LUKA 15
15
Tuu Kanghma
(Mat 18:12-14)
1Nito loa tamut congkungnawk hoi kami kazae tiah takhoe sut ih kaminawk paroeai to Jesuh ih lok tahngai hanah angzoh o.#Luk 5:29-30 2Farasi kaminawk hoi Tawklok patukkungnawk loa a prong o moa, “Hi kami loa tahnawng ih kami kazaenawk hoi angkom o moa anihcae hoiah buh mataeng doeh a cak haih,” tiah a naa o. 3Topongah Jesuh mah ahi patahhaih hae a thuih pae:
4“Patahhaih lok ah nangcae thungih longto mah tuu cumvaito a tawnh moa maeto to anghma ving nahaeloa kawbangmaw sah tih? Tuu quitakawtto pacoeng takawtto to rawkcak phroh kahing ohhaih taw thungah suem sut ueloa kanghma maeto to a hnuk let airoek loa pakrong daethaeh tih. 5A hnuk na-ah palung anghoe phi pongah palaeng nuiah a thuengh moa, 6im ah amlaem haih. Topacoengah ampuinawk hoi imdongpaknawk to kawk cu moa anihcae khaeah, ‘Tuu kanghma to ka hnuk let moa palung kanghoe phi. Anghoehaih hoiah um o si,’ tiah a naa. 7Tobatih toengah zae dawn pakhuemhaih aloe ai kami kahoih quitakawtto pacoeng takawtto ponghdoeh a zaehaih ka dawnpakhuem longto nuiah van ah anghoehaih pop aep tih,” tiah a naa.
Phoisa Kanghma
8“Tiaibaloa, nongpui longto loa maku phoisa hato a tawnh moa maeto anghma pae ving nahaeloa timaw sah tih? Hmai-im to pa-aang moa im to pahuih, hnuh airoek loa takiket boih to hoihdak ta-ah pakrong king. 9A hnuk na-ah angmah ampuinawk hoi imdongpaknawk to a kawk cu moa, ‘Ka tahmat ih phoisa to ka hnuk let boah, kanghoe parai, anghoehaih hoiah um o sih!’ tiah a naa. 10Tobatih toengah kang thuih o: Zae dawn pakhuemhaih ka tawn, kami kazae longto nuiah Sithaw ih vanminawk loa anghoe o,” tiah a naa.
Capa Kanghma
11Jesuh mah a thuih bae ih loa, “Vaito loa capa longhnetto ka tawn nongpa longto to a oh. 12Kanauk kue longto mah ampa khaeah, ‘Pa, qawk ka toep hankoi to vaihiah na paek lai ah,’ tiah a naa. Topongah ampa mah angmah ih hmuenmae boih to tapraek moa a capa hnit to pazet pae. 13Ani zetta pacoengah capa kanauk loa qawk a hak ih hmuenmae to a zawh king moa a hnuk tangka hoiah im hoitoah tacawt. Prae kahla paraiah to a caeh, toah to koehkoeh ngaingai ah kho a sak moa tangka to soekzak king. 14A tawnh ih boiboih to patoh king. Topacoeng loa ato prae thung boih ah caknaek takang ka nung parai to a thoh moa tita doeh tawn aiah a oh sut boah. 15Topongah ato prae kami longto khaeah toksak hanah a caeh moa ato kami mah ok to khetzawnsak hanah angmah ih lawk to patoeh. 16Oknawk mah cak ih cangrokoi hoiah doeh zokkoisak han a koeh boah, to-e amimah doeh cak hanah tita doeh paek o ai. 17A hnukkhuem aloa palungha vawk moa, ‘Pa ih toksah kaminawk boih loa caa laek nae laek aiah a oh o, kai loa hiah zok kamhlam ah paqam tom boah! 18Kangthawk moa pa khaeah ka caeh moa, ‘Pa, Sithaw khae hoi nang khaeah ka zae boah. 19Na capa ti hanah doeh kamcuk ai boah; nang ih toksakung longto batiah doeh na suem toeng ah, ka naa han,’ tiah a dawn. 20Topongah angthawk moa ampa khaeah amlaem let hanah amsak.
“A caeh moa im hoitoah a hla parai vop na-ah ampa mah anih to a hnuk; a tahmen parai, a cawnh thuih moa a sakop phrat, moa a mok. 21A capa mah, ‘Pa, Sithaw khae hoi nang khaeah ka zae ving boah. Na capa tiah kawk han doeh kamcuk ai boah,’ tiah a naa. 22To-e ampa mah angmah ih tamtoehnawk to a kawk moa, ‘Karang ah angzo oh! Khukbuenh kahoih koek to sin oloa angkhuksak oah. A banpazung ah bantuep to a buensak oloa a khok ah khokbuen to a buensak oah. 23Topacoeng loa caeh oloa maitaw cata kathauk koek to bop oah, anghoehaih poi to sah o si. 24Kawmawtiah hi ka capa loa a duek e vaihi a hing let boah; anghmat e vaihi hnuk let boah,’ tiah a naa. Topacoengah anghoehaih poi to a sak o.
25“Tona thuemah a capa kacoeh to loa lawk ah a oh. Amlaem moa, im taeng a phak na-ah tuenkamding hoi hnawhlamh tuen to a thaih. 26Topongah tamtoeh longto to a kawk moa, ‘Timaw a sak o?’ tiah a duengh. 27Ato tamtoeh mah, ‘Nam nauk to amlaem let boah moa ngantui ta hoi kasueng ta-ah im ah ang phak let pongah nam pa mah maitaw caa kathauk to a boh pae,’ tiah a naa.
28“Amza kacoeh loa paroeai palung a phuii moa im thungah akun han koeh ai; topongah ampa to tacawt moa im thungah akun hanah a pahloep. 29To-e ampa to, ‘Dawn noek e! Saning hi zetto misong batiah tok ka sak, na lok doeh ka aek vaih ai. Kai han timaw nang paek loa? Kampuinawk hoiah a nawmhaih poi sak hanah ma-eh maeto ta boe doeh nang paek ai. 30To-e hi na capa loa nang ih vawnsai boiboih to takbum ka zaw nongpuinawk pongah pasaeng king moa im ah angzoh let na-ah maitaw cata kathauk to na boh pae,’ tiah ampa to a naa. 31Ampa mah, ‘Ka capa, nang loa hiah kai hoiah na oh toemoe moa ka tawnh ih hmuenmae boiboih hae nang ih king ni. 32To-e nam nauk loa a duek moa vaihi a hing let, anghmat moa vaihi hnuk let ah oh, topongah anghoe kawnhaih poi sak han a krak roeroe,’ tiah thuih pae,” tiah Jesuh mah a naa.
Currently Selected:
LUKA 15: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
