LUKA 11

Khophoehhaih Kawng Patukhaih

(Mat 6:9-13; 7:7-11)

1Nito na-ah Jesuh loa ahmuenh maeto khaeah kho a phoeh. A pacoeng na-ah a hnukbang longto mah, “Angraeng, Johan mah a hnukbangnawk to khophoehhaih a patuk batiah kaicae doeh na patuk toengh ah,” tiah a naa pae o.

2Jesuh mah anihcae khaeah, “Khophoeh o na-ah hitiah thui oah:

‘Kaicae Ampa,

Na hmin kacai khangzahaih oh na soe;

Na Poenghaih pha na soe.

3Nithokkruek kangtoeng o ih caknaek na paek ah.#11:3 Kangtoeng o ih caknaek tihae khawn omvaih hanih caknaek tiah doeh oh thaih.

4Kaicae nui ih zaehaih ka sah kami boih ka tahmen o pongah,

kaicae zaehaih tahmen toeng ah.

Tanoekcakhaih ih karai to na phasak hmah,’ tiah khophoe oh,” a naa pae.

5Moa, Jesuh mah a hnukbangnawk khaeah, “Patahhaih iah nangcae thungih longto to loa ampui im ah a qumning ah a caeh moa, ‘Kampui, takaw kae thumto na coisak rae ah. 6Kampui longto kholong ka caeh to ka im ah angzoh moa paek han tidoeh ka tawn ai,’ tiah a naa. 7Tona-ah patahhaih iah nampui mah im thung hoitoah, ‘Palung baecat ah na sah hmah, thok khah boih boah moa ka caanawk hoi ka iih o boah, nang to hmuen paek hanah kangthawk thaih ai boah,’ a naa. 8Totibaloa kawbangmaw na sak han? Loktang kang thuih o: Nampui ah a oh pongah angthawk ai moa na hnik ih takaw to na paek ai langla cadoeh azat aiah na hnik tuek pongtoah angthawk ueloa nangtoeng ih hmuen boih to na paek tih.

9“Topongah hitih hiah kang thuih o: Hnih oh, na hak o tih; Pakrong oh, na hnuh o tih; takhuek oh, nangcae hanah thok paong pae ah om tih. 10Kawmawtiah ka hnih kami boiboih loa hak tih, pakrong kami loa hnuh tih, takhuek kami boih hanah thok to paong pae ah om tih. 11Nangcae ampanawk thungah na capa mah tangaa a hnik na-ah pahui ka paek to na om o tih maw? 12Tiaibaloa aadui hnik na-ah taqawk ta-ai na paek o han maw? 13Kami na hoih o ai eloa na caanawk to hmuen kahoih paek han loa na panoek o parai. Totibaloa van ih kaom Pa mahcae loa angmah khaeah Cai Pakhra ka hnih kami to loa natanmaw paek han koeh aep tih!” tiah a naa.

Jesuh hoi Beelzebul

(Mat 12:22-30; Mrk 3:20-27)

14Jesuh mah lok-aa nongpa thungih taqawk maeto pathok moa taqawk to tacawt na-ah ato kami loa lok apaeh thaih let. Mipui loa katingai dawnrai o, 15to-e thoemto kaminawk mah, “Taqawk pathok hanah hmuensak thaihaih ih ka paekkung loa taqawk ukkung angraeng Beelzebul ni,” tiah a naa o.#Mat 9:34; 10:25

16Mi kalahnawk mah Jesuh zaehaih naeh han koeh o pongah Sithaw mah naakrakhaih ih ni tito amtuengsak hanah dawnraihaih hmuen to sak hanah pacae pae o.#Mat 12:38; 16:1; Mrk 8:11 17To-e Jesuh mah anihcae dawnhaih ih to panoek pae pongah anihcae khaeah, “Kawbatih prae doeh angmah hoi angmah to a bu zetpui ah kampraek moa maeto hoi maeto kangtuh loa ka sawk ah angdoe mak ai, imthungtako doeh kampraek moa angmah hoi angmah kangtuh loa khosak apra dung. 18Topongah Setan ih prae doeh maeto hoi maeto kangtuh a bu to om nahaeloa kawbangmaw ka sawk ah om thaih tih? Nangcae mah, ‘Kaimah totiah taqawk pathok thaih ih loa Beelzebul mah hmuensak thaihaih ih a paek pongtoah ni,’ tiah nang naa o. 19Totiah taqawk to ka pathok nahaeloa, kawbangmaw nangcae ih hnukbangnawk mah taqawk to pathok o thaih tih? Nangmahcae ih hnukbangnawk to mah na tahmang o boah tito amtuengsak. 20Na ai ni, Sithaw hmuensak thaihaih ih khueh hoiah ni taqawk to ka pathok thaih; toto mah to Sithaw Poenghaih loa nangcae khaeah a phak boah tito amtuengsak.

21“Tha kaom nongpa longto mah angmah ih lithom boiboih hoiah angmah ih im to a toep na-ah a tawnh ih vawnsainawk boih to a sueng. 22To-e tha karah aep nongpa mah ato kami to a tuk moa pazawk na-ah loa ka tawnkung mah angoephaih koek ih lithom boih to la pae king ueloa a paquk ih vawnsainawk to minawk pazet king.

23“Ami doeh kai kangpang haih ai loa ka misa tangtang ni; ami doeh kai pakuem haih bom ai loa ka soekzak kami tangtang ni.

Taqawk Kasae Amlaem Let

(Mat 12:43-45)

24“Taqawk kasae loa kami longto thung hoitoah tacawt na-ah anghakhaih ih ahmuenh to pakrong hanah praetanghaeng ah amhet tuek. Maeto doeh hnuh thaih ai na-ah loa angmah hoi angmah to, ‘Kaimah im ah kamlaem let halat han,’ tiah a dawn. 25Topongah amlaem let moa im loa kacaipin hoi kacai roekah ka om to a hnuk. 26Topacoengah a caeh moa angmah pongdoeh ka nung raat pakhra sarihto to angzoh haih moa toah to a oh haih. Topongah kangkhuem aloa tangsuek ih pongdoeh ka nung aep ah a oh,” tiah a naa pae.

Anghoehaih Tangtang

27Jesuh mah hi lok a thuih pacoeng na-ah mipui salak thung hoitoah nongpui a hangh moa anih khaeah, “Nang to ka za moa pacah panaekung nongpui loa natanmaw anghoe tih!” tiah a naa.

28To-e Jesuh mah, “Sithaw lok ka thaih moa ka pazui loa natanmaw palung anghoehaih to om aep tih!” tiah pathim.

Dawnrai Hmuen Sak Han A Nguek O

(Mat 12:38-42)

29Kaminawk mah Jesuh to a ven o thuih khuk na-ah anihcae khaeah, “Vaihang dung ih kaminawk loa paroeai a set o ak! Dawnraihaih sak hanah ang hnik o, to-e Jonah ih dawnraihaih tiaialoa mita khaeah doeh paek ah om mak ai.#Mat 16:4; Mrk 8:12 30Tahma Jonah loa Nineveh vang kaminawk hanah amathaih iah a oh batih toengah Kami Capa loa vaihang dung ih kaminawk hanah amathaih iah om toengh tih. 31Lokcaekhaih Ni ah Sheba Sangpahrang nongpui to angdoe ueloa vaihang dung ih kaminawk hae zaenet tih, kawmawtiah Solomon Sangpahrang ih palunghahaih lok patuk ih to tahngaih koeh ah angmah prae kahla parai hoitoah angzoh; kang thuih o: Solomon pongdoeh kalen kue kami hiah hae a oh.#1 Sang 10:1-10; 2 Dung 9:1-12 32Lokcaekhaih Ni ah Nineveh vang ih kaminawk to angdoe ueloa nangcae to zae na net o tih, kawmawtiah Jonah mah anihcae khaeah lok a thuih na-ah zaehaih to a dawnpakhuem o; loktang kang thuih o: Jonah pongdoeh kalen kue to hiah a oh,” a naa.#Jon 3:5

Takbum Aanghaih

(Mat 5:15; 6:22-23)

33“Amimah doeh hmai-im pa-aang na-ah hawk vaih ai, tiaibaloa takho hoiah doeh muek khoep vaih ai; im thungah ka kun kaminawk mah aanghaih to a hnuk o thaih hanah hmai-im pa-aanghaih ih hmaitung nuiah ni pahnut o toemtoem.#Mat 5:15; Mrk 4:21; Luk 8:16 34Na mik loa na takbum hanah hmai-im batih ni a oh. Na mik to aang na-ah na takbum boih to aang, to-e na mik to hoih ai na-ah na takbum boih to vinghaih thungah a oh. 35Totiah oh pongah nang thungih aanghaih to vinghaih ah oh ving han aiah acoe aha oah. 36Na takbum boih to tetta boe doeh vinghaih thungah om aiah aanghaih hoiah koi nahaeloa hmai-im mah a aanghaih hoiah nangcae to a aang thuih batiah aang king tih,” a naa pae.

Farasinawk hoi Tawklok Patukkungnawk Padaengh

(Mat 23:1-36; Mrk 12:38-40)

37Jesuh loa lokthuih aboeng na-ah Farasi kami longto mah buh a kawk haih; topongah a caeh moa buh cak hanah anghnut. 38Jesuh loa buh cak ai nahlanah ban amsae ai to Farasi kami mah a hnuk na-ah a dawnrai sut. 39Tona-ah Angraeng mah anih khaeah, “Nangcae Farasinawk loa boengloeng hoi sabae to anuibang khueh to na palik o toemtoem, to-e athungbang loa saengpranghaih hoi hoihhaih ai hoiah na koi o. 40Kamthunawk! Anuibang ka sahkung Sithaw mah athungbang to doeh a sak na ai maw? 41To-e nangcae ih boengloeng hoi sabae thungih ka om to kamtang kamlainawk to paek oloa tiboih to nangcae hanah thoengcai tih.

42“Farasi kaminawk, nangcae hanah natanmaw zitman thoh! Sithaw khaeah anhli anhla a thaih thungih sungpram cae, sungsin cae hoi kalah kalah to doeh hato maeto ah na paek o, to-e toenghaih hoi Sithaw palunghaih to loa na takhoe o sut. Kalahnawk to doeh takhoe sut aiah hinawk hae na sak o han oh.#Lev 27:30

43“Farasi kaminawk, nangcae hanah natanmaw zitman a thoh! Sinakok ah anghnuthaih ih patoem pae roeh to na koeh o moa vawnsai zawhhaih hmuenh ah khangzahaih hoiah lok apring to na koeh o. 44Nangcae hanah natanmaw zitman thoh! Nangcae loa amathaih sah ai ih taprong hoiah nahmong o. Ato ih a nuiah mimah panoek aiah a caeh o,” tiah a naa.

45Tawklok patukkung nongpa longto mah, “Angraeng, hitiah na thuih na-ah kaicae doeh nang padaeng toeng bae hae!” tiah a naa.

46Jesuh mah, “Nangcae Tawklok patukkungnawk, nangcae han doeh natanmaw zitman a thoh! A phawh o thaih ai hanih hmuenzit to minawk ih a naam nuiah to na thuengh pae o, to-e nangmahcae mah loa ato hmuenzit to na tahoeng haih bom hanah banpazung maeto boe doeh pazang han na koeh o ai. 47Nangcae hanah natanmaw zitman thoh! Tahmanawk hanah taprong kahoih to na sak pae o, ato tahmanawk loa nangcae ih saezanawk mah a hum o ih to ni. 48Topongah nangcae saezanawk mah a sak o ih to nangmahcae roeroe mah naakrakhaih ih to namtuengsak o. Anihcae mah tahmanawk to a hum o moa nangcae mah taprongnawk to na sak pae o. 49Hi pongah hae Sithaw palunghahaih ih mah, ‘Anihcae khaeah tahmanawk hoi kawkpatoehnawk to ka patoeh han, thoemto loa hum o ueloa thoemto bae loa pacaekhlaek o tih,’ a naa. 50Topongah vaihang dung kaminawk hae long sak amtong tangsuek hoitoah tahmanawk to a hum o pongah raekhaih to om tih. 51Loktang kang thuih o: Abel humhaih ih hoitoah bokting hoi Hmuenh Kacai salak ah Zekhariah humhaih ih karoekto, thii a longh pongah vaihang dung kaminawk boih to danpaek ah om tih.#Gen 4:8; 2 Dung 24:20-21

52“Nangcae Tawklok patukkungnawk, nangcae hanah natanmaw zitman a thoh! Panoekhaih im thok paonghaih sawr to na pakuem o khak; nangmahcae to akun hanah na koeh o ai moa akun han ka koeh kaminawk to doeh na pakaa pae o khoep bae,” tiah a naa.

53Ato hmuenh to Jesuh mah a caehtak na-ah Tawklok patukkungnawk hoi Farasinawk loa anih to kasae phi ah thui o moa hmuen zetpui kawng to lok zetpui a duengh o; 54Maemaeto a thuih pazae ih om nahaeloa angmah ih lokthang pongah a mansak han koeh pongah lok zetpui a duengh o haih ih ni.

Currently Selected:

LUKA 11: AKNT2023

Highlight

Copy