JOHAN 9
9
Zah Nahoi-ih Mikmaeng A Hoihsak
1Jesuh loa lam takat li nathuemah zah tangsuek nahoiah mik kamaeng nongpa longto a hnuk. 2A hnukbangnawk mah anih khaeah, “Patukkung, ami ih zaehaih pongah maw mikmaeng ah a zah? Angmah ih zaehaih pongah maw, tiaialoa amno hoi ampa hnit ih zaehaih pongah maw?” tiah a duengh pae o.
3Jesuh mah, “Angmah ih zaehaih mah doehsoe, amno hoi ampa hnit ih zaehaih mah doehsoe a mikmaengsakhaih ih tidoeh om ai. A mikmaenghhaih ih loa Sithaw hmuensak thaihaih ih toksakhaih to anih nuiah amtuengsak hanih ni. 4Khodai nathung loa matoehkung ih tok to sak toemoe han a oh; mimah doeh toksak thaih ai ih aqum tue to ang phak li. 5Longnui ah ka oh nathuemah kai hae long hanah aanghaih ah ka oh,” tiah a thuih.#Mat 5:14; Jhn 8:12
6Ato lok to a thuih pacoengah Jesuh loa long pongah tamtui pathoih moa ato tamtui hoiah tangphrung to a sak pacoengah ato kami ih mik ah to a nok pae moa, 7“Caeh aloa Siloam Tuili ah na mikhmai to pahlak ah,” tiah a naa. (Siloam tihae Patoeh tih thuihkoehhaih ih ni). Topongah ato kami loa a caeh moa a mikhmai to pahlak, mikhnuk let hoiah amlaem.
8Ahi ai nahlanah anih loa bantadoi ah ka om to ka hnuh kaminawk hoi angmah ih imdongpaknawk mah, “Hi kami hae anghnut kungah bantadoi to na ai maw?” tiah a naa o.
9Mi thoemto mah, “Anih to ni,” tiah a thuih o. Mi kalahnawk mah, “Anih na ai ni; anih batih kanghmong mi kalah ni,” tiah a ti o.
Topongah ato kami angmah khaekhaeh mah, “Kai loa anih boah ni,” tiah a thuih.
10Anihcae mah, “Kawbangmaw vaihi mik na aang thaih let loa?” tiah a duengh o.
11Anih mah, “Jesuh tiah naa pae o ih mah tangphrung zetta a sak moa ka mik ah a nok pacoengah Siloam ah caeh aloa mikhmai pahlak ah, tiah ang naa. Topongah ka caeh moa mikhmai ka pahlak hoiloa ka hnuk thaih roep,” tiah a naa.
12Anihcae mah, “Anih loa naamaw a oh,” tiah a duengh o.
Anih mah, “Ka panoek ai,” tiah a pathim pae.
A Hoihhaih Kawng Farasinawk Akung Tacet O
13Topacoengah anihcae mah mikmaeng nongpa to Farasinawk khaeah a thak o. 14Jesuh mah tangphrung a sak moa a mikmaenghhaih a hoihsak ih ani loa Sabbath ni ah a oh. 15Topongah Farasi kaminawk mah kawbangmaw a mik to aang thaih let tito a duengh pae o. Anih mah, “Tangphrung to ka mik ah angnok, mikhmai to ka pahlak moa vaihi mikhnuk thaih let,” tiah a thuih pae.
16Farasi kami thoemto mah, “Ahi hmuen ka sah kami loa Sithaw khae hoitoah kangzo ah om thaih mak ai, kawmawtiah Sabbath tawk to pazui ai,” tiah a ti o.
To-e kalahnawk mah, “Kami kazae mah kawbangmaw hibatih dawnraihaih to sah thaih tih?” tiah a ti o toengh. Topongah anihcae thungah ampraekhaih ih to a oh.
17Topongah Farasinawk mah ato kami to lok a duengh pae let bae moa, “Na mikmaenghhaih to anghoihsak na tih, totih nahaeloa anih kawng to kawbangmaw na dawn?” tiah a duengh pae o.
To kami mah, “Anih loa tahma ni,” tiah a pathim.
18To-e Judah kami akaatawn kungnawk loa anih to mikmaengh moa vaihi mik amtueng let, tito amno hoi ampa to kawk o airoek loa taang han koeh o ai. Topongah anih hnit to kawk o moa, 19“Hi kami hae nang ih capa maw? Mikmaeng tangcae ah tacawt, na ti o; totibaloa kawbangmaw vaihi mikhnuk thaih let?” tiah a duengh pae o.
20Amno hoi ampa hnit mah, “Anih loa kai hnit ih capa ni tito ka panoek hoi moa mikmaeng tangcae ah a zah tito doeh ka panoek hoi. 21To-e kawbangmaw mikhnuk thaih let tih to ka panoek hoi ai, a mikmaeng ih to amimah maw hoihsak tito doeh ka panoek hoi ai bae. Angmah khaeah to dueng oah, a coehpui toengh boah moa angmah to mah pathim thaih tih,” tiah a naa pae hoi. 22Amno hoi ampa hnit mah totiah a thuih pae hoi ih loa anih hnit mah Judah kami akaatawn kungnawk to a zit hoi pongah ni. Anihcae mah Jesuh to Messiah ni, tiah ka taang kami loa sinakok thung hoitoah pathok han, tiah naakrakhaih to a tawnh o zawh boah. 23Topongah amno hoi ampa mah, “Palungha toeng boah moa angmah khaeah dueng oah,” tiah a tihaih ih ni.
24A pahnit bae ah, mikmaeng kok ah ka tacawt kami to a kawk o let moa anih khaeah, “Loktang ka thuih han tiah Sithaw hma-ah lok amaih ah! Nang ka hoihsak kami hae kami kazae ni tito ka panoek o,” tiah a naa.
25To kami mah, “Kami kazae hoi kazae ai to ka panoek ai. Hmuen maeto ka panoek ih loa, Mik ka maengh e vaihi loa kho-aang ka hnuk thaih boah,” tiah a naa.
26Anihcae mah, “Kawbangmaw angsak? Na mikmaenghhaih ih loa kawbangmaw mikhnuksak?” tiah a duengh pae o.
27Anih mah, “Kang thuih o boih boah e na tahngaih han koeh o ai. Tipongmaw thaih let han na koeh o? Nangcae doeh a hnukbang ah oh hanah na koeh o kalang mue?” tiah a naa pae.
28Tona-ah anihcae mah tangoeng o moa ato kami khaeah, “Nang loa anih ih hnukbang ah na oh, to-e kaicae loa Mosi ih hnukbang ah ka oh o. 29Sithaw mah Mosi khaeah lok a thuih tih to ka panoek o; to-e ato kami loa naabanghoiah maw angzoh tidoeh ka panoek o ai,” tiah a ti o.
30Ato kami mah, “Hi hmuen loa dawnrai han oh! Nangcae loa naabanghoiah maw angzoh tih to na panoek o ai, to-e ka mikmaenghhaih ih hae anghoihsak! 31Sithaw loa kami kazaenawk ih lok to tahngai pae ai, tito ka panoek o; angmah khangza kaminawk hoi a koehhaih ih ka sah kaminawk ih lok to ni loa tahngaih pae. 32Mikmaeng tangcae ah zah ih kami to mik amtuengsak thaih tihae Long oh tangsuek hoitoah mita mah doeh thaih vaih ai. 33Hi kami hae Sithaw khae hoitoah kangzo ah om ai nahaeloa tih hmuen doeh sah thaih mak ai,” tiah a naa.
34Anihcae mah, “Zaehaih thungah na zah moa zaehaih thungah ka qoeng mah hae kaicae hae na patuk han na thuih maw?” tiah a naa o moa sinakok thung hoitoah pathok o ving.
Pakhra Mikmaenghhaih
35Totiah hmuen ka om to Jesuh mah a thaih na-ah ato kami to a hnuk moa anih khaeah, “Kami Capa na taang maw?” tiah a duengh.
36To kami mah, “Angraeng, anih to mimaw? Anih to ka taang thaih hanah na thuih ah,” tiah a naa.
37Jesuh mah anih khaeah, “Nang loa anih to na hnuk boah, moa vaihi nang hoiah lok ka pae hae ni,” tiah a naa.
38To kami mah, “Angraeng, kang taang!” a naa moa Jesuh hma-ah to khok samkrawn moa a bok.
39Jesuh mah, “Hi long ah hae lokcaek hanah kangzoh; ato loa mikmaengnawk mah mik amtueng moa mik kamtuengnawk mah mikmaengh haih hanih ni,” tiah a naa.
40Farasi thoemto toah anih hoiah ka om mah a thuih ih lok to ka thaih kaminawk mah, “Kaicae doeh hae mik na maengh o toengh tiah na thuihkoehhaih ih maw?” tiah a naa o.
41Jesuh mah, “Mik na maengh o nahaeloa na zaehaih ih om mak ai; to-e ‘ka mikhnuk thaih’ na ti o pongah vaihi khoekto na zaehaih ih a oh vop,” tiah a naa.
Currently Selected:
JOHAN 9: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
