LUKA 12

Laiha Kaminawk To Acoepaekhaih

(Mat 10:26-27)

1Mipui kroeklaek ai to acu o moa longto hoi longto angcawh o mingmoeng pongah Jesuh mah a hnukbangnawk khaeah hmaloe ah hitiah a thuih: “Farasinawk ih tae to acoe oah, ka thuihkoehhaih ih loa laihacanhaih ih tae to ni.#Mat 16:6; Mrk 8:15 2Kawbatih doeh khuk hmoep ah ka om boih to paongh king ah om ueloa loktamqu boih to taphong king ah om tih. #Mrk 4:22; Luk 8:17 3Topongah kawbatih doeh khoving thungah na thuih o ih loktamqu to thun ka aang ah thaihsak king ah om ueloa kawbatih doeh im thok khah hmoek moa tamqu lamah na thuih o ih to im nuibang hoiah hanghhaih ah om tih.

Zit Han Kaom Kami

(Mat 10:28-31)

4“Kang thuih o: Kampuinawk, takbum khueh hae paduek thaih moa kalah kasae aep ka sah thaih ai kaminawk to zi o hmah. 5Mimaw zit han ka om tito kang patuek o han: Paduek pacoengah doeh hell thungah vah hanah akaatawnkung Sithaw to zi oah. Kang thuih hae taang oah, angmah khueh to ni zit han oh.

6“Paritca pangato to phoisa piahnetto ah a zawh o na ai maw? To-e paritca maeto boe doehsoe Sithaw mah pahnet ah om ai. 7Nangcae lu ih sam mataeng doeh a kroek king. Topongah mawn o hmah; nangcae loa paritca paroeai parai ponghdoeh atho na oh o pahlai zawt.

Khrih To Taphong hoi Tahnawng

(Mat 10:32-33; 12:32; 10:19-20)

8“Loktang ta-ah kang thuih o: Kai ih kami ah ka oh o tiah minawk hma-ah ka taphong kaminawk loa Kami Capa mah Sithaw ih vanminawk hma-ah kai ih kami ni tiah na naa o toeng tih. 9To-e minawk hma-ah kai ka tahnawng kaminawk loa Kami Capa mah Sithaw ih vanminawk hma-ah tahnawng o toeng tih.

10“Ami doeh Kami Capa to aekhaih lok ka thui loa tahmen pae thaih tih; to-e Cai Pakhra to kasae ah ka thui loa tahmen pae mak ai.#Mat 12:32; Mrk 3:29

11“Sinakok ah doehsoe, prae ukkung angraengnawk tiaibaloa ukkungnawk hma-ah doehsoe anghoih o na-ah kawbangmaw kangtangh han moa timaw ka thuih han tito mawn o hmah.#Mat 10:19-20; Mrk 13:11; Luk 21:14-15 12Kawmawtiah ato tue ah timaw ka thuih han tito Cai Pakhra mah na patuk tih hmang,” tiah a naa pae.

Angraeng Kanang Kamthu Patahhaih

13Mipui thungih nongpa longto mah Jesuh khaeah, “Patukkung, kam pa mah caeh o tak ih qawk hmuenmae to kai han pazet toeng hanah kamza to thui pae rae ah,” tiah a naa.

14Jesuh mah, “Kampui, nang hnit salak ih lok ka takroek han hoi qawk to pazet hanah amimah maw lok na paek,” tiah a pathim. 15Topacoengah anihcae boih khaeah, “Oeloekoehhaih cungri thung hoitoah acoe aha oloa amkuem amzen oah; kawmawtiah kami hinghaih ih tangtang loa a tawnh ih hmuenmae pongah om ai, natanmaw angraeng tito lokpui ai,” tiah a naa.

16Topacoengah hi patahhaih lok hae a thuih pae o: “Vaito loa angraeng kanang nongpa longto a oh moa cang hoi baeha kahoih parai lawk to a tawnh. 17Tona-ah anih loa angmah hoi angmah to, ‘Cang hoi baehanawk boih suekhaih hanah ahmuenh doeh ka tawn ai boah. Timaw ka sak thaih han?’ tiah a dawn. 18Hitiah ka sak han: Tapup to ka phraek moa kalenpui ah ka sak han. Toah to cang hoi kalah hmuenmaenawk boiboih doeh ka suek han. 19Topacoengah kaimah hoi kaimah to, ‘Taham kahoih kami! Saning zetpui thung hanah nangtoeng ih hmuenmae kahoih boiboih to na tawnh boah. Na koeh batiah zongom ah hing lai ah, caa loa, nae loa phuhnaep pung ah om ah, ka tih han,’ tiah a tih. 20To-e, Sithaw mah anih khaeah, ‘Nang kamthu! Vaiduem roeroe ah na hinghaih ih to boeng tih; tih soehaeloa nangmah hanah na patung ih hmuenmae boiboih hae mimah maw a toep tih?’ a naa,” tiah a naa.

21Topacoengah Jesuh mah hnukkhuem ah, “Angmahcae hanih khueh ah hmuenmae ka patung cui moa Sithaw ih mikhnuk ah kangraeng ai kami to loa hitiah ni loa a oh o roe,” tiah a naa.

Sithaw Angoephaih

(Mat 6:25-34)

22Topacoengah Jesuh mah a hnukbangnawk khaeah, “Totiah oh pongah na hingh o haih hanah angtoeng ih buh hoi takbum hanah angtoeng ih khukbuenh kawng pongah mawn o khing hmah,” tiah kang thuih o. 23Kawmawtiah hinghaih loa buh pongdoeh lokpui kue moa khukbuenh pongdoeh lokpui kue ah oh. 24Pangahnawk ho khen o noek e: Cangti doeh tuh o ai moa cang doeh aat o ai; sabum sapai hoi tapup doeh tawn o ai; to-e Sithaw mah pacah king; nangcae loa tavanawk pongdoeh atho na oh o pahlai zawt. 25Nangcae thungih amimah maw palungdawn angphohaih ranghoiah a hinghaih setta ka sawksak thaih ka om? 26Tobatih hmuen ka thoengkae mataeng boe doeh sah thaih ai nahaeloa tipongmaw kalah hmuennawk kawng pongah palungdawn nangphosak o? 27Taw thungih apawknawk kawbangmaw a qoengh o tahang tito khen oah: Tok doeh sah o ai, kahni doeh akong o ai. To-e kang thuih o: Angraeng kalen kasawk Solomon sangpahrang mataeng doeh ato apawk maeto batiah hniikhuk kahoih to tawn ai.#1 Sang 10:4-7; 2 Dung 9:3-6 28Vaihni ah ka om moa khawnbang ah omthuh hmai thungah ka kang king hanih taw thungih phrohkung doeh amthoepsak takung loa Sithaw ni. Anih mah nangcae to na khuk na buensak aep mak ai tih maw? Nangcae taanghaih ih loa tamsi parai hae loa!

29“Topongah cak han hoi naek han kawng dawn tuek hoiah palung kangpho ah om o hmah. 30(Kawmawtiah longnui kaminawk mah hibatih hmuennawk hae a dawn o toemoe). Nangcae Ampa mah hi hmuennawk hae angtoeng tito a panoek. 31Topongah Sithaw Poenghaih to lokpui koek ah suem oah, totibaloa hae hmuennawk boih doeh na paek o tih.

Van Ah Angraenghaih

(Mat 6:19-21)

32“Tuuhu tanawk, mawn o hmah; kawmawtiah nangcae khaeah Poenghaih paek han hae nangcae Ampa mah a koehhaih koek ih ni. 33Na tawnh ih vawnsainawk to zaw o king aloa na hak o ih tangka to mithoenawk to paek oah. Kangsiik thaih ai tangka tabu to nangmahcae hanah sah o aloa van ah qawk to patung oah. Kawmawtiah toah loa kamqu mah paqu thaih mak ai ueloa kipanget mah doeh panget thaih mak ai pongah natuek doeh boeng thaih mak ai. 34Kawmawtiah qawk tacong ohhaih khaeah nangcae ih palungthin to doeh om toemoe tih,” tiah a naa.

Acoe Hoiah Kaom Tamtoehnawk

35“Kawbatih hmuen doeh angzo na soe, kaengkaeh to kacak ah angzaeng oloa hmai-im pa-aang hoiah coengcoe ta-ah om oah.#Mat 25:1-13 36Zupaluen poi hoitoah kamlaem han angraeng to a tamtoehnawk mah a zing o batih toengah acoehaih hoiah om oah. Anih to ang phak moa im thok to takhuek na-ah thok to paong pae o phrat tih.#Mrk 13:34-36 37Angmahcae ih angraeng to anghloih na-ah iih ka hruek hoi coengcoe ta-ah kaom tamtoehnawk to natanmaw palung anghoehaih om tih! Kang thuih o: Anih loa angmah ih laihawnui to angkhring tih, anghnusak ueloa anihcae to pacah panae tih. 38Qumning ah angzoh langla doehsoe, ato ponghdoeh hnukkhuem ah angzoh langla doehsoe, coengcoe ta-ah ka om tamtoehnawk to a hnuk na-ah natanmaw palung anghoehaih to om tih! 39Topacoengah ahi hae pakuem oah: Im tawnkung mah kamqu angzoh hanih tue to panoek roeh nahaeloa a im to muksak mak ai roeroe.#Mat 24:43-44 40Topongah nangcae doeh sadi hoiah om oah, kawmawtiah na oepdoeng o ai ih atue ah Kami Capa loa angzo tih,” tiah a naa.

Oepthok hoi Oepthok Ai Tamtoeh

(Mat 24:45-51)

41Piter mah, “Angraeng, hi patahhaih lok hae kaicae hanah na thuihkoehhaih ih maw, tiaibaloa mi boih hanih maw?” tiah a duengh.

42Angraeng mah, “Totibaloa oepthok hoi kacing tamtoeh loa mimaw? Tamtoeh oepom hoi kacing loa angmah ih angraeng mah angmah im khetzawn han hoi tamtoeh kalahnawk to atue nathuem ta-ah angmahcae taham buh to paek hanah a suek hanih tamtoeh to ni. 43Angmah ih angraeng to im ah anghloih na-ah totiah ka sah to hnuh nahaeloa a tamtoeh hanih loa natanmaw palung anghoehaih om tih! 44Loktang tang kang thuih o: Ato tamtoeh loa angmah ih angraeng mah a hmuenmae boiboih to khenzawnkung ah suem tih. 45To-e ato tamtoeh mah, ‘Kai ih angraeng loa angzo hnai mak ai, akraa parai vop tih,’ ka tih moa tamtoeh kalah nongpa doehsoe, nongpui doehsoe, ka bop moa caa nae moa ka paquih nahaeloa, 46tamtoeh mah a oepdoeng ih ani hoi panoek ai ih atue thuemah angmah ih angraeng to pha tih. Angmah ih angraeng mah a boengh a tumh ah takroek ueloa lok tahngai ainawk mah a hak hankoi to haksak tih.

47“Angmah ih angraeng mah a toksak hanah a koeh ih to panoek e coengcoe ah ka om ai moa ka sah ai tamtoeh to loa kana paraiah boh ah om tih. 48To-e angmah angraeng ih koehhaih panoek ai moa boh han ka krah ah hmuen maemaeto ka sah langla doeh amzai ta-ah boh ah om tih. Zetpui ah paek ih kami khaeah zetpui ah hnik ah om tih; paroeai aep ah paek ih kami khaeah paroeai aep toengloeng ah hnik ah om tih,” tiah a naa.

Jesuh Kampraeksak Takung

(Mat 10:34-36)

49Jesuh mah, “Long hae hmai hoiah qoeng hanah ni kangzoh, kang boih lai soehaeloa ka koeh! 50Baptisma hak hanah a oh moa ato topacoeng airoek loa dawn angpho parai.#Mrk 10:38 51Longnui ah hae angdaehhaih sinh hanah angzoh tiah maw na dawn o? Na ai ni, angdaehhaih ih na ai moa ampraeksakhaih ih ni kang sinh. 52Vaihi hoitoah kamtong imthungtako maeto ah kami long pangato ka om loa ampraek o tih; longthumto mah kalah longhnetto to misa ah suem ueloa longhnetto mah longthumto to misa ah suem toeng tih. 53Ampanawk mah a caanawk to misa ah suem o ueloa a caanawk mah ampanawk to misa ah suem o toengh tih; amnonawk mah a canunawk to misa ah suem o ueloa a canunawk mah amnonawk to misa ah suem o toengh tih; savanawk ih amnonawk mah a linganawk to misa ah suem o ueloa a linganawk mah a savanawk ih amnonawk to misa ah suem o toengh tih,” tiah a naa.#Mik 7:6

Khotue Panoekhaih

(Mat 16:2-3)

54Jesuh mah mipui khaeah, “Niduem bang hoitoah tamai kamnum tadok ung to na hnuk o na-ah ‘Kho angzo tih,’ tiah na thuih o roep moa angzoh tangtang. 55Topacoengah valae bangih takhi ka thok to na hnuk o na-ah ‘Ni na tih,’ na ti o moa a nat tangtang. 56Laiha kaminawk! Long hoi van to na khet o moa kho kahoih hoi kho kangzo han to na thuih o roeh thaih; totibaloa tipongmaw vaihang tue ih hmuen hae na panoek o thaih ai?” tiah a naa.

Na Misa Hoiah Angdaeh Ah

(Mat 5:25-26)

57“Tipongmaw kamsoem hmuen to sak hanah palung na dawn o thaih ai? 58Kami longlongto mah nang to tazacoi hanah lokcaek zung ah na caeh o haih nahaeloa zung ah phak haih ai nahlanah angmah hoiah angdaehhaih sak hanah azom ah. Totiah na sah ai nahaeloa lokcaekkung hma-ah to nahoi o ueloa, lokcaekkung mah palik ban ah na paek ueloa thongim ah pakhrak ah om tih. 59Kamnoek ta-ah kang thuih: Danpaek o ih na rong hankoi hnukkhuem koek phoisa ta doeh na paek boih airoek loa toah to nang-ung tih,” tiah a naa.

Currently Selected:

LUKA 12: AKNT2023

Highlight

Copy