Roca 18

Uima cacattemade amonerre tobaccopero acco icanarrarocca uima

1Zesopa arrirraro namiza imadinicca uimaza pocca zozosse tabaqqui mari icanabaqquirrari. Madirra Deoza uatide dameraqquiri nauiuarrine, —Deopa ouatti mitta-rraraui −quena-rrarauiuarrine uati uati tarrari. 2Nazapa uima arrima narraro uati tarrari: —Oza pananiuarripa uima cacattemade madirrari. Pouapa Deo noppine cappina-rrararrari. Madirraza naco cappina-rrararrari. 3Narraro oza pananiza amonerre maqqui zoqquerrari madirraro. Ponipe uarrirriraza uima cacattemadeza uatide totocca narraro: “Oua acco ticanarri” nanerre narraro. “Madirracca nacasserehe onauana-zanaponi” nanerre narraro. 4Naraha pouapa poni acco canade iborride rarrari. Naraha zotodena bodi uatoza arrama narrari: “Deoza ocappina-rrerani madirradeniza naqui ocappina-rrerani. 5Naraha arri amonerre tobaccopero ouaza tonarro uati carrirezape poni acco ocanana. Acco ocana-rrerezape poni attini ouaza tocasseraqquinitoui” narrari uima cacattemade ibobote. Nazapa poni acco canade touiborarrari −narrari Zeso.

6Nazapa ia Zozossede Zeso attipa: —Rrehe, uima cacattemade bica tarrararraripa atti nama narrari. 7Poua atti nama naraha Deopa nama narrararrari. Pouapa bica tarrari. Pocca tocatterrizabaqquinarra attideni mittarrari. Pouadenipa Deoza ssiuarra uati, zome uati totoquena narrari. Nazapa Deo pouadeni acco icanabaqquiuiuarrinepa narropazarra? Narro-rrarauitoui. 8Narraroa tiadeniza uati onarraroparri: Deopa narro-rraraza tiadeni acco tocanabaqquiuitoui, onarraro. Naraha ouape Madirra Bedi orrarraroa niza occanipomezape occa madirrapa Deo Pouaza uatide dameraqquiri nauiparra napazarra? Pouadeni naco: “Rrehe, Deo oua acco canaui” quequenanauiparra napazarra? onarraro −narrari Zeso.

Marinarra parizeoza rrehe narraricca uima, rromanodenicca taminecca zossenirri ziniro nanaccadecca uima tazarrani

9Zesoza queriqquimanarrari mota bodidenipa: —Rrehe, ouape Moizecca marinarra ouacauanissa tarraro, bica onani −quequenanarrari. Narrari bodideni naco: —Madirra ouassa quena-rrararraridenipa Moizecca marinarra ecauemananissa terrerani, bicaqquiri narraraui −quequenanarrari. Naraha Zesopa narrarideni bodicca uima nauato tazapa arrirraro namiza imadinicca uima uati tarrari.

10—Madirra pamahapa Deoza uati toquenauiuarrine dada toqquimauarri touedezimarrari. Orraria Deoza damera tarrari, pouapa marinarra onini parizeoza rrehe narrari. Ouahapa uimasiri sse tarrari, pouapa rromanodenicca taminecca zossenirri ziniro nanaccade. 11Nazapa marinarra parizeoza rrehe narrari uaza Deoza uati tazapa arrama narrari: “Rrehe Abi Deo, tiaza bica onarraro, ouape pina madirra ouahadenissa onerrerani. Pina bobotidedenissa, pina mamaizadedenissa, pina amonerrecca cauassibotedenissa onerrerarraro. Pina arrarrari rromanodenicca taminecca zossenirri ziniro nanaccadessa onerrerani. Bica onarraro” narrari. 12“Ouape semana uarrirriraza rripehe ohonebocossa narraro. Ouape occa ziniro ouaza totorra narraro mota naqui tiaza da da ohozanapo narraro” narrari.

13—Naraha rromanodenicca taminecca zossenirri ziniro nanaccadepa uarrima uarrari. Madirra ouahadenipa tocattamacossemanaza Deoza uati uati toquenaraha pouapa cappinarra narrari tocatteza narrari. “Uaidira onani” narrari. Poua attipa: “Abi Deo, ouaza teti uana tarri. Ouape uimasiri ocarrini” narrari taminecca zossenirri ziniro nanaccade −narrari Zeso.

14Narraro uima uati taha rricazapa arra —Bica onani −quequenanarrarideniza Zeso attipa: —Nazama ouape tiadeniza uati onarraro. Arrarrari maqquiderre uimasiri sse tarraripa poua bodi tobicazapa pocca ozauarri toccanirrari. Pocca uima Deo sse inerre narraro, Deoza tobicarrari. Naraha madirra ouaha marinarra parizeoza rrehe narraripa Deoza bodi tobica-rrararrari. Pocca uima mota uaidira taniccape Deoza uati tarrarazapa pocca uima Deo sse inerrererre narraro. Rrehe, madirrapa: “Occa biquehe qqui tiquenarri” nanarra narraripa Deoza arramani torrauitoui. Naraha madirrapa: “Ouape arrimani orrani” nanarra narrarina Deo deni inanauitoui −narrari Zeso.

Zesopa: —Abi, ticca biquehe erredeniza tinanarri −narrari

Mateo 19.13-15; Maraco 10.13-16

15Nazapa madirra poccadeni erredeni baziraqquiri narrarideni Zesoza eccarronabaqqui-manarrari, —Zeso tatideni bara inabaqquiza Deoza uati tauiuarrine −quenaza. Naraha Zesocca zozosse tabaqqui qqui toquenazapa attidenia: —Erredenipa poua! Zesouarri teccarronabaqquimana tarrararro! −quenarrari. 16Naraha Zeso pouapa erredenitoui uaua narrari. Poua uatimadedeniza poua attipa: —Pouadeni rrauirronana, onarraro. Eccarronabaqqui-manauiuarrine tecossemana terrerarri. Madirrapa pina arrarrari erredenidenissa quenarrarina Deocca cacaueheza toquerrenauitoui −narrari Zeso. 17—Parrissehera tiadeniza uati onana: Madirrapa poua bodicca rrehenirri pina erredenicca rrehenirrissa narrarazapa Deocca cacaueheza torra-rrarauitoui −narrari Zeso.

Tamine zepe sse tarrari Zesoza uati tarrari

Mateo 19.16-30; Maraco 10.17-31

18Madirra orraria tamine torrarraripa Zesoza uati tarrari: —Nirra Mamaride bicaui nerrecoma oneza camittehe rriquerreranicca bacco onaniuarrine? −narrari. 19Naraha manaco Zeso pouaza uati tarrari: —Nerrecotoui ouaza: “Mamaride bicaui” tarraro? Madirra bicaui noueraui. Deona bica taui orrariui. 20Naraha camittehe rriquerreranicca bacco tinaniuarrinepe Deocca zossenirri Moize dozo inarrarocca nauato tinani. Narraro bazima tecauanissa taqui? Pocca zossenirripe arrima narraro: “Madirra ouahacca amonerre tirra terrerarri. Madirra tinanazoqque-rrararro. Tiboti terrerarri. Maizeheza naqui madirraza ponima uima tinauana terrerarri. Ticca abi, ticca amiza bica tineza tinamadibaqquiuissa tarro” nani Deocca zossenirri Moize dozo inarraro −narrari Zeso.

21Naraha tamine attipa: —Narraro zossenirri bazimape zabisso orrapozama ouacauarronarrarode −narrari. 22Naraha Zeso tamine atti mittazapa pouaza uati tarrari: —Naraha uima orrarie tiaza zori taccani. Ticcaniza tizepetarri manaconiza rridi tinarizarri. Nani narraro zinirope madirra touati nauanaqquiri narrarideniza da tinabaqquiniuarrine. Nema tinanezape niza memeuarri Deocca biquehe tiaza torranitoui. “Nema onana” tezape ouazara damera tinarri −narrari Zeso.

23Naraha taminepa narraro uima mittaza: —Rrehe, nema onana −narrararrari. Poua zepetarritoui, pocca zinirotoui uati uana tarrari. Pouapa zepe sse tarra nazapa bodi ocassera taha ua canarrari. 24Tamine bodi ocassera taui Zeso qqui tazapa uati tarrari: —A, madirra zepedeni sseqquiri narraridenipa Deocca cacaueheza toquerrenauiuarrine narro tani! −narrari. 25—Pina bani imehibote camero etero ssessequi odiniza toqqueqquimauiuarrine parrire-rrerarrarissa narrari. Madirra zepe sse tarraripa Deocca cacaueheza torrauiuarrine ssamo tani −narrari Zeso.

26Nazapa Zeso atti nama naui mittemanazapa madirra attidenia: —Rraho, madirra tocassiuauerauiuarrinepa ssamo tani. Nerrecorrarina tossiuauapazarra? −quenarrari. 27Naraha Zeso attipa: —Madirrapa ssamomo taraha Deozape ssamo terrerani. Pouarrinena madirra tocassiuauerauitoui −narrari.

28Naraha Pedoropa Zesoza uati tarrari: —Ia Maride, iape tiaza rrauirrarizaniuarrinepe icca oza, icca madirra, bazima ineborizabaqquide −narrari.

29Manaco Zeso pouadeniza uati tarrari: —Parrissehera tiadeniza uati onana: Madirra ouaza zepe irriuiuarrinepa pocca oza icanebo, pocca amonerre inebo, poua imecote inebobaqqui, pocca abi, ami inebobaqqui, pocca erredeni inebobaqqui nazapa Deocca cacauehe madirraza torrarizaniuarrine zepe irririzarrari. 30Nazapa niza zotode bazima poua ineborizarrarossa nehe Deorrine carripomauitoui. Rridapana arrirraro namiza poua madiccaza uemani carriuitoui. Niza Deorrine zama zati torreza naqui camittehe rriquerreraniccaza madi-zanapouitoui −narrari Zeso.

Zesopa poua zoqqueuicca uima uati nimanipomarrari

Mateo 20.17-19; Maraco 10.32-34

31Zesopa pocca zozosse tabaqqui 12 quenarrari tezerre Zerozarecca rraui rraui torraza pouadenira ua inabaqquiza pouaza queriqquirrari. Nazapa pouadeniza uati uati zanaporrari: —Arri oza panani Zerozareuarri rrauirremorarrarope nauatoqquiri tiquenani. Ouape Madirra Bedi orrarraroa niza Zerozare bacco inezape arra Deo Atti cacomeraqquiri narrarideni otauimari dozo iquenaporrarope ouaza torranitoui, onarraro. 32Ouape madirra ouaha zodeo querrena-rrararrarideni zepedeniza orranitoui. Narraridenina oua rrarra icanaqquimanarraro, oua itamassoqquimanarraro, oua ppito inaqquimanarraro nanitoui. 33Nezape oua cossi inaqquimanezape aua porimacossaniza oua inanazoqque-maneza oua ppa izemananitoui. Naraha uada pama torrari neza onauatoninitoui −narrari Zeso.

34Naraha pocca zozosse tabaqquiza Zeso poua tauimari uati uati taraha mittemana-rrararrari. Pouadeni bodiza narraro uima auatora tarraro. Pouadenipa: —Rra, poua zoqqueuiuarrinecca uima uati tarrari −quena-rrararrari.

Zesopa Zericocca madirra nocco ssire inanarrari

Mateo 20.29-34; Maraco 10.46-52

35Zesopa oza panani Zericouarri touarrirarronazapa rraui inidiza madirra nocco siri uiuitta narrari. Poua zepe da naza: —Ouaza ziniro da tiquenarri −tatacossa narrari. 36Nazapa madirra bazima pouauarri rraui torreqquimama canaui mittazapa uati tarrari: —Nerrecotoui madirra bazima rraui torreqquimama canarrari? −narrari. 37Naraha pouaza uati toquenarrari: —Zeso Nazaretiuarricca uarrirarronaui −quenarrari. 38Nazapa nocco siri uaua narrari: —Zeso, Dabi Potemaui! Ouaza teti uana tarri, onaua! −narrari.

39Naraha madirra taiderronemanarrari attidenia: —Poni! Zamarrima tarri! −quenarrari. Naraha denima parra uaua tariui uaua tariui narrari: —Tamine Dabi Potemaui! Ouaza teti uana tarri! −napomarrari.

40Nanarra Zeso ccarronaraha mittazapa uaha taui naza: —Rrari, nocco siri arrauarri teccarronemanarro −narrari. Naza eccarronemanazapa pouaza uati tarrari: 41—Nerrecora tiaza onananiuarrine? −narrari. Naraha nocco siripa: —Oua Zozossede, onocco ssire tinanarri, onarraro −narrari.

42Nazapa Zeso: —Rrehe, tinocco ssire tana. Tibodi ouaza parrissa tezape tinomini −narrari. 43Nazapa Zesorrine amazati poua nocco ssire tazapa Zesoza toccarrari. Deoza uatizeri zanaporrari. Madirra bazima naco poua nocco tonomiui qqui toquenazapa uatizemanaza: —Deopa bica taui, bica taui! −quenarrari.

Currently Selected:

Roca 18: KBNT

Highlight

Copy