LUKA 17
17
Zaehaih
(Mat 18:6-7,21-22; Mrk 9:42)
1Jesuh mah a hnukbangnawk khaeah, “Kaminawk to zaehaih thungah kamtimsakkung hmuen to loa om toemoe tih, to-e ato hmuen ka omsakkung hanih loa zitman a oh! 2Hi naukta tatanawk thungih longto doeh zaesak pongloa cangkaehhaih hlungsumpui to tahnong ah a oisak moa tuiculi ah vah zawh to hoih kue. 3Topongah na sak o ih hmuen pongah acoe oah.#Mat 18:15
“Nam naukamza mah zaehaih ih sah nahaeloa thuitaek ah, dawnpakhuem nahaeloa tahmen ah. 4Nito thungah vai sarihto na nuiah zaehaih sah cadoeh nang khaeah kangzo moa, ‘Ka zaehaih dawnpakhuem boah,’ tiah thui baloa na tahmen han oh,” tiah a naa.
Taanghaih
5Kawkpatoehnawk mah Angraeng to, “Kaicae taanghaih ih hae lensak kue ah,” tiah a naa.
6Angraeng mah, “Antam muu tetto ta mah taanghaih na tawnh nahaeloa hi thaibaakung hae, ‘Na tangzun hoiah angphong duk aloa tuiculi thungah anghling ah,’ na ti o thaih tih moa na ti o ih batiah na lok to tahngai tih.
Tamtoeh Ih Tok
7“Patahhaih iah nangcae thungih longto loa tamtoeh longto a tawnh moa ato tamtoeh mah lekok to a tok, tiaibaloa tuu to a khetzawn; lawk hoitoah amlaem na-ah ‘Karang ah buh caa lai ah’ na naa pae o han maw? 8Na naa o mak ai! Totiah na naa ponghloa anih khaeah, ‘Kai hanah duembuh to patoem coek ah, topacoengah laihawnui to angkhuk aloa buh kacak hoi tui ka naek nathungah na toep ah; topacoengah loa na caa toengh tih hmang,’ na naa o tih. 9Tamtoeh mah a lokpaek ih to tahngaih moa a sak pongah kawn lok thuih hanah aloe maw? 10Nangcae doeh ato batih toengah ni loa na oh o; na sak o hanah thuih ih to na sak o boih na-ah, ‘Kaicae loa tamtoeh romramnawk ni, ka sak o hankoi tok khueh to ni ka sak o,’ naa pae oh,” tiah a naa.
Ngansae Kaman Longhato A Hoihsak
11Jesuh loa Jerusalem bangah a caeh han thuih na-ah Samari hoi Galili prae khoqik thuem hoitoah a caeh krue krue. 12Vang maeto thungah akun na-ah ato vang ih ngansae kaman long hato mah anih to angqum o. Anihcae loa kahla paraiah angdoet o moa, 13“Jesuh, Angraeng! Kaicae hae na tahmen rae ah,” tiah a hangh o.
14Jesuh mah a hnuk moa anihcae khaeah, “Caeh oloa qaihmanawk mah na khen o na soe,” tiah a naa.#Lev 14:1-32
A caeh o na-ah loklam ah a thoeng#17:14 A thoeng: 5:12 khen ah. o boih. 15Anihcae thungih longto mah ka hoih boah tito angmat na-ah amlaem let moa khoeh puiah Sithaw to pakoeh. 16Jesuh ih khokkung ah to tabok moa anih khaeah kawn lok to a thuih. Ato nongpa to loa Samari kami ni. 17Jesuh mah, “Mi hato boih ah a hoih o king bae; kalah mi takawtto loa naamaw a oh o? 18Tipongmaw ahi prae kalah kami longto khueh hae angzoh moa Sithaw khaeah kawn lok to a thuih?” tiah a naa. 19Jesuh mah anih khaeah, “Angthawk loa caeh ah; na taanghaih ih mah anghoihsak boah,” tiah a naa.
Sithaw Poenghaih Angzohhaih Kawng
(Mat 24:23-28,37-41)
20Farasi kami thoemto mah, “Natuekah maw Sithaw Poenghaih to angzo tih?” tiah a duengh. Jesuh mah, “Sithaw Poenghaih loa mikhnuk han ka om ah angzo ai. 21Amimah doeh, ‘Khen e, hiah a oh,’ tiaibaloa ‘Hoah a oh,’ tiah thui o mak ai; kawmawtiah Sithaw Poenghaih loa nangmahcae thungah ni a oh,” tiah a naa.#17:21 Nangmahcae thungah tihae nangmahcae salak thungah tiaibaloa nangmahcae salak thungah toklaek ah amtueng tih tiah doeh oh thaih.
22Topacoengah a hnukbangnawk khaeah, “Kami Capa ih ani maeto to hnuk han ka koeh, na ti o ih atue to na pha tih, to-e na hnuh o mak ai. 23Nangcae khaeah, ‘Khen oah, hoah a oh! Khen oah, hiah hae a oh!’ tiah ka thui kaminawk to om tih. To-e khet hanah caeh o hmah. 24Tangphra loa van ahapbang hoitoah ahapbang khoekto a puek lawk moa a aang king batih Kami Capa loa angmah ih ani aloa om toengh tih. 25To-e hmaloe koek ah angmah to katingai patang khang ueloa vaihi dung kaminawk mah tahnawng o sut tih. 26Noah dung ah a oh batih toengah Kami Capa dung ah doeh om toengh tih.#Gen 6:5-8 27Noah mah palong thungah akun ni karoekto mi boiboih mah a cak a naek o, nongpanawk hoi nongpuinawk to zuva ah anglak angoh o, tuisakring to a thoh moa anihcae boih to paduek king.#Gen 7:6-24 28Lot dung ih ka om batiah om bae tih. Mi boiboih mah a cak a naek o, a qanh a zawh o, athaihkung to a hlingh o moa im to a sak o.#Gen 18:20—19:25 29Lot mah Sodom vang a cawnhtak ni ah hmai hoi kaat to van bang hoitoah kho batiah angzoh moa mi boiboih to paduek king. 30Kami Capa amtueng ni aloa totitoah om toengh tih.#Gen 19:26
31“Tona ni ah a imphu nuiah kaom kami longlongto mah im thungih hmuenmae to lak hanah sakra hmah na soe; ato batih toengah lawk ah kaom kami mah im ah amlaem hmah laih soe.#Mat 24:17-18; Mrk 13:15-16 32Lot ih zu to pahnet o hmah.#Gen 19:26 33Ami doeh angmah ih hinghaih pahlong han ka koeh loa a hinghaih to sung tih; ami doeh a hinghaih to ka sung loa a hinghaih to pahlong tih.#Mat 10:39; 16:25; Mrk 8:35; Luk 9:24; Jhn 12:25 34Loktang kang thuih o: Ato qum ah iihkroeng maeto pongah ka iip nawn longhnetto om tih; longto loa lak ving ah om ueloa longto loa suek sut ah om tih. 35Nongpui longhnetto cang ka daeng nawnto om tih; longto loa lak ving ah om ueloa longto loa caehtak sut ah om tih.
36(“Nongpa longhnetto lawk ah tok ka sah nawnto om tih; longto loa lak ving ah om ueloa longto loa caehtak sut ah om tih,” tiah a naa.) 37Hnukbangnawk mah anih khaeah, “Angraeng, natuekah maw om tih?” tiah a duengh o.
Jesuh mah, “Kadueh qok ohhaih ahmuenh kruekah langta tahmunawk acu o toemtoem,” tiah a naa.
Currently Selected:
LUKA 17: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
