LUKA 9

A Hnukbang Hlaihnetto Patoehhaih

(Mat 10:5-15; Mrk 6:7-13)

1Jesuh mah hnukbang hlaihnetto a kawk cu moa taqawknawk haek thaih ih hoi nathaih ihnawk hoihsak thaih ih hmuensak thaihaih hoi akaatawnhhaih ih to a paek. 2Topacoengah Sithaw Poenghaih kawng thuih taphong han hoi ngoina kaminawk to hoihsak hanah a patoeh. 3Anihcae khaeah, “Kholong ah caeh na-ah tidoeh sin o hmah: Cunghet doeh, pasah doeh, caknaek doeh, tangka doeh, laihaw tangkraih mataeng doeh sin o hmah.#Luk 10:4-11; Tok 13:51 4Nangcae imtoemh ka paek im ah to nahloih o tak airoek toem oah. 5Nangcae to imtoemh paek ai ih vang boih to loa caeh o tak aloa acoehaih paek iah khok pongih hmaiphu to takhoek thuih oah,” tiah a naa.

6Hnukbangnawk loa a caeh o moa vangca boiboih ah amkaeh o, Tamthang Kahoih to a thuih o moa vang kruekah ngan kananawk to a hoihsak o.

Herod Ih Palung Angpunghaih

(Mat 14:1-12; Mrk 6:14-29)

7Galili prae ukkung Herod loa tobatih hmuen ka omnawk kawng boih to a thaih na-ah paroeai palung angpung pae, kawmawtiah thoemto kaminawk mah Baptisma paekkung Johan loa a hing let boah, tiah a thuih o. #Mat 16:14; Mrk 8:28; Luk 9:19 8Mi kalah mah, “Elijah amtueng boah,” a ti o moa kalah thoemto mah zanghnii ih tahma longlongto a hing let boah, a ti o. 9Herod mah, “Johan ih a lu loa ka boengsak boah, to-e akawng ka thaih toemoe ih kami hae ami han maw vai?” a tih. Moa Jesuh to hnuk hanah angcaeng.

Kami Sangpangato Buh A Kok

(Mat 14:13-21; Mrk 6:30-44; Jhn 6:1-14)

10Kawkpatoehnawk loa anghloih o moa a sak o ihnawk boih to Jesuh khaeah a thuih pae o. Anihcae to a caeh haih moa Bethsaida na pae o ih vangpui ah to angmahcae khueh ah a caeh o. 11Ato tamthang to mipuinawk mah a thaih o na-ah patom o.

Anihcae to a kawnh a laeh, Sithaw Poenghaih kawng to a thuih pae moa ngantuihaih kangtoeng kaminawk to doeh nganna a hoihsak. 12Ni akun han amtong na-ah hnukbang hlaihnetto loa anih khaeah angzoh o moa, “Kaminawk hae patoeh lai ah, vangpui thung hoi taenghaek ih lawk ah caeh o soeloa buh hoi iihhaih han to pakrong o na soe, kawmawtiah hi hmuenh hae loa tawtaqak ni,” tiah a naa pae o.

13To-e Jesuh mah anihcae khaeah, “Nangmahcae mah cak han to paek pae oah,” tiah a naa.

Anihcae mah, “Ka tawnh o ih loa sungqum boih ah takaw kae pangato hoi tangaa hnetto khueh hae ni. Mipui boih hanah ka caeh o moa buh qanh han na koeh maw?” tiah a naa pae o. 14(Toah to nongpa kacoeta khueh ah sangpangato roekrak a oh).

Jesuh mah a hnukbangnawk khaeah, “Mipui to quipangato roekrak ah a bubu ah anghnusak rip ah,” tiah a naa.

15Totiah hnukbangnawk mah a sak o boih pacoengah, 16Jesuh loa takaw kae pangato hoi tangaa hnetto a lak, van bang a doeng moa Sithaw khaeah kawn lok a thuih pacoengah a aeh, moa mipui to pazet hanah hnukbangnawk to a paek. 17Anihcae boih mah a cak o moa zok amhah o king, cak kamhlai to hnukbangnawk mah pakuem o moa daengkraem hlaihnetto a koi.

Piter Mah Jesuh Kawng Taphonghaih

(Mat 16:13-19; Mrk 8:27-29)

18Nito loa Jesuh angmah buengah khophoeh na-ah hnukbangnawk to anih khaeah angzoh o. Anih mah, “Minawk mah kai hae mimaw ang naa o?” tiah a duengh.

19Anihcae mah, “Thoemto mah baptisma paekkung Johan ni, a ti o. Thoemto mah Elijah ni, a ti o. Mi kalah mah zanghnii ih tahma longlongto kahing let ni, a ti o,” tiah a naa pae o.#Mat 14:1-2; Mrk 6:14-15; Luk 9:7-8

20Anih mah, “Nangcae mah to loa? Kai hae mimaw na ti o?” tiah a duengh.#Jhn 6:68-69

Piter mah, “Nang loa Sithaw ih Messiah ni,” a naa pae.

Patang Khang hoi Duek Han Kawng A Thuih

(Mat 16:20-28; Mrk 8:30—9:1)

21Moa hi kawng hae mita khaeah doeh thuih han aiah Jesuh mah kana dakah lok a paek. 22Topacoeng bae ah anihcae khaeah, “Kami Capa hae paroeai patang khang ueloa kacoetanawk, qaihma kacoetanawk, hoi Tawklok patukkungnawk mah tahnawng o tih. Paduek o tih, to-e ni thumto pacoengah angthawksak let ah om tih,” tiah a naa.

23Moa anihcae boih khaeah, “Ami doeh kai hnukah baang han ka koeh loa angmah taham koehhaih to takhoe ving soeloa ni kruekto kraws aput hoiah na bang na soe.#Mat 10:38; Luk 14:27 24Kawmawtiah ami doeh a hinghaih pahlong han ka koeh loa a hinghaih to sung tih, to-e ami doeh kai hanih ah a hinghaih ka sung loa a hinghaih to pahlong tih.#Mat 10:39; Luk 17:33; Jhn 12:25 25Kami longto mah longnui bum boih hae hak langla cadoehsoe angmah ih hinghaih to sung ving, tiaibaloa amro ving nahaeloa timaw amraihaih to ka om? Amraihaih tita doeh om ai. 26Ami doeh kaimah hoi ka patukhaih ih to ka zat haih loa Kami Capa mah doeh a phungaeng lensawkhaih hoi, Ampa hoi vanmi kacainawk ih phungaeng lensawkhaih hoiah angzoh na-ah ka zat haih toeng han. 27Loktang ta-ah kang thuih o: Sithaw Poenghaih hnuh o airoek ka dueh han ai kami thoemto hiah hae na oh o,” tiah a naa.

Jesuh Tungkraang Anglaihhaih

(Mat 17:1-8; Mrk 9:2-8)

28Hi lok a thuih pacoeng tabaihto tuemtang a oh na-ah Jesuh loa Piter, Johan, Jaem cae to a kawk moa khophoeh hanah maenui ah a dawh haih.#2 Pit 1:17-18 29Khophoeh li nathuemah Jesuh loa a tungkraang to anglaih ving moa a hniikhuk loa anglung tamla ah sadae ah sadae hlup. 30Nawnetta ah toah to kami nongpa longhnetto mah lok aram haih. Ato hnit loa Mosi hoi Elijah ni. 31Van phungaeng hoiah amtueng pae hoi moa Jerusalem ah duekhaih hoiah Sithaw ih amsakhaih to acungsak palang hanih kawng to Jesuh hoiah aram o. 32Piter hoi angmah ampuinawk loa iih ka khraem paraiah a iih o, to-e anglawt o moa Jesuh ih lensawkhaih hoi a taengah kangdoe kami longhnetto a hnuk o. 33Longhnetto hnit mah Jesuh to a caeh hoi tak na-ah Piter mah, “Angraeng, hiah oh hae zongoh parai. buk thumto sah o si; nang hanah maeto, Mosi hanah maeto, Elijah hanah maeto,” tiah a naa. (Angmah to timaw ka thuih tito doeh panoek ai roeroe.)

34Lok a thuih li nathuemah tamai to angzang moa anihcae to azaw thuih hmoek. Moa tamai mah a khuk na-ah hnukbangnawk loa paroeai a zit o. 35Tamai thung hoitoah lok maeto mah, “Hi kami loa ka qoih ih ka Capa ni, a lok to tahngai pae oah,” tiah a thuih.#Isa 42:1; Mat 3:17; 12:18; Mrk 1:11; Luk 3:22

36Ato lok to a dit na-ah, Jesuh angmah khueh ah ka om to a hnuk o. Hnukbangnawk loa hi kawng hae thui aiah oh o haih duem moa a hnuk o ih to ato tue na-ah loa mita khaeah doeh thui o ai.

Taqawk Mah Naeh Ih Naukta A Hoihsak

(Mat 17:14-18; Mrk 9:14-27)

37Akhawnbang ah Jesuh hoi a hnukbang longthumto loa mae hoitoah ahum o tathuk moa mipui paroeai mah Jesuh to a dawt o. 38Mipui salak thung hoitoah kami longto loa a hangh moa, “Patukkung! Tahmenhaih kang hnik, ka capa longto ta khueh ka tawnh ih hae na khen pae rae ah. 39Taqawk kasae mah akun thuih moa a hangh halat lat moa amtimsak kawngkawng; pakhaa pongah tamtui poepbuk tacawt, vaihi hoi vaihi a sak moa caehtak ai roeroe! 40Na hnukbangnawk khaeah taqawk kasae to pathok pae hanah ka pacae, to-e pathok o thaih ai,” tiah a naa.

41Jesuh mah, “Natanto taanghaih tawn ai hoi lam tahmang kaminawk maw! Nasetto roek maw kang oh o haih han? Nasetto roek maw kang paquem o tuek han vop?” tiah a naa. Topacoengah nongpa khaeah, “Na capa to hiah angzoh haih ah,” tiah a naa.

42Naukta loa angzoh na-ah taqawk mah long ah patimh moa kamlet kawnkawn ah a sak. Jesuh mah taqawk kasae to a zoeh, naukta to a hoihsak moa ampa khaeah a paek let. 43Mi boih mah Sithaw hmuensak thaihaih ih to a hnuk o na-ah a dawnrai o king.

A Duekhaih Han Kawng A Thuih Let

(Mat 17:22-23; Mrk 9:30-32)

Jesuh mah hmuen a sak ih boih to a hnuk o na-ah kaminawk loa dawnrai hoiah a oh o nathuemah a hnukbangnawk khaeah, 44“Kang thuih o hanih lok hae pahnet o hmah. Kami Capa hae kaminawk ih thaohhaih ban thungah paek ah om ih,” tiah a naa. 45To-e hnukbangnawk loa a thuihkoehhaih ih to panoek o ai. Panoek o thaih han aiah hawk iah oh pongah thaihkop o ai moa ato kawng to duengh han to doeh a vam o ai bae.

Mimaw Kalen Koek?

(Mat 18:1-5; Mrk 9:33-37)

46Hnukbangnawk loa angmahcae salak thungah mimaw kalen koek, ti ih kawng to angaek o. #Luk 22:24 47Anihcae ih dawnhaih to Jesuh mah panoek pae pongah naukta longto to ahoih moa angmah taengah to angdoetsak moa, 48anihcae khaeah, “Ami doeh ka hmin hoiah hi naukta hae ka talawk to loa kai ka talawk ni; ami doeh kai ka talawk loa matoehkung to a talawk. Kawmawtiah nangcae thungih kacai koek to kalen koek ah om tih,” tiah a naa.#Mat 10:40; Luk 10:16; Jhn 13:20

Ka Aek Ai Loa Nangcae Kami Ni

(Mrk 9:38-40)

49Johan mah, “Angraeng, kami longto loa na hmin hoiah taqawk kasae ka pathok to ka hnuk o moa ka pakaa pae o; kawmawtiah aicae ih bu thungah a paa o ai,” tiah a naa.

50Jesuh mah, “Pakaa o hmah, kawmawtiah ami doeh nangcae ka aek ai loa nangcae bang kami ah oh,” tiah Johan hoi hnukbang kalahnawk khaeah a naa pae.

Samari Vang Mah Jesuh Koeh O Ai

51Jesuh to van bangah lakhaih hanih atue mah hnaih tenren na-ah Jerusalem ah caeh hanah palung khaeh hnget moa amsak. 52Hma-ah to laicae a patoeh moa cungriboih to coengcoe ah sak pae roeh hanah Samari prae ih vang maeto ah to akun o. 53To-e to ih kaom kaminawk mah anih to pakun o ai, kawmawtiah Jerusalem bangah caeh poe hanah amsak o tito amnoek laih pongtoah ni. 54Ato to a hnukbang Jaem hoi Johan hnit mah a hnuk hoi na-ah Jesuh khaeah, “Angraeng, hi kaminawk hae tahmat hanah van bangih hmai to kaicae mah kraksak han na koeh maw?” tiah a duengh hoi.#9:54 Thoemto banrikcabu ah loa Elijah mah sak ih batiah tihae pacoih thuih.#2 Sang 1:9-16

55Jesuh loa anihcae bangah angqoi moa a zoeh.#9:55 Thoemto banrikcabu ah loa moa, “Kawbatih Pakhra to maw na tawnh o tito na panoek o ai; kawmawtiah Kami Capa loa kami hinghaih paro hanah angzo ai, to-e anihcae to pahlong hanah ni angzoh,” tiah a naa tihae pacoih thuih. 56Topacoengah Jesuh hoi a hnukbangnawk loa vangca kalah bangah a caeh o.

Jesuh Hnukbang Ah Oh Koehnawk

(Mat 8:19-22)

57Lam ah a caeh o li na-ah nongpa longto mah Jesuh khaeah, “Na caeh kung kruekah kang baang han,” tiah a naa.

58Jesuh mah anih khaeah to, “Tasuinawk mah akhaw a tawnh o moa tavanawk mah doeh tabu tazi a tawnh o; to-e Kami Capa loa a lu koenghaih han hoi anghakhaih ahmuenh boe doeh tawn ai,” tiah a naa.

59Kami kalah nongpa longto khaeah, “Kai hnukah baang ah,” tiah a naa.

To-e anih mah, “Angraeng, im ah na caehsak rae aloa kam pa ih qok to na quisak hmaloe rae ah,” tiah a naa.

60Jesuh mah, “Kami kaduenawk loa angmahcae hoi angmahcae to aquih o na soe. Nang loa caeh aloa Sithaw Poenghaih kawng to thui ah,” tiah a naa pae.

61Kami kalah longlongto mah, “Angraeng, kang baang han hmang, to-e im ah caeh rae ueloa sanauknawk to ampraekhaih ih sah hmaloe rae ue,” tiah a naa pae.#1 Sang 19:20

62Jesuh mah anih khaeah, “Ami doeh lekok tok kamtong moa ahnuk bangah kanghae mut to loa Sithaw Poenghaih hanah avanghaih om ai,” tiah a naa.

Currently Selected:

LUKA 9: AKNT2023

Highlight

Copy