ do gɩ bɔrɛ dɩ ɩ̃ khere gɩrɛ kpa kha kpa kha, dɩ ma‐n mɩɛ fɩ, fɛr Teofɩl bʋɔ, 4fɩ puno fɩ jɩɩ jɩ, dɩ sobɔr dɩɩrɛɛlera fɩ kɔɔ ˈlɛnɩ do.
Kɩɛr Thãgbaa thɔ̃thɔ̃daar thu mɩɩ Jã Batɩsɩtɩɩ kɔ̃ thɩmɩɩ
5Dabɔɔkɛ Ɛrɔɔdɩ donɩ fãgadaar Jude dɩɩra, Thãgbaa bonɩ jidaar bɩɛl kɔɔ hale wɩ‐n wenɩ Jakarɩ, Abɩaa too gɩ. Ɔɔ khɛr, kɛ wɩ‐n wenɩ Elijabɛtɩ, dɔ Aarɔ̃ɔkɛ dɔnɩ gbõdaarɩ məl.#1 Kur 24:10 6Dɩ wɛr yenyɔ fɛʋ dor tɩbɩlaakɛ saranɩ Thãgbaa ƴɛra. Dɩ wɩ‐n hɩɩnɛ Kɔ̃tɩnɩ jɔfʋsɔ na ɔɔ so fɛʋ, wa hana so paaraˈ. 7Sɩ wa hana bɩsaanaˈ, gɩdonɩ Elijabɛtɩ dor khɛr kʋ̃bʋʋ, wɛr yenyɔ fɛʋ tɩnɛ.
8Dɩ wi bɩɛl, Jakarɩ n dor ɔɔ bonɩ ji thɔ̃ Thãgbaa ƴɛra, gɩdonɩ ɔɔ too dea mɛ̃. 9Mɔ̃kɛ bonɩ jidara n cʋʋnɩ, wɩ lɩrɛ lɩɩ dɩɩ do ɔɔda gɩ, dɩ na lõ Kɔ̃tɩnɩ fʋɔr cɔ kɔ̃tɩɩna a thii thɩ̃ɛɛkɛ n hʋnanɩ daʋ. 10Sɩ tibil jɔ derre phiilo, dɩ wa‐n bɩɛl Thãgba, dabɔɔkɛ Jakarɩ n thiini thɩ̃ɛɛkɛ n hʋnanɩ daʋ. 11Le Kɔ̃tɩnɩ thɔ̃thɔ̃daar thu biɛl the Jakarɩra a jɩɩl nyɔ̃bɔɔra, paarɩkɛ wɩ‐n thiini thɩ̃ɛɛkɛ n hʋnanɩ daʋ. 12A Jakarɩ yɩɩ, haar fuguure dɩ maar fʋʋ. 13Sɩ Thãgbaa thɔ̃thɔ̃daar thu sʋʋraa ayɩ: Jakarɩ, fa‐n do maar n fʋ faˈ, gɩdonɩ Thãgba ture afɩ bɩɛl. Afɩ khɛr Elijabɛtɩ na kʋɔn kũubir, dɩ fa dʋʋ ire Jã. 14A na do farɛ dadaa na kãkadaa, dɩ daʋ na fʋrɛ tibil jɔjʋɔ ɔɔ kɔna. 15Gɩdonɩ a na dor tibil kɔ̃tɩ̃ɩ Kɔ̃tɩnɩ ƴɛra, a na yɔ divɛ̃ dɩ ta khaa ga, a na hinəne Thu Phuu dabɔɔkɛrakɛ a hanɩ ɔɔ nɩɩ kɔ̃lora.#Ther 6:3 16Dɩ ɔr na cʋɛ ljɩrayɛl bɩsana jɔɔjɔɔ, dɩ wa kɛr na bir Kɔ̃tɩn awɩ Thãgbara. 17Dɩ ɔr na kʋlɛ Kirisiti ƴɩɛ, a hanana Elɩ Thãgbaa bobonɩ thu ca na ɔɔ puno, a cʋʋna thɛɛ ha gɩ bir gɩ ha awɩ bɩsãsɔra, sɩ a kpa nũ nʋʋrdara a pɛr wɩ hana tɩɩ saraa kpɛsɛ, gɩ do mɛ̃ a gbɛbɩ tɩbɩla dɩ wɩ too Kɔ̃tɩnɩ too.#Mal 4:5–6 18Dɩ Jakarɩ bule Thãgbaa thɔ̃thɔ̃daar thurə: Mɔ̃ ma jɩ dɩ sobɔr thɩ̃ɛɛlera na do, gɩdonɩ mɩ tɩnɛ dɩ ɩ̃ khɛr dakha tɩ̃? 19Dɩ Thãgbaa thɔ̃thɔ̃daar thu bir birsee: Mɛr dʋɔn Gabɩrɩɛlɩkɛ n jɩlɛnɩ Thãgbaa ƴɛra. A thɔ̃ mɛr ayɩ, ɩ̃ sɔ far a mɩana fɩ dakha tutugo bʋɔɔkɛra.#Dan 8:16; 9:21 20Dɩ hɩnɛ, gɩdonɩ fa kɔɔ pɛr haar ɩ̃ thɩmɩɩsɔraakɛ na dananɩ a ga bɔ dã ga, fa dor nɔ madaar, fa puno a na mɩɩ thɩmɩɩraˈ phaphapha gɩ dana wireekɛ gɩrɛɛkɛra na danɩ.
21Sɩ tɩbɩla har dɩ wa‐n pɩɛr Jakarɩ, dɩ nʋɔ kpaa wɛr mɔ̃ a‐n pʋɔrnɩ le Thãgba fʋɔr cɔ kɔ̃tɩ̃ bɩnɔ. 22Sɩ ɔbɔɔkɛ Jakarɩ thenɩ aa‐n puno na mɩɩna wɩ thɩmɩɩraˈ. Dɩ mɛ̃ wɩ jɩ thɩ̃ɛ a yɩ le Thãgba fʋɔr cɔ kɔ̃tɩ̃ bɩnɔ. Dɩ a mar da‐n mɩɩna wɩ na nyɛ̃be, dɩɩ do nɔ marra a toona thalera.
23Dɩ ɔbɔɔkɛ Jakarɩɩ thɔ̃ do wi pɩnɩ, a bire kɔ̃ ɔɔ cɔ. 24Ɔbɔɔkɛ ga toonɩ gbe, dɩɩ do ɔɔ khɛr Elijabɛtɩ hananɛ pɛmɛr da‐n toona cɔ haar dɩɩ cʋʋna pora yemɔɩ, sɩ dɩ so ayɩ: 25Hɩnɛ gɩrɛɛkɛ Kɔ̃tɩn cʋʋ marnɩ, ɔbɔɔkɛ a hɩɩn mɩnɩ sa ti gɩrɛɛkɛ dɔ marnɩ yicuru tɩbɩlala.
Kɩɛr Thãgbaa thɔ̃thɔ̃daar thu mɩɩ Jejuu kɔ̃da
26Dɩ ɔbɔɔkɛ Elijabɛtɩ hananɩ pɛmɛr dɩɩ cʋʋ pora maadõ, Thãgba bire thɔ̃ ɔɔ thɔ̃thɔ̃daar thu Gabɩrɩɛl Galile, dɩ bɩɛllakɛ wɩ‐n wenɩ Najarɛtɩ, 27khɛ biireraakɛ na jɛnɩ kuun paˈ. Sɩ a hananɛ wɛdaar, kɛ wɩ‐n wenɩ Jojɛfɩɩkɛ dɔnɩ Davɩdɩɩ tibil. Dɩ khɛ biireelee irə n dʋɔn Marɩ.#Mat 1:18 28Le Thãgbaa thɔ̃thɔ̃daar thu pɔ Marɩɩ pa, a sʋʋraa: Mɩ fʋɔr fɛr, fɛrɛɛkɛ Thãgba jɩnɩ bʋɔra, Kɔ̃tɩn har kha na fɛrɛ. 29Sɩ mɔ̃kɛ Marɩ nɩɛnɩ ga thɩmɩɩle, haar fuguure ka dɩ bule ɔɔbara: Anye dɔ fʋɔr caakɛɛ kɩr ya fɛ? 30Dɩ Thãgbaa thɔ̃thɔ̃daar thu sʋʋraa: Marɩ, fa‐n do maar n fʋ faˈ, gɩdonɩ Thãgba jɩɛn fɩ bʋɔra. 31Dɩ hɩnɛ, fa hananɛ pɛmɛr a na kɔ̃ kũubir a na dʋʋ ire Jeju.#Mat 1:21 32A na dor tibil kɔ̃tɩ̃ɩ, dɩ ɔɔ i na‐n dɔ Kəkəədaarɩ Bikuun, dɩ Kɔ̃tɩn Thãgba na haarɛ ɔɔ mama thɩ kɔ̃tɩ̃ Davɩdɩɩ fãga too pa.#1:32–33; 2 Sam 7:12, 13, 16; Eja 9:7 33Dɩ mɛ̃ a na do fãgadaar khorr Jakɔbɩɩ toora, dɩ ɔɔ fãgadaar do na hana khu paaraˈ. 34Dɩ Marɩ so Thãgbaa thɔ̃thɔ̃daar thurə: Mɔ̃ ga do sɩ na ha thale gɩdonɩ ma jɩ kuun pa? 35Dɩ Thãgbaa thɔ̃thɔ̃daar thu birsee: Thu Phuu na ɩna na ha far, dɩ Kəkəədaar na ɔɔ fãga na kɛɛ farɛ ɩtɩɩr. Gɛr gɩ bɩsaanɩkɛ fa kɔnɩ, wa‐n wɩɩrɛ daphuu, Thãgbaa Bikuun. 36Dɩ hɩnɛ, Elijabɛtɩ afɩ tibil, a hananɛ pɛmɛr dakha ɔɔ tɩ̃ bɔra, dɩ kũubir a na kɔ̃, ɔrkɛ wɩ‐n kɔɔ wenɩ khɛr kʋ̃bʋʋ hana gɛr pora maadõ gɩ cʋʋ nɛnɛ̃. 37Gɩdonɩ thɩ̃ bɩɛl na hale kpɩɩkɛ Thãgba na‐n punonaa ga.#Jən 18:14 38Dɩ Marɩ birsee: Hɩnɛ, mɩ dor Kɔ̃tɩnɩ thɔ̃daar, dɔ gɩ dã mɩ mɔ̃kɛra fɩ sonɩ. Dɩ Thãgbaa thɔ̃thɔ̃daar thu fagʋʋ sa jal.
Mɔ̃ Marɩ jalnɩ a yɩ Elijabɛtɩ
39Dawiilera Marɩ ɩɩr a gba hʋɛ na phananɛ, da‐n jal gɔ̃gɔ̃ khʋra Juda dɩ bɩɛlla, 40a lõ Jakarɩɩ cɔ a fʋɔr Elijabɛtɩ. 41Dɩ ɔbɔɔkɛ Elijabɛtɩ nɩɛnɩ Marɩɩ fʋɔr, ɔɔ bi ubire le ɔɔ kɔ̃lora, dɩ Elijabɛtɩ hinə Thu Phuu, 42a hulẽ na nɔ kheu ayɩ: Thãgba bɔna fɛr a jɔ khɛra fɛʋ, dɩ biilera afɩ kɔ̃lora ˈlɛr bɔnanɛ. 43Mɔ̃ gɩ fʋ sɩ ɩ̃ Kɔ̃tɩ̃ɩ nɩ ɩ̃ a yɩ mɩ? 44Gɩdonɩ hɩnɛ, dapaara afɩ fʋɔr lõ mɩnɩ nũ kaar, ɩ̃ bi ubire na kãkar kɛ ɩ̃ kɔ̃lora. 45Gɩ da fɛrkɛra pɩɛrnɩ haar, gɩdonɩ gɩrɛ thɛnɩ Kɔ̃tɩnɩ pa dɩ wɩ mɩɩ fɩ, ga daan oti.
Mɔ̃kɛ Marɩ khɩɩnɩ Thãgba
46Dɩ Marɩ so ayɩ:
Ɩ̃ ha n khɩɩrɛ Kɔ̃tɩn,#1 Sam 2:1–10 #Jən 17:7
47dɩ ɩ̃ ha na‐n kãka Thãgba ɩ̃ Taadaarra,
48gɩdonɩ a hɩɩnɛ ɔɔ hɛlɛlɛ thɔ̃daar khɛr.
Gɩdonɩ hɩnɛ, a fʋna nɛnɛ̃kɛ,
thɩ kɔ̃ caar fɛʋ na so marɛ anayɩ, Thãgba bɔna mɛr.#1 Sam 1:11
49Gɩdonɩ Thãgbaakɛ dɔnɩ thɩ̃ɛ fɛʋʋ Punodaar cʋʋ marɛ thɩ̃ kɔ̃tɩna;
dɩ ɔɔ i n dʋɔn daphuu.
50Dɔ ɔɔ bɔ dona n hale wɩrɛraakɛ n maanɛɛnɩ
məlle wo məllela fɛʋ.
51A nɩnanɛ mɔ̃kɛ ɔɔ fãga nyɔ̃ hanɩ,
a bɩ̃bɩlanɛ wɩrɛɛkɛ hananɩ i ƴaal kpɩɛrɛsɔ haarra.
52A tɔr fãgadara awɩ fãga too para kpɛɛ,
sa cʋʋ hɛlɛlɛ fɩldara dɩ wɩ pal ɩɩr.#Jɔ 5:11; 12:19
53A cʋʋrɛ kɔmɛdara dɩ wɩ hi na thɩ̃ bʋɔ,
sa faa lɛ̃lɛ na nyɛ̃ biire dɩ wɩ jal.
54A bulle Ɩjɩrayɛl ɔɔ thɔ̃daar,
gɩdonɩ ɔɔ bɔ donana a jɩna
55Abɩraham na ɔɔ məlsɔ khorr,
mɔ̃kɛ a kɔɔ sonɩ asɩ mama thɩ kɔ̃tɩ̃sɔra.
56Dɩ Marɩ too nakha Elijabɛtɩ pora yẽthersɔ. Agɩpɩ dɩ kɛr bir kɔ̃ ɔɔ cɔ.
Jã Batɩsɩtɩɩ kɔ̃
57Dɩ ɔbɔɔkɛ Elijabɛtɩɩ bi kɔ̃ bɔ danɩ, a kʋɔn kũubir. 58A Elijabɛtɩɩ cɔ khudara na ɔɔ toosɔ nɩɛ dɩ Kɔ̃tɩn kɔɔ donaanɛ bʋɔ dɩɩ kar, wɩ‐n kãkarɛ kha na ɔr. 59Dɩ wire makõther wirera, wɩ pɔr a kur biile khʋ̃ʋ, sa ƴaal wɩ haa ire Jakarɩ, kɛ dɔnɩ ɔɔ thɩɩ irə wo.#Lev 12:3 60Sɩ ɔɔ nɩ so: Kpei, Jã wa‐n wɩɩ. 61Dɩ wɩ sʋʋraa: Tibil na hale afɩ toora a hana ire thalaˈ; 62sa mɩɩna ɔɔ thɩ nyɛ̃be wɩ hɩɩn mɔ̃kɛ a‐n ƴaalnɩ a na‐n wɩɩ. 63Dɩ Jakarɩ bɩɛl sɛbɛ a khere pɛr ayɩ: Jã wa‐n wɩɩ. Dɩ nʋɔ kpaa wɩ fɛʋ. 64Dɩ dapaara Jakarɩɩ nɔ khɛr, dɩ delẽbire lɩmɩ dɩ puno wo da‐n mɩɩ thɩmɩa, da‐n khɩɩna Thãgba. 65Dɩ maar fʋlɛ cɔ khudara fɛʋ, dɩ Jude gɔ̃gɔ̃ dɩdara fɛʋ kɔɔ mɩɩrɛ kha ga thɩ̃sɔɔlera. 66Dɩ wɩrɛ fɛʋʋkɛ kɔɔ nɩɛnɛnɩ thɩmɩɩrɩle, wɩ fʋ gɛr le awɩ bɩnɔ sɩ wa‐n so aa: Dɩ mɔ̃ biilera na ha ya fɛ? Sɩ Kɔ̃tɩnɩ nyɔ̃ kɔɔ kɛɛraarɛ.
Mɔ̃kɛ Jakarɩ khɩɩnɩ Thãgba
67Dɩ ɔɔ thɩ Jakarɩ hinə Thu Phuu, a ma da‐n ti Thãgba tukɩrʋ thakɛ ayɩ:
68Kɔ̃tɩnɩkɛ dɔnɩ Ɩjɩrayɛl Thãgba hɩna khɩɩrɛ,
gɩdonɩ a ɩnɛ a kher ɔɔ too sa birse wi.
69A pɛ sarɛ Taadaar kɔ̃tɩ̃ɩ
ɔɔ thɔ̃daar Davɩdɩɩ toora,
70mɔ̃kɛ a kɔɔ mɩɩnɩ dɩɩ the ɔɔ bobon phusɔɔ nɔɔ kɛkɛkɛ;
71taarɛ gɩ dɩ ga‐n taa sɩ asɩ sodarara,
na wɩrɛraakɛ fɛʋ n laarɛ sɩnɩɩ nyɔ̃kɔɔ.
72Mɛ̃ a kɔɔ dona asɩ mama thɩ kɔ̃tɩ̃sɔ bʋɔ,
a jɩnana ɔɔ nɔ bɩɛl ʋlfɛ phu.
73Gɛr dʋɔn nʋɔɔkɛ a kɔɔ sonɩ na asɩ mama thɩ kɔ̃tɩ̃ Abɩraham,
74dɩ mɛ̃ Thãgba na ha sɩ fãga,
ɔbɔɔkɛ a na taa sɩnɩ asɩ sodaraa nyɔ̃kɔɔ na pɩ,
sa‐n dʋʋraa thɔma na ˈlar,
75na phur, na fɩl sarʋ ɔɔ ƴɛra
wire fɛʋ asɩ yi hanana.
76Sɩ fɛrɛ bɩsã buu, wa we fer Kəkəədaarɩ bobon,
gɩdonɩ fɛr na kʋlɛ Kɔ̃tɩn ƴɩɛ,
fa‐n gbɛbɩrɩ ɔɔ hʋsʋnɔ.#Mal 3:1
77Dɩ mɛ̃ a na nɩna ɔɔ too taa jɩɩr,
dɩ ga ther awɩ sopugosɔɔ faara,
78gɩdonɩ asɩ Thãgba hinəne bɔ donanɛ,
gɛr dɔ nɔɔ dɩ ƴũu dahɩrɛ phã a ɩ̃ a kher sɩ;
79a na‐n hɩrɛ wɩrɛɛkɛ hanɩ dabirəra, na khi jəərera,
a thɔɔ asɩ nɛ a na‐n pɛ ha ie hʋɛra.#Eja 9:2
80Dɩ bɩsaanna n khʋɔn, dɩ ɔɔ thu na‐n ˈlɛ fãga. Sɩ bəənnə a‐n cɔ, phaphapha dɩɩ dana wireekɛ a nɩnanɩ ɔɔbara Ɩjɩrayɛldaraa ƴɛ thɩ̃thɩɩn.
Currently Selected:
Luki 1: LOBIRI
Highlight
Share
Copy
Want to have your highlights saved across all your devices? Sign up or sign in
Bible Society of Burkino Faso 1985.
