JOHAN 17
17
A Hnukbangnawk Hanah Khophoeh
1Jesuh mah hi lok hae a thuih pacoengah van bangah a khet moa, “Pa, atue loa a phak boah. Capa mah lensawkhaih paekhaih thaih hanah na Capa khaeah lensawkhaih na paek ah. 2Na Capa khaeah na paek ih kami boiboih khaeah dungzan hinghaih to a paek thaih hanah caeng kaminawk boiboih nuiah akaatawnhhaih to nang paek boah. 3Ato dungzan hinghaih tihaih ih loa nang khueh to ni Sithaw tangtang tiah panoek hoi nangmah na patoeh ih Jesuh Khrih panoek hae ni. 4Long ah na lensawkhaih to kamtuengsak boah; toksak han nang paek ih to ka pacoeng boah. 5Pa! Long hae sak ai nahlanah nang khae hoi-ih ka tawnh ih lensawkhaih to vaihi na mikhnuk ah na paek ah.
6“Longprae thung hoitoah nang paek ih kaminawk khaeah na hmin to kamtuengsak boah. To kaminawk loa nang iah a oh moa kai khaeah nang paek ih ni. Anihcae loa na lok to pazui o moa, 7vaihi loa kai khaeah nang paek ih cungriboih hae nang khae hoitoah kangzo ni, tito doeh panoek o. 8Kai khaeah nang paek ih tamthang lok to ka thuih pae moa talawk o boah; kai loa nang khae hoitoah kangzoh tihae ahmaan tiah panoek o moa nangmah kai hae nang patoeh tito a taang o.
9“Anihcae hanah kho ka phoeh. Long hanah kho ka phoeh ai, to-e nang paek ih kaminawk hanah kho ka phoeh, kawmawtiah anihcae loa nang ih ni. 10Ka tawnh ih boiboih hae nang ih moa na tawnh ih boiboih doeh kai ih ni; ka lensawkhaih ih loa anihcae ranghoiah amtueng. 11Vaihi nangcae khaeah kangzoh han; kai loa long ah ka om mak ai boah, to-e anihcae loa long ah om o vop tih. Kacai Pa! nang hoi kai loa bum maeto ah oh batih toengah anihcae doeh bum maeto ah oh thaih toeng hanah nang paek ih na hmin#17:11 Nang paek ih na hmin hmuensak thaihaih hoiah kasueng ta-ah toepkawt rae ah tihae thoemto banrikcabu ah loa Nangmah kai nang paek ihnawk hae na hmin hoiah kasueng ta-ah toepkawt rae ah tiah a oh. hmuensak thaihaih hoiah kasueng ta-ah toepkawt rae ah. 12#Sam 41:9; Jhn 13:18Anihcae hoiah ka oh nathuemah nangmah kai nang paek ih na hmin hmuensak thaihaih hoiah anihcae to kasueng ta-ah ka toepkawt.#17:12 Nangmah kai nang paek ih na hmin hmuensak thaihaih hoiah anihcae to kasueng ta-ah ka toepkawt tihae thoemto banrikcabu ah loa Nangmah kai nang paek ihnawk hae na hmin hoiah kasueng ta-ah ka toepkawt tiah a oh. Cabu Kacai mah a thuih ih to acung haih hanah anghmat hanah ka om roe kami longto tiaialoa longto doeh anghma angtaa ai; kaimah kang dungh o king. 13Vaihi loa nangcae khaeah kangzoh han boah; anihcae mah kai ih anghoehaih to palung thungah kacung ta-ah a tawnh o thaih hanah hi longprae ah hibatih hmuennawk hae ka thuih pae. 14Nang ih tamthang lok to anihcae khaeah ka thuih na-ah long mah anihcae to a hnukmaa o. Kawmawtiah kai loa hi long iah ka om ai batih toengah nangcae doeh hi long iah na om o ai toeng pongah ni. 15Anihcae to hi long hoitoah lak ving hanah kang hnih ai, to-e Kahoih-ai Kami thung hoitoah kasueng ta-ah toepkawt hanah ni loa kang hnik. 16Kai loa long iah ka om ai batih toengah anihcae doeh long iah na om o ai. 17Anihcae to loktang ranghoiah nangmah hanah tahlangsak ah; Na lok loa loktang ni. 18Kai hae long ah nang patoeh batih toengah kaimah doeh anihcae to long ah ka patoeh toeng. 19Anihcae mah doeh nang khaeah ang tahlang o thaih tangtang toeng hanah Kaimah hoi kaimah hae doeh anihcae taham ah nang khaeah kang tahlang toeng.
20“Anihcae han khueh ah kho ka phoeh ai, anihcae ih tamthang lok thuihhaih ranghoiah kai ka taang kaminawk hanah doeh kho ka phoeh. 21Anihcae boiboih to maeto ah oh thaih hanah kho ka phoeh. Pa! Kai thungah nang na oh moa nang thungah kai ka oh batih toengah anihcae doeh kaicae thungah om toeng na soe. Kai hae nang patoeh tito long mah a taang thaih hanah maeto ah om o na soe. 22Nang hoi kai loa maeto ah oh batiah anihcae doeh maeto ah coengh o thaih hanah nangmah nang paek ih lensawkhaih to anihcae doeh ka paek toengh. 23Anihcae thungah kai ka oh moa kai thungah anihcae to oh ranghoiah anihcae loa maeto ah oh tangtang boah. Maeto ah ohhaih ranghoiah kai hae nang patoeh tihoi kai nang palung batiah anihcae doeh na palung tito long mah panoek thaih tih.
24“Pa! Anihcae to kai khaeah nang paek boah moa ka ohhaih khaeah kai hoiah oh hanah anihcae to ka koeh, tona-ah ni loa anihcae mah kai ih lensawkhaih nangmah nang paek ih to hnuh o thaih tih; kawmawtiah long sak ai nahlanah kai hae nang palung boah. 25Katoeng Pa! Nang loa long mah hae panoek ai, to-e kaimah loa kang panoek moa anihcae mah nangmah kai nang patoeh hae panoek o. 26Anihcae khaeah na hmin to ka taphong boah moa, ka nuiah amlunghaih na tawnh ih hae anihcae thungah a oh toeng han hoi kaimah doeh anihcae thungah ka oh toengh hanah na hmin loa ka taphong poe han,” tiah kho a phoeh.
Currently Selected:
JOHAN 17: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
