LUKA 16
16
Vawnsai Khenzawnkung Laiha
1Jesuh mah a hnukbangnawk khaeah, “Vaito loa angraeng kanang nongpa longto a oh moa angmah ih hmuenmae ka khenzawn tamtoeh longto a tawnh. Ato tamtoeh mah angmah angraeng ih tangka to koeh ngaiah a soekzak romram, tiah angraeng to a thuih pae o. 2Topongah a kawk moa, ‘Nang kawng ka thaih ih hae timaw? Kai ih hmuenmae cazin to kacung ta-ah na paek ah, kawmawtiah kai ih hmuenmae khenzawnkung ah na om mak ai boah,’ tiah a naa. 3Tamtoeh loa angmah hoi angmah to, ‘Ka angraeng mah ka tok hae anghaksak tih boah. Timaw ka sak han? Long takaeh han doeh thazung om ai, mi khaeah bantadoi han doeh ka zat bae. 4Vaihi timaw ka sak han tito ka panoek boah. Ka tok to aboeng na-ah a im ah na ohsak thaih kampui to ka tawnh,’ han a tih.
5“Topongah angmah angraeng ih laiba ka tawn kaminawk boiboih to a kawk. Hmaloe koek kami khaeah, ‘Ka angraeng to nazetto maw na baa?’ tiah a duengh. 6Anih mah, ‘Oliv situi pung cumvaito,’ tiah a pathim. Hmuenmae khenzawnkung mah to, ‘Hi hae na cazin ah om tih, anghnu aloa pung quipangato,’ tiah tarik ah a naa pae. 7Topacoengah kalah longto khaeah, ‘Nang loa nazetto maw na baa?’ tiah a duengh. Anih mah, ‘cang phawh sangto,’ tiah a pathim. Hmuenmae khenzawnkung mah to, ‘Hi hae na cazin ah om soe, phawh cumvaitazetto, tiah tarik ah,’ tiah a naa.
8“Ato hmuenmae khenzawnkung oep-om ai kami mah laihahaih hoiah ka kop paraiah totiah a sak to angmah ih angraeng mah a hnuk na-ah a pakoeh; kawmawtiah hae longnui kaminawk loa angmahcae ih hmuen a sak o na-ah ka aang thungah kaom kaminawk pongdoeh a kop o pahlai aep pongah ni” tiah a naa.
9Topacoengah Jesuh mah, “Loktang ta-ah kang thuih o: Longnui hmuenmae hoiah ampui sah o haih ah, kawmawtiah hmuenmae to aboeng na-ah dungzan im ah pakun ah om tih. 10Ami doeh hmuen tetta pongah oep-om ah ka om loa hmuen tetpui pongah doeh oep-om ah om tih; ami doeh hmuen tetta pongah oep-om ah ka om ai kami loa hmuen tetpui pongah doeh oep-om ah om mak ai. 11Topongah longnui hmuenmae pathueng palet na-ah oep-om ah na om ai nahaeloa kawbangmaw angraeng lenhhaih tangtang to paek ah om thaih tih loa? 12Mi kalah longlongto ih hmuenmae nuiah mataeng doeh oep-om ah na om ai nahaeloa mimah maw nangmah ih hmuenmae to na paek o tih?
13“Tamtoeh longto mah angraeng hnetto ih misong ah om thaih ai; tobatih tamtoeh loa longto to hnumaa ueloa longto loa palung tih; longto khaeah oep-om ah om ueloa longto loa khensae tih. Nangcae loa Sithaw ih tamtoeh hoi tangka ih tamtoeh ah na om o maek thaih mak ai,” tiah a naa.#Mat 6:24
Jesuh Mah Thuih Ih Lok Thoemto
(Mat 11:12-13; 5:31-32; Mrk 10:11-12)
14To loknawk boih to Farasinawk mah a thaih o na-ah tangka ka koeh parai kami ah oh o pongah Jesuh to pahnuih o thuih. 15Jesuh mah anihcae khaeah, “Nangcae loa minawk mikhnuk ah loa kami katoeng koek ah nangsak o, to-e Sithaw mah nangcae ih palungthin to panoek. Kawmawtiah kami mah avang kaom paraiah dawn ih hmuennawk to Sithaw mikhnuk ah loa tidoeh na ai ni.
16“Mosi ih Lokpaek hoi tahmanawk mah tarik ih cabunawk loa baptisma paekkung Johan dung tue roekto khueh hanih ni; topacoeng hoiloa Sithaw Poenghaih Tamthang Kahoih to thuih ah oh moa mi boih mah patok palaek ah akun o.#Mat 11:12-13 17To-e Tawklok thungih camaeh kacai koek anghmat ponghdoeh van hoi long anghmat to zoi kue.#Mat 5:18
18“Ami nongpa doeh a zu to pakhrah moa nongpui kalah to angoh haih loa a zu nuiah zaehaih a sak; ato pakhrak ih nongpui kang oh haih nongpa to doeh zaehaih a sak.#Mat 5:32; 1 Kor 7:10-11
Angraeng Kanang hoi Lazaruh Kawng
19“Vaito loa angraeng kanang nongpa longto a oh moa khukbuenh atho kana koek hoiah amthoep moa nithokkruek phuhnaep pung ah kho a sak. 20Kamtang kamlai nongpa longto ahmin Lazaruh to a oh toeng, takbum boih to ahma hoiah a koi moa angraeng kanang ih thok kungah to angzoh o haih toemtoem. 21Angraeng kanang ih caboi hoitoah buhmae ka krah to paluem hanah amtoemh. Uinawk mah doeh angzoh o moa ahma to palaeh pae toemtoem.
22“Kamtang kamlai nongpa to loa a duek moa van ih buhcakhaih poikung ah Abraham taengah anghnut hanah vanminawk mah angzawn o. Angraeng kanang to doeh duek toeng moa aphum o, 23hell #16:23 Hell hae kadueh kaminawk kho, taqawk kho ni. thungah a krak moa paroeai patang a khang; ranui bangah a doeng tahang moa kahla paraiah Abraham hoi a taeng ih Lazaruh to a hnuk. 24Topongah anih mah, ‘Pa Abraham, kai hae tahmen ah; Lazaruh to matoeh aloa a banpazung to tui thungah nup na soeloa ka palai pongah paca na soe, kawmawtiah hi hmai kana thungah patang khanghaih ka pauep thaih ai,’ tiah a naa.
25“To-e Abraham mah, ‘Dawn noek e, ka capa, na hing thungah hmuen kahoih boiboih to paek ah oh boah moa Lazaruh loa hmuen kahoih ai boiboih to a hak. To-e vaihiah anih loa hiah hingh zongom ah a oh moa nang loa patang na khang boah. 26Ato laep ah, aicae salak ah longhaw kathuk parai a oh, topongah hi hoitoah nang khaeah angzoh han ka koeh kaminawk doeh angzo o thaih ai, nangcae na ohhaih khae hoitoah kaicae khaeah angzoh han ka koeh kami doehsoe angzo o thaih ai,’ tiah a naa. 27Tona-ah angraeng kanang mah, ‘Totibaloa, pa Abraham, kam pa ih im ah Lazaruh to patoeh ngaepacae rae ah. 28Toah to kam nauk mi pangato ka tawnh. Lazaruh to caeh na soeloa anihcae taloe loa hi patang khanghaih hmuen ah angzoh o han aiah acoehaih paek na soe,’ tiah a naa.
29“Abraham mah, ‘Nam nauknawk to acoehaih paek hanah Mosi hoi tahmanawk a oh; a thuih o ih to nam nauknawk mah tahngai o ngaepacae soe,’ tiah a naa. 30Angraeng kanang mah, ‘Ato khueh loa khawt ai, pa Abraham! To-e kami longlongto duekhaih thung hoitoah angthawk moa anihcae khaeah caeh nahaeloa zaehaih ih to dawnpakhuem o tih,’ tiah pathim pae. 31To-e Abraham mah, ‘Anihcae loa Mosi hoi tahmanawk ih lok to tahngai o ai nahaeloa kami longlongto duekhaih thung hoitoah angthawk langla cadoehsoe taang o pom mak ai,’ a naa,” tiah Jesuh mah a thuih.
Currently Selected:
LUKA 16: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
