JOHAN 10
10
Tuukroekung Patahhaih
1Jesuh mah, “Loktang tang kang thuih o: Tuu im thungah khongkha bang hoiah akun aiah ahmuenh kalah bang hoiah ka dawh moa ka kun kami loa kamqu kamca hoi damiah ni. 2Khongkha bang hoiah ka kun kami loa tuukroekung ni. 3Khongkha toepkung mah anih hanah khongkha to paong pae; angmah ih tuu to ahmin hoiah a kawk na-ah a lok to a thaih pae moa tasabang ah tacawt haih. 4Tasabang ah tacawt haih na-ah tuunawk hma-ah a caeh moa tuu mah a baang pae, kawmawtiah a lok to a thaih pae o. 5Mi kalah longlongto hnukah loa baang o mak ai; anih khae hoitoah cawn o king lat tih, kawmawtiah a lok to panoek o ai pongah ni,” tiah a naa.
6Jesuh mah ahi patahhaih hae a thuih pae, to-e a thuihkoehhaih ih to anihcae mah panoek o thaih ai.
Jesuh Tuukroekung Kahoih
7Topongah Jesuh mah a thuih bae, “Loktang kang thuih o: Kai loa tuu hanah khongkha ni. 8Kai kangzoh ai nahlanah hma-ah kangzo boiboih loa kamqu hoi damiah ni, to-e tuu mah anihcae ih lok to tahngai pae o ai. 9Kai loa khongkha ni. Ami doeh kai khae hoiah ka kun loa pahlong ah om tih; akun o, tacawt o ueloa rawkcak phroh kahing to hnuh o tih. 10Kamqu kamca loa paquk han, hum han hoi phraek hanah khueh ni loa angzoh, to-e kai loa hinghaih na tawnh o moa kacung bit ah na tawnh o hanih ah kangzoh.
11“Kai loa tuukroekung kahoih ni, tuu hanah hinghaih paek pasaengkung ni. 12Tuukroekung tangtang na ai, a hlai ih kami, angmah to doeh tuu ka tawn ai to loa tasui kangzo to a hnuk na-ah tuu to a suek sut moa a cawnhtak ving; topongah tasui mah tuu to a kaek moa takhraengh dung. 13A hlai ih kami to loa a cawnh ving, kawmawtiah a hlai romram khueh ih kami ah a oh pongah tuu taham to dawn ai pongah a cawnhtak. 14-15Kai loa tuukroekung kahoih ni. Pa mah ang panoek batiah kaimah doeh Pa to ka panoek, tobatih toengah kaimah tuu to ka panoek moa tuu mah doeh kai to ang panoek. Moa anihcae hanah ka hinghaih lu vah khoekto ah ka paek pasaeng.#Mat 11:27; Luk 10:22 16Hi tuu kanghu thungah ka om ai tuu kalah to ka tawnh. Anihcae to doeh kang sinh han; ka lok to tahngai o tih moa anihcae loa tuukroekung maeto hlimah tuu kanghu maeto ah coeng#10:16 Coeng o tih tihae thoemto banrikcabu ah loa om tih tiah a oh. o tih.
17“Ka hinghaih ka paek pasaeng pongah Pa mah kai hae ang palung; ato ka paek pasaenghaih ih loa ka hnuk let han pongah ni. 18Ka hinghaih loa amimah doeh kai khae hoitoah na lom pae mak ai. Kaimah palung angthawkhaih hoiah ni loa ka paek pasaeng. Kaimah hae paek thaih ih akaa ka tawnh moa lak thaih let ih akaa doeh ka tawnh. Ato to sak hanah Pa mah lok ang paek boah,” a naa.
19Hi loknawk pongah mipui salak thungah ampraekhaih ih to a oh bae. 20Kami paroeainawk mah, “Anih loa taqawk to a tawnh! Amthu boah! Tipongmaw a lok to tahngaih pae o?” tiah a naa o.
21To-e loa thoemto mah, “Taqawk ka tawn mah loa hitiah lok thui thaih mak ai! Taqawk ka tawn mah loa kawbangmaw mikmaeng to hoihsak thaih tih?” tiah a ti o.
Jesuh Takhoe O
22Sik angqai tue ah a oh moa Tempal Tahlanghaih ih Poi to Jerusalem ah a sak o li ah oh. 23Jesuh loa Tempal ih Solomon Imhup ah to amkaeh li na-ah, 24kaminawk mah anih to ven o thuih khuk moa, “Nasetto maw oepvawthaih hoiah nang suek han? Loktang ah kamnoek ah na thui ah: Nang loa Messiah maw?” tiah a duengh pae o.
25Jesuh mah, “Kang thuih boah e na taang o ai. Pa ih akaatawnhhaih hoiah ka sak ih hmuennawk hae kaimah ih kawng to a thuih. 26To-e nangcae loa kai ih tuu ai pongah na taang o ai. 27Kaimah ih tuu mah loa ka lok to tahngaih; kaimah anihcae to ka panoek moa kai hnukah baang o. 28Dungzan hinghaih to ka paek moa natuek doeh dueh o mak ai. Amimah doeh kai khae hoitoah lom o ving thaih mak ai. 29Pa mah kai ang paek ih loa tiboih pongdoeh a lenh#10:29 Pa mah kai ang paek ih loa tiboih pongdoeh a lenh tihae thoemto banrikcabu ah loa Kai khaeah atonawk ka paek Pa loa a lenh tiah a oh. moa Pa ih khetzawnhaih thung hoitoah amimah doeh lom ving thaih mak ai. 30Pa hoiah kai loa maeto ni,” tiah a naa.
31Tona-ah mipui mah anih to vah haih hanah hlung to akhuih o bae. 32Jesuh mah anihcae khaeah, “Pa mah sak hanah ang paek ih hmuen kahoih zetpui to nangcae mikhnuk ah ka sak boah; ahi hmuennawk thungah hae kawbatih kawng pongah maw hlung hoiah nang vah han koeh o?” tiah a duengh.
33Anihcae mah, “Hlung hoiah kang vah han koeh o haih ih loa hmuen kahoih na sak ih pongah na ai ni, Sithaw to na thuihsae pongah ni! Nang loa kami romram khueh ni, to-e nangmah to Sithaw ah nang suek!” tiah a naa o.#Lev 24:16
34Jesuh mah, “Nangmahcae ih Tawklok thungah, Sithaw mah ‘Nangcae loa sithawnawk ni,’ tiah tarik ah oh.#Sam 82:6 35Cabu Kacai mah a thuih ih to dungzan ah amsoem tito aicae mah panoek o; Sithaw mah angmah ih tamthang lok a paek ih kaminawk to ‘sithawnawk’ tiah a naa. 36Kai han loa Pa mah ang tuek moa longprae ah ang patoeh. Totibaloa kawbangmaw ‘Kai loa Sithaw Capa ni,’ tiah ka thuih pongah Sithaw to ka thuihsae tiah na thuih o thaih? 37Toti nahaeloa Pa mah sak han ang koeh haih ih hmuennawk to ka sah ai nahaeloa kai hae na taang o hmah. 38To-e ka sak nahaeloa kai hae nang taang o ai langla cadoehsoe ka sak ih taloe loa na taang o han oh; ahi hae Pa loa kai thungah oh moa kai loa Pa thungah ka oh, tiah na panoek o poe hanih ni,” tiah a naa.
39Jesuh to naeh hanah vaito panki o let bae, to-e naeh o ai nahlanah anihcae ih ban thung hoitoah tacawt tak ving.
40Moa Jesuh loa Johan mah baptisma a paekhaih ih hmuenh Jordan tuiva yaeh ah to a caeh let, moa toah to a oh.#Jhn 1:28 41Kami zetpui anih khaeah angzoh o moa, “Johan loa dawnraihaih hmuennawk sah ai, to-e hi kami ih kawng a thuih ih boiboih to amsoem king,” a ti o. 42Toah kaom kami ka pop parai mah anih to a taang o.
Currently Selected:
JOHAN 10: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
