Luke 10
10
De hai gi hulo o tinohidu ma dogolua
1Dua mee nei, gai Tagi Maolunga ne hili e dinohidu ma dogolua#10.1 dinohidu ma dogolua: hanu beebaa Greek ange laa e hai ange dinohidu (diiloo hogi de gubu e 17). dangada ga hai gi hulo dagi dogolua i ono mada i mua, gi denga aduhale ma mommee alodahi oona gu dai hano aagena. 2Gai ia ne hai ange gi gilaadeu, “Gu laumalie mmao tau gai, gai gu sogoisi de gau hai hegau. Deenei ai, goodou dangidangi ange gi de Ia Aamua o tau gai, ia gi haia gi hulo de gau hai hegau gi dana dau gai.#Mat 9.37-38 3Goodou hulo! Tilo, au e hai goodou gi hulo bei dagodo o denga ssiibi gauligi i magavaa o denga wolf.#Mat 10.16 4Gai goodou e dee kave hanu mee hhao sseene, be ni beagi, aabe ni mee vae, goodou e dee tuu hogi e hagaboo ange gi dangada i honga de haiava.#Mat 10.7-14; Mark 6.8-11; Luke 9.3-5
5Gai dee hee naa huu de hale oodou ne ulu ai, aagai goodou ga hai ange, ‘De baba gi dagodo i de hale nei.’ 6Gai noo e hanu dangada e heohi i de kave de baba i kilaa, gai de baba i oodou daha gi dagodo hogi i ono daha; aagai noo e deai, gai de baba i oodou daha gi ahe adu gi goodou. 7Gai goodou ga nnoho i de hale e abodonu adu gi goodou, ga gaimee i kilaa ma de unu i mee alaadeu e gaavadu gi goodou; go hiidinga e heohi donu de kave a tangada hai hegau ono mee e gaimee ai. Gai goodou e dee hulo gi hagadaga saele i denga hale.#1 Co 9.14; 1 Ti 5.18
8Gai noo gu ulu goodou i dahi aduhale, gai dangada i kilaa e abodonu adu gi goodou, gai goodou gaina mee alaadeu e gaavadu gi goodou. 9Gai goodou ga hagaieiangi magi i kilaa ma de hai ange gi gilaadeu, ‘Gu baa mai donu de nohoanga hodooligi o de Maadua gi goodou.’ 10Gai noo goodou gu hulo gi dahi aduhale gai dangada iai e dee abodonu adu, gai goodou ssao hulo gi honga de haiava, ga hai ange,#Acts 13.51 11‘Gimaadeu e luuluu donu hogi denga gelegele o doodou aduhale gu pigi mai laa gi omaadeu vae, e hai baasi adu ai gi goodou; gai goodou gi iloo bolo de nohoanga hodooligi o de Maadua gu baa mai donu!’ 12Au e hai adu gi goodou: Sodom e danuaa ange i de aduhale laa i de laangi hagamodu muna.#Gen 19.24-28; Mat 11.24; 10.15
E vakaa naa denga aduhale tee daahuli
(Mat 11.20-24)
13“E vakaa naa goe, Korazin! E vakaa naa goe, Bethsaida! Go hiidinga noo denga hegau hagalele mouli ne hai i ooluu daha ne hai i Tyre ma Sidon, gai dangada ne daahuli olaadeu lodo madagidagi ga kahu i malo daladala ma de hulu i lehu!#Isa 23.1-18; Ezk 26.1—28.26; Joel 3.4-8; Amos 1.9-10; Zec 9.2-4 14Aagai de hagaduasala o Tyre ma Sidon e maamaane ange naa i doodou hagaduasala i de laangi hagamodu muna. 15Gai koe, Capernaum! Koe gu hai gi maolunga goe bei de maolunga o de langi? Gai koe e tili iho naa donu gi Hades.#Isa 14.13-15
16Tangada e hagalaangona oodou muna e hagallongo donu agu muna; gai tangada e kino i goodou e kino donu i de au. Aagai tangada e kino i de au e kino donu hogi i de ia ne haia nei au gi humai.” #Mat 10.40; Mark 9.37; Luke 9.48; John 13.20
De aahe mai o tinohidu ma dogolua
17Gai ga aahe mai huu tinohidu ma dogolua, gai gilaadeu gu malangilangi mmao, gai gilaadeu ga hai ange gi Iesu, “Tagi Maolunga, denga hagasaalunga baubau ne hagallongo mai donu hogi gi gimaadeu i doo ingoo!”
18Iesu ne hai ange gi gilaadeu, “Au ne gidee de doo iho o Satan mai i de langi bei dagodo o de uila. 19Tilo, au ne gaavadu gi goodou ssauaa e dagadagahi ai denga labodo hagammau ma manu manga lua gi lalo oodou vae, aama ssauaa e mmahi ange laa i ssauaa o de ia hagabaubau, gai e deai donu se mee daudahi e maua i de hagammae goodou.#Psa 91.13 20Aagai goodou gi dee llodo danuaa i de hagallongo adu o denga hagasaalunga baubau gi goodou; aagai goodou llodo danuaa i hiidinga oodou ingoo gu sisi i de langi.”
De lodo malangilangi o Iesu
(Mat 11.25-27; 13.16-17)
21De masavaa laa gai Iesu ne malangilangi mmao i daho de Hagasaalunga Dabu, ga hagadaba, “Au e tuhi goe, Tamana, Tagi Maolunga o de langi ma henua i lalo, go hiidinga koe ne hagammuni mee nei i gilaadeu e heiangi ma de iloo mee, gai gu hagaago ange gi denga gauligi vaaligiligi. Uaa, Tamana, aanei donu oo lodo.
22Dogu Damana gu dugu mai mee alodahi gi de au. Gai e deai donu e iloo be goai go Tama gai go Tamana donu huu; e deai ange hogi e iloo be goai go Tamana gai go Tama donu huu, aama tangada a Tama e lodo e hagaago ange aagena.” #John 3.35; 10.15
23Iesu ne huli ange gi ana dangada agoago ga hai ange gi gilaadeu, “Goodou gu manuuia i doodou gidee mee nei! 24Au e hai adu gi goodou, e soa pelaabisi ma hodooligi ne llodo gi gidee e gilaadeu mee oodou gu gide naa, gai gilaadeu tee gidee. Gilaadeu ne llodo e hagallongo mee oodou gu langona, aagai gilaadeu tee langona!”
De mee hagasengasenga o taane Samaria danuaa
25Dahi dangada agoago o de hainga ne duu age hogi ga hagatale Iesu ga ssili ange, “Tangada Agoago, se aha aagu e hai gi maua ai e au de mouli e dee ngado mai?” #Mat 22.35-40; Mark 12.28-34
26Iesu ne hai ange gi de ia, “Aahee muna gu sisi laa i de hainga? Gai dee hee dau hai gu daulia ange ai laa?”
27Taane laa ne hai ange gi de ia, “Koe gi aloha i Tagi Maolunga doo Maadua i oo lodo alodahi, ma doo hagasaalunga alodahi, ma oo mahi alodahi, aama au maanadu alodahi. Gai koe gi aloha i tangada e baa adu gi de goe,#10.27 tangada e baa adu gi de goe e bei go dangada alodahi e dee hilihili. bei doo aloha donu i de goe.” #Lev 19.18; Deut 6.5
28Iesu ne hai ange gi de ia, “E heohi au muna, hannoo haia de mee nei gi mouli ai goe.” #Lev 18.5
29Gai ia ne lodo e hagaheohi donu huu ia, deelaa ai, ia ne ssili ange gi Iesu, “Goai tangada e baa mai gi de au?”
30Iesu ne hai ange gi de ia, “E dahi daane ne humai i Jerusalem e hano gi Jericho, gai de gau gaiaa ne daa ia gu dai magau ga hagaui ono malo, ga tili ia i kilaa gai ga saavini ga hulo gee. 31Gai dahi dangada haimeedabu ne humai hogi i de haiava mau, ga gidee e ia taane laa, gai ia ga daa gi de baasi gee de haiava ga hano ai. 32Aagai e bei ai hogi dahi dangada de aamuli o Levi, de masavaa huu oona ne humai ai laa kilaa ga gidee e ia taane laa, gai ia ga daa hogi gi de baasi gee de haiava ga hano ai. 33Aagai e dahi daane Samaria ne humai hogi laa kilaa, gai de masavaa huu aana ne gidee ai taane laa, gai ia gu lodo aloha i de ia.#2 Ch 28.15 34Gai ia ga hano ga saabini ono maanuga ga llingi ange lolo ma uvaini aagena. Gai ia ga hagauda ange taane laa gi honga dana manu, ga kave ia gi de hale gaainga ga tilo ange ai ia. 35De laangi i ono dua gai taane Samaria ne gaavange e lua denarius gi tangada niiona de hale gaainga laa. Gai ia ga hai ange gi de ia, ‘Diiloo ange taane nei, gai be ni aha ange naa huu aau ne bale ange ai taane nei, gai au ga hagaodi ange de hagao.’
36Dee hee dau maanadu, goai i magavaa o denga daane dogodolu laa e baa ange gi taane ne daia laa e de gau gaiaa?”
37Tangada agoago o de hainga laa ne hai ange, “Go taane ne lodo aloha ange laa gi de ia.”
Iesu ne hai ange gi de ia, “Hannoo ago ange i de ia.”
Iesu i daho Martha ma Mary
38De masavaa o Iesu ma ana dangada agoago e seesee i honga de haiava, gai Iesu gu dae gi dahi aduhale, gai de hine go Martha ga abodonu ange ai gi de ia i dono hale.#John 11.1 39Gai Martha e dahi ono daina hahine, dono ingoo go Mary. Mary ne humai ga noho i gaogao luu vae o Tagi Maolunga ga hagallongo ai ana agoago. 40Aagai Martha e dee saohia i de hagadabena mee alodahi. Gai ia ne humai ga hai ange gi de ia, “Tagi Maolunga, koe e dee gidee naa donu bolo dogu daina e tili mai donu huu au gi haia sogosogo amaau hegau? Hai ange ia gi balea mai au!”
41Aagai Tagi Maolunga ne basa ange ga hai ange gi de ia, “Martha, Martha! Koe e manavasaa ma tee baba oo lodo i mee lagolago, 42aagai e dahi donu huu mee e heohi i de hai. Gai Mary gu hili de mee e kii ange tanuaa, gai e dee maua donu i de kave gee mai i ono daha.”
Currently Selected:
Luke 10: DBD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
