JOHAN 16

1“Nangcae na taanghaih ih to na prawt o sut han aiah hi lok hae kang thuih o. 2Sinakok thung hoitoah na haek o tih, nangcae ka hum kaminawk mah hitiah sak hae Sithaw tok ni ka sak o tiah dawn o haih ih atue to pha tih. 3Minawk mah tobatih to nangcae nuiah sah o tih, kawmawtiah anihcae loa Pa panoek o ai moa kai doeh panoek o ai. 4To-e vaihi kang thuih o, kawmawtiah hibatih hmuennawk hae nangcae nuiah sak hanah atue phak na-ah kang thuih o boah tito na panoek o let tih.

Cai Pakhra Ih Toksakhaih

“Nangcae hoiah nawnto ka oh vop pongah, atangsuek ah hi kawngnawk hae kang thui o ai. 5To-e kai loa matoehkung khaeah vaihi ka caeh han boah, to-e amimah doeh naamaw na caeh han tito na dueng o ai. 6Moa hitiah vaihi kang thuih pongah nangcae plungthinnawk loa palungsethaih hoiah koi o. 7To-e loktang ta-ah kang thuih o: Ka caeh hae nangcae hanah a hoih kue, kawmawtiah ka caeh ai nahaeloa nangcae khaeah bomkung to angzo mak ai. To-e ka caeh nahaeloa anih to nangcae khaeah kang patoeh han. 8Anih to angzoh na-ah loa zaehaih kawng dawn pazaehaih ih, toenghaih kawng dawn pazaehaih ih hoi Sithaw lokcaekhaih kawng dawn pazaehaih ihnawk to long kaminawk khaeah amtuengsak tih. 9Zaehaih kawng to a dawn pazae o, kawmawtiah kai na taang o ai pongah ni; 10toenghaih kawng to a dawn pazae o, kawmawtiah Pa khaeah ka caeh han moa nang hnuh o mak ai han boah pongah ni; 11moa lokcaekhaih kawng to na dawn pazae o, kawmawtiah hi long ukkung hae lokcaek ah oh boah pongah ah.

12“Nangcae khaeah thuih hanah paroeai ka tawnh, to-e vaihi aloa na pakuem o thaih lek mak ai. 13To-e loa Sithaw kawng loktang taphongkung Pakhra angzoh na-ah loa loktang boiboih thungah na zaehoi o tih. Anih loa angmah ih akaatawnhhaih hoiah thui mak ai, to-e a thaih ih to thui ueloa kangzo hankoi hmuennawk to doeh na thui tih. 14Anih mah kai hae lensawkhaih na paek tih, kawmawtiah kaimah ka thuih ih to anih mah la ueloa ato to nangcae khaeah na thui tih. 15Pa mah a tawnh ih boiboih loa kai ih ni; ato pongah ni loa kaimah ka paek ih to Pakhra mah la ueloa ato to nangcae khaeah na thui o tih, tiah kang thuih o to.

Palungsethaih hoi Anghoehaih

16“Nawnetta thung nangcae mah kai hae nang hnuh o mak ai boah, nawnetta pacoengah nang hnuh o let tih,” tiah a naa.

17A hnukbang thoemto mah, “Hi hae ti thuihkoehhaih ih maw vai? Nawnetta thung nangcae mah kai hae nang hnuh o mak ai boah; nawnetta pacoengah nang hnuh o let tih, tiah a thuih. Topacoengah ‘Pa khaeah ka caeh han pongah ni,’ tiah doeh a thuih bae. 18‘Nawnetta’ tihae ti thuihkoehhaih ih maw vai? Ti kawng maw a thuih tihae ka panoek o ai,” tiah longto hoi longto a ti o.

19Anih khaeah lok duengh han a koeh o tih to Jesuh mah panoek na-ah anihcae khaeah, “Kaimah ‘Nawnetta thungah nangcae mah kai hae nang hnuh o mak ai boah; nawnetta pacoengah nang hnuh o let tih,’ ka tih pongtoah maw nangcae mah longto hoi longto nang duengh o tuek? 20Loktang ta-ah kang thuih o: Nangcae loa ahaamhaih hoiah na qah o tih e long mah loa anghoe tih; nangcae loa palungsae o tih, to-e nangcae palungsethaih to anghoehaih bangah coeng let tih. 21Nongpui mah nauk a zah tom na-ah patang khanghaih ih tue mah a phak pae pongah palung a set; to-e nauk to zah na-ah loa longnui ah naukta kangtha longto zah pongtoah anghoe moa patang khanghaih ih boih to pahnet king. 22Tobatih toengah nangcae doeh na om o toengh tih: Vaihi aloa palung na set o, to-e kang hnuh o let tih moa palungthin loa anghoehaih hoiah koi tih, ato anghoehaih ih to loa amimah doeh nangcae khae hoitoah na lomh pae o thaih mak ai.

23“Ato ni to a phak na-ah loa kai hae tidoeh na dueng o mak ai boah. Loktang kang thuih o: Kawbatih doeh ka hmin hoiah na hnik o ih boih to Pa mah na paek o tih.#16:23 Kawbatih doeh ka hmin hoiah na hnik o ih boih to Pa mah na paek o tih tihae thoemto banrikcabu ah loa Pa khaeah tidoeh na hnik o nahaeloa, anih mah ka hmin hoiah na paek o tih tiah a oh. 24Vaihi karoekto ka hmin hoiah tidoeh nang hnih o vaih ai; hnih oah, na hnuh o tih; tona-ah ni loa nangcae anghoehaih ih to acung tih.

Long Pazawkhaih

25“Ahi hmuennawk hae kang thuih o na-ah patahhaih lok khueh ni ka patoh. To-e patahhaih patoh aiah Pa ih kawng to ka caisoek ah thuih hanih atue to na pha tih. 26Ato ni to a phak na-ah loa nangcae mah kai hmin hoiah na hnih o tih; nangcae zuengah kaimah kang hnik pae han tiah ka thui ai, 27kawmawtiah Pa angmah roeroe to mah nangcae to ang palung. Nangcae mah kai hae nang palung o pong hoi kai loa Sithaw khae hoitoah kangzoh tito nang taang o boah pongtoah Pa mah nangcae to palung o. 28Kai loa Pa khae hoitoah kangzoh tangtang moa long ah hae kangzoh; vaihi long hae tacawt tak moa Pa khaeah ka caeh han,” tiah a tih.

29Topacoengah a hnukbangnawk mah anih khaeah, “Vaihi loa patahhaih patoh aiah ka caisoek ta-ah na thuih. 30Nang loa hmuen cungriboih to na panoek king tito vaihi kang panoek o; nangmah kami longlongto lok na duengh mut han angaih ai boah. Ato mah nang loa Sithaw khae hoitoah nangzoh tito kaicae hae ang taangsak boah,” tiah a naa o.

31Jesuh mah anihcae khaeah, “Vaihi loa na taang o boah maw? 32Atue loa a phak boah moa hiah a oh boah, nangcae boih to na cawnh o dung na-ah nangmahcae ih im ah to na caeh o rip tih moa kaimah buengah nang caeh o tak sut tih; to-e kaimah buengah loa ka om ai, kawmawtiah Pa loa kai khaeah a oh. 33Kai hoiah angpaehhaih ranghoiah monghaih na hnuk o thaih hanah hi lok hae kang thuih o. Long mah patang raihaih to na paek o tih. To-e misa hoihsak oh! Long hae ka pazawk boah!” tiah a thuih.

Currently Selected:

JOHAN 16: AKNT2023

Highlight

Copy