Luke 7
7
De ieiangi o tangada hai hegau o tagi o de lau
(Mat 8.5-13)
1Gai ga lava huu i de tala ange a Iesu ana muna alodahi gi dangada, gai ia ga hano gi Capernaum. 2Gai e dahi dangada hai hegau o tagi o de lau gu magi ma gu dai magau, gai se daane hagamogomogo i daho dono dangada aamua. 3Aagai ga langona huu e tagi o de lau laa dagodo hegau a Iesu, gai ia ga hai gi hulo hanu dagi o de gau Ssuu, gi dangidangi ange gi Iesu, ia gi humai gi hagaieiangi ina dono dangada hai hegau. 4De masavaa olaadeu ne loomai ai gi daho Iesu, gai gilaadeu ne dangidangi hagammahi ange ga hai ange, “Ia se daane e heohi dau bale ange, 5go hiidinga ia e aloha i taadeu huaahenua, gai go ia ne hagaduulia demaadeu synagogue.” 6Gai Iesu ga hano madali gilaadeu.
Gai dono masavaa huu ne dai baa ange ai gi de hale o tagi o de lau laa, gai taane laa ga hai gi loomai hanu ono soa gi hai ange gi Iesu, “Tagi Maolunga, aude hagadee saohia ina goe, go hiidinga au e dee bau ange gi doo humai gi dogu hale. 7Aanei hiidinga oogu tee hanadu ai nei gi oo daha. Aagai koe basa donu huu gi ieiangi ai dogu dangada hai hegau. 8Go hiidinga au se dangada hogi e noho i lalo ssauaa o dahi, gai e soa daane hebagi i ogu lalo. Gai noo au e hai ange gi dahi, ‘Hannoo!’, gai ia ga hano; be au e hai ange gi dahi, ‘Humai!’, gai ia ga humai; aabe au e hai ange gi dogu dangada hai hegau, ‘Haia de mee nei!’, gai ia ga hai.”
9De masavaa huu a Iesu ne langona ai muna nei, gai ia gu lele ono mouli i taane laa, gai ia ga huli dua ga hai ange gi dangada e daudali ange laa i de ia, “Au e hai adu gi goodou, au tigi gidee dahi gai laumalie bee nei i daho de gau Israel.” 10Gai ga ahe huu dangada hai hegau o taane laa gi de hale o delaadeu dagi laa, gai gilaadeu gu gidee tangada hai hegau e magi laa gu ieiangi.
De hagamouli age o tama a de hine gu magau dono bodu
11De laangi i ono dua, gai Iesu ne hano gi de aduhale go Nain. Gai ana dangada agoago ma dangada soa ne hulo hogi madali ia. 12Gai ga dae huu Iesu gi de haitoga o de aduhale laa, gai ia gu gidee dangada soa e saabai dahi daane magau e kave e danu, gai se dama dagidahi nii dahi hahine gu magau dono bodu. Gai e soa hogi dangada mai i de aduhale ne loomai madali de hine laa. 13Gai de masavaa huu a Tagi Maolunga ne gidee ai de hine laa, gai ia gu lodo aloha i de ia, gai ia ga hai ange gi de ia, “Aude dangi.”
14Gai Iesu ga hano ga poo ange de ngavesi, gai dangada e sabaia ga tuu. Gai ia ga hai ange gi taane magau laa, “Tama daane, au e hai adu gi de goe, hidi age!” 15Gai tama daane laa gu noho age ga basa. Gai Iesu ga gaavange ia gi dono dinana.
16Aagai dangada alodahi i kilaa gu maatagu mmao, gai gilaadeu ga tuhi de Maadua ga hagataba, “Dahi pelaabisi maolunga gu humai gi odaadeu daha, gai de Maadua gu humai gi daho ono dangada!” 17Gai gu dele longo o mee laa i Judea ma henua alodahi e paa ange gi kilaa.
Iesu ma John taane Babudaisi
(Mat 11.2-19)
18Gai de masavaa huu a denga dangada agoago a John ne tala ange ai gi de ia mee laa alodahi, gai ia ga hagahi e dogolua ana dangada agoago, 19ga hai gilaau gi hulo gi siilia ange gi Iesu, gi hai ange, “Go koe de ia gu tala laa bolo e humai, aabe gimaadeu e tali ange dahi dangada gee?”
20Luu dangada laa ne hulo ga hai ange gi Iesu, “John taane Babudaisi ne hai gimaau gi loomai gi siilia adu be go koe de ia e humai laa aabe gimaadeu e tali ange dahi dangada gee.”
21De masavaa laa gai Iesu e hagaieiangi dangada soa ma de hai gi hulo gee hagasaalunga baubau, gai e soa hogi dangada dee kide gu kide. 22Gai Iesu ga hai ange gi luu dangada agoago laa, “Gooluu hulo daalaa ange gi a John ooluu mee gu langona ma de gidee: de gau dee kide gu gidee, de gau balagelage gu seesee, de gau mmagi lebelaa gu gilimalali, de gau longoduli gu langona, de gau maakau gu mouli age, gai de longo danuaa gu tala ange gi de gau hagaau aloha.#Isa 35.5-6; 61.1 23Gai e manuuia tangada e dee ahe dua i ogu hiidinga!”
24Gai ga hulo huu luu dangada agoago a John, gai Iesu ga tala ange gi dangada i dagodo o John, “Se aha oodou e hulo laa e tilo i de vao? Se madila e iliilihia saele i de madangi? 25Gai se aha donu oodou e hulo laa e tilo? Se dangada e gahu i malo danuaa? Tilo, dangada e kahu i malo danuaa e nnoho i lodo hale o denga hodooligi. 26Gai se aha ai oodou e hulo laa e tilo? Se pelaabisi? Uaa, au e hai adu gi goodou, ia e maolunga ange donu i de pelaabisi. 27Deenei taane gu sisi laa ono dagodo ma e hai ange,
‘Tilo, au e hai gi hano dogu dangada hagailoo i oo mada i mua,
gi hagadabena ina de haiava i oo mada i mua.’ #Mal 3.1
28Au e hai adu gi goodou, e deai ange donu se dangada ne haanau i daho denga haahine e maolunga ange i John. Aagai de ia e maolalo i de nohoanga hodooligi o de Maadua e maolunga ange i de ia.”
29Gai de masavaa a dangada ma de gau hagabudu taagisese ne langona ai muna nei, gai gilaadeu ga hagataba bolo de Maadua e heohi donu, go hiidinga gilaadeu gu lava i de babudaisi i de babudaisi a John.#Mat 21.32; Luke 3.12 30Aagai denga Pharisee aama de gau agoago o de hainga ne hagangadi mee de hagatau a de Maadua, gilaadeu tee babudaisi i daho John.
31⌊Gai Iesu ga hai ange gi gilaadeu,⌋ “Se aha aagu e hagadagodo ange aagena de atangada nei? Gai aahee olaadeu hagadagodo? 32Gilaadeu e bei dagodo o denga gauligi e nnoho laa i de mommee hagao mee, ma de hagadau pasa i olaadeu magavaa,
‘Gimaadeu e hagadangidangi i denga flute,
gai goodou e dee aanu!
Gimaadeu e daahili i taahili o de magau,
gai goodou e dee tangi!’
33Go hiidinga John taane Babudaisi ne humai, gai ia tee gai pelaoaa aabe ne unu uvaini, gai goodou ne hagataba, ‘De hagasaalunga baubau e noho i ono daha.’ 34Aagai Tama a Tangada ne humai ga gaimee ma de unu, gai goodou ne hagataba, ‘Ia se dangada aagai ma de lodo e unu mee vii, gai se soa niio de gau hagabudu taagisese ma de gau baubau!’ 35Gai de heiangi o de Maadua gu hagaago mai bolo e heohi i daho ana dama alodahi.”
Iesu i de hale o Simon, de Pharisee
36Dahi Pharisee ne ssala ange Iesu gi humai e gaimee i dono hale. Gai ia ne hano gi de hale o de Pharisee laa ga noho i teebele ga gaimee ai. 37Gai tilo, dahi hahine haisalasala i de aduhale laa, gu iloo e ia bolo Iesu gu noho ma e gaimee i de hale o de Pharisee laa. Gai ia ga gaamai dahi manu alabaster iai vai hagamanongi,#Mat 26.7; Mark 14.3; John 12.3 38gai ia ne humai ga duu i ono dua i gaogao luoono vae ga dangi ai, gai ia ga daamada de hhui luoono vae i ono loimada, ga hagammasa i ono ngaangaaulu, aama de osooso luoono vae ga hagamanongi i de vai laa.
39Gai de masavaa huu a de Pharisee laa ne gidee ai mee gu hai laa, gai ia ga maanadu i ono lodo ga hagadaba, “Noo se pelaabisi abodonu taane nei, gai ia e iloo donu dagodo o de hine e boogia ange nei ia. Ia se hine haisala!”
40Gai Iesu ga hai ange gi de Pharisee laa, “Simon, e hanu agu muna e lodo e tala adu gi de goe.”
Simon ne hai ange, “Tangada Agoago, daalaa mai au muna.”
41Iesu ne hai ange, “E dahi daane e dogolua dangada e muli ange gi de ia. Dahi e muli ange i e limalau denarius, gai dahi e madalima. 42Gai gilaau tee maua i de hagao alaau muli, gai ia ga degi ange gi alaau muli. Gai goai naa i olaau magavaa e kii ange dono aloha i taane laa?”
43Simon ne hai ange, “Au e hagadaba bolo go taane e lagolago laa ana muli.”
Iesu ne hai ange gi de ia, “E heohi donu au muna.”
44Gai Iesu ne huli ange gi de hine laa, gai ia ga hai ange gi Simon, “Galo ange diiloo de hine nei. Au ne humai gi doo hale, gai koe tee gaamai hanu vai e hhui ai luoogu vae, aagai de hine nei gu hhui luoogu vae i ono loimada ma de hagammasa i ono ngaangaaulu. 45Koe tee oso au, gai de hine nei tigi helui donu dana osooso luoogu vae mai i taamada dogu ulu i doo hale ga dae mai ai gi iainei. 46Koe tee hagasulu dogu biho i de lolo, aagai de hine nei gu hagasulu luoogu vae i de vai manongi. 47Deenei ai, au e hai adu gi de goe, dono aloha e laumalie, i hiidinga ono haisala e lagolago gai gu degi ange aagena. Aagai tangada ne damaa mee de mee ne degi ange ai gi de ia, e damaa mee hogi dono aloha.”
48Iesu ne hai ange gi de hine laa, “Au gu degi adu gi oo haisala!”
49Gai gilaadeu e nnoho laa ma e gaimee madali ia ne hagataba i olaadeu lodo, “Goai taane e maua nei e ia i de degi ange gi denga haisala?”
50Iesu ne hai ange gi de hine laa, “Doo gai gu hagaola goe, hannoo i de baba.”
Currently Selected:
Luke 7: DBD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
