LUKA 1

Lokhraemhaih

1Ka palung ih Theofilas:

Kami kanoi mah aicae thungih hmuen kaom tangcaenawk to a hoihhaih thaih thungah tarik o boah. 2A tarik o na-ah tangsuek hoitoah ka hnuh khaeh kaminawk mah a thuih o ih hoi ato tamthang lok ka thui kaminawk mah a thuih o ih batih toengah tarik o. 3Topongah, nang Kahoih koek, kai doeh hi hmuennawk boih hae takung hoiah hoihdak ta-ah parui het pacoengah kamtom kamzen ta-ah nangcae hanah tarik han hoih tiah ka dawn. 4Na thaih tangcae ih akawng alamnawk to loktang tang ni tito na panoek o thaih hanah hi ca hae ka tarik.

Baptisma Paekkung Johan Zahhaih

5Herod loa Judea sangpahrang ah oh nathuemah #1:5 Judae prae tihae Palestine prae bum boih thuihhaih ih ni. Abijah qaihma caeng thungah ka paa toengh qaihma Zekhariah to a oh. A zu ih ahmin loa Elizabet moa anih doeh qaihma caengqui thungih toeng ni.#1 Dung 24:10 6Anih hnit loa Sithaw mikhnuk ah tuinuenh kahoih ah khosak hoi moa Angraeng ih tawknawk hoi lokpaek ihnawk to kacung bit ah pazui hoi boih. 7Elizabet loa ca kak pongah caanawk to tawn hoi ai; anih hnit loa mitong hoi maek boah.

8Nito na-ah Zekhariah loa nithokkruek a toksakhaih ih tue to a phak pae toeng moa Tempal thungah qaihma tok to a sak. 9Qaihmanawk mah pazui o ih tawk batiah bokting nuiah hmuihoih to hlaek hanah qoihcung azuhaih hoiah Zekhariah to a qoih o. Topongah Angraeng ih Tempal ah thungah to akun. 10Hmuihoih hlaek tue phak nathuemah to mipuinawk loa tasabang ah kho a phoeh o.

11Angraeng ih vanminawk to anih khaeah amtueng thuih moa hmuihoih hlaek ih bokting bantang bangah angdoet. 12Zekhariah mah a hnuk na-ah angpae moa a zit. 13To-e vanmi mah, “Zekhariah, zi hmah! Sithaw mah nang ih khophoehhaih ih loa a thaih boah moa na zu Elizabet loa ca nongpa to za tih. Ahmin ah Johan na phuii han. 14Anih to a zah na-ah natanmaw palung anghoehaih to om ueloa mi kalah paroeai mah doeh anghoe o toeng tih. 15Anih loa Angraeng ih mikhnuk ah kami kalen ah om tih. Misurtui to doehsoe, mu doehsoe nae mak ai. A zah pacoeng rumhoi loa Cai Pakhra hoiah koi roep ueloa,#Nam 6:3 16Israel kami zetpui to Angraeng Sithaw khaeah to amlaem haih let tih. 17Anih loa Angraeng ih hma-ah caeh hmaloe ueloa tahma Elijah batih toengah kangcak hoi tha karah kami ah om tih. Ampanawk hoi caanawk to nawnto ah angqum cusak let ueloa lok tahngai ai kaminawk to doeh kami katoengnawk ih a dawnhaih lam bangah to paqoi let tih. Angraeng ih kaminawk to Angraeng hanih ah coengcoe ah omsak tih,” tiah a naa.#Mal 4:5-6

18Zekhariah mah van kami khaeah, “Totiah om tih tito kawbangmaw ka panoek thaih han? Kai loa ka mitong boah moa ka zu doeh mitong toeng bae boah,” tiah a naa.

19Vanmi mah, “Kai hae Gabriel ni. Hi tamthang kahoih hae nangcae khaeah thuih hanah patoehkung Sithaw ih hma-ah kangdoet toemtoem.#Dan 8:16; 9:21 20To-e tamthang lok ka thuih ih hae na taang o ai cadoeh atue mah phak na-ah loa acung tih. Na taang ai pongah lok apae thaih aiah na om tih. Nang khaeih lok amaihhaih ih to acunghaih tue phak airoek loa lok pakhato doeh napae thaih mak ai,” a naa pae.

21To tue thungah to kaminawk mah Zekhariah to a zing o moa tipongmaw Tempal thungah akraa parai vai, tiah a dawnrai o. 22Tasa ah tacawt na-ah lok apae thaih ai, topongah Tempal thungah hnuksakhaih to a hnuk boah tito panoek o. Lok apae thaih ai moa a ban hoiah amathaih to a sak.

23Tempal thungih a toksakhaih tue to aboeng na-ah Zekhariah loa im ah amlaem. 24Topacoeng akraa parai aiah a zu Elizabet loa nauk a naengh moa khrah pangato thung loa tasabang tacawt ai. 25Anih mah, “Vaihi aboeng koek ah Angraeng mah ang bom moa mipui hma-ah azathaih ih to anglak pae ving boah,” tiah a thuih.

Jesuh Zahhaih

26Elizabet ih nauk a naenghhaih a khrah tarukto na-ah Sithaw mah vanmi Gabriel to Galili prae Nazareth naa pae ih vang ah patoeh. 27Sangpahrang David ih cadii ah kaom nongpa Joseph naa pae ih hoiah zuva ah angoh hanah lok kamaih nongpui khaeah tamthang na thuih han, tiah a patoeh. To nongpui ih ahmin loa Meri ni.#Mat 1:18 28Vanmi loa angzoh moa anih khaeah, “Na nuiah monghaih oh na soe! Angraeng loa nang khaeah oh moa mangtuihoihhaih zetpui ang paek,” tiah a naa.

29Vanmi ih tamthang lok pongah Meri loa omtui ai moa a lok thuihkoehhaih loa timaw vai, tiah a dawnrai. 30Tona-ah vanmi mah, “Meri, zi hmah. Sithaw hma-ah mikhmai hoihhaih na hnuk boah,” tiah a naa. 31Nauk na naengh ueloa nongpa to za tih. Ahmin ah Jesuh na phuii tih.#Mat 1:21 32Anih loa kami kalen ah om ueloa Ranuisang Koek Sithaw Capa tiah thui o tih. Anih to Angraeng Sithaw mah amsae David batiah sangpahrang ah suem ueloa,#2 Sam 7:12,13,16; Isa 9:7 33Jakob cadiinawk ih nuiah dungzan ah sangpahrang ah om tih. A ukhaih ih loa natuek doeh boeng mak ai,” tiah a naa pae.

34Meri mah vanmi khaeah, “Kai loa tangla kacuem ni, tobatih loa kawbangmaw angcoeng thaih tih,” tiah a naa.

35Vanmi mah, “Cai Pakhra to nang khaeah angzo ueloa Sithaw ih hmuensak thaihaih loa na nuiah pha tih. Hitih pongah kacai naukta loa Sithaw Capa tiah kawk o tih. 36Na sanauk Elizabet to dawn oah. Anih loa naukta tawn thaih ai tiah thuih o, to-e mitong ngan bangah nauk a naengh moa vaihi hae khra tarukto oh boah. 37Kawmawtiah Sithaw mah sak thaih ai ih tidoeh om ai,” tiah a naa.#Gen 18:14

38Meri mah, “Kai loa Angraeng ih tamtoeh ni, na thuih ih batiah ka nuiah oh na soe,” tiah a naa. Topacoengah vanmi mah a caehtak.

Elizabet Khaeah Meri Paqaih

39Topacoengah Meri loa amhuek moa Judea prae maepui ih vang ah tawt hoiah a caeh. 40Zekhariah im ah akun moa Elizabet to lok hoiah apring. 41Meri ih apringhaih lok to a thaih na-ah a zok thungih naukta to angtawt. Elizabet loa Cai Pakhra hoiah koi moa, 42khoeh puiah, “Nang loa nongpui boiboih pongdoeh tahamhoih koek nongpui ah na oh. Na zah hanih naukta doehsoe tahamhoih naukta ah oh! 43Tipongkhoe maw ka Angraeng ih amno mah kai batih kami khaeah nang paqaih? 44Kawmawtiah nangmah apringhaih ih lok ka thaih hoiloa ka zok thungih naukta to anghoehaih hoiah amcawh. 45Angraeng ih tamthang lok nang khaeah kangzo to acung tangtang tih, tiah taang hae nang hanah natanmaw palung anghoe han oh!” tiah a naa.

Meri Ih Pakoehhaih Laa

46Meri mah,#1 Sam 2:1-10

“Ka palungthin mah Angraeng to pakoeh;

47Ka hinghaih mah Sithaw mahlongkung nuiah anghoe;

48kawmawtiah mi hlimah ka om na tamtoeh hae nang pahnet ai.#1 Sam 1:11

Vaihi kazit hoiloa mi boih mah tahamhoih kami na naa o tih.

49Cungri sahthai Sithaw mah kai hanah hmuen kating kanoek ai to angsak pae boah.

Ahmin loa a cai;

50Dung maeto pacoeng maeto

Angmah ka zinawk to loa a tahmen.

51A ban tha kaom to pazang moa

kam-oek kaminawk to loa angcaenghaih o ih hoi paro pae dung.

52Tha karah sangpahrangnawk to a tangkhang nui hoitoah pakhrak tathuk moa,#Job 5:11; 12:19

mi hlimah kangbaih kaminawk to pasang tahang.

53Zok kamhlam kaminawk to hmuen kahoih hoiah pacah moa,

angraeng kanangnawk to ban kokkak ah amlaemsak.

54Aicae saezanawk khaeah lok amaihhaih ih loa acungsak moa,

a tamtoeh Israel abom hanah angzoh boah.

55Abraham hoi a cadiinawk boih khaeah

dungzan ah tahmenhaih amtuengsak hanah pahnet ai,” tiah a thuih.

56Meri loa Elizabet khaeah khra thumto roekrak a oh moa topacoengah angmah im bangah amlaem let.

Baptisma Paekkung Johan Zahhaih

57Elizabet loa nauk ohhaih ani khrah acung boah moa ca nongpa to a zah. 58Angraeng loa natanmaw a nuiah a hoih tito a imdongpaknawk hoi sanauknawk boih mah a thaih o na-ah anihcae boih mah kawn o haih bo.

59Naukta ta loa ani tazet na-ah tangzat hin aah hanah angzoh o haih moa ampa hmin Zekhariah to phuii han thuih o.#Lev 12:3 60To-e amno mah, “Na ai ni, ahmin loa Johan phuii han,” tiah a naa.

61Anihcae mah nongpui khaeah, “Na sanauk thungah ato batih ahmin ka tawn to om ai!” tiah a naa pae o. 62Topacoengah ampa to banpazung hoi amathaih sak hoiah lok apaeh o haih moa a capa hmin phuii han a koeh ih to a duengh o.

63Zekhariah mah ca tarikhaih caqam to a hnik moa, “Ahmin loa Johan ni,” tiah tarik. Anihcae boih mah dawnrai o. 64Topacoeng hoiloa Zekhariah to lok apaeh thaih let moa Sithaw to pakoeh. 65Imdongpaknawk loa zit mawnhaih hoiah a koi o moa hi hmuen kawng hae Judea prae maepui ih vang boih ah amthang king. 66Ato tamthang ka thaih kami boih mah palung thungah a dawn o moa, “Hi naukta loa kawbatih kami ah maw coeng tih vai?” tiah a thuih o. Kawmawtiah Angraeng hmuensak thaihaih ih loa naukta nuiah a oh tito hoihdak ta-ah amtueng.

Zekhariah Mah Thuihcoek Ih Lok

67Johan ampa Zekhariah loa Cai Pakhra hoiah a koi moa Sithaw ih tamthang lok to hitiah a thuih:

68“Israel Sithaw Angraeng to pakoeh o si.

Anih loa angmah kaminawk abom hanah angzoh boah moa a loihsak boah.

69Aicae hanah tha karah Pahlongkung to tacawtsak boah;

Anih loa a tamtoeh David ih catawn ni.

70Zanghnii zangkhawn ah angmah ih tahma kacainawk ranghoiah lok amaih zawh boah;

71Aicae ih misanawk ban thung hoitoah,

aicae na hnumaa kaminawk boih ih thaohhaih ban thung hoitoah pahlong hanah.

72Aicae ih saezanawk khaeah ‘palungnathaih to ka tawnh moa,

a paipi kacai to ka pahnet mak ai,’ tiah a thuih.

73-74Aicae ih misanawk ban thung hoitoah loihsak han hoi

zithaih om aiah Angmah ih toksak hanah,

aicae saeza Abraham khaeah saephoehhaih hoiah lok amaih boah.

75Topongah aicae hing thung boiboih ah

angmah hma-ah kacai hoi katoeng ta-ah oh hanah ni.

76“Ka capa, nang loa Kasang Koek Sithaw ih tahma tiah kawk ah om tih.#Mal 3:1

Nang loa angmah ih loklam to tuk hanah

Angraeng ih hma-ah na caeh tih.

77Angmah kaminawk loa a zaehaih o ih

tahmenhaih ranghoiah

pahlong ah om o tih, tiah na thuih pae han. 78Aicae ih Sithaw loa mi tahmen thaih hoi tuinom kahoih ni.

Pahlonghaih niaeng kahoih loa aicae nuiah na phasak ueloa,

79duekhaih tahlip kaving thungah kaom kaminawk boih nuiah van bang hoitoah na toeh ueloa,#Isa 9:2

aicae ih khok tangkan to monghaih loklam ah pahoi tih,” tiah a thuih.

80Naukta loa takphrah hoi pakhra bangah qoeng tahang moa tha oh tahang hruet hruet. Israel kaminawk khaeah mi boih mikhnuk ah amtueng airoek loa praetanghaeng ah a oh.

Currently Selected:

LUKA 1: AKNT2023

Highlight

Copy