LUKA 10
10
Quisarihto Pacoeng Hnetto A Patoeh
1Topacoengah Angraeng mah kami kalah quisarihto pacoeng hnetto#10:1 Quisarihto pacoeng hnetto tihae thoemto banrikcabu ah loa quisarihto tiah a oh. a tuek moa angmah a caeh hanih vang kruek hoi hmuenhkruek ah a hma-ah to longhnet longhnetto ah a patoeh. 2Anihcae khaeah, “Cang aah hanah katingai a pop e aloa ka aat hanah toksakung tamsi. Topongah cang ka aat hanah toksahkungnawk patoeh hanah lawk tawnkung khaeah khophoe oah.#Mat 9:37-38 3Caeh oah! Tasui hu salak thungah tuucanawk prawt batih toengah kang prawt o.#Mat 10:16 4Phoisa tabu doehsoe, pasah doehsoe, khokbuen doehsoe ampuk o hmah; loklam ah ami doeh lok apring hanah angdoe o raerae hmah.#Mat 10:7-14; Mrk 6:8-11; Luk 9:3-5 5Im maeto akun o nakruek ah hmaloe koek ah, ‘Hi im ah monghaih oh na soe,’ tiah thui oah. 6Monghaih ka koeh kami ah om nahaeloa nangcae ih monghaih to anih nuiah oh na soe; totiah om ai nahaeloa monghaih to nangcae khaeah amlaem let na soe. 7Ato im ah to om o aloa kawbatih doeh ang patoem pae ih boih to loa caa oloa nae oh; kawmawtiah toksakung loa a toktho to hnuk han a krak. Im maeto hoitoah im kalah bangah angpuen o hmah.#1 Kor 9:14; 1 Tim 5:18 8Vang maeto na kun o moa imtoemh ang paek o nakruek ah ang patoem pae o ih boiboih to caa oah; 9To vang thungih ngantui ainawk to ngantuisak oloa to ih vang kaminawk khaeah, ‘Sithaw Poenghaih loa nangcae taengah ang phak boah,’ tiah thui pae oah. 10To-e vang maeto thungah na kun o moa imtoemh paek aiah na oh o nakruek ah lam ah to tacawt oloa,#Tok 13:51 11‘Kaicae khok pongih ka kap, nangcae vang thungih vaiphu hae doeh nangcae tangaehaih iah kang takhoek o thuih. To-e Sithaw Poenghaih loa nangcae taengah phak boah, tihae pahnet o hmah,’ tiah naa pae oah. 12Loktang ta-ah kang thuih o: Lokcaekhaih Ni ah loa ato vang pongdoeh Sodom vang kaminawk to Sithaw mah tahmenhaih tawn kue tih,” tiah a naa.#Gen 19:24-28; Mat 11:24; 10:15
Kataang Ainawk Ih Vangnawk
(Mat 11:20-24)
13“Nang Khorazin vangpui, na hmalam khosak a bingh! Nang Bethsaida vangpui, na hmalam khosak a bingh toeng! Nangcae khaeah dawnraihaih ka sak ih hae Tair vangpui hoi Sidon vangpui ah ka sak nahaeloa to ih ka om kaminawk loa zae dawn pakhuemhaih amtuengsak hanah buri kahni to angkhuk hoi hmaiphu to angphuih o ueloa anghnut ih to akraa parai tih boah!#Isa 23:1-18; Ezk 26:1—28:26; Jol 3:4-8; Amo 1:9-10; Zek 9:2-4 14Lokcaekhaih Ni ah Sithaw mah nang pongdoeh Tair hoi Sidon vang kaminawk nuiah tahmenhaih amtuengsak kue tih. 15Moa nang Kapernaum vang! Van khoekto namsang han na koeh maw? Hell thungah vah ah na om tih!” tiah a naa pae.#Isa 14:13-15
16Jesuh mah a hnukbangnawk khaeah, “Ami doeh nangcae ih lok ka tahngai loa kai ih lok ka tahngai ni; ami doeh nangcae to tahnawng takhoe loa kai tahnawng takhoe ni; ami doeh kai tahnawng takhoe loa kai matoehkung to tahnawng takhoe,” tiah a naa.#Mat 10:40; Mrk 9:37; Luk 9:48; Jhn 13:20
Quisarihto Pacoeng Hnettonawk Amlaem
17Quisarihto pacoeng hnetto#10:17 Quisarihto pacoeng hnetto tihae thoemto banrikcabu ah loa quisarihto tiah oh (Kathoeng 1 khen ah). patoeh ih kaminawk loa anghoe parai hoiah amlaem o let moa, “Angraeng, na hmin hoiah taqawknawk ka pathok o na-ah kaicae ih lok to tahngai,” tiah a naa o.
18Jesuh mah anihcae khaeah, “Setan to van bang hoitoah parae batiah ka krah to ka hnuk,” tiah a naa. 19Tahngai oah! Akaa tawnhhaih ih to kang paek o: Pahuinawk hoi taqawk ta-ainawk#10:19 Taqawk ta-ainawk tihae sata-ainawk tiah doeh thuih o. nuiah na caeh o thaih tih, Misanawk ih thaohhaih boih to na pazawk o thaih tih, moa tidoeh nganbawh na paek o mak ai.#Sam 91:13 20To-e taqawk kasaenawk mah nangcae ih lok tahngai pongah palung anghoe o hmah; van ah nangcae ih ahmin tarik ah oh boah pongah anghoe lat ah.
Jesuh Palung Anghoe
(Mat 11:25-27; 13:16-17)
21Tona-ah Cai Pakhra mah palung anghoehaih hoiah a koisak moa,#10:21 Cai Pakhra mah tihae thoemto banrikcabu ah loa Pakhra mah tiah a oh moa; kalah thoemto pongah loa angmah ih Pakhra mah tiah a oh. “Kam Pa, van hoi long Angraeng! Palungha kaminawk hoi thoemkop kaminawk khae hoitoah na hawk ih to thoemkophaih ka tawn ai kaminawk khaeah namtuengsak pongah ka kawnh parai. Ahlong, Pa, hitiah coenghsak hanah na koeh ih roe boah ni.
22“Pa mah hmuen boiboih ang paek boah. Pa tiaialoa mimah doeh Capa hae mimaw tito panoek ai; Capa hoi Capa mah taphongsak hanah a tuek ih kaminawk tiaialoa mimah doeh Pa hae mimaw tito panoek ai,” tiah a naa. #Jhn 3:35; 10:15
23Topacoengah Jesuh loa a hnukbangnawk bangah angqoi moa anihcae khueh mah thaih hanah, “Na hnuk o ih hmuennawk na hnuk o pongah natanmaw tahamhoih o! 24Nangcae khaeah kang thuih o: Tahma zetpui hoi sangpahrangnawk mah na hnuk o ih to hnuk hanah a koeh o toengh e hnuh o thaih ai; thaih han a koeh o toengh e thaih han hak o ai,” tiah a naa.
Samari Kami Kahoih Patahhaih
25Tawklok patukkung longto angzoh moa Jesuh zaehaih naeh han angcaeng. “Patukkung, dungzan hinghaih hak hanah timaw ka sak han?” tiah lok a duengh.#Mat 22:35-40; Mrk 12:28-34
26Jesuh mah anih khaeah, “Cabu Kacai mah timaw a thuih? A thuih ihnawk to kawbangmaw na thaihkop?” tiah a duengh.
27Ato kami nongpa mah, “Angraeng na Sithaw to na palungthin boiboih hoi, na hinghaih boiboih hoi, na thazung boiboih hoi, na dawnhaih boiboih hoiah palung aloa na imdongpak to nangmah hoi nangmah na palung batih toengah palung ah, a tih,” tiah a naa.#Lev 19:18; Deut 6:5
28Jesuh mah, “Na thuih ih to amsoem parai; totiah to sah ah, na hing tih,” tiah a naa.#Lev 18:5
29To-e Tawklok patukkung loa angmah hoi angmah to a taang han a koeh pongah Jesuh khaeah, “Kai ih imdongpak loa amimaw?” tiah a duengh.
30Jesuh mah, “Vaito na-ah nongpa longto loa Jerusalem hoitoah Jeriko ah to a caeh. Totiah a caeh na-ah kamqu kamcanawk mah a naeh o, khukbuenhnawk to khringh pae o king, boh o pasat moa ka dueh duiah caeh o tak sut. 31Totiah oh na-ah qaihma longto loa ato lam bangah to a caeh; to-e ato kami to a hnuk na-ah lampaeng bang hoitoah ayae moa a caehtak ving. 32Ato batih toengah Levi kami longto doeh a caeh toeng, to kami to a caehthuih moa a khet, topacoengah lampaeng bang hoitoah ayae moa a caehtak ving bae. 33To-e Samari kami longto, ato loklam bang hoitoah kholong ka caeh loa to kami khaeah to a phak, a hnuk na-ah tahmenhaih palungthin hoiah a koi.#2 Dung 28:15 34Anih khaeah to a caeh moa ahma to situi hoi misurtui to a nok pae moa hoihdak ta-ah a komh pae; topacoengah angmah ih laa hrang nuiah a thuengh moa angvin toemhhaih im ah a caeh haih moa toah to hoihdak ta-ah a khet a zawn. 35Akhawnbang ah maku phoisa hnetto pathong moa im tawnkung to a paek. ‘Hi kami hae hoihdak ta-ah khenzawn ah, kawbatih doeh anih hanah na patoh bae ih kahaw kava boih to kanghloi na-ah kang pathok boih let han,’ a tih,” tiah a naa.
36Topacoengah Jesuh mah hnukkhuem ah, “Ato kami longthumto thungah kamqu kamcanawk mah a boh o kami ih imdongpak loa amito maw tito na dawn?” tiah a duengh.
37Tawklok patukkung mah, “Anih hanih tahmen kami to ni,” tiah pathim.
Jesuh mah, “Caeh aloa tobatiah sah toengh ah,” tiah a naa.
Marta hoi Meri Khaeah Jesuh Paqaih
38Jesuh hoi a hnukbangnawk loa kholong ah caeh o moa vang maeto a phak o, toah to nongpui longto ahmin Marta mah a im ah a toemhsak.#Jhn 11:1 39Amnauk longto a tawnh moa ahmin loa Meri ni. Meri loa Jesuh ih khokkung ah anghnut moa a patukhaih to a tahngaih. 40Marta loa toksak han a pung pae sut moa palungsiksak khuek pongah angzoh moa, “Angraeng, tok boiboih kaimah sak king hanah kam nauk mah caehtak sut hae na dawncang ai maw? Thui pae rae ah, angzo soeloa na bom soe!” tiah a naa.
41Angraeng mah, “Marta, Marta, hmuen zetpui kawng pongah na mawnh moa na dawn angphosak, 42to-e kangtoeng parai loa maeto khueh ni a oh. Meri mah kamsoem hmuen to a qoih zawh boah moa ato loa amimah doeh lomh pae let mak ai,” tiah a naa.
Currently Selected:
LUKA 10: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
