LUKA 18
18
Lumhmai hoi Lokcaekkung Patahhaih
1Topacoengah palungboeng aiah khophoeh o toemoe hanah a patukhaih iah Jesuh mah a hnukbangnawk to patahhaih maeto a thuih pae. 2“Vang maeto ah Sithaw zi ai moa minawk doeh azat saiqathaih ka tawn ai lokcaekkung longto a oh. 3Toah to lumhmai longto a oh moa lokcaekkung khaeah, ‘Ka misa to a zawn hanah na bom rae ah,’ tiah vaihi hoi vaihi angzoh moa a hnik toemoe. 4Lokcaekkung mah atue sawk parai thung loa angmak pae tuektuek, to-e hnukkhuem aloa, ‘Sithaw ka zi ai moa kami doeh azat saiqathaih ka tawn ai eloa 5ahi lumhmai mah ka baecat ah angsak toemoe pongah lok ka caek pae han; tiaibaloa angzo toemoe ueloa kai hae palung angphosak lat tih,’ tiah a dawn,” tiah a naa pae.
6Topacoengah Angraeng mah lok patom let moa, “Ato lokcaekkung katoeng ai mah a thuih ih to tahngai oah. 7Vaihi angmah ih kaminawk mah qum thun ka hang moa abomhaih ih ka hnih loa Sithaw mah anihcae to katoeng ah taracaek pae aiah loa om tih maw? Anihcae to abom hanah angtawt loe mak ai maw? 8Loktang kang thuih o: Anihcae koehhaih ih to karang ah lokcaek pae tih. To-e Kami Capa angzoh na-ah longnui ah hi taanghaih to hnuh tih hmang maw?” a naa.
Farasi hoi Tamut Congkung Patahhaih
9Angmahcae to kami kahoih phi ah kang dawn o moa mi kalah boiboih to ka khensaenawk khaeah Jesuh mah ahi patahhaih hae a thuih pae bae. 10“Vaito loa Tempal ah khophoeh hanah ka caeh kami longhnetto a oh; longto loa Farasi kami moa longto loa tamut congkung ni.
11“Farasi kami loa angmah buengah kalah bangah angdoet moa,#18:11 Kalah bangah angdoet moa tihae thoemto banrikcabu ah loa angdoet moa angmah hoi angmah to kho a phoeh tiah a oh. ‘Aw, Sithaw, kai loa mi kalah batiah kaoeloe ka koeh ai, amsawn amlai ka thui ai, pazang ka sah ai kami ah oh pongah kawn lok kang thuih. Ho ih kaom tamut congkung batiah ka om ai pongah kawn lok kang thui. 12Tabaihto na-ah vaih hnetto buh ka zah moa ka hak ih boiboih to hato maeto ka paek,’ tiah kho a phoeh.
13“To-e tamut congkung loa kahla paraiah angdoet moa van bangah doeh mikhmai amdoengh vam aiah angmah ih saoek to angtum moa, ‘Aw Sithaw, kami kazae kai hae na tahmen ah,’ tiah a thuih. 14Jesuh mah, “Kang thuih o: Farasi kami to na ai moa tamut congkung to ni im ah amlaem na-ah Sithaw hma-ah katoeng kami ah a oh. Kawmawtiah ami doeh angmah hoi angmah to kamsang tahang kami loa pakhrak tathuk ah om ueloa ami doeh angmah hoi angmah to mi hlimah kangbaih loa kalen ah suek ah om tih,” tiah a naa.#Mat 23:12; Luk 14:11
Naukta Tanawk Tahamhoihhaih A Paek
(Mat 19:13-15; Mrk 10:13-16)
15Thoemto kaminawk mah a caanawk ih nuiah ban koengsak hanah Jesuh khaeah angzoh o haih. Hnukbangnawk mah anihcae to a hnuk o na-ah a zoeh o. 16To-e Jesuh loa nauktanawk to angmah khaeah a kawk moa, “Nauktanawk hae kai khaeah angzo o na soeloa pakak o hmah, kawmawtiah Sithaw Poenghaih loa hibatih kaminawk hanih ni. 17Ahi hae pahnet o hmah: Ami doeh Sithaw Poenghaih hae naukta mah a talawk batiah ka talawk ai loa Sithaw Poenghaih thungah akun thaih mak ai,” tiah a naa.
Angraeng Kanang Kalen
(Mat 19:16-30; Mrk 10:17-31)
18Judah kami pahoikung longto mah Jesuh khaeah, “Patukkung Kahoih, dungzan hinghaih hak hanah timaw ka sak han,” tiah a duengh.
19Jesuh mah, “Tipongmaw kahoih tiah nang kawk?” tiah a naa. “Sithaw khueh tiaialoa mita doeh kahoih om ai. 20Lokpaek to na panoek to loa: Pazang sah hmah; kami hum hmah; paqu hmah; amlai hmah, nam no hoi nam pa to khangza ah, tih ihnawk to,” tiah a pathim.#Exo 20:12-16; Deut 5:16-20
21Ato kami mah, “Ka nauktak nahoiah ahi lokpaeknawk boiboih hae ka pazui boih boah,” tiah a pathim.
22Jesuh mah ato to a thaih na-ah anih khaeah, “Na sak han angtoeng ih hmuen maeto a oh vop. Na tawnh ih boiboih to zaw loa tangka to kamtang kamlai kaminawk to paek ah, totibaloa van ah tacong to na tawn tih; topacoengah kai hnukah na baang ah,” tiah a naa. 23To-e ato kami mah ahi lok hae a thaih na-ah palung a set phi, kawmawtiah anih loa angraeng kanang kalen paraiah a oh pongah ni.
24Jesuh mah palung kahoih ai to a hnuk na-ah, “Angraeng kanang mah Sithaw Poenghaih thungah akun han hae natanmaw a rai!” tiah a naa. 25Kala-uk mah phungvang khaw thungah akun pongdoeh angraeng kanang mah Sithaw Poenghaih thungah akun to a rai aep.
26Anih ih lok ka thaih kaminawk mah, “Totibaloa mimaw pahlong ah om thaih tih?” tiah a duengh o.
27Jesuh mah, “Kami mah angcoeng thaih ai ti ih hae Sithaw han-iah loa angcoeng thai,” tiah a pathim.
28Topacoengah Piter mah, “Khen e! Kaicae loa nang hnukah baang hanah imnawk ka caehtak o king hae,” tiah a naa.
29Jesuh mah, “Ahlong, na thuih ih to ahmaan, moa loktang kang thuih o: Ami doeh a im doehsoe, a zu doehsoe, naukamzanawk doehsoe, amno ampa doehsoe, a caanawk doehsoe Sithaw Poenghaih kawng pongah ka caehtak loa 30vaihi dung ah kamhlai zawt ah hak ueloa kangzo hanih dung ah doeh dungzan hinghaih to hak bae tih,” tiah a naa.
A Duekhaih Kawng A Thuih Pathumhaih
(Mat 20:17-19; Mrk 10:32-34)
31Jesuh mah a hnukbang hlaihnetto to kalah bangah a caeh haih moa anihcae khaeah, “Tahngai o e! Jerusalem ah caeh o han moa toah to Kami Capa kawng cungriboih tahmanawk mah tarik o ih to acung tih. 32Gentel kaminawk ban thungah paek ah om ueloa anihcae mah pacaekhlaek o tih, padaeng o ueloa tamtui pathoih o thuih tih. 33Anihcae mah bop o ueloa hum o tih, to-e ni thumto pacoengah angthawklet tih,” tiah a naa.
34To-e hnukbangnawk loa hi hmuen kawng hae thaih panoek o ai; a lok thuihkoehhaih ih to hawk pae ving ah a oh moa Jesuh mah a thuih ih ahlongrui to panoek o ai.
Bantadoi Mikmaeng A Hoihsak
(Mat 20:29-34; Mrk 10:46-52)
35Jesuh loa Jeriko bangah a caeh moa a phak tom na-ah mikmaeng longto loa lamtaeng ah bantadoi moa anghnut sut. 36Mipui ka caeh tumprui tuen to a thaih na-ah, “Hihi loa timaw vai?” tiah a duengh.
37Anihcae mah, “Nazareth vang ih Jesuh angzoh,” tiah a thuih pae o.
38Anih loa, “Jesuh! David Capa! Kai hae na tahmen ah!” tiah a hangh.
39A hma-ih kaom minawk mah a zoeh o moa oh duem hanah a thuih pae o. To-e anih loa, “David Capa, kai hae na tahmen ah!” tiah khoeh puiah hangh aep aep.
40Topongah Jesuh loa angdoet moa, “Mikmaeng nongpa to hiah angzoh haih oah,” tiah lok a paek. Anih khaeah a phak na-ah Jesuh mah, 41“Timaw kang sak pae hanah na koeh,” tiah a duengh.
Anih mah, “Angraeng, mikhnuk let ka koeh,” tiah a pathim.
42Jesuh mah, “Totibaloa hnuh ah, na taanghaih ih mah nang to anghoihsak boah,” tiah a naa.
43Vaipang ta-ah mik a hnuk thaih, Jesuh hnukah bang moa Sithaw to saphaw. Ato to mipui mah a hnuk o na-ah anihcae boih mah Sithaw to saphaw o.
Currently Selected:
LUKA 18: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
