LUKA 13
13
Zaehaih Dawnpakhuem Oh
1Tona tue ah kami thoemto mah Jesuh khaeah, Galili kaminawk mah Sithaw khaeah angbawnhaih a sak o li na-ah Pilat mah kami humhaih ih kawng to a thuih pae o. 2Jesuh mah anihcae khaeah, “Ato Galili kaminawk to hum ah oh pongah kalah kaminawk boih pongdoeh a zae o aep, tiah na dawn o maw? 3Zae o aep ai roeroe, kang thuih o: Nangcae doeh na zaehaih ih dawnpakhuem o ai nahaeloa anihcae batih toengah na dueh o king tih. 4Siloam ih imsang amtim na-ah kami hlaitazetto a taeh moa duek ih kawng to kawbangmaw na dawn o? Totiah a duek o pongah Jerusalem ih kaom kaminawk pongdoeh a zae o koek, tito amtuengsak tiah na dawn o maw? 5Zae o koek ai roeroe, kacai ta-ah kang thuih o: Nangcae doeh na zaehaih ih dawnpakhuem o ai nahaeloa anihcae batiah na dueh o boih toeng tih,” tiah a naa.
Ka Thaii Ai Thaiduet Kung Patahhaih
6Jesuh mah anihcae khaeah hi patahhaih hae a thuih pae: “Zanghnii ah kami longto mah angmah ih takhaa thungah thaiduet kung maeto to a hlingh. Kathai hoi kathai ai to a khet toemoe e athaih tidoeh hnuh ai. 7Topongah takhaa toepkung khaeah, ‘Khen e, saning thumto thungah hi thaiduet kung athaih maw athaii ai maw, tito khet hanah hiah kangzoh tuektuek e athaih tidoeh ka hnuh ai roe. Pakhruh ving halat lai ah. Tipongkhoe longlai kahoih to caa tuektuek halat tih?’ tiah a naa. 8To-e takhaa toepkung mah, ‘Angraeng, saning maeto ta khueh loa pahlung rae ah. A taenghaek ih long voe pae rae ueloa long kathauk to paek rae ue. 9Topacoengah amla ah athaih to athaii nahaeloa hoih aep tih hmang; athaii ai ving nahaeloa tona-ah pakhruh thaih tih hmang,’ a naa,” tiah a thuih pae.
Sabbath Ni Ah Nongpui A Hoihsak
10Vaito loa Sabbath ni ah Jesuh mah sinakok ah patuk pae. 11Toah to nongpui longto a thungah taqawk kasae ka tawn a oh moa ato taqawk mah to saning hlaitazetto thung angoisak; kaeng a kuu moa katoeng ta-ah angdoe thaih ai roeroe. 12Jesuh mah a hnuk na-ah a kawk moa, “Nongpui na nathaih hoitoah na loih boah,” tiah a naa. 13A nuiah to a ban a koeng pae, moa katoeng ta-ah angdoet thaih let moa Sithaw to pakoeh.
14Sinakok khenzawnkung kacoeta loa Sabbath ni ah Jesuh mah a hoihsak to paroeai palung a phuisak, topongah mipui khaeah, “Toksak hanah ni tarukto a oh; ato ni tarukto thungah angzo oloa hoihsak oah, to-e Sabbath ni ah loa sah o hmah roeroe ah,” tiah a naa.#Exo 20:9-10; Deut 5:13-14
15Angraeng mah, “Nangcae laiha kaminawk! Nangcae thungih ami doeh Sabbath ni ah maitaw doehsoe, laa hrang doehsoe a im thungih aqui to na khramh pae o moa tui naeksak hanah na caeh o haih to loa. 16Vaihi hiah hae Abraham ih cadii, Setan mah saning hlaitazetto thung raekrai moa patang ka khang to a oh; anih hae raekraihaih thung hoitoah Sabbath ni ah loihsak hanah om ai maw?” tiah a naa. 17A lok pathimhaih ih mah a misanawk to a zatsak roem moa dawnraihaih hmuen a sak ih nuiah to mipui mah palung anghoe o.
Antam Muu Patahhaih
(Mat 13:31-32; Mrk 4:30-32)
18Jesuh mah, “Sithaw Poenghaih loa tihoiah maw ahmong? Tihoiah maw ka patah han? 19Kami longto mah antam muu a lak moa angmah lawk thungah a haeh ih hoiah ahmong. Anmae loa amprawk, a qoengh tahang moa thingkung ah coengh, moa tanghangnawk pongah tavanawk mah tabu a boh o,” tiah a naa.
Tae Patahhaih
(Mat 13:33)
20Topacoeng bae ah Jesuh mah, “Sithaw Poenghaih loa tihoiah maw ka patah han? 21Nongpui longto mah tae tetta to a lak moa takaw lahom maeto thungah a phuih moa a thungih takaw boih kanguengsak king tae hoiah ahmong,” tiah a naa pae.
Thokkhang Tamcaek
(Mat 7:13-14,21-23)
22Jesuh loa vangpui vangca ah to amkaeh moa kaminawk to a patuk, moa Jerusalem bangah to a caeh. 23Kami longlongto mah, “Angraeng, kami zetta khueh maw pahlong ah om tih?” tiah a duengh.
Jesuh mah hitih hiah a pathim, 24“Khongkha tamcaek bang hoitoah akun hanah panki oah; kawmawtiah kami ka pop mah toah akun han to zom o tih, to-e akun o thaih mak ai. 25Im tawnkung angraeng to angthawk ueloa thok to kha tih; tona-ah nang loa tasabang ah angdoe ueloa thok to na takhuek o tih moa, ‘Angraeng, kaicae hanah thok paong pae o rae ah,’ tiah na naa o langla cadoeh ‘Naahoimaw nangzoh o kang panoek ai,’ tiah na naa o tih. 26Tona-ah nangcae mah, ‘Nangmah hoi buh nawnto angvai o moa tui doeh nawnto a naek o to loa, kaicae vang ah nang patuk to loa,’ tiah na thui o tih. 27To-e anih mah, ‘Naahoimaw nangzoh o kang panoek ai. Kai khae hoitoah caeh o ving ah, nangcae kami kasaenawk!’ tiah a naa bae tih.#Sam 6:8 28Nangcae boih loa tasabang ah vah king ah om ueloa Sithaw Poenghaih thungah Abraham, Isaak, Jakob, hoi tahmanawk boih to na hnuk o na-ah natanmaw na qah o ueloa haa to na kaek o tih.#Mat 22:13; 25:30#Mat 8:11-12 29Niangzae hoi niduem, aluekbang hoi aloihbang hoitoah kaminawk angzo o ueloa Sithaw Poenghaih thungah buhraeng to angvai o nawn tih. 30Tona-ah loa vaihi ih hnukkhuem kaminawk hae hmaloe koek ah om ueloa vaihi ih hmaloe koek kaminawk hae hnukkhuem koek ah om tih,” tiah a naa.#Mat 19:30; 20:16; Mrk 10:31
Jesuh Mah Jerusalem Palung
(Mat 23:37-39)
31To tue nathuem toengah Farasi kami thoemto to Jesuh khaeah angzoh o moa, “Hi hmuenh hoitoah tacawt aloa kalah bangah caeh ving ah, kawmawtiah Herod mah nang to hum han a thuih,” tiah a naa pae o.
32Jesuh mah anihcae khaeah, “Caeh oloa ato tasui khaeah, ‘Vaihni hoi khawnbang loa taqawknawk pathok moa nathaih ihnawk to ka hoihsak han vop, ani pathum ah ka toksakhaih ih to ka pacoeng han a tih,’ tiah thui pae oah. 33Topongah vaihni, khawnbang hoi omvaih ah ka caeh han vop, kawmawtiah tahma loa Jerusalem vang thungah tiaialoa hmuenh kalah ah doeh hum hanah angcoeng thaih ai.
34“Jerusalem, Jerusalem! Tahmanawk to na hum moa Sithaw mah nang khaeah patoeh ih laicaenawk to hlung hoiah na vah o. Aapui mah a caanawk to pakhrae hlimah tacu batiah vai nazetto maw nang ih kaminawk boih to ka ban hoiah takaem han ka koeh e na koeh o ai. 35Topongah na Tempal to pahnawt sut ah om tih. Kacai ta-ah kang thuih o: ‘Angraeng hmin hoiah kangzo loa Sithaw mah tahamhoihhaih paek na soe,’ tiah na thuih ih tue a phak airoek loa kai ih kraang hae na hnuh o mak ai,” tiah a naa.
Currently Selected:
LUKA 13: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
