JOHAN 15

Jesuh Loa Misur Kung Tangtang

1Jesuh mah, “Kai loa misur kung tangtang ni, Pa loa takhaa tawnkung ni. 2Kai thungah athaih kathai ai tanghang boih loa aboeng king moa athaih kathai tanghang to loa a thoengsoek han hoi athaih aep hanah tanghang kahoih ai to a taep pae. 3Nangcae doeh kang patukhaih ih ranghoiah na thoeng na cai o boah. 4Kai khaeah om o poe ah, kai doehsoe nangcae khaeah ka oh poe toeng han. Misur tanghang angmah khueh loa athaih athaii thaih ai; misur kungpui hoiah angpaeh na-ah khueh ni athaih thaih. Tobatih toengah kai hoiah nangpaeh o ai nahaeloa na thai o thaih mak ai.

5“Kai loa misur kung ni, nangcae loa tahang ni. Ami doeh kai thungah ka om poe moa kai doeh a thungah ka oh thuih ih kami loa zetpui athaii tih; kawmawtiah kai hoiaiah loa na sak o thaih ih tidoeh om ai. 6Ami doeh kai thungah ka om ai loa misur tanghang batiah vah ueloa angqo tih; tobatih tanghangnawk to loa lak cu moa hmai kamngaeh thungah thumh o moa a kang king. 7Kai thungah na oh poe o moa ka lok hae nangcae thungah om poe nahaeloa na koeh o ih boiboih to na hnih o ueloa na hnuh o tih. 8Pa ih lensawkhaih loa nangcae mah zetpui a thaihhaih ranghoiah amtueng ah oh; totiah to kai ih hnukbang ah coeng o tih. 9Pa mah kai ang palung batiah nangcae doeh kang palung o; kai ih amlunghaih thungah om o poe ah. 10Pa ih lokpaek to ka pazui moa angmah ih amlunghaih thungah ka oh poe batiah kai ih lokpaek to na pazui o nahaeloa kai ih amlunghaih thungah na om o poe tih.

11“Kai anghoehaih nangcae thungah oh han hoi nangcae anghoehaih to acung thaih hanah hi lok hae kang thuih o. 12Kai ih lokpaek loa ahi ni: Kaimah nangcae to kang palung o batiah nangcae doeh longto hoi longto amlung o toeng ah.#Jhn 13:34; 15:17; 1 Jhn 3:23; 2 Jhn 5 13Kami longto mah angmah ampuinawk hanih amlunghaih kalen koek a tawn ih loa anihcae hanah a hinghaih paek hae ni. 14Moa nangcae mah ka lokpaek ih hae na sak o nahaeloa kai ih ampui ah na oh o. 15Nangcae loa tamtoeh tiah kang kawk o mak ai boah, kawmawtiah tamtoeh loa angmah angraeng mah a sak ih to panoek ai. Nangcae loa tamtoeh tih aiah ampui tiah kang kawk o lat boah, kawmawtiah Pa khae hoitoah ka thaih ih boih to kang thuih king boah. 16Nangcae mah kai hae nang tuek o ai; kaimah ni kang tuek o moa cae moa kangcak hankoi athaih to zetpui ah athaih thaih hanah kang pacae o. Topongah kawbatih doeh ka hmin hoiah nang hnik o ih boih to Pa mah na paek o tih. 17Topongah ka lokpaek loa ahi ni: Longto hoi longto amlung oah.

Long Kaminawk Ih Hnukmaahaih

18“Long mah na hnumaa o nahaeloa kai hae ang hnukmaa hmaloe boah tito pahnet o hmah. 19Nangcae loa long iah na oh o nahaeloa long mah nangcae to angmah ih batiah palung o tih. To-e kaimah hi long hoitoah kang tuek o moa anih ih na ai boah ni; topongah long mah nangcae to ang hnukmaa o haih ih ni. 20‘Misong loa angmah ih angraeng ponghdoeh len kue vaih ai,’ tiah kang thuih ih to palung thungah pakuem o toemoe ah. Kaminawk mah kai hae pacaekhlaek o nahaeloa nangcae to doeh pacaekhlaek o toeng tih; anihcae mah kai ih patukhaih to pazui o nahaeloa nangcae ih patukhaih to doeh pazui o toeng tih.#Mat 10:24; Luk 6:40; Jhn 13:16 21To-e nangcae loa kai ih kami ah na oh o pongah hi hmuen boiboih hae nangcae nuiah sah o tih; kawmawtiah anihcae mah kai matoehkung to panoek o ai. 22Anihcae khaeah kangzo ai moa lok ka thui ai nahaeloa anihcae nuiah zaehaih ih oh han ai to mah; to-e vaihi loa anihcae zaehaih to akhaehaih han tidoeh tawn o ai boah. 23Ami doeh kai ka hnumaa loa Pa to doeh a hnukmaa. 24Mimah doeh sak vaih ai ih hmuennawk to anihcae salak thungah ka sah ai nahaeloa anihcae nuiah zaehaih ih oh han ai tomah; to-e vaihi loa ka sak ih to a hnuk o boih boah moa kai hoi Pa to ang hnukmaa o maek. 25To-e hitiah oh hanah a oh khruek, kawmawtiah anihcae ih Tawklok cabu thungah, ‘Tiloeng aiah, ang hnukmaa o,’ tiah tarik ih to akoephaih hanih ni. #Sam 35:19; 69:4

26“Pa khae hoitoah kangzo Bomkung, Sithaw ih kawng loktang taphongkung Pakhra to angzo tih. Pa khae hoitoah nangcae khaeah kang patoeh o han moa anih mah kai ih kawng to thui tih. 27Nangcae doeh atangsuek nahoiah kai khaeah na oh o boah pongah kai ih kawng to na thuih o han.

Currently Selected:

JOHAN 15: AKNT2023

Highlight

Copy