Luki 11

Jeju dɩɩrɛ ɔɔ kpãkpãadara mɔ̃ wa bɩɛlnɩ Thãgba

(Mat 6:9–13; 7:7–11)

1Wi bɩɛl Jeju kɔɔ har pa bɩɛl da‐n bɩɛl Thãgba. Ɔbɔɔkɛ a pɩnɩ, ɔɔ kpãkpãadaar bɩɛl sʋʋraarɛ aa: Kɔ̃tɩn, dɩrɛ sɩ sa‐n bɩɛl Thãgba mɔ̃ Jã kɔɔ dɩɩrnɩ ɔɔ kpãkpãadara.

2Dɩ Jeju so war: Ɔbɔɔkɛ nɩ‐n bɩɛlnɩ Thãgba nɩ sɔ thakɛ aa: Thɩrɛ,

dɔ afɩ i n dʋbɩrɔ,

dɔ afɩ fãgadaar do n ɩ̃.

3Na hana sɩ wire fɛʋʋ dɩkookɛ na‐n dana sɩnɩ.

4Faa asɩ sopugosɔ a hana sɩ,

gɩdonɩ sɛrɛ dakha sɩ‐n faarɛ puureekɛ tɩbɩla n cʋʋ sɩnɩ dɩ sa‐n ha wɩ.

Dɩ fa‐n faa sɩ fifiləle n puno saˈ.

5Dɩ Jeju so war wo: A tibil bɩɛl nɛrɛɛ thɩ̃thɩɩn hana kuun a jal ɔɔ cɔ dɩnɩrɔ a sʋʋraa thakɛ: Ɩ̃ kuun, pema mɩ buru yẽther, 6gɩdonɩ ɩ̃ kũu bɩɛl ther dɩkhãa pa a ɩ̃, sɩ ma hana thɩ̃ɛ a na haa ga. 7Sɩ ole cɔ bɩnɔ birsee: Fa‐n vɔɔ maˈ, loo khaanɛ pɩ dɩ ɩ̃ bɩsãsɔ na mɛrɛ sɩ phɩɩnɛ, ma puno na ɩɩr na ha fɩ gɩrɛ fɩ‐n ƴaalnaˈ. 8Mɩ so narɛ, ga do a donɩ ɔɔ kuun, gɛr a na ɩɩrɔ na haa gɩrɛɛkɛ a‐n ƴaalnaˈ, sɩ a na ɩɩrɛ na haa gɩrɛ fɛʋʋkɛra a‐n ƴaalnɩ, gɩdonɩ ɔɔ kuun bɩɛlɛ da‐n kɛ̃kɛrɛna.

9Dɩ mɛrɛ, mɩ so narɛ: Na‐n bɩɛlnɛ na ˈlɛr, na‐n ƴaalɛ na yɩɛrɛ, na‐n bɛ loo wa khɛr nɛr. 10Gɩdonɩ tibil wo tibilikɛ n bɩɛlnɛnɩ a‐n ˈlɛr, ʋrɛɛkɛ n ƴaalɛnɩ a‐n yɩɛrɛ, dɩ ʋrɛɛkɛ n bɛnɩ loo wa khɛrʋʋrɛ. 11Ʋmɔ̃ɔ thɩ anɩ thɩ̃thɩɩn ɔɔ bi na bɩɛllɔ buru a haa bokaar? Agɩbo dɩ bɩɛlaa thʋm, sii a na haa gɩ do thʋm ya? 12Dɩ a yɔl paar a bɩɛl, laan a na haa ya? 13Ado nɛrɛɛkɛ dʋɔnnɩ tɩɩ puusɔ jɩ thɩ̃ bʋɔ a na ˈlaa anɩ bisɔra, mɔ̃ ga thʋ̃ na da anɩ Thɩraakɛ hanɩle ƴũ na pɔna, da ˈlaa Thu Phuu na ha tɩbɩlaakɛ n bɩɛlaanɩ?

Jeju weere nɔ ma kɔ̃tɛɛbuukɛ hanɩ kuunna

(Mat 12:22–30; Mar 3:20–27)

14Jeju weere kɔ̃tɛɛbu bɩɛlɩkɛ cʋɛnɩ kuun dɩ do nɔ madaar. Ɔbɔɔkɛ kɔ̃tɛɛbuulera kɔɔ thɩɩraanɩ pɩ, nɔ madaar n mɩɩrɛ thɩmɩa dɩphã, dɩ nʋɔ kpaa tibil jɔɔle. 15Sɩ wɩ̃ tibil wɛrra na‐n so: Bɛljɛbulikɛ dɔnɩ yʋʋ kɔ̃tɛɛbiisɔra n hanaa fãga dɩ weena kɔ̃tɛɛbii.#Mat 9:34; 10:25 16Wɩ̃ tibil wo na‐n fifiləə a bulee nɔ kpaa thɩ̃ɛɛkɛ thɛnɩ thãgbara ƴũ.#Mat 12:38; 16:1; Mar 8:11 17Mɔna Jeju jɩnɩ awɩ kpɩɛr a so warɛ: Fãgadaar dɩ wo fãgadaar dɩɩkɛ n tɩnɛnɛnɩ a bir da‐n kena dɩbara a na wɩɛlɛ, dɩ cɔna dakha na wɩɛlɛ kpa kha kpa kha. 18Dɩ gɛr gɩ, a Satã tɩnɛ a bir da‐n kena dɩbara, mɔ̃ ɔɔ fãgadaar dɩ na fʋ sɩ na jɩɩl, gɩdonɩ nɩ‐n sor: Bɛljɛbul hana mɩ fãga dɩ ma‐n weena kɔ̃tɛɛbiisɔ? 19Dɩ ado mɛrɛ, Bɛljɛbuli fãga mɩ‐n gba dɩ ma‐n weena kɔ̃tɛɛbiisɔ, sɩ anɩ bɩsãsɔ amɛɛ i wɩ‐n gba dɩ wa‐n weena wɩ? Dɩ gɛr gɩ wɛr thɛthɛra na dʋɔn anɩ so kɩɩldara. 20Sɩ ado Thãgbaa fãga mɩ‐n gba dɩ ma‐n weena kɔ̃tɛɛbiisɔ, ga dor Thãgbaa fãgadaar do dã nɛr mɛ̃ dɩphã. 21A kũu khɩɩ hana ko ke thɩ̃ɛ a na bɛrna ɔɔ cɔ, gɩrɛɛkɛ a hɩnɩ na toore bɔɔbɔɔ. 22Sɩ ado bɩɛlɩkɛ hananɩ fãga a jʋɔ pɔr a punoo, a na fʋʋrɛ sɩ na taa ɔɔ ko ke thɩ̃sɔɔkɛra fɛʋ a‐n kɔɔ kpɩɛrɔnɩ, sɩ a tɩnɛ gɩrɛ fɛʋʋkɛ a kɔɔ taaraanɩ. 23Ʋrɛɛkɛ na‐n hanɩ kha na mɛrɛaˈ, ɩ̃da a‐n bo; dɩ wo ʋrɛɛkɛ na‐n bulo mini sɩ kpa ga, ɔr n bɩ̃bɩlanɛ gɩ.#Mar 9:40

Kɔ̃tɛɛbu hɔ̃hɔlɩkɛ n ƴaalɛnɩ a kɛr a bir

(Mat 12:43–45)

24Ɔbɔɔkɛ kɔ̃tɛɛbu hɔ̃hɔl n thenɩ tibillə, a‐n jaal da‐n kpaar bəənnə da‐n ƴaal kãkɛ a na toonɩ na hɩɩr. A a na yɩ ga, a‐n sor dɩ yɩ: Ma kɛrrɛ na bir ɩ̃ cɔ kãkɛ mɩ kɔɔ thenɩ. 25A a pɔ dã a yɩ cʋɔrɩle dɩ kpabɩ a gbɛbɩrɩ thɩ̃ɛ bɔɔbɔɔ; 26le a‐n jal dɩphã mɛ̃ dɩ kpa kɔ̃tɛɛbi kpɩɩsɔ wo makonyɔɔkɛ n hʋɔlɛnɩ dɩ wɩ jʋɔ, dɩ wɩ pɔ a lõ a too le. Dɩ mɔ̃ gɩ hanɩ kuunnaale pɩpɩɩ paar, gɩ ka puurore a jɔ caca fʋ paar.

Anye n dʋɔn nɔbɔ bʋɔ?

27Dɩ mɔ̃kɛ Jeju kɔɔ mɩɩnɩ thale, khɛ bɩɛl tibil jɔɔlee thɩ̃thɩɩn sʋʋraarɛ na nɔ kheu: Gɩ da khɛrraakɛ kɔna fɩnɩ na ɩlɛ̃sɔɔkɛ fɩ mamɩnɩ. 28Dɩ Jeju birsee: Ɔɔ, ga ka na dar wɩrɛraakɛ n pɛnɩ Thãgbaa thɩmɩɩ nũu dɩ wa‐n cʋʋ.

Nɔ kpaa thɩ̃ɛɛkɛ tɩbɩla n ƴaalnɩ Jejura sɩ dɩ bo

(Mat 12:38–42)

29Mɔna tibil jɔɔle kpanɩ dɩ wa‐n jɛ, le Jeju ma da‐n so: Nĩdaraakɛ dʋɔn tɩɩ puusɔɔkɛ n ƴaalɛnɩ nɔ kpaa thɩ̃ɛ. Sɩ nɔ kpaa thɩ̃ kpɩɩ na bir na yɩ saagado Jonasɩɩda gaaga.#Mat 16:4; Mar 8:12 30Gɩdonɩ mɔ̃kɛ Jonasɩ kɔɔ donɩ jɩɩn Nɩnɩvɩdarara, mɛna mɛr tibili Bikuun na do jɩɩn nĩdararaakɛ dakha.#Jon 3:4 31Wireekɛ Thãgba na kɩɩlnanɩ tɩbɩla, khɛr fãgadaarɩkɛ kɔɔ hanɩ wi phã paar nyɔ̃bɩlana, na ɩɩrɛ na the khirera nakha nĩdaraakɛ, dɩ ɔr na heene wɩ sor. Gɩdonɩ ɔr, thɩ khu paar a kɔɔ the a pɔ a pɛ Salomɔ̃ɔ kpɛsɛ nũu. Sɩ nɩ hɩnɛ, ʋkhaakɛ kɔ̃tɩnanɩ a jɔ Salomɔ̃ hakɛ.#1 Fãg 10:1–10; 2 Kur 9:1–12 32Wireekɛ Thãgba na kɩɩlnanɩ tɩbɩla, Nɩnɩvɩdara na ɩɩrɛ na the khirera nakha nĩdaraakɛ, dɩ wɛr na heene wɩ sor, gɩdonɩ wɩ kɔɔ debire haar ɔbɔɔkɛ Jonasɩ kɔɔ mɩɩ wɩnɩ Thãgbaa thɩmɩɩ. Sɩ nɩ hɩnɛ, ʋkhaakɛ kɔ̃tɩnanɩ a jɔ Jonasɩ hakɛ.#Jon 3:5

Lãphã sokpaa

(Mat 5:15; 6:22–23)

33Tibil na gbaar lãphã a na pɛ wo sɩ a ker ya, agɩbo a suuro bɩlãkpʋʋn ya? Ga do bilela a na dɛ̃ɛ dɩ wɩrɛɛkɛ n lonanɩ le n yɩ dahɩraa?#Mat 5:15; Mar 4:21; Lu 8:16 34Afɩ yi dʋɔn lãphã afɩ tomɩra, dɩ ɔbɔɔkɛ afɩ yi bɔrnɩ, afɩ tomɩ fɛʋ dahɩrɛra gɩ‐n ha. Sɩ ɔbɔɔkɛ afɩ yi na bɔrnaˈ, afɩ tomɩ fɛʋ dabirəra gɩ‐n ha. 35Gɛr gɩ na jɩɛ hɩɩn dɩ dahɩrɛɛkɛra fɩ hananɩ afɩ bɩnɔ, ga‐n do dabirə ga. 36Sɩ ado afɩ tomɩ fɛʋ har dahɩrɛra, dɩ kho bɩɛl na bo too dabirəra ga, ga dor a har dahɩrɛra fɛʋ gɩ ho mɔ̃ lãphã n carã fɩnɩ ɔɔ hɩrɛ.

Mɔ̃ Jeju mɩɩnɩ jɔfʋ bʋ dʋdarasɔ na jɔfʋ dɩɩrdarasɔɔda

(Mat 23:1–36; Mar 12:38–40)

37Dɩ ɔbɔɔkɛ Jeju mɩɩnɩ pɩ, jɔfʋ bʋ dʋdaar bɩɛl wɩɩrɛ a pɔ ɩnɩ cɔ a khɔ dɩkor. Dɩ jal lõ dɩko kho paar. 38Dɩ nʋɔ kɔɔ kpaarɛ jɔfʋ bʋ dʋdaarɩle, mɔ̃kɛ a yɩɛnɩ dɩɩ do Jeju na kɔɔ phʋɔl dɩbara ɓo sɩ da‐n kho dɩkoraˈ. 39Sɩ Kɔ̃tɩn sʋʋraarɛ: Nɛr jɔfʋ bʋ dʋdara, nɩ‐n cɔcɔɔrɛ thɩ̃ yɔdaa khiru na dɩko khodaa khiru, sɩ bɩnɔ nɩ hinəne thɩ̃ tagɩrɩ kpɩɛrɛ na dakha kpallɛ. 40Də̃bələ ha nɩ bã, ga do ʋrɛɛkɛra cʋɛnɩ khiru, ɔrra cʋɛ bɩnɛ dakha gaa? 41Nɩ ka na ˈlaanɛ gɩrɛɛkɛ hanɩ bɩnɔ, dɩ mɛ̃ thɩ̃ɛ fɛʋ na do daphuu nɛrɛra.

42Sɩ ga puu narɛ nɛr jɔfʋ bʋ dʋdarasɔ, gɩdonɩ nɩ‐n tire bɩɛl yʋɔr anɩ bi fara na anɩ thɩ̃ phulosɔraakɛ fɛʋ dʋɔnnɩ bii. Sɩ dɩ nɩ hɛbɩ fɩl sarʋ na naʋʋkɛ dʋɔnnɩ Thãgbaada. Sɩ gɛr ka do thɩ̃ɛɛkɛ teananɩ na‐n cʋɛ, sɩ ga do wɩ yɩ nɩ hɛba gelaˈ.#Lev 27:30 43Ga puu narɛ nɛr jɔfʋ bʋ dʋdarasɔ, gɩdonɩ nɩ‐n nar ƴɛ kʋʋl too paar Juifisɔɔ Thãgba fʋɔr cʋɔrɔ. Nɩ‐n nar dakha wo tɩbɩla na‐n fʋɔrɛ nɩ kɔ̃tɩ̃ fʋɔrʋʋ ƴatɔɔsɔ. 44Nɛrɛ ga puu narɛ, gɩdonɩ nɩ hʋrɛ kaakɛ tɩbɩla n saarnɩ, gɩdonɩ ga yɩr dɩ wɩ jɩ kaa ga.

45Dɩ jɔfʋ dɩɩrdaar bɩɛl sʋʋraa: Dɩɩrdaar, thalera fɩ‐n mɩɩnɩ, sɛr fɩ‐n nɩɩr dakha. 46Dɩ Jeju birsee: Nɛr jɔfʋ dɩɩrdarasɔ ga puu narɛ dakha, gɩdonɩ nɩ‐n heene tɩbɩla heendaasɔɔkɛ dɩbarɔnɩ, sɩ wo na‐n thar heendaasɔrara na nyɔ̃ɔ fɩɩʋrakaˈ.

47Nɛrɛ ga puu narɛ, gɩdonɩ nɩ‐n mɩrɛ Thãgbaa bobonasɔɔkɛ anɩ mama thɩ kɔ̃tɩ̃sɔ kɔɔ kʋʋrnɩɩ ka. 48Nɛr dʋɔn wɩrɛ n nɛnanɩ mɔ̃ anɩ mama thɩ kɔ̃tɩ̃sɔɔ thɔna hanɩ, dɩ nɩ tu ger gɩdonɩ wɛr, wɛr kɔɔ kʋʋrɛ Thãgbaa bobonasɔ. Sɩ nɛrɛ, nɛr n mɛ awɩ kasɔ. 49Gɛr dɔ kɩrʋ dɩ kpɛsɛrɛɛkɛ thɛnɩ Thãgbaa pa so ayɩ: Ma thɔ̃ warɛ bobonasɔ na thɔ̃thɔnasɔ. Wa kʋʋrɛ wɛ wɛrra, dɩ ɩkhasɔ wa hʋɔl warɛ. 50Gɛrra na dɔ nɔɔ dɩphã dɩ sor na heen nĩdaraakɛ Thãgbaa bobonasɔ fɛʋʋ tɔmɩnaakɛ wɩ kɔɔ deernɩ kɛkɛkɛ dɩɩ fʋna thɩɩkɛɛ ti bɔɔ, 51Abɛlɩ tɔmɩ̃ gɩ fʋna a dana Jakarɩɩda, kɛ wɩ kɔɔ kʋnɩ bonɩ ji paar na Thãgba fʋɔr cɔ thɩ̃thɩɩn. Ɔɔ mɩ so narɛ, sor na heene nĩdaraakɛ gɩ do tɩbɩla fɛʋʋlee tɔmɩ̃ dɔ nɔɔ.#Jən 4:8; 2 Kur 24:20–21 52Ga puu narɛ nɛr jɔfʋ dɩɩrdarasɔ, gɩdonɩ nɩ tire lakileekɛ n khɛranɩ jɩɩr, dɩ anɩ thɛthɛ na‐n lonaˈ, wɩrɛ n ƴaalɛnɩ wɩ lõ na‐n sɩ war wo wɩ lona ga.

53Ɔbɔɔkɛ Jeju thenɩ paarɩle, jɔfʋ dɩɩrdarasɔ na jɔfʋ bʋ dʋdarasɔ mar dɩ wa‐n gbʋɔrʋʋ na nĩkhii, gɩ cʋgʋʋ a mɩɩ thɩ̃ɛ jɔɔjɔɔ; 54gɩdonɩ wɩ nʋɔrɛ wɩ fʋʋ dɩkhaa thɩmɩɩraakɛ na thɛnɩ ɔɔ nɔɔ.

Currently Selected:

Luki 11: LOBIRI

Highlight

Copy