Markɩ 16
16
Jejuu khi ɩɩr
(Mat 28:1–8; Lu 24:1–12; Jã 20:1–10)
1Ɔbɔɔkɛ hɩɩr wire kanɩ pɩ, Marɩɩkɛ thɛnɩ Magɩdala, Salome, na Marɩɩkɛ dʋɔnnɩ Jakɩɩ nɩ kɔɔ ther niinikɛ n hʋnanɩ daʋ, a jalna wɩ thir Jejuu forra. 2Sɩ duuro phiphi wire makonyɔɔ caca wi, wɩ kɔɔ jaal kaara wi phã bɔɔ. 3Sɩ wɩ‐n mɩɩrɛ khasɔ ayɩ: Amɛ na ba kpurone sar bokaar ka nʋɔra na faa ya fɛ? 4Dɩ ɔbɔɔkɛ wɩ gbanɩ wɩ hɩɩn, wɩ yɩrɛ bokaar dɩɩ kpuro a khokhɩa, sɩ ga do bokaar gɩ a wabɩ kpãkpalã ga. 5Dɩ wɩ kɔɔ lʋʋn kaʋ a yɩ daɓolbir dɩ too mɔ̃ wa‐n lonɩ a pɛr nyɔ̃bɔɔ, a to kẽkẽ gbã bulo, dɩ nʋɔ kɔɔ kpaa wɛr. 6Sɩ a so warɛ: Na‐n do nʋɔ n kpaa naˈ; mee Najarɛtɩ Jejuukɛ wɩ kɔɔ kpanɩ kʋkʋ thɩrʋra nɩ‐n ƴaal. A ɩɩrɛ a the khirera, aa ha kɛkaˈ; nɩ yɛ ka wɩ kɔɔ pɩɛnɩ. 7Sɩ nɩ jala a sɔ ɔɔ kpãkpãadarara nakha Pɩɛrra ayɛ: A kʋʋl nɛr yɩɛ da‐n jal Galile, dɩ le na yɩɩ mɔ̃kɛ a kɔɔ so narnɩ.#Mat 26:32; Mar 14:28 8Dɩ mɛ̃ khɛraale kɔɔ the kaʋ a caalɛ gɩdonɩ nʋɔ kpaa wɛr dɩ wa‐n jẽ, sɩ wa kɔɔ so tibillə thɩ̃aˈ, gɩdonɩ maar fʋlɛnɛ wɩ.
Mɔ̃ Jeju kɔɔ nɩnanɩ ɔɔbara Marɩ
(Mat 28:9–10; Jã 20:11–18)
[9Ɔbɔɔkɛ Jeju kɔɔ ɩɩrnɩ khirera pɩ, wire makonyɔɔ caca wi duuro phiphi, Magɩdala Marɩɩkɛ a kɔɔ weeronɩ kɔ̃tɛɛbii makonyɔ a faa a kɔɔ nɩna dɩbara ɓo. 10Ɔr kɔɔ jala a mɩɩ mɔ̃ thɩ̃ɛ hanɩ wɩrɛraakɛ n kɔɔ hananɩ kha Jeju, kɛ n bɩɛnnɩ dɩ wa‐n khɩɩna. 11Sɩ ɔbɔɔkɛ wɩ nɩɛnɩ Jeju hananɛ yire dɩ ɩnɛrɛɛ thɛthɛ yɩɩ, wa kɔɔ pɛr haaraˈ.
Jeju kɔɔ nɩnanɛ ɔɔbara kpãkpãadara yenyɔ
(Lu 24:13–35)
12Agɩpɩ tɩbɩla yenyɔ wɛrra kɔɔ ha hʋɛra dɩ wa‐n jal kõgoso, dɩ Jeju kɔɔ nɩna wɩ dɩbara a ha kpɩɩ. 13Dɩ wɛr dakha kɔɔ jaal a mɩɩ wɩrɛɛkɛ sɛnɩ, sɩ wa kɔɔ pɛr haar dakha weraˈ.
Jeju kɔɔ nɩnanɛ ɔɔbara kpãkpãadara yʋɔr bɩɛl
(Mat 28:16–20; Lu 24:36–49; Jã 20:19–23; Th t t 1:6–8)
14A gele pɩ, a kɔɔ nɩnanɛ ɔɔbara kpãkpãadara yʋɔr bɩɛl, ɔbɔɔkɛ wɩ hanɩ dɩko kho paar, a kɔɔ phaan wɛr awɩ ha pɛ ɓɔrra na mɔ̃kɛ awɩda khɩɩrnɩ, gɩdonɩ wa kɔɔ pɛr wɩrɛɛkɛ yɩɛnɩ na yireeda haaraˈ. 15Agɩpɩ a so warɛ: Nɩ jala thɩɩra fɛʋ a na mɩa Thãgbaa tutugo bʋɔɔ thɩmɩɩ tɩbɩlala fɛʋ.#Th t t 1:18 16Ʋrɛɛkɛ pɩɛrnɩ haar dɩ wa kpɛgʋʋ nyʋɔnɔ a na ˈlɛr taarɛ, sɩ ʋrɛɛkɛ na pɩɛrnɩ haaraˈ, sor na heenuune. 17Nɩ yɛ gɩrɛ dɔnɩ jenaakɛ na kpaanɛnɩ wɩrɛraakɛ na‐n pɩɛrnɩ haar: Wa gbaar ɩ̃ i wa‐n weena kɔ̃tɛɛbiisɔ, wa‐n mɩɩrɛ thɩmɩɩ kpɩɩsɔ; 18wa fʋrɛ siisɔ; a wɩ yɔ kpalʋ, ga pɛ war thɩlkɩɩr fɩɩʋrakaˈ; wa dɛɛnɛ khodarara nyɛ̃ɛ dɩ wa kpɛɛ.
Jejuu Thãgbaa dɩ jʋʋn
(Lu 24:50–53; Th t t 1:9–11)
19Ɔbɔɔkɛ Jeju Kɔ̃tɩn kɔɔ mɩɩ wɩnɩ pɩ, Thãgba kɔɔ khəsuure da‐n jʋʋn Thãgbaa dʋɔ a too ɔɔ nyɔ̃bɔra.#Th t t 1:9–11 20Dɩ kpãkpãadara jaal dɩ wa‐n mɩɩ Thãgbaa thɩmɩɩ paar fɛʋ, dɩ Kɔ̃tɩn n dona wɛr kha thɔma, dɩ gba jenaakɛ n kpaanɛnɩ Thãgbaa thɩmɩɩra da‐n nɩna dɩ sobɔr gɩ do.]
Currently Selected:
Markɩ 16: LOBIRI
Highlight
Share
Copy
Want to have your highlights saved across all your devices? Sign up or sign in
Bible Society of Burkino Faso 1985.
