Luke 8

Denga haahine madali Iesu

1Dua mee laa gai Iesu ne hano ga hagadaga i denga aduhale nnui ma aduhale vaaligiligi ga agoago ai, ma de hagadele de longo danuaa o de nohoanga hodooligi o de Maadua. Gai tinoangahulu ma dogolua ne hulo madali ia, 2gai e hanu hogi haahine ne hai ga hulo gee denga hagasaalunga baubau mai i olaadeu daha ma de hagaieiangi mai i denga magi ne hulo madali gilaadeu: Mary (dahi ono ingoo laa go Magdalene), deenei de hine ne hulo gee mai i ono daha e hidu hagasaalunga baubau;#Mat 27.55-56; Mark 15.40-41; Luke 23.49 3ma Joanna de bodu o Cuza, go taane e diiloo ange mee o Herod, aama Susanna. E soa ange haahine ne balea ange gilaadeu i olaadeu goloa donu.

De mee hagasengasenga o tangada doo golee

(Mat 13.1-9; Mark 4.1-9)

4Gai de masavaa o dangada soa ne hagabuni mai ai gi ono daha i denga aduhale, gai ia ne hai ange gi gilaadeu i dahi mee hagasengasenga: 5“E dahi daane hai veelenga ne hano e doo ana golee. Gai de masavaa huu aana ne hagamalili ai ana golee, gai hanu gu too ange gi gaogao de haiava, gai dangada ne dagadagahi gi lalo olaadeu vae, gai denga manu llele ga loomai ga gai. 6Hanu ne too ange gi de mommee haduhadua, gai de masavaa huu ne ssomo age ai, gai ne moolau donu de mmae, go hiidinga e dee suungia i kilaa. 7Hanu ne too ange gi magavaa o denga manu daladala, gai denga manu daladala ga ssomo age ga haoli. 8Hanu ne too ange gi honga de bela danuaa, ga ssomo age ga hhua mai ai e dagillau.”

Gai ga lava huu i dana tala ange mee nei, gai ia ga hai ange, “Be goai e hanu ono dalinga e hagallongo ai, gai ia gi hagalaangona.”

Hiidinga o denga mee hagasengasenga

(Mat 13.10-17; Mark 4.10-12)

9Gai ana dangada agoago ne ssili ange gi de ia de hagadoonunga o de mee hagasengasenga laa. 10Ia ne hai ange, “Gu dugu adu gi goodou gi maua i de tonu ange, gi mee o de nohoanga hodooligi o de Maadua e dee iloo laa, aagai e tala ange donu huu gi dangada ange laa i muna hagasengasenga;

‘gi gidee ai e gilaadeu gai e dee madea,

gai gi langona ai e gilaadeu gai e dee tonu ange aagena.’ #Isa 6.9-10

De hagadonu o de mee hagasengasenga o tangada e dooa golee

(Mat 13.18-23; Mark 4.13-20)

11“Deenei de hagadoonunga o de mee hagasengasenga laa: denga golee laa go muna a de Maadua. 12Golee ne too ange laa gi gaogao de haiava, go dangada e langona laa muna nei; gai de ia hagabaubau laa ga humai ga kave gee muna laa i olaadeu lodo, gi dee hagadonusia ai e gilaadeu, gai gilaadeu gu hagamouli. 13Aagai golee ne too ange laa gi de mommee haduhadua, go dangada e malangilangi laa i de kave muna a de Maadua, i de masavaa alaadeu ne langona ai, aagai e deai olaadeu aga. Gilaadeu ne hagadonusia i dahi damaa masavaa, aagai de masavaa huu o denga hagatale, gai gilaadeu gu aahe dua. 14Gai golee ne too ange laa gi magavaa manu daladala, go dangada ne langona laa muna nei, aagai ga hulo gee huu gilaadeu, gai muna laa gu haolia i denga maanadu hagamanavasaa, ma de lava, aama mee hagalodo danuaa alodahi o de mouli nei, gai olaadeu hua e dee maua gi maatua. 15Gai denga golee ne too ange laa gi honga de bela danuaa, go dangada e langona laa muna a de Maadua ga dugu i olaadeu lodo i de heohi ga daudali ai, gai gilaadeu gi lodo mmahi ga dae ai gi delaadeu hagadili hua.

De laama e haoli ange laa

(Mark 4.21-25)

16“E deai se dangada e haula ina de laama ga haoli ange i de bagede, aabe dugu i lalo de moenga, aagai e gaavage gi honga de mommee dugu laama, gi gidee ai e dangada e ulu i de hale de maalama.#Mat 5.15; Luke 11.33 17Mee alodahi e hagammuni e odi naa donu i de hagaago mai, aagai mee e dee iloo laa e odi naa i de hai ga iloo.#Mat 10.26; Luke 12.2 18Deenei ai, goodou diiloo maalie doodou hai e hagallongo ai; go hiidinga be goai e hanu ana mee, e gaavange naa donu gi de ia; gai be goai e deai ana mee, gai e kave gee donu mee aana e hagadaba bolo e hanu i ono daha.” #Mat 25.29; Luke 19.26

Tinana ma daina o Iesu

(Mat 12.46-50; Mark 3.31-35)

19Tinana o Iesu ma ono daina daane ne loomai e tilo ia, aagai gilaadeu gu dee maua i de hedae ange gi de ia i hiidinga de soa dangada. 20Gai dahi dangada ne hai ange gi Iesu, “Doo dinana aama oo daina daane e tuu i duaahaho, gilaadeu e llodo e hedae adu gi de goe.”

21Aagai ia ga hai ange gi dangada, “Dogu dinana aama ogu daina daane go gilaadeu e hagalangona laa muna a de Maadua ga hai hegau ai.”

De hagasee a Iesu de madangi mmahi

(Mat 8.23-27; Mark 4.35-41)

22Dahi laangi gai Iesu ne gage i de boose madali ana dangada agoago, gai ia ga hai ange gi gilaadeu, “Gidaadeu ga hulo gi de baasi laa de vai.” Deelaa ai, gilaadeu ne dele ga hulo. 23Gai de masavaa olaadeu e dele ai ga hulo gai Iesu gu seni. Aagai gu dau de madangi mmahi i honga de vai laa, gai denga beau gu haohaoa mai lo te boose ma de hagamanavasaa.

24Gai ana dangada agoago ga loomai ga hhango ange ia, ga hai ange, “Tangada Aamua, Tangada Aamua! Gidaadeu ga maakau nei!”

Aagai Iesu ga alahage ga hagasee de madangi mmahi ma denga beau; gai gu malino. 25Ia ne hai ange hogi gi ana dangada agoago, “I hee ai oodou kai?”

Gai gilaadeu gu llele mouli ma de maatagu ga hagataba i olaadeu magavaa, “Goai taane nei? Ia ne hagasee de madangi ma beau gai gilaau gu hagallongo ange gi de ia!”

De hagaieiangi o taane iai hagasaalunga baubau

(Mat 8.28-34; Mark 5.1-20)

26Gai gilaadeu ne tau age i de henua o de gau Gerasene i de baasi laa o Galilee. 27Gai de masavaa o Iesu ne hanage ai gi uda, gai ia gu hedae ange gi dahi daane iai denga hagasaalunga baubau mai i de aduhale. Gai gu daulooloa dono dee gahu aama tee noho i lodo hale, aagai e noho i magavaa denga daanunga. 28Gai ga gidee huu e taane laa Iesu, gai ia ga oo ga hagabaguu gi lalo i ono mada i mua ga hai ange i de leo laumalie, “Iesu, Tama Daane a de Maadua Maolunga Mmao laa, se aha oou e lodo ai i ogu daha? Au e dangidangi adu koe gi dee hagammae ina ngau!” 29Go hiidinga Iesu ne hai ange gi denga hagasaalunga baubau laa gi ssao mai i daho taane laa. Gu lagolago hanonga a de hagasaalunga baubau ne hai ai gi de mahi ia, gai e dee galemu donu gu noonoa luoono vae ma luoono lima i daula baalanga ma de hagaloosi ange, aagai ia ga duuduu denga daula baalanga e nnoa ai laa ia, gai de hagasaalunga baubau ga kave ia gi de vao.

30Aagai Iesu ga ssili ange gi de ia, “Goai doo ingoo?”

Gai ia ga hai ange, “Dogu ingoo go Legion,” go hiidinga e soa hagasaalunga baubau e nnoho i ono daha. 31Gai denga hagasaalunga baubau laa ne dangidangi ange gi Iesu gi dee haia gilaadeu gi hulo gi lo te geelonga e deai laa sono dagelo.

32Gai e dahi hagabuulingaa biigi e gaimee saele i honga tuuduu laa. Gai denga hagasaalunga baubau laa ga dangidangi ange ia gi haia gilaadeu gi hulo gi ulu gi lodo biigi laa. Gai Iesu ga dugu ange. 33Aagai denga hagasaalunga baubau laa ga ssao mai i daho taane laa ga hulo ga ulu gi lodo biigi laa. Gai de hagabuulingaa biigi laa ga saavini iho ga hulo gi lo te vai, gai gilaadeu gu odi i de maalemo.

34Gai ga gidee huu e dangada e diiloo ange laa denga biigi mee gu hai laa, gai gilaadeu ga saavini gi de aduhale ma mommee e paa ange gi kilaa ga tala ai mee gu hai laa. 35Aagai dangada ne loomai e tilo mee gu hai laa, gai ga tae mai huu gilaadeu gi daho Iesu, gai gilaadeu gu gidee taane ne ssao mai laa denga hagasaalunga baubau i ono daha gu noho i gaogao luu vae o Iesu, ia gu gahu gai gu dee libolibo ange, gai gilaadeu gu maatagu. 36Gai dangada ne gidee laa mee laa ne tala dagodo de ieiangi o taane iai laa denga hagasaalunga baubau. 37Aagai dangada alodahi i de ungaamee go Gerasene ga dangidangi ange ia gi hano gee mai i olaadeu daha, go hiidinga gilaadeu gu maatagu mmao. Gai ia ga gage i de boose ga ahe.

38Gai taane nogo iai laa denga hagasaalunga baubau ne lodo mmao e hano madali ia, aagai Iesu ga hai ia gi hano, ga hai ange, 39“Ahe gi doo hale daalaa ange dagodo mee a de Maadua gu hai adu gi de goe.” Gai ia ga hano ga tala dagodo o mee alodahi a Iesu gu hai ange gi de ia, i de aduhale laa alodahi.

Tamaa hine a Jairus ma de hine magi dodo

(Mat 9.18-26; Mark 5.21-43)

40Gai ga ahe huu Iesu gi de baasi laa o de vai, gai dangada ga abodonu ange gi de ia, go hiidinga gilaadeu alodahi e tali ia. 41Gai e dahi daane, dono ingoo go Jairus, ia se dagi i de synagogue, ne humai ga duuduli i gaogao luu vae o Iesu, ga dangidangi ange ia gi humai gi dono hale, 42go hiidinga e dahi donu huu ana damaa hine, ia gu madaangahulu ma lua ono ngadau, gai ia gu dai magau.

De masavaa o Iesu e seesee ai e hano, gai dangada soa gu hagakabi luoono baasi. 43Gai e dahi hahine ne magi dodo i e madaangahulu ma lua ngadau; ia ne gaavange ana mee alodahi gi de gau hai magi, gai teai donu se gilaadeu ne maua i de hagaieiangi ia. 44Ia ne humai gi dua o Iesu ga poo ange huga o dono malo, gai de masavaa laa donu huu gai gu tuu de ssali ono dodo.

45Gai Iesu ga ssili ange, “Goai ne boogia mai nei au?”

Gai ga deai huu dangada e pasa ange, gai Peter ga hai ange, “Tangada Aamua, e soa mmao dangada e duuli ina luoo baasi ma de hagakabi ina goe.”

46Aagai Iesu ga hai ange, “Dahi dangada gu poo mai donu au, au e langona iho de sao o ssauaa i ogu daha.”

47Gai ga gidee huu e de hine laa bolo ia gu dee maua i de mmuni, gai ia ga humai ma de bolebole ga duuduli i mada luu mada o Iesu ga tala ange gi de ia i madamada o dangada alodahi, de hiidinga aana ne poo ange ai ia, aama dono ieiangi i de masavaa laa donu huu. 48Aagai Iesu ga hai ange gi de ia, “Dagu damaa hine, doo gai gu hagaieiangi goe, hannoo i de baba.”

49De masavaa o Iesu e basa ai, gai dahi dangada de hale o tagi o synagogue gu humai, ga hai ange, “Dau damaa hine gu magau, aude hakoso ina Tangada Agoago.”

50Aagai ga langona huu e Iesu, gai ia ga hai ange gi de ia, “Aude madagu; hagadonusia donu huu, dau damaa hine e ieiangi donu.”

51Gai ga dae huu ia gi de hale laa, gai ia tee dugu ange hanu dangada gee gi ulu madali ia, go Peter donu huu ma James ma John, aama luu maadua o tamaa hine laa. 52Gai dangada alodahi i kilaa e tangi ma de tangi see i hiidinga o tamaa hine laa. Aagai Iesu ga hai ange, “Goodou aude tangi, tamaa hine nei tigi magau donu, ia e seni donu huu!”

53Aagai dangada ga kada i ana muna, go hiidinga gilaadeu e iloo bolo tamaa hine laa gu magau. 54Gai Iesu ga poo de lima o tamaa hine laa ga hagahi ange ia, ga hai ange, “Tamaa hine, hidi age!” 55Gai dono hagasaalunga gu ahe mai gi de ia, gai ia ga hidi age i de masavaa laa donu huu. Gai Iesu ga hagadaba bolo gi gaavange hanu mee e gai tamaa hine laa. 56Gai luoono maadua gu llele mouli mmao, aagai ia ga hai ange gilaau gi dee daalaa ange gi dahi mee gu hai laa.

Currently Selected:

Luke 8: DBD

Highlight

Copy