Roca 19

Zaqueo tauimari

1Zesopa oza panani Zerozareuarri toccauiuarrine taidepa oza panani Zericozaha bacco taporrari. Nazapa Zerico nocconi toqqueqquimauiuarrine toqquezimarrari. 2Naraha nauizapa maqquiderre zepe ssebote madirrari, poua onipa Zaqueo. Pouapa zodeodeniraha rromanodenicca taminecca zossenirri ziniro nanaccadedenicca tamine torrarrari. 3Nazapa —Zeso ccarronaui −quenaui mittazapa Zaqueo bodipa: —Zeso qqui onana −narrari. Naraha pouapa tere tarrarirrine, madirra uapi tazapa Zeso qqui inarrararrari. 4Nazapa Zaqueo madirra rraui torreqquimaui qqui tazapa tezerremadenina rroppa tarrari: —Arri auaza occamaroza Zeso toqqueqquimaui qqui onana −naza auaza toccamarorrari. 5Naraha Zeso Zaqueo uittariuiuarri toqqueqquimazapa Zaqueo auaza uittariui qqui tarrari. Nazapa Zaqueoza uaua narrari: —Nirra Zaqueo, uassinarra ticcaronarri! Ouape rridapana ticca ozauarri omadiccana, onarraro −narrari.

6Nazapa Zaqueo uassinarra ccaronaza Zesoza: —Rrehe, occa ozaza timadiccarri −narrari. Zaqueo pocca ozauarri Zeso iaccanizapa touatizenirrari. 7Naraha madirra bazimapa Zeso Zaqueocca ozaza toqquezimaui qqui toquenazapa pouadenira uimahaha canarrari: —A, Zesopa uimasiri ssebotecca ozazaraha toqquezimaua. Zeso nama nazapa iaza bica terrerani −quenarrari zodeodeni atti, arra rromanodenicca taminecca zossenirri ziniro nanaccadedeniza nacasseraqquiri naza.

8Nazapa ozaza rrassi tozanarra Zaqueo totemaza ia Zozossedeza uati tarrari: —Rrehe oua Zozossede, rridapanape arrima onana: Arra cappiremanarrarideniza ozepetarri arobeni ocanarobenissa tarizezape pouadeniza da onarizana. Nazama arra ocamaizabaqquirrarideniza naqui pina arra ocamaizabaqquiporrarissa nehe pouadeniza da onanina. Nezape pouadeniza narrarossa nehe denima da, denima da, denima da onimanirizaniuarrine−narrari.

9Nazapa Zeso madirra bazima mittemanauiuarrine uati tarrari: —Rrehe, rridapana arrarrari maqquiderrepa pocca uimasiri ineboza Deoza parrissa nazapa pina maittaccazama pocca idi Abarahao Deoza parrissa narrarissa narrari. Nazapa poua, pocca ozacca madirraza naqui Deocca tossiuauehe torrarizani auato tani −narrari Zeso atti. 10—Nazama arri oua Madirra Bedi orrarrarope madirra rrano toquerrenarrarideni pina arrarrari maqquiderressa quenarrari qquide occarronarraro. Uimasiricca zozosse toquerrenarrarissa quenaraha onassiuauabaqquiuiuarrine. Bazima ouaza parrissa quenazapa camittehe rriquerreranicca carrimanauiuarrine −narrari Zeso.

Zesopa ziniro inauapimananiuarrinecca uimaza mari icanabaqquirrari

Mateo 25.14-30

11Zesopa Zaqueoza uati uati tauiza madirra queriqquimanarrarideni mittemanarrari. Zeso Zerozareuarri touarrirarronaza pouadeni bodi attidenipa: —Niza Zeso Zerozareza bacco tazapa amazati Deocca cacauehe torranitoui −quenaraha narraro uima torraniuarrine rrerani. Nazapa Zeso pouadeni bodi uatomanauiuarrinepa arrirraro namiza imadinicca uimaza mari icanabaqquirrari.

12Zeso attipa: —Zama uapimacca tamine deni torrauicca zama onihicca deni toquerrenarrarideni orrariaza uaua narrari: “Tia ocatterrizarraro, ticca zama arobeni cacauade tirraniuarrine. Ouaza uatide arriuarri ticcarronarri” narrari. Nazapa uarri taraha pouauarri uatide toccauiuarrine narrorarrari. Poua bodipa: “Niza occaniza ouape occa zamacca tamine orranitoui” narrari. 13Nazapa toccabote naza pocca zozosse tabaqqui mota 10 quenaha ua inabaqquirrari. Nezape ziniro ccarara uatini ccara tanicca 10 narraro pouadeniza orrari orrari nehe da inarizarraro. Nazapa pouadeniza uati tarrari: “Arrirraro ziniroza mitta, da, mitta, da tarizemanana, ziniro touapiniuarrine. Niza occanizape ouaza nemanehe da tanimananiuarrine” narrari. 14Arra tamine torrauiuarrinepa tamine deni torrauicca madiuiuarri toccarrari. Naraha toccaui nattipa pocca zamacca madirrapa pouaza nacasseraqquiri nazapa madirra zosse inabaqquimanarrari, tamine deni torrauiccaza uati toquenauiuarrine. Bacco toquenaza attidenipa: “Arra ticatterrizarraripa icca tamine torrauiuarrine nacasseraqquiri inani” quenarrari, zama bazimacca tamineza.

15—Naraha tamine deni torrauiccapa attideniza rrehe narraraza poua icatterrizarraripa tamine inanarrari. Nazapa tamine torrazapa pocca zamaza zosse zosse nauiuarrine toccanirrari. Bacco nanizapa pocca zozosse tabaqqui pouadeniza ziniro da inarizarrarodeniza uaua narrari, “Ziniro nerrecoma nehe torrani?” nauiuarrine. 16Nazapa taide qquezimaporraria pouaza uati tarrari: “Oua zossede, ticca ziniro ccarara carrariraha orrine deni torrezape 10 nehe torrani” narrari. 17Nazapa tamine torrezati manaco pouaza uati tarrari: “Rrehe, tiape occa zozosse bica tinani. Ouattiza ibora tinezape occa zossenirri uima bedeniraha tirrine toccanissa tezape oza panani 10 narrarocca cacauade tirranitoui” narrari. 18Pocca zozosse ouaha naco qquezimaza uati tarrari: “Oua zossede, ticca ziniro ccarara carrariraha deni torrezape 5 nehe torrani” narrari. 19Nazapa tamine torrezati manaco pouaza uati tarrari: “Rrehe, tiape oza panani 5 narrarocca cacauade tirranitoui” narrari.

20—Naraha pocca zozosse ouaha qquezimazapa pouaza uati tarrari: “Oua zossede, arrirraroparri ticca ziniro. Eteroza rrore onaqquinissa teza ouacauarraro. 21Ouape tinoppine ocappinarraro. Tiape madirraza daco tirrirarraro. Tiape tarabaia terrereraha ticca zozosse tabaqquirrine titicarri narraro” narrari. 22Nazapa manaco tamine torrezati attipa: “Occa zozosse uaidira tinani! Tia tettirrine tiaza uima ssonarirraro. Arri ouattiza ibo tinezape ouaza bica terrerani. Tettipe ouaza: ‘Madirraza daco tirrirarraro. Tarabaia terrereraha ticca zozosse tabaqquirrine titicarri narraro’ taua. Naraha occa uima nauato tinezape 23nerrecotoui occa ziniro touapiniuarrine ziniro ehecauemana naniuarri da tizima-rrerarraro? Rridacca occanizape arri occa ziniro touapirrarocca tazarrani ocarrinitouiraha” narrari tamine atti. 24Nazapa arra pocca zozosse tabaqqui domodeni uarizarrariza uati tarrari: “Rrari, occa ccarara tidinimaneza ccarara 10 carrirrarizana da tiquenarri” narrari tamine atti. 25Naraha pouadeni attipa: “Ia zossede, narraripa ccarara 10 nehe carriua” quenarrari. 26Naraha tamine attipa: “Peperriua, ouape tiadeniza uati onarraro: Madirra occa zossenirriza damera tazapa pouaza denima torranitoui. Naraha arra madirra occa zossenirriza damera tarrarazapa cappirauissa tauitoui. Bazira tehe carriraha narraro naqui todininitoui. 27Nazama arra ouaza boqueqquiri narrarideni tamine orraniuarrine nacasseraqquiri narrarideni ouauarri teccarronabaqquimanaza obaccouarri domo uazapa tinarrica-baqquimanarro” narrari tamine torrezati atti –narrari Zeso.

Zesopa Zerozareza bacco tozimarrari

Mateo 21.1-11; Maraco 11.1-11; Zouao 12.12-19

28Zesopa uima uati uati taha rricazapa denima rraui torrarrari, Zerozareuarri bacco toquenauiuarrine. 29Taidepa ssono onini Rritona quenauiza rraui torremorarrari. Narraro ssonoza oza capamema nehe anirraro, oninidenipe Betapaque, Betania narraro. Narraro oza pameheza bacco toquenabote naza pocca zozosse tabaqqui pamahaza uati tarrari: 30—Rrari, arricca oza capamema naniuarri ticadaporri. Naniuarripe borro napizati ssoque zanaha uaui. Narrari borropa ideza madirra uittari-rraraccaui. Narrari dicca tiquenaza teccanimanarro −narrari. 31—Naraha tiadeniza madirra attipa: “Nerrecotoui borro dicca tiquenarrari?” nazapa pouaza uati tiquenana: “Ia Zozossede arrarrari borro toui nazaparra” tiquenana −narrari Zeso.

32Nazapa touedanarra, borro napizati ssoque zanaha uaui qqui iquenarrari, pina arra Zeso uati tarrarissa narraro. 33Borroza bacco toquenazapa dicca iquenanarra rrinedepa: —Nerrecotoui occa borro dicca tiquenarrari? −narrari. 34Naraha manaco pouadeni cacomeremanarrari: —Ia Zozossede toui nazaparra −quenarrari. Nazapa rrinede rrehe naza eccanimanarrari.

35Nazapa borro eccanimanarrari. Zesouarri bacco nanimanazapa poccadeni etero uapicca motararraro ssiti iqueneza borro ideza bina iquenaza nauiza inauittarimanarrari Zeso. 36Nazapa Zeso borroza toccaui tezerrema pouaza rrauirizarrarideni poccadeni etero rraui bina izanapomanarraro, pouaza: —Tiana deni tirrani −quenauiuarrine. Nazapa Zeso rraui bina tani motta toccazanaporrari. 37Nazapa ssono onini Rritona rraui toqquezippaniuarri bacco tabote naza pocca zozosse tabaqqui, pouaza rrauirizarrarideni bazima Zeso canauato-uarrapoui canaui qqui toquenaporra narrarirrinea Deoza touatizemana-zanaporrari. Rriri rriri zanapomanarra moua moua zanapomanarra narrari. 38Attidenipa: —Ia Zozossede onima ccarronarrariza biquehera torrana, torrana! Pouapa ia Izarraeo potemauideni icca tamine! Pouaza biquehera torrana, torrana! −zanapomanarrari. —Memeuarri Deo icca uimaza carroneri canaui, canaui, narraro rronehe torrarizaniuarrine. Memeuarri Deoza madimanarrarideni pouaza: “Tiana deni tirrani!” quenana, quenana! −quenarrari, uaua zanapomanaza.

39Nazapa naui oza pananiuarricca madirra bazima Zesocca madirra tezerre toqueriqqui narrari. Naraha nauiza zodeodeni mota marinarra parizeoza rrehe quenarrarideni carrimemanarrari. Narrarideni motaha Zesoza uati toquenarrari: —Mamaride, ticca zozosse tabaqqui uati ticanabaqquirro. Nama nama quenauipa oppina tani. Pouadeni zamarrama tinanabaqquirro −quenarrari. Arra parizeodenipa Zesoza uatizemanauiuarrine nacasseraqquiri narrari.

40Naraha Zesopa pouadeniza uati tarrari: —Tiadeniza uati onana: Arra occa zozosse tabaqqui zamarrama onanabaqquizapa arri rraui inidicca sibana Deorrine moua moua quenanitoui. Occa uima uati toquenanitoui −narrari Zeso.

41Nazapa Zeso Zerozareuarri touarriraza narraro oza panani qqui tazapa nauicca madirratoui orri orri narrari. 42Poua attipa: —A, rridapana tiadeniza Deocca rronehe torranitouiraha ssamoqquiri tiquenarraro. Rrehe, arrirraro rronehe parrissehecca touini tiquenerrereza narrarorrine Deocca uima tiadeniza auato terrerarraro. 43Nema tiquenezape niza uima oppina tehe tiadeniza torranitoui. Zerozarecca siba ua nauarranini memeza teraha ideniuarri tiadeni uadidenipa nami ppa inamaromaneza siba ua nauarranini tetepi bacco toquenaza cottarra-uarranimanaha rricazapa tiadeniza ssonarimanauitoui. 44Nezape tirricarizanitoui. Ticcadeni oza siba ua tamaroni uapima naqui pouadenirrine cco-cco bototo touedi, cco-cco bototo touedi narizanitoui. Tiadeni Tonassiuauade Cristo-Mesia tiadeniza Deo zosse inaronaraha tibodideni parrissa tiquenerrerarraro. Nema tiquenezape uima oppina tehe tiadeniza torranitoui −narrari Zeso.

Deoza dada toqquimacca ozaza manaconitoui dadadedeni moua ininebaqquirrari

Mateo 21.12-17; Maraco 11.15-19; Zouao 2.13-22

45Nazapa Zeso Zerozareza bacco tozimaza Deoza dada toqquimauarri toqquezimarrari. Narraro ozacca boroniza madirra bani bedi Deoza da tauiuarrinecca dade toquerrenaui qqui tarrari. Manaconitoui dadadedeni qqui inabaqquizapa bazima moua ininebaqquirrari. 46Nazapa pouadeniza uati tarrari: —Deo Atti dozo naniza arrima narraro: “Occa ozape ouaza uati uati toquenauiuarrinecca oza tocarranitoui” naponi nade Deo Atti dozo naniza. Neraha tiadenipe madirra titicamaiza-baqquimana naza tirrinedenia pina bobotidedenicca quequeriqqui ozassa ticananemanarraro −narrari.

47Zesopa uada uarrirriraza Deoza dada toqquimauarri mari mari ihicanabaqqui narrari. Naraha dada toqquimade taminedeni, zodeodenicca marinarra maridedeni, oza panani Zerozarecca deni toquerrenarrarideni quenaza Zesoza nacasseraqquiri naza pouadeni attipa: —Nerrecoma inanaza Zeso inanazoqqueuiuarrine? −quequenanarrari. 48Zeso zoqqueuiuarrine touini quenaraha madirrapa Zesocca marinarra pouadeniza bica teza mittade damamera tarra narrari. Nazapa inanazoqque-manauiuarrine pouadeniza ssamo tarraro.

Currently Selected:

Roca 19: KBNT

Highlight

Copy