Roca 20

—Nerrecorraricca dacorehe ticarrirraro? −quenarrari Zesoza

Mateo 21.23-27; Maraco 11.27-33

1Zesopa uada uarrirriraza Deoza dada toqquimauarri madirra bazima mari mari ihicanabaqqui narrari. Uima bicani icassiuaueraniuarrinecca Zeso madirra mari icanabaqquiraha pouaza nacasseraqquiri narrarideni arra dada toqquimade taminedeni, zodeodenicca marinarra maridedeni, zodeodeni ime rrocouideni quenaza Zesoza touarriressimanarrari. 2Nazapa pouaza uati toquenarrari: —Iaza ticca uima tecomerarri. Nerrecorraricca dacorehe ticarrirraro? Nerrecorrari attiza dadadedeni moua tininebaqquirrari? −quenarrari, Zeso poua cacomerauiuarrine touini quenaza.

3Naraha manaco Zeso pouadeniza uati tarrari: —Oua naqui tiadeniza uati onana. Ouaza tecomeremanarri. 4Zouaopa nerrecorrari icazosseza passo dopaniza niqui izanabaqquirraritta? Deorrine ttarana, madirrarrine ttarana? Tettideni nerrecoma tiquenani? −narrari Zeso.

5Naraha taminedenipa pouadenira uati tocanirere canarrari: —Rraho “Zouaocca passo dopaniza niquinarrape Deocca zossenirri” inezape Zesopa: “Nerrecotoui pouaza rrehe tiquenerrerarrarotte?” nauitoui −quenarrari. 6—Naraha “Zouaocca passo dopaniza niquinarrape madirracca zossenirri” inezape madirra sibaza ia toquenabaqquirana. Arra madirra bazima attidenipa: “Zouaopa Deo icazosserrari. Deo Atti cacomerabotederra” quequenanade −quenarrari taminedeni, madirradeni noppine cappinemanaza. 7Nama quenazapa taminedeni Zesoza uati toquenarrari: —Zouao madirra passo dopaniza niqui izanabaqquiuiuarrine poua zossedepa ssamomo inani −quenarrari.

8Nazapa Zesoa: —Oua naqui oua zossede onipa tiadeniza ouacomera-rraraui −narrari.

Uizarra cacauade uaidiraqquiri narraridenicca uima

Mateo 21.33-44; Maraco 12.1-11

9Zotode Zesopa pocca marinarra arrirraro namiza imadinicca uima tazarrani madirra mari icanabaqquirrari: —Madirrapa pocca uizarraza ppa taui uva pouara ppa inarrari. Nezape pocca uizarra ecauemananiuarrine madirratoui qqui narizarrari, naui pocca uizarraza tarabaia quenauiuarrine, ppa taui uva ecauemanauiuarrine. Uva bono rradazapa motapa uizarra rrinedeza torrauiuarrine. Motapa uizarra cacauadedeni pouadeniza torrauiuarrine. Nazapa pocca uizarra ecauemananiuarrine madirra qqui inabaqquizapa pocca uizarra pouadeniza ineborraro. Nazapa rrinede zama uarri taniuarri toccarrari. Nauiza madi-zanapoccauiuarrine. 10Uva bono rradauicca abazico bacco tazapa uizarra rrinedepa uarri taniza madiraha pocca zozosse orraria pocca uizarrauarri zosse inanirrari, uizarra cacauadedeni uva bono mota pouaza da iquenauiuarrine. Naraha pocca zozosse uizarrauarri bacco nanizapa uizarra cacauadedenipa inarrizomanarrari. Uva rriraha zosse inanimanarrari. 11Nazapa uizarra rrinede pocca zozosse ouaha zosse inanirrari. Uizarra cacauadedeniuarri bacco naniraha narrari naco inarrizomanarrari. Itamassomanaza uva rriraha zosse inanimanarrari. 12Nazapa pocca zozosse ouaha zosse inanirrari. Naraha narraripa inabiqueremanaza uizarra inidiuarri rrazirema rroca coro iquenarrari.

13—Narrari toccanizapa uizarra rrinede attipa: “Nerrecoma onaniuarrine? A, rrehe, arrima onana. Occa erredeni oua ouaticcana zosse onanina. Narrarizana cappinemanauitoui” narrari. 14Nazapa zosse inanirrari, toccaniraha uizarrauarri bacco naniza uizarra cacauadedenipa poua qqui toquenazapa pouadenira uati tocanirerrari: “Arrarraripa uizarra rrinede bedi. Nizaranibote imehi zoqqueza uizarrape pouaza torranitoui. Rrari, inanazoqquena, uizarrape icca torraniuarrine” quenarrari. 15Nama quenazapa uizarra rrinede bedi dama iquenaza uizarra inidiuarri rroca iquenaza inanazoqque-manarrari −narrari Zeso.

Nazapa pouaza queriqquimanarrarideniza uati tarrari: —Rrari, tibodideni uatorri. Uizarra rrinede pouadeniza nerrecoma napazarra? 16Pouapa uima mittazapa pocca uizarrauarri toccanipomauitoui. Manaco pocca uizarra cacauadedeni inarricarizauitoui. Pocca uizarrape madirra ouahadenizana da inanitoui −narrari Zeso.

Naraha pouaza queriqquimanarraridenia narraro uima mittemanazapa: —Rraho, narraro uima iaza torra-rrerana! −quenarrari.

17Nazapa Zeso pouadeni icattabaqqui naza uati tarrari: —Tettidenipe: “Narraro uima iaza torra-rrerana” tiqueneraha parrissa torranitoui. Narraro uimassa narraro Deo Atti dozo naniza dozo naporraro. Uimape arrima narraro:

“Oza sibaza icanauatomananiuarrinepe nanauatodedenipa siba orrariepe ettarromanani nade.

Naraha zotodepe narraro sibana oza daco carriraniuarrine torrarraro”

nani Deo Atti dozo naniza dozo naporraro. 18Nazama narraro siba dacorehe carrirraroza madirra touedimemanazapa poccadeni uima tossamozape assiredeni tarroririzemanarrarissa quenauitoui. Narraro siba madirraza ssonarizape mere tocanirezapa rramiromanauissa tauitoui −narrari Zeso, poua tauimari uati taza. (Arra poua atti nama narraripa madirra pouaza parrissa quena-rrarazapa parra rricariui nauitoui, narrari.)

19Nazapa dada toqquimade taminedeni, zodeodenicca marinarra maridedeni quenaza Zesocca marinarra mittemanazapa bodideni nauatoqquiri narrari: —Zesopa icca uima uati uati tarrari, iape poua ettarrorrarirrine −quenarrari. Nazapa Zesoza uadimanaza: —Rrari, rridapana Zeso tozepe inanana! −quenaraha madirra noppinedeni cappinemanaza dama iquena-rrararrari.

—Rromanodenicca tamineza icca ziniro mota da inaniuarrine bica taqui? −quenarrari

Mateo 22.15-22; Maraco 12.13-17

20Nazapa dada toqquimade taminedeni, zodeodenicca marinarra maridedeni quenaza Zeso inoccozemanarrari. Attidenipa: —Zesopa rromanodeni nacasseraqquiri nauicca uati tazapa rromanodenicca zossenirri cacauadeza uati inaniuarrine, naui poua zepeza torrauiuarrine −quenarrari. Nama quenazapa poccadeni madirra mota Zesoza uati toquenauiuarrine zosse inabaqquimanarrari. Pouadenipa pina parrissa Zeso poua attitouissa quenaraha pouadeni bodiza maizehe narroremanarrari. Nazapa Zesoza touarriressimanarrari. 21Pouadenipa Zesoza arrama quenarrari: —Nirra, Mamaride, ticca marinarrape toccanissa tarraro nauatoqquiri inani. Ticca uima zori torani narizarraro. Madirra attideni noppine ticappine-rrerezape ticca uima onihi torra-rrerarraro. Madirra deni torrarrari, madirra zepe sse tarrari, madirra arramani torrarrari tezerrepa tiaza narrarissa caniqquimerarrari. Parrissehera Deocca marinarraza madirra madimanauissa tauiuarrine mari mari titicanabaqqui narrari −quenarrari Zesoza. 22—Nazama iape rromanodenicca tamine deni torrauicca pocca zossenirriza icca ziniro mota pouaza da inaniuarrine bica taqui? Bica terrererane? Moizecca marinarraza oppina taqui? Oppinera terane? Tetti nerrecoma tani? −quenarrari maizeheza.

23Pouaza uima inassonarimananiuarrine uati toquenaraha Zeso poccadeni maizehe nauato tarrari. Nazapa pouadeniza uati tarrari: 24—Rrari, ziniro denario ouaza noue ticanemanarri −narrari. Noue icanemanezape uati tapomarrari: —Rrari, arrirraro ccararazape nerrecorrari corimena anirraro? Nerrecorrari oni dozo narraro? −narrari Zeso. Naraha pouadeni attipa: —Rromanodenicca taminederra −quenarrari.

25Naraha Zeso attipa: —Rromanodenicca tamine pocca zinirope pouaza da tinanimanarri. Naraha Deocca tiquerrenezape Poua nacassa tauiccara Pouaza da tiquenarri −narrari Zeso.

26Naraha taminedeni, mamaridedeni quenarraripa Zeso atti inarrizemaneza madirra queriqquimanarrari bazima mittemanauiuarrine touini quenaraha parriremana-rrararrari. Uarro quenaza attidenipa: —A, icca uima ecomeraniuarrine nauato tarrariua −quenaza todidimana narrari.

Niza rriquemanarrarideni nauatonimanazapa carricarri noueranitoui

Mateo 22.23-33; Maraco 12.18-27

27Nazapa Izarraeo potemaui zodeodeni mota marinarra onini sadoseoza rrehe quenarrarideni Zeso madiuiuarri rrauirronarrari. Poccadeni marinarrape: —Izoqquezape inauatoniniuarrine nouerani −quequenanarrari. 28—Narraro uimaza Zeso atti irrine tossamoza torrizana quenaza Zesoza narraro uima uati toquenarrari: —Mamaride, Moizecca marinarrazape arrima nani: “Maqquiderrepa amonerre tobaccopero carriraha erredeni rriraha zoqquezapa pocca amonerrepe poua imecotena icarrina, naui erredeni carrizapa pocca ato zoqquerraricca erredenissa nauiuarrine” nade Deo Atti Moizerrine dozo naniza −quenarrari. 29—Nazama tiaza uima arrima narraro uati inana: Arra pouadeni imecote pouadenira 7 quenaha madimanarrari. Taideccaha amonerre carriporrari, naraha bedi rriraha zoqquerrari. 30Zotodecca naco poua ouaha bedimeni icarriraha erredeni rriraha zoqquerrari. 31Zotodecca naco narraro amonerre icarriraha narrari naco erredeni rriraha zoqquerrari. Narrarossa zanaporraro carride 7 quenaraha erredeni rriraha rricarrari. 32Narrarideni rricazapa poni naqui zoqquerraro. 33Nezape zama rriqueza madirra nauatonimanazapa poua imecote 7 quenarraripa narraro amonerre icarriqquimanaporaha nerrecorrarina ponicca maqqui torrapazarra? −quenarrari.

34Naraha Zeso attipa: —Rridapana arra namiza madimanarraridenipa carri carri cacana naza madimanaccarrari. 35Naraha niza zotode madirrapa memeuarri Deo madiuiuarri madimanazapa nama quenapoma-rrarauitoui. Uena uena quenapoma-rrarauitoui. Arra Deoza iboraqquiri narraridenipa Deo inaparrirebaqquiuissa tarra naza pouadeni inauatonibaqquiuitoui. 36Nazapa pouadenipa zoqquemanapoma-rrarauitoui. Pina Deocca zozosse tabaqqui memeuarriccassa quenauitoui. Deocca nauatonihe carrimanazapa Deocca erredeni toquerrenarrari.

37—Nazama Deorrine madirra nauatonimanauicca uimape Moize dozo inarraro. Arri aua dirri tani tauimariniza Moizepa ia Zozossede Deo Atti dozo inarraro: “Ouape Deo, ticca idideni Abarahao, poua bedi Izaqui, poua bedi Zaca quenarraridenicca Deo orrani” naui nade, Moizerrine dozo naniza. 38Arra Deo Atti nama nazapa Abarahaodeni nauatonimanaza madimana-zanapouicca uima auato tarraro. Deopa parra zoqquemanariui narraridenicca Deo rraraui. Deopa camittaqquiri narraridenicca Deo. Pouapa rridapana naco poccadeni Deo. Pouaza bazima madimana-zanaporrari −narrari Zeso.

39Zodeodenicca marinarra maridedeni motana Zesoza uati toquenarrari: —Rrehe Mamaride, uimape narrarona parri −quenarrari.

40Nazapa arra uati toquenaporraripa cappinemanazapa paparra quenarrari.

—Cristo-Mesiapa nerrecorrari potemaui tiquenarraro? −narrari Zeso

Mateo 22.41-46; Maraco 12.35-37

41Zesopa madirra bodideni uatome-manauiuarrine pouadeniza uati tarrari: —Nerrecotoui madirra attidenipa: “Cristo-Mesiapa Dabi Potemaui” quequenanarrari? 42Naraha tamine Dabipa maittaccazama madiza pocca rrirririza poua tezerremacca uima dozo inaporraro. Dabicca dozonirripe arrima narraro:

“Ia Zozossede Deopa oua Zozossede Mesiaza uati tarrari: ‘Ouinori nauatoniuarri tittarirri. Oua otezerrepe touatti dacorarraro ticarrirri’ narrari. 43‘Nizaranibote tia uauadidedenipa arramani onanabaqquiuitoui. Poccadeni dacorehepe onarricanitoui’ napoui nade Deo.”

44Naraha madirra attidenipa: “Cristo-Mesiapa tamine Dabi Potemaui” quequenanazapa nerrecotoui Dabipa poua potemauizaraha: “Oua Zozossede” naporraritta? −narrari Zeso.

—Parri, tiadenipe pina zodeodenicca marinarra maridedenicca madiessa tiquenerrerarri −narrari Zeso

Mateo 23.1-36; Maraco 12.38-40; Roca 11.37-54

45Madirra bazima tauaribobo canaza Zesopa pocca zozosse tabaqquiza uati uati tarrari: 46—Parri, tiadenipe! Pina zodeodenicca marinarra maridedenicca madiessa tiquenerrerarri. Pouadenipa etero arabo tarraroza uezarizemanaza attidenipa: “Iape pina taminessa inani” quequenanarrari. Arri dadauarricca rrauiza rrauirizaza naco madirra pouadeniza: “Nirra, bica tinani? Tiape deni tirrani” quenauiuarrine touini quequenanarrari. Deo Atti mamariuarri rrassi tariuiuarrinepa deni toquerrenarraridenicca uiuittariza rrassi tariuiuarrine touini quequenanarrari. Rripaqquie imeniza naqui deni toquerrenarraridenicca uiuittariza rrassi tariuiuarrine touini quequenanarrari. 47Nazama amonerre tobaccoperodeni ponideni madimananiuarrineccaraha icamaizabaqqui-maneza pouadeniza totorra nezape ponidenicca oza naqui pouadeniza totocarrariza narraro. Naraha poccadeni uaidirehe auatora taniuarrinepe Deoza uati uati toquenazapa poccadeni uatinarra arabo tarraro, arra madirra pouadeniza: “A, Deoza dameraqquiri naui” quenauiuarrine. Pouadenipa Deo Attima mamaizemana nazapa niza Deocca narrizoue denima oppina tanicca pouadeniza ssonarinitoui −narrari Zeso.

Currently Selected:

Roca 20: KBNT

Highlight

Copy