Exodus 7
7
1Gai Tagi Maolunga ga hai ange gi Moses, “Au e hai naa goe gi bei dagodo o de Maadua i daho Pharaoh, gai doo daina daane go Aaron e bei naa dagodo o de pelaabisi i oo daha. 2Gai koe ga tala ange gi doo daina go Aaron mee alodahi aagu e tala adu gi de goe, gai ia ga tala ange gi Pharaoh, gi dugua ai e ia de gau Israel gi hulo gee mai i dono henua. 3Aagai au e hagamakaga naa lodo o Pharaoh, gai au ga hai agu hagailonga lagolago ma mee hagalele mouli i de henua go Egypt,#Acts 7.36 4aagai Pharaoh e dee hagallongo adu naa donu gi de goe. Gai au e hagaduasala naa Egypt, ga dagi dogu huaadangada go de gau Israel ga kave gee mai i de henua go Egypt, 5gi iloo ai de gau Egypt bolo go au donu go Iahweh, i de masavaa aagu e hagaduasala ai gilaadeu, ga kave gee de gau Israel mai i olaadeu daha.”
6Gai Moses ma Aaron ga hai gu bei muna a Tagi Maolunga gu tala ange gi gilaau. 7Gai Moses gu madavalu ono ngadau, gai Aaron gu madavalu ma dolu ono ngadau, i de masavaa olaau ne hulo ai ga tala ange muna nei gi Pharaoh.
Togo o Aaron
8Gai Tagi Maolunga ga hai ange gi Moses ma Aaron, 9“De masavaa naa huu a Pharaoh e hai adu ai gooluu gi haia dahi mee hagalele mouli, gai koe ga hai Aaron gi dilia iho dono dogo i mada luu mada o Pharaoh, gai togo laa e sui naa ga se labodo.”
10Gai Moses ma Aaron ga hulo gi daho Pharaoh ga hai donu gu bei muna a Tagi Maolunga gu tala ange gi gilaau. Aaron ne tili iho dono dogo gi lalo i madamada o Pharaoh ma ono dangada hai hegau, gai togo laa gu sui ga se labodo. 11Gai Pharaoh ga hagahi ono daane heiangi ma de gau hai huuhuaa mee; gai de gau hai huuhuaa mee o Egypt ga hai hogi olaadeu dogo gu ni labodo. 12Gilaadeu alodahi ne tili iho hogi olaadeu dogo gi honga de gelegele, gai denga dogo laa gu sui ga ni labodo. Aagai togo o Aaron ga holo denga labodo ange laa. 13Gai Pharaoh goi hagamakaga huu ono lodo; ia tee hagallongo ange gi alaau muna, bei de hai a Tagi Maolunga gu tala ai laa.
Denga vai gu ni dodo
14Gai Tagi Maolunga ga hai ange gi Moses, “Pharaoh goi hagamakaga huu ono lodo, ia e dee lodo e dugu de huaadangada naa gi hulo. 15Hannoo gi daho Pharaoh i boo taiao, i de masavaa oona e hano ai gi de vai; gai koe hannoo basa ange gi de ia i gaogao ssaalingaa vai go Nile, gai koe gaavee togo ne sui laa ga se labodo madali goe. 16Gai koe ga hai ange gi de ia, ‘Iahweh, de Maadua o de gau Hebrew, ne hai au gi humai gi oo daha, gi hai adu: Dugua dogu huaadangada gi hulo gi daumaha mai gi de au i de vao. Gai tilo, koe tigi hagallongo mai donu ga dae mai ai gi iainei. 17E hagadaba Tagi Maolunga: De mee nei se hai gi iloo ai e goe bolo go au donu go Iahweh. Au e hagaili naa honga ssaalingaa vai go Nile i togo i lo togu lima nei, gai denga vai iai e sui naa ga ni dodo.#Rev 16.4 18Gai denga mamu i lo te saalingaa vai go Nile e odi naa i de maakau, ga hai de vai laa gu pilo, gai de gau Egypt e kino naa i de unu vai o de Nile.’ ”
19Gai Tagi Maolunga ga hai ange gi Moses, “Hai ange gi Aaron ia gi boogia dono dogo gi haalo ina ange gi honga denga vai alodahi o Egypt; go honga alaadeu leevaa ma saalingaa vai, ma geelonga iai laa vai, aama mommee alodahi e dugu ai vai, gai denga vai e sui naa gi ni dodo. Gai gi ni dodo ai denga vai alodahi i honga de henua go Egypt, ma denga vai hogi i lodo mee hao vai laagau aama mee hao vai hadu.”
20Gai Moses ma Aaron ne hai donu ga bei muna a Tagi Maolunga gu tala ange gi gilaau; Aaron ne haalo togo ga hagaili ai honga ssaalingaa vai go Nile i mada i mua o Pharaoh ma ono dangada hai hegau, gai denga vai alodahi o de Nile gu sui ga ni dodo. 21Gai mamu i lo te saalingaa vai go Nile gu odi i de maakau. Gai vai o de Nile gu hagapilo; de gau Egypt gu dee maua i de unu ai, gai vai alodahi i honga de henua go Egypt gu ni dodo.
22Aagai denga daane hai huuhuaa mee o Egypt ga helau hogi hanu vai gu ni dodo. Gai Pharaoh tee sui donu de makaga ono lodo; ia tee hagallongo ange gi Moses ma Aaron, bei de hai a Tagi Maolunga gu tala ai laa. 23Gai Pharaoh ga huli ga ahe gi dono hale, ia tee anga ange donu gi mee laa. 24Gai de gau Egypt alodahi ga geli luu baasi o ssaalingaa vai go Nile e ssala ai hanu vai unu, i hiidinga gilaadeu gu dee maua i de unu vai i lo te Nile.
Denga kailu
25De masavaa laa gai gu hidu laangi i dua de hai a Tagi Maolunga ga dee maua i de unu vai i lo te Nile.
Currently Selected:
Exodus 7: DBD
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
