MATHAI 18
18
Mimaw Kalen Koek
(Mrk 9:33-37; Luk 9:46-48)
1Tona tue ah a hnukbangnawk loa Jesuh khaeah angzoh o moa, “Van Poenghaih thungah amimaw kalen koek?” tiah a duengh pae o.#Luk 22:24
2Tona-ah Jesuh loa naukta ta longto a kawk, anihcae ih a hma-ah angdoetsak moa, 3“Loktang ta-ah kang thuih o: Naukta ta batiah palungthin na laih o ai nahaeloa van Poenghaih thungah natuekah doeh na kun o mak ai.#Mrk 10:15; Luk 18:17 4Van Poenghaih thungah kalen koek loa mi hlimah kangdok moa hi naukta batiah kaom kami to ni. 5Ami doeh ka hmin hoiah hibatih naukta ta longto hae ka talawk loa kai ka talawk boah ni.
Zaepacunghaih
(Mrk 9:42-48; Luk 17:1-2)
6“Ami doeh hi naukta tata longlongto to kai taanghaih tahmangsak ving hanah kasah kami to loa cangkaehhaih hlungsum kalenpui to tahnong ah a oisak moa tuiculi kathuk ah pakhrak zawh to anih han hoih kue tih. 7Longprae ah kaminawk ih taanghaih kamrosakkung hmuennawk a oh mang pongah zitman oh parai. Tobatih loa om toemoe tih, to-e tobatih ka omsakkung hanah loa natanto maw khobingh!
8“Na ban tiaibaloa na khok mah na taanghaih to amtimsak nahaeloa boeng pat aloa vah ving ah. Ban hnetto hoi khok hnetto ah dungzan hmai thungah vah ah oh pongloa khok ban hoiaiah hinghaih thungah na kun o to a hoih kue.#Mat 5:30 9Topacoengah mik mah nangcae taanghaih to amtimsak o nahaeloa talaih aloa vah o ving ah. Mik hnetto hoi hell hmai thungah krak ponghloa mik maeto hoiah hinghaih thungah akun to a hoih kue.#Mat 5:29
Tuu Kanghma Patahhaih
(Luk 15:3-7)
10“Nangcae mah hi naukta ta maemaeto doeh na khetsae han aiah acoe oah. Loktang ta-ah kang thuih o: Anihcae ka toepkung vanminawk loa van ih kaom Pa ih hma-ah a oh o toemoe. 11(Kawmawtiah kami Capa loa kanghma kaminawk pahlong hanah ni angzoh.)
12“Kami longto loa tuu cumvaito a tawnh e maeto to anghma pae ving nahaeloa, timaw sah tih tiah na dawn o? Anih mah tuu kalah quitakawtto pacoeng takawtto to maenui ah rawkcak oh nakhaeah caehtak ueloa tuu kanghma to pakrong tih. 13Loktang ta-ah kang thuih o: Anih mah a hnuk na-ah tuu kanghma ai quitakawt hoi takawtto ponghdoeh kanghma maeto nuiah to a kawn kue. 14Tobatih toengah van ih kaom nam Pa mah hi naukta tatanawk thungih maeto mataeng doeh anghmatsak han koeh ai.
Kazae Hnit Naukamza
15“Nam naukamza longlongto mah nang nuiah zaehaih sah nahaeloa, angmah khaeah to caeh aloa pazaehaih to thui pae ah. To-e mi thaih aiah nangmah hnit buengah sah hoi ah. Na lok to tahngai nahaeloa nam naukamza to na pazawk thaih let boah.#Luk 17:3 16To-e nang ih lok tahngai ai nahaeloa, panoek bomkung longto maw, longhnetto maw caeh haih ah. Cabu Kacai mah, ‘Zaenethaih boiboih to tueng hoi tueng ai panoek hanah panoek haih bomkung longhnetto maw longthumto maw om na soe,’ a tih batiah na caeh haih kami loa panoek haih bomkung ah om tih.#Deut 19:15 17To-e na lok to tahngai nahaeloa to kawng to Khrihca kangkom khaeah na thuih o han. Khrihca kangkom lok to tahngai han koeh ai toengtoeng bae nahaeloa Sithaw panoek ai kami tiaibaloa tamut congkung kami batih toengah dawn oah.
Komhhaih hoi Khramhhaih
18“Topongah nangcae khaeah kang thuih o: Longnui ah na komh o ih boih to van ah doeh komh ah om ueloa na khramh o ih boih to van ah doeh khramh ah om toengh tih.#Mat 16:19; Jhn 20:23
19“Kang thuih o bae han vop: Longnui ah kawbatih doeh hnik ih kawng pongah nangcae thungih kami longhnetto, palung maeto aduehaih hoiah khophoeh nakruek ah van ih kaom Pa mah na paek o tih. 20Kawmawtiah ka hmin hoiah kami longhnetto doehsoe, longthumto doehsoe, namkhueng o cu na-ah kai doeh nangcae khaeah ka oh toeng,” tiah a naa.
Tahmenhaih Katawn Ai Tamtoeh Patahhaih
21Topacoengah Piter mah Jesuh khaeah angzoh moa, “Angraeng, naukamza longlongto mah ka nuiah zaehaih sah nahaeloa vai nazetto maw ka tahmen han? Vai sarihto roek maw” tiah a duengh.#Luk 17:3-4
22 #
Gen 4:24
Jesuh mah, “Na ai ni, vai sarihto roek na ai ni, vai quisarih alet sarihto roek na tahmen han;#18:22 Quisarih alet sarihto tihae Quisarihto pacoeng sarihto tiah doeh oh thaih. 23kawmawtiah van Poenghaih loa hitiah ni a oh. Vaito na-ah sangpahrang longto a oh moa angmah tamtoehnawk ih a tok o haih ih tangka cazinnawk to pasoep han a koeh. 24Totiah sak han amtong na-ah anih ih tangka sanghato ka baa tamtoeh longto to angzoh o haih. 25Ato tamtoeh loa laiba pathok han ka khawt tangka to tawn ai. Topongah sangpahrang mah to kami to angmah hoi a zu, a caanawk hoi tawnh ih hmuen boiboih zawh moa laiba pathok hanah lok a paek. 26Tamtoeh loa sangpahrang ih hma-ah khok samkrawn lamhoi a bok moa, ‘Tahmenhaih hoiah na zing rae ah, kang pathok king tih hmang,’ tiah tahmenhaih a hnik. 27Sangpahrang loa a tahmen, topongah laiba to azomsak moa a patoeh.
28“Tona-ah ato kami to loa a caeh moa angmah ih laiba zetta ka baa angmah ih ampui tamtoeh longto to angqum. To kami to a naeh, tahnong ah panamh pae moa, ‘Laiba to na paek lai ah’ tiah a naa pae. 29Angmah ampui tamtoeh to loa khokkhu samkrawn moa, ‘Tahmen loa na zing rae ah, kang pathok han hmang,’ tiah tahmenhaih a hnik. 30To-e koeh pae ai, laiba pathok thaih airoek loa thongim ah to pakhrak. 31Tamtoeh kalahnawk mah a hnuk o na-ah palunghoih o ai roe moa sangpahrang khaeah caeh moa a thuih pae o king. 32Tona-ah sangpahrang mah to tamtoeh kami to a kawk moa, ‘Nang tamtoeh ka vanglang ai, tahmenhaih nang hnik tuek pongah na baa ih boiboih to kang tahmen king. 33Kaimah na nuiah kang tahmen batih toengah nang doeh nampui tamtoeh nuiah tahmenhaih na tawnh han oh toeng bae,’ tiah a naa pae. 34Sangpahrang loa katingai palung a phuii moa ato kami mah laiba pathok boih airoek loa thongim ah pakhrak ah om tih,” tiah a naa.
35Topacoengah Jesuh mah, “Ami doeh nam naukamza to na palung thung tangtang hoiah na tahmen o ai nahaeloa ato kami batih toengah van ih kaom Pa mah doeh nangcae to na sah o toengh tih,” tiah a naa.
Currently Selected:
MATHAI 18: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
