Luki 10
10
Kpãkpãadara kpalãther yʋɔrɩkɛ Jeju thɔnɩ
1A gele ka pɩ, Kɔ̃tɩn kɔɔ phiire kpãkpãadara kpalãther yʋɔr wo, a thɔ̃ wɩ yenyɔ yenyɔ ɔɔ ƴɛ kʋʋlɔ dɩɩra fɛʋ, na paar fɛʋʋkɛ ɔɔ thɛthɛ teenanɩ a jala. 2Sɩ a so warɛ: Jɔ jɔrɛ, sɩ jʋ kha na jɔraˈ. Gɛr gɩ na‐n bɩɛlnɛ ʋrɛ dɔnɩ Kɔ̃tɩn jʋ kharra, a thɔna thɔ̃dara wa‐n kha jɔ.#Mat 9:37–38 3Nɩ jala, sɩ nɩ hɩnɛ, banaa nɩ ho dɩ ɩ̃ thɔ̃ kpesɔɔ thɩ̃thɩɩn.#Mat 10:16 4Na‐n fʋrɔ pɔtɩma ga, na‐n fʋrɔ kpakpaar lokaaraˈ, na‐n fʋrɔ nɛfaa ga, dɩ na‐n fʋɔr tibil hʋɛra ga.#Mat 10:7–14; Mar 6:8–11; Lu 9:3–5 5Sɩ cʋɔr wo cʋɔrraakɛ na lonɩ, cacara nɩ kɔɔ sɔ: Ha ɩɩ hana cʋɔrraakɛ. 6Dɩ ado tibilikɛ dɔnɩ ha iedaar hale cʋɔrraale, anɩ ha ie na ɓaanaanɛ, a mɛ̃ gaa ga kɛrrɛ na bir nar. 7Nɩ tɔɔ cɔ dɔɔraalera, dɩ gɩrɛɛkɛ wa ha nɩnɩ nɩ khɔ a na yɔna, gɩdonɩ thɔ̃daar teenanɛ ɔɔ lɩmɩ. Na‐n ɩɩr na kpaar cɔna cɔna ga.#1 Kor 9:14; 1 Tim 5:18 8Dɩ dɩɩ wo dɩɩraakɛ na lonɩ dɩ wa tee nɩ, na‐n khɔ dɩkor wo dɩkorɩkɛ wa ha nɩnɩ. 9Na‐n kpɛɛnɛ khodaraakɛ na hanɩle a na sɔna war: Bɔɔ n daan dɩ Thãgba na‐n gba fãga nɛrɛra. 10Sɩ dɩɩ wo dɩɩraakɛ na lonɩ kãkɛ wa tee nɩnaˈ, nɩ jala dɩ bɩnɔ a sɔ thakɛ ayɛwɔɔ:#Th t t 13:51 11Sɩ‐n kpɛɛrɛ anɩ dɩ thɩlãkobiikɛ ma sɩnɩ nɛɛ dɩ sa‐n faa nar, sɩ nɩ jɛrakɛ dɩ Thãgbaa fãgadaar do n daan. 12Mɩ so narɛ wireekɛ Thãgba na kɩɩlnanɩ tɩbɩla Sɔdɔmdaraa kɩɩlɩkɛ wa ˈlɛnɩ na khɩɩr mɔ̃ dɩɩlee kɩɩl na khɩɩrnaˈ.#Jən 19:24–28; Mat 11:24; 10:15
Mɔ̃ Jeju phaannɩ dɩɩsɔɔkɛ bɔnɩ ha pɛrɛ
(Mat 11:20–24)
13Ga puu farɛ Korajɛ̃ dɩɩ. Ga puu farɛ Bɛcaɩda dɩɩ. Gɩdonɩ ado nɔ kpaa thɩ̃ɛɛkɛ cʋɛnɩ anɩ thɩ̃thɩɩn kɔɔ cʋʋrɛ mɛ̃ Tɩɩr na Sɩdɔ̃ dɩɩra, wa kɔɔ mãa debire haar kɛkɛkɛ sɩ na to bɔrɔ na bʋlna thoo.#Eja 23:1–18; Eje 26:1—28:26; Jow 3:4–8; Amɔ 1:9–10; Jak 9:2–4 14Gɛr gɩ wireekɛ Thãgba na kɩɩlnanɩ tɩbɩla, Tɩɩrdara na Sɩdɔ̃daraa kɩɩlɩkɛ wa ˈlɛnɩ na khɩɩr mɔ̃ anɩ kɩɩl na khɩɩrnaˈ. 15Sɩ fɛr Kapɛrnayʋm dɩɩ, Thãgba na khəi fer na jʋʋnna ƴũ ya? Ə̃ˈə̃, Thãgba na gbumo fer dɩ fa thʋ khĩdi dɩɩ.#Eja 14:13–15
16Tibilikɛ n pɛ nɩnɩ nũu, mɛr a‐n pɛ nũu. Tibilikɛ bɔ nɩnɩ, mɛr a bo; dɩ tibilikɛ bɔ mɩnɩ, ʋrɛɛkɛ thɔna mɩnɩ a bo.#Mat 10:40; Mar 9:37; Lu 9:48; Jã 13:20
Kpãkpãadara kpalãther yʋɔrɩ kɛr bir
17Dɩ kpalãther yʋɔr kɛrrɛ bir na daʋ dɩ wa‐n so: Kɔ̃tɩn, kɔ̃tɛɛbiisɔrakɛ wɩ jo sarɛ dɩɩ do afɩ i dɔ nɔɔ. 18Dɩ Jeju so war: Mɩ kɔɔ torre Satana yire dɩ thena ƴũ a ji, mɔ̃kɛ thãgba n lenɩ dɔɔ. 19Nɩ hɩnɛ, mɩ ha nɛr punone dɩ na saarna siisɔ na lanasɔ na lãlaardaarɩ fãga fɛʋ, dɩ thɩ̃ bɩɛllakɛ na puno na cʋʋ nɩ puurəˈ#Khɩ 91:13 20Sɩ na‐n kãka thakɛ gɩdonɩ kɔ̃tɛɛbiisɔ jo naraˈ, sɩ nɩ ka na kãkanɛ gɩdonɩ anɩ isɔ kherere Thãgbaa dʋɔ.
Jejuu kãka
(Mat 11:25–27; 13:16–17)
21Ga bɔ bɩɛllaalera Jeju n kɔɔ kãkarɛ dɩɩ the Thu Phuurə da‐n sona: Thɩrɛ, mɩ‐n fʋɔr fɛr, fɛrkɛ dɔnɩ Kɔ̃tɩn thãgbara ƴũ na thɩɩra, gɩrɛraakɛ fɩ kɔɔ kernɩ thɩ̃ɛsɔɔkɛra kpɛsɛdarara na thɩ̃ jɩnana, sa gba gɩ a nɩna bɩsã bii. Ɔɔ Thɩrɛ, fɛr gɩ kɔɔ da haar dɩ fɩ cʋʋ mɛ̃. 22Ɩ̃ Thɩ gbaar thɩ̃ɛ fɛʋ a ha mɩ, sɩ tibil na jɩ ntɛ Bikuun donɩ saagado Thɩrɛ gaaga; dɩ tibil na jɩ dakha ntɛ Thɩrɛ donɩ saagado Bikuun gaaga, saagado wo Bikuunna ɔr ƴaalɛ a nɩrɔ ntaa ga.#Jã 3:35; 10:15 23Sɩ agɩpɩ dɩ kɛr a telẽ ɔɔ kpãkpãadara a so war awɩ ha ayɩ: Gɩ da wɩrɛraakɛ n yɛnɩ thɩ̃ɛɛkɛ nɩ‐n yɩnɩ. 24Gɩdonɩ mɩ so narɛ, Thãgbaa bobona jɔɔ na fãgadarasɔ kɔɔ ƴaalɛ wɩ yɩ gɩrɛ nɩ‐n yɩnɩ sɩ wa kɔɔ yɩ ga, wɩ nɩɛna dakha gɩrɛɛkɛ nɩ‐n nɩnɩ sɩ wa kɔɔ nɩ ga.
Sokpaa Samarɩ kũu bʋɔra
25Dɩ hɩnɛ, jɔfʋ dɩɩrdaar bɩɛl gɩ, a ɩɩr pɔ da‐n fifilə Jeju, a bulee thakɛ: Dɩɩrdaar, anye ma cʋʋ a na ˈlɛ yire khorr?#Mat 22:35–40; Mar 12:28–34 26Dɩ Jeju birsee: Anye Mʋɩjɩɩ jɔfʋ so? Dɩ anye fɩ‐n yɩ le? 27Dɩ birsee: “Dɔ fa‐n na Kɔ̃tɩn afɩ Thãgba na afɩ bɩ̃ fɛʋ, na afɩ ha fɛʋ, na afɩ fãga fɛʋ, na afɩ kpɩɛr fɛʋ, na afɩ ˈwalãkha tibil mɔ̃kɛ fɩ‐n nanɩ afɩbara.”#Lev 19:18; Dət 6:5 28Dɩ Jeju sʋʋraa: Fɩ ture dɩɩ bɔr, dɩ cʋɛ thalera fa ˈlɛr yire.#Lev 18:5 29Sɩ gɩdonɩ a‐n kɔɔ ƴaalɛ a nɩna mɔ̃ a sarnɩ, a bulele Jeju: Dɩ amɛ dʋɔn ɩ̃ ˈwalãkha tibililera? 30Dɩ Jeju bir sʋʋraa wo ayɩ: Kũu bɩɛl gɩ, a kɔɔ the Jerujalɛm da‐n jal Jeriko, a lõ yu hɔ̃hʋɔldarara dɩ wɩ tagɩrʋʋ thɩ̃ɛ fɛʋ, sa bɩɩrʋʋ dɩ dã khir, sɩ dɩ wɩ fagʋʋ sa jal kɔ̃. 31Dɩ dabɔɔlera, bonɩ jidaar bɩɛl kɔɔ gbaar ɔ hʋʋlera da‐n jal, a phuro kuunnaale a golona ʋ̃ hʋ gɛl a jal. 32Dɩ kũu bɩɛlɩkɛ dɔnɩ Levɩɩ ca pɔr dakha a dã paarɩlera, a yɩ kuunile sa golona ʋ̃ hʋ gɛl a jal. 33Sɩ Samarɩdaar bɩɛlɩkɛ n kpaarɛnɩ pɔr a dã kuunile. Ɔbɔɔkɛ a yɩɩnɩ, bʋɔ fʋʋrɛ.#10:33–34; 2 Kur 28:15 34Dɩ a tɔr pɔ dã a gba niin na taanɩkɛ wɩ‐n wenɩ dɩvɛ̃, a pɩɛraa khoosɔra sa li. Agɩpɩ dɩ gbaa pɛ kũkəənə, a jalna kpakpal cɔ bɩɛlla da‐n haan. 35A dɩɩ wɩl, a tire wire yenyɔ thɔ̃ lɩmɩnɛɛ war a ha ʋrɛɛkɛ dʋɔnnɩ kpakpal cɔ hɩɩndaar sa sʋʋraa: Gba na haanaa, sɩ gɩrɛɛkɛ fa kʋɛnɩ na dɛbɩrɔ, a mɩ bir ɩ̃ ma lɩmɩ fɛr. 36Dɩ Jeju bulee: Ʋmɔ̃ wɛr yẽtherraale fɩ pɛr haar, ɔr dʋɔn ˈwalãkha tibil kuunnaakɛ lonanɩ yu hɔ̃hʋɔldarara? 37Dɩ birsee: Ʋrɛɛkɛ kɔɔ dɔnaanɩ bʋɔ gɩ. Dɩ Jeju sʋʋraa: Dɩ fɛrɛ dakha jala na cʋɛ ɔmɛ̃.
Mɔ̃ Jeju hanɩ Martɩ na Marɩɩ cɔ
38Dɩ mɔ̃kɛ Jeju hanɩ hʋɛra na ɔɔ kpãkpãadara dɩ wa‐n jal, a lʋʋn dɩ bɩɛlla. Dɩ khɛ bɩɛlɩkɛ wɩ‐n wenɩ Martɩ teguure ɔɔ cɔ.#Jã 11:1 39Dɩ Martɩɩ õkhɛrɩkɛ wɩ‐n wenɩ Marɩ toore Kɔ̃tɩnɩ ƴɛ thɩ̃thɩɩn, da‐n pɛ ɔɔ thɩmɩɩ nũu. 40Sɩ Martɩ or har thɔ̃ jɔjʋɔra kĩkĩkĩ, sa gba pɔ Jejura a sʋʋraa ayɩ: Kɔ̃tɩn, ga ba fɩ gɩrɛɛkɛra ɩ̃ õkhɛr faa marnɩ thɔmaakɛra fɛʋ dɩbara gaa? Sʋɔraa a bulo mi. 41Dɩ Kɔ̃tɩn birsee: Martɩ, Martɩ, fɩ‐n dɛr dɩ fa‐n jena thɩ̃ jɔjʋɔra. 42Thɩ̃ bɩɛl dɩbara teana fɩ cʋʋrɛ. Marɩ kɔɔ phiire dabʋɔɔkɛ na hanɩ taa paaraˈ.
Currently Selected:
Luki 10: LOBIRI
Highlight
Share
Copy
Want to have your highlights saved across all your devices? Sign up or sign in
Bible Society of Burkino Faso 1985.
