Roca 21

Amonerre tobaccopero tocarrani ponicca ziniro Deoza da inanicca uima

Maraco 12.41-44

1Zesopa Deoza dada toqquimauarri zepedeni sseqquiri narrarideni ziniro dade toquerrenarrari qqui inabaqquirrari. Poccadeni ziniro da naqquinarracca bauza ua izemanarraro. 2Naniuarri naqui amonerre tobaccopero tocarranipe poni madiniuarrinecca ziniro bedeniraha ponicca danirriuarrine capamehe cororo icazarraro. 3Nazapa Zeso pouaza toqueriqquirrarideniza uati tarrari: —Parrissehera tiadeniza uati onana: Arrirraro amonerre tobaccopero tocarrani ponipe cappireraha ponicca danirri ziniro bedeniraha deni torrani. Pina Deoza denima da inarrarossa narraro. Naraha arra bazima zepedeni sseqquiri narraridenicca danirripe pina arrimani Deoza da iquenarrarossa narraro. 4Pouadenipa poccadeni ziniro mota arobeni da iquenarraro. Naraha ponipe cappirarraro, touati nauana tarraro. Poni madiniuarrineccaraha da inehe rricarraro −narrari Zeso.

—Deoza dada toqquimauarricca oza taborizanitoui −narrari Zeso

Mateo 24.1-2; Maraco 13.1-2

5Zesocca zozosse tabaqquipa Deoza dada toqquimauarricca oza qquide bica tocaneza uimahaha canarrari: —A, siba moponi bicaboteza nauatorizarraro. Madirracca danirri oro zibehi tarraroza ebezorizarrarope bicaqquiri nani −quenarrari. 6Naraha Zeso attipa: —Arri oza imeni sibaza nauatorizani rridapana qqui tiqueneraha niza zotodepe taborizehe rricanissa tanitoui −narrari Zeso.

Zama rricani touarrireza nauatoqquiri inaniuarrinecca uima

Mateo 24.3-28; Maraco 13.3-23

7Nazapa Zesocca zozosse tabaqqui pouaza uati toquenarrari: —Ia Maride, rridacca uati tinarrarope nerrecoma neza torrapazerre? Narraro uima touarrireza nauatoqquiri inaniuarrinepe nerrecora qqui inapopazarra? −quenarrari.

8Nazapa Zesoa: —Parri, madirra tiadeni tocamaizabaqqui-manarana. Niza madirra uapi taha pouama oua oniza maizemanazapa: “Ouape Cristo-Mesia orrani” quequenanauitoui. “Rridapana zama rricanicca bacco tani” quequenanauitoui. Naraha narrarideni attiza rrehe tiquenerrerarri. 9Nazama madirra zama onihicca, zama onihicca tezerre rrazire imeni inauatomanani tauimarini timittemaneza naqui ticappinemana terrerana. Ticcadeni zamauarri, zama onihiuarri naco boqueqquiri narrarideni taminedenicca cacauehe narrizorizemanaui timittemaneza naqui ticappinemana terrerana. Narraro uima oppina taniccape taide torraporaha zama rricaniuarrinepe noueraccanitoui −narrari Zeso.

10Zesopa denima uati uati tarrari: —Nazama madirra zama onihicca, zama onihicca tezerre rrazire inanemana-rizanitoui. Tamine ouahacca madirra, tamine ouahacca madirra tezerre cauadire-rizauitoui. 11Nazama nami zaro tani naqui carri tanitoui, pemi naqui carririzanitoui. Zamacoma naco zama onihiza, zama onihiza carririzanitoui. Nezape memeuarri naqui oppina tanicca auatoza uarro ticanireni toui. Narraro qqui tiquenezape zama rricanicca bacco tani nauatoqquiri tiquenanitoui −narrari Zeso.

12—Naraha arri uima bazima uati uati onarrarocca torra-rreraqquezama tiadeniza uima torrarizaponitoui. Madirra boqueqquiri narrarideni tiadeni tadamemanazapa tiadeni tonarrizobaqqui-manauitoui. Zodeodenicca Deo Atti mamariuarri tiadeni touaqquezimabaqqui-manauitoui, toponi cocoroza naqui tiadeni coro tozima-baqquimanauitoui. Otauimari tiadeniza torrarraro acconi uadimanaza zama onihicca zama onihicca madirra tamine deni toquerrenarrariuarri tiadeni touaqquezimabaqqui-manauitoui. Zama cacauadedeniuarri naco tiadeni touaqquezimabaqqui-manauitoui. 13Nani pouadeni zepeza tiquerreneza taminedeniza ticcadeni uima tecomeremanezape otauimari naqui mittemanauiuarrine.

14—Nazama ticcadeni uima tecomeremanezape tiadeniza uima ssonari-rreraniuarrine tibodideni titinarroremanapo nerrerana. 15Tettideni tecomeremananiuarrinepe tiadeni acco ocanabaqquinitoui, tiadeni uadidedeni tettideni inassamomana-rreraniuarrine, uima uatide nauatoqquiri tiquenaniuarrine. Nazapa pouadeni attina tettideniza arrimani torranitoui. 16Naraha tiadeni uadidedeni naco ticca abi uitide, ticca ami nitide, timecotedeni uitide, ticca madirra uitide, titesse uitide pouadenipa otauimari tiaza torrarraro acconi boquemanaza tozepe tiquerrenaniuarrine tiadeni eccoremana-rizanitoui. Tiadeni mota naqui tiadeni inanazoqque-manerre canimanitoui. 17Occa madirra tiquerrenarrarorrinepe madirra bazimapa tiadeniza nacasseraqquiri nauitoui. 18Naraha Deo tiadeni touacaua-baqquiuitoui. Poua touini nazapa titatideni conani orrarie amossinerre canima-rreranitoui. 19Nazama tiadeniza ouattipe: Dacoco tirrirarri! Narraro uadie tinauanemana-zanapozape tiadenina ticassiuaueranitoui −narrari Zeso.

20Zesopa zama rricanicca uima denima mari icanabaqquirrari: —Niza zotode ticcadeni oza panani Zerozare uapiuarri rrarrazirededeni cottarrauarranimanaha rrica naui qqui tiquenezape: “Zerozare rricanicca uada bacco tani” tiquenana. 21Nazama arri zama Zodeauarri timadirize-manarrarope ssonouarri tidomo toqquemorana. Zerozareza timadimanarraro naqui tidomo toccana. Arri uizarraza timadimanarrarope oza pananiuarri rraui tirrani terrerana, tirriquerana.

22—Narraro uima oppinabote torrarrarope Zerozarecca madirra iboqquiri nazapa Deocca narrizoue pouadeniza ssonarinitoui. Pina Deo Atti dozo naporrarossa nehe torranitoui. 23Narraro uima oppina tarraro bacco nezape amonerre rriuemanarrarodeni, bacconideni irrimanarrarodeni naqui rroppa toquenaniuarrine touati nauanaqquiri nanitoui. Rrehe, arrirraro zamacca madirra Deocca narrizouerrine ocasserani auemanauitoui. Deocca uadie imeni arrarrari madirradeniza ssonarinitoui. 24Rrazire uarrinecca massito cauidireqquima naniza motadenipa rricarizauitoui. Motadeni naco rrarrazirededeni itadamemanarizaza pouadeni zepeza toquerrenazapa zama onihiuarri zama onihiuarri iaccanibaqqui-rizemanauitoui. Nazapa zodeo querrena-rrararrarideni deni toquerrenazapa Zerozare inauaidiremananitoui. Pouadenirrine Zerozarepe pina ttai ttai torrarrarossa nanitoui. Naraha zotodepe poccadeni uarrano Zerozareuarri madimanauiuarrine parrirenissa tezape narrizoue rricanitoui −narrari Zeso.

Zeso ccaronapomauicca uima

Mateo 24.29-35,42-44; Maraco 13.24-37

25Zesopa uima denima uati uati tarrari: —Uima nauatoqquiri tiquenaponiuarrinepe marri, abazico, amouadeni narraridenipa torrizarizauitoui. Arra memeuarricca torrizarizazapa namiuarri madimanarrarideni uarro tocanireuitoui. Coriza imenicca passo poni rribabani torrizezape mouini oppina tarrarorrine madirra bazima uarro quenauitoui. 26Rridapanapa arra marri, abazico, amouadeni naco dacoraqquiri naraha narraro uima torrezape meme zaroro neza memecca bazima rrenene rrenene canauitoui. Madirrapa: “Iaza zama oppina tani! Nerrecoma inapazerre?” quenaza cappinemanazapa tossamorizemanarra uauatia cossemanerinarra quenauitoui. 27Nezana ouape Madirra Bedi orrarraroa meme essenima ocarrimehe occaronapomani madirra bazima qqui toquenauitoui. Occa dacorehe, occa deni torrehe auato tanitoui. 28Madirra ouahapa cappinarize-manaraha tiadeni occa madirrape arri uati onarraro qqui tiquenezape pina tetizemanana. Memeuarri ticattamacossassa canana. Ouape tiadeni odinibaqquiniuarrine titouideni occaronanitoui −narrari Zeso.

29-30Nazapa arrirraro namiza imadinicca uimaza pouadeni mari icanabaqquirrari: —Rrari, aua piquera tauimariza ticauatterarri. Aua piquera, aua bazima naco eppe moro nimaniui qqui tiquenezape: “Rrehe, zazarrade torremanini” titiquena narraro. 31Pina narraro uimassa narraro arri zama rricani tauimarini uati uati onarraro qqui tiquenezape: “Rrehe, Deocca cacauehe touarrirarronani” tiquenana, onarraro −narrari Zeso.

32—Parrissehera tiadeniza uati onarraro: Arri zama rricani tauimarini uati uati onarrarocca madirra zoqquemana-rraraccazama narraro uima uapima torranissa tani qqui toquenaccauitoui. 33Meme, nami naqui rricarizanissa tanitoui. Naraha ouattipe rriquerreranitoui. Arri uati uati onarrarope narrarossa nanitoui −narrari Zeso.

34—Parri tiadenipe tiadeni tecauemananissa tarri, tibodideni ccaracossa-rreraniuarrine. Arri bica terrereraha touini tiquenarraroccape tineborizemanarri. Arri ze tiqueneza comani teterizemana narraro naqui tineborizemanarri. Arri timadimananicca touira tibodideni uauato narraro naqui tineborizemanarri. Narraro tinebomana-rrereza zama rricanicca uada amazati bacco tezape uarro ticanirenitoui. 35Narraro uada bacco tezape pina tarrapa abaza cassonariza touittemanarrarissa tiquenerana. Zama rricanicca oppinehepe arrirraro zama bazimacca madirraza ssonarinitoui. 36Narraro noppineni tinarroremanehe timadimanarri, onarraro. Deoza uati uati titizanapomana narri, arri uima oppina tehe torreza zori ticanireniuarrine. Ouape Madirra Bedi orrarraroa niza occaronapomezape uima rrirehe obaccouarri tidomodeni uaniuarrine naqui Deoza uati uati titizanapomana narri, onarraro −narrari Zeso.

37Zesopa uada uarrirriraza Deoza dada toqquimauarri maride totorra narrari. Zomezape Ssono oni Rritona quequenanauiuarri totoccani narrari. Nauiza uauada narrari. 38Naraha madirra bazimapa izamassa Deoza dada toqquimauarri bacco bacco nanarronemana narrari, Zesocca marinarra mittemanauiuarrine.

Currently Selected:

Roca 21: KBNT

Highlight

Copy