LUKA 2

Jesuh Zahhaih

(Mat 1:18-25)

1Tona tue ah prae ukkung Sangpahrang Augastas mah a uk ih Rom prae thung boiboih ah milu kroek moa ahmin lak king hanah lok a paek. 2Hi milu kroekhaih hmaloe koek ah hae Kuirinias loa Siria ukkung ah a oh. 3Topongah mi boih mah angmahcae khaekhaeh mah ahmin to khrumh hanah angmahcae vang ah to caeh o rip.

4Joseph loa Galili prae Nazareth vang hoitoah Sangpahrang David tacawthaih ih hmuenh, Judea prae Bethlehem vang ah to a caeh. Joseph toah a caehhaih ih loa David ih cadii ah a oh pongah ni. 5Milu kroek na-ah ahmin khrumh hanah to angohhaih hanah lok kamaih tangcae ah kaom Meri hoiah to a caeh hoi. Meri loa zokbum ah oh moa, 6Bethlehem vang ah a oh hoi nathuemah nauk zahhaih ani khrah to a phak boah. 7A calu ah nongpa to a zah moa kahni hoiah abam pacoengah maitaw okduk thungah pasong; kawmawtiah angvin toemhhaih im ah to anih hnit hanah ahmuenh om ai.

Tuukroekungnawk hoi Vanminawk

8To prae thungah to angmahcae ih tuu huto ka khenzawn moa tawtaqak ah ka iip tuukroekung thoemto a oh. 9Angraeng ih vanmi longto loa anihcae khaeah amtueng moa Angraeng lensawkhaih to anihcae nuiah aang pae. Anihcae loa paroeai a zit o; 10to-e vanmi mah anihcae khaeah, “Zi o hmah! Nangcae hanah tamthang kahoih kang sinh; ato tamthang kahoih mah mi boiboih hanah anghoehaih kalen parai to na sin tih. 11Vaihni roeroe ah David vangpui ah nangcae ih pahlongkung Khrih Angraeng loa zah boah. 12Moa hi hae nangcae hanah amathaih iah om tih: Naukta to kahni hoiah abam moa maitaw okduk thungah pasong ih to na hnuh o tih,” tiah a naa.

13Nawnetta ah vanmi hoiah nawnto ah van ih vanmi risa bupui to amtueng moa Sithaw to saphawhaih laa a sak o:

14“Van kasang koek ah Sithaw lensawkhaih oh na soe,

Palung a daeh ih kaminawk khaeah hi long ah monghaih oh na soe!” tiah a thuih o.

15Vanminawk loa anihcae khae hoitoah van ah amlaem o let na-ah tuukroekungnawk loa longto hoi longto, “Bethlehem vang ah caeh o siloa Angraeng mah aicae khaeah a thuih ih hmuen ka thok to khen o si,” a ti o.

16Topongah karang ah caeh o moa Meri hoi Joseph to angqum o moa maitaw okduk thungah pasong ih naukta to a hnuk o. 17Tuukroekungnawk mah naukta to a hnuk o na-ah vanmi mah naukta kawng a thuih ih to anihcae khaeah a thuih pae o. 18Tuukroekungnawk mah a thuih o ih ka thaih kaminawk boiboih mah a dawnrai phi. 19Meri loa hi hmuennawk boih hae palung thungah aken moa kathuk paraiah a dawn. 20Tuukroekungnawk loa amlaem o moa a thaih hoi a hnuk o ihnawk boih pongah Sithaw saphawhaih laa a sak o. Vanmi mah anihcae khaeah a thuih ih batih toah a oh tangtang.

Jesuh Ahmin Phuiihaih

21Tabaihto pacoengah naukta loa tangzat hin aah tue akoep na-ah Jesuh tiah ahmin phuii o. To ahmin loa amno mah a naengh ai nahlanah vanmi mah a thuih pae roeh ih ahmin ni.#Lev 12:3; Luk 1:31

Tempal Ah Jesuh Tahlanghaih

22Mosi ih Tawklok mah lokpaek ih batiah thoengcaisakhaih ih to sak hanah Joseph hoi Meri hnit han atue mah a phak. Topongah naukta to Angraeng khaeah tahlang hanah Jerusalem ah a caeh haih hoi.#Lev 12:6-8 23Angraeng ih Tawklok cabu thungah loa, “Calu nongpa boih loa Angraeng khaeah tahlang hanah a oh,” tiah tarik.#Exo 13:2,12 24Tokhueh aiah Angraeng ih Tawklok mah a kuek ih batih toengah pahuu hnetto, tiaibaloa aapahu cata hnetto hoiah lucik sak hanah a caeh hoi.

25Tona tue ah Simeon naa pae o ih longto Jerusalem vang ah a oh. Anih loa kami kahoih hoi Sithaw ka zi kami ah oh moa Israel kami pahlong ah oh hanah ka zing toemoe kami ah a oh. Cai Pakhra mah a oh haih moa, 26“Angraeng mah lok amaih ih Messiah to na hnuh airoek loa na dueh mak ai,” tiah kacai ah taphong. 27Tona-ah Cai Pakhra zaehoihhaih hoiah Simeon loa Tempal thungah a caeh na-ah Tawklok mah a kuek ih batih toengah anih hanah sak pae hanah amno ampa hnit mah naukta Jesuh to Tempal thungah angzoh haih. 28Simeon mah naukta to ban hoiah tapom moa Sithaw to pakoeh:

29“Angraeng, vaihiah na lok amaihhaih ih to na cungsak boah moa,

na tamtoeh kai hae kamong katae ta-ah nang caehsak thai boah.

30Na pahlonghaih loa ka mik hoiah ka hnuk khaekhaeh boah,

31mi boiboih mikhnuk ah na paroep ih pahlonghaih to:

32“Ato pahlonghaih loa Gentelnawk khaeah na koehhaih loklam patuekkung aanghaih iah oh moa, #Isa 42:6; 49:6; 52:10

nangmah ih kami Israel kaminawk khaeah lensawkhaih ka phasakkung ah oh,” tiah a thuih.

33Simeon mah naukta ih kawng a thuih to amno hoi ampa mah thaih na-ah a dawnrai hoi. 34Simeon mah anih hnit hanah tahamhoihhaih to a paek moa amno Meri khaeah, “Hi naukta loa Israel kaminawk thungah kami zetpui amrohaih han hoi pahlonghaih hanah Sithaw mah a qoih ih ni. Angmah hae Sithaw khae hoi-ih kangzo amathaih iah om tih; kami paroeai mah angaekhaih iah om ueloa, 35totiah kasae ah thuih o haih ih ranghoiah palung thungah tamqu lamah dawnhaih ihnawk boih to amtueng pae o lat tih. Moa palungsethaih ih mah songsen batiah na palungthin to na thun tih,” a naa pae.

36Tahma kacoeh phi lumhmai longto ahmin Anna naa pae o ih to a oh moa anih loa Asher caeng thungih Fanuel canu ni. A sava hoiah saning sarihto khueh angoh hoi moa, 37vaihi loa saning quitazetto pacoeng palito a oh boah. Tempal to caehtak vaih ai moa qum thun Sithaw a bok moa buhzah hoi khophoehhaih a tawnh toemoe.#2:37 Vaihi loa saning quitazetto pacoeng palito a oh boah tihae saning 84 to lumhmai ah oh boah tih thaih. 38Tona tue thuemah to angzoh toeng moa Sithaw khaeah kawn lok a thuih. Topacoengah Sithaw mah Jerusalem loihsak let tih tiah ka zing kaminawk boiboih khaeah naukta ta kawng to a thuih pae.

Nazareth ah Jesuh Amlaem Haih Let

39Joseph hoi Meri loa Angraeng ih tawklok mah a nguek ih boih to a sak hoi king pacoeng na-ah Galili prae Nazareth vang angmah hnit im ah amlaem hoi let.#Mat 2:23 40Naukta loa a qoengh tahang moa a tha a oh; ciinghaih hoiah a koi moa Sithaw ih mangtuihoihhaih to a nuiah a oh.

Naukta Jesuh Tempal Thungah

41Jesuh amno hnit ampa loa saning kruekto Takantak Poi patoh hanah Jerusalem ah a caeh hoi toemoe.#Exo 12:1-27; Deut 16:1-8 42Jesuh loa saning hlaihnetto akoep na-ah a caeh noek batiah poi kungah to a caeh. 43Poi to aboeng pacoeng na-ah im ah amlaem han amsak o, to-e naukta Jesuh loa Jerusalem ah oh. Ato to amno hnit ampa mah panoek hoi ai; 44ampuinawk khaeah a oh mue tiah a dawn hoi, topongah thunqui a caeh hoi moa a sanauknawk hoi ampuinawk salak thungah pakrong hoi khing. 45To-e hnuh hoi ai, topongah Jerusalem ah pakrong hanah amlaem hoi let. 46Ani pathum ah Tempal thungah to a hnuk hoi, patukkung Judah kaminawk khaeah anghnut, anihcae ih lok to tahngai moa lok doehsoe a duengh toeng. 47Anih ih lok ka thaihnawk boiboih mah palunghahaih hoiah lok pathim ih to a dawnrai o sut. 48A hnuk hoi na-ah amno hnit ampa mah doeh a dawnrai hoi moa amno mah, “Ka capa, tipongmaw hitiah hae nang sak? Nam pa hoi mawnhaih hoiah kang pakrong hoi khing,” tiah a naa.

49Jesuh mah, “Tipongmaw nang pakrong hoi loa? Pa im ah ka oh han a oh tito na panoek hoi ai maw?” tiah a naa. 50To-e a thuihkoehhaih ih to panoek pae hoi ai.

51Topacoengah Jesuh loa amno hnit ampa hoiah Nazareth ah amlaem moa a lok tahngai ah oh. Amno mah hi hmuennawk boiboih hae palung thungah pakuem cet. 52Jesuh loa takbum bangah doehsoe, palunghahaih bangah doehsoe a qoengh tahang moa Sithaw hma hoi kami hma-ah mikhmai kahoih to a hnuk. #1 Sam 2:26; Lok 3:4

Currently Selected:

LUKA 2: AKNT2023

Highlight

Copy