MATHAI 19
19
Zuva Ampraekhaih Kawng
(Mrk 1:1-12)
1Jesuh mah to loknawk to a thuih boih na-ah Galili to tacawt tak moa Jordan tuiva hapbang yaeh Judah prae ah to a caeh. 2Kami paroeai mah baang o moa toah to ngoina paroeai a hoihsak.
3Farasi thoemto Jesuh khaeah angzoh o moa a zaehaih pakrong han koeh ah, “Kawbatih kawng pongah doehsoe nongpa mah a zu pakhrak hanah aicae ih Lokpaek mah pa-awh maw?” tiah a duengh o.
4Jesuh mah, “Atangsuek ah Sithaw mah nongpui hoi nongpa to a sak, tito Cabu Kacai thungah na kroek o ai maw? #Gen 1:27; 5:2 5Topongah Sithaw mah, ‘Hitiah oh pongah nongpa mah ampa hoi amno to caehtak ueloa a zu hoiah angom hoi tih, totitoah anih hnit loa takbum maeto ah coeng tih,’ a ti.#Gen 2:24 6Topongah anih hnit loa hnetto na ai boah moa maeto boah ni. Sithaw mah tabum ih loa mimah doeh tapraek hmah na soe,” tiah a naa.
7Farasinawk mah, “Totibaloa tipongmaw Mosi mah ‘Nongpa mah a zu to pakhrakhaih ca paek na soeloa patoeh na soe,’ tiah lokpaek a paek loa?” tiah a duengh o.#Deut 24:1-4; Mat 5:31
8Jesuh mah, “Nangcae loa thuihtaek han na rai o parai pongah Mosi mah zu pakhrakhaih thaih ih akaa to ang paek o. To-e atangsuek na-ah loa totiah om ai. 9Topongah kang thuih o: Kami longlongto mah a zu to mi kalah hoiah oeptang kaom aiah oh ih doeh na ai puiah, a zu ka pakhrah moa zu kalah to la nahaeloa pazang zaehaih a sak boah,” tiah a naa.#Mat 5:32; 1 Kor 7:10-11
10A hnukbangnawk mah anih khaeah, “Zuva salak ah hitiah oh hanih kanok baloa zuva angoh aiah oh hae a hoih kue,” tiah a naa o.
11Jesuh mah, “Hi patukhaih ih hae mi boih hanih na ai ni, Sithaw mah a qoih ih kaminawk han khueh ni. 12Nongpa a zu lak thaih ai ih takung kalah kalah a oh; thoemto loa totiah oh hanah a zahhaih roe boah ni; thoemto loa mimah totiah a sak o ihnawk ni; thoemto loa van Poenghaih kawng pongah zu la aiah ka omnawk ni. Hi patukhaih ih ka pazui thaih kami mah loa totiah pazui na soe,” tiah a thuih pae.
Nauktanawk Tahamhoihhaih A Paek
(Mrk 1:13-16; Luk 18:15-17)
13Thoemto kaminawk mah nauktanawk ih lu nuiah ban koeng moa khophoeh pae hanah Jesuh khaeah angzoh o haih. To-e a hnukbangnawk mah kaminawk to a zoeh. 14Jesuh mah, “Nauktanawk to kai khaeah angzoh na soe, pakaa o hmah. Kawmawtiah van Poenghaih loa hibatih kaminawk ih ni,” tiah a naa.
15Anihcae ih lu nuiah ban a koeng moa topacoengah a caehtak.
Thendoeng Angraeng Kanang
(Mrk 10:17-31; Luk 18:18-30)
16Vaito na-ah kami longto Jesuh khaeah angzoh moa, “Patukkung, dungzan hinghaih ka hak hanah hmuen kahoih timaw ka sak han?” tiah a duengh.
17Jesuh mah, “Hmuen kahoih kawngah tipongmaw kai nang duengh? Hmuen kahoih loa maeto khueh ni a oh. Dungzan hinghaih hnuk han na koeh nahaeloa lokpaeknawk to pazui ah,” tiah a naa pae.
18Anih mah, “Kawbatih lokpaeknawk to maw?” tiah a naa.#Exo 20:13-16; Deut 5:17-20
Jesuh mah, “Mi hum hmah; pazang sah hmah; paqu hmah; mi amsawn amlai ah net hmah; 19Nam no hoi nam pa khangza ah; na imdongpak to nangmah ih takbum palung batih toengah palung ah,” tiah naa.#Exo 20:12; Deut 5:16; Lev 19:18
20Thendoeng mah, “Hi lokpaeknawk hae ka pazui boih boah. Timaw sak han aloe bae vop?” tiah a duengh.
21Jesuh mah anih khaeah, “Kami kacung ah oh han na koeh nahaeloa caeh aloa na tawnh ih hmuen boiboih to zaw ah, na hnuk ih tangka to kamtang kaminawk to paek ah; Totibaloa van ah qawk na tawn tih, topacoengah angzo aloa na baang ah,” tiah a naa.
22Thendoeng mah to lok to a thaih na-ah palung kasae hoiah a caeh, kawmawtiah anih loa angraeng kanang ni.
23Topacoengah Jesuh mah a hnukbangnawk khaeah, “Loktang ta-ah kang thuih o: Angraeng kanang hanah loa van Poenghaih thungah akun hae a rai parai. 24Kang thuih let bae: Kala-uk mah phungvang lakat khaw ah akun pongdoeh angraeng kanang mah Sithaw Poenghaih thungah akun to a rai aep,” tiah a naa.
25A hnukbangnawk mah to lok to a thaih o na-ah a dawnrai o phi moa, “Totibaloa mimaw pahlonghaih to hak thaih tih,” tiah a duengh o.
26Jesuh mah anihcae to a khet daptap moa, “Hi hae kami han-iah loa angcoeng thaih ai, to-e Sithaw han-iah loa cungriboih angcoeng thaih,” tiah a naa.
27Topacoengah Piter mah, “Khen e! Kaicae mah hmuenmae boih ka caeh o tak moa nang hnukah kang baang o. Timaw ka hak o han?” tiah a duengh.
28Jesuh mah anihcae khaeah, “Loktang ta-ah kang thuih o: Kami Capa to Dung Kangtha thungah lensawkhaih tangkhang nuiah anghnut na-ah nangcae ka hnukbang hlaihnetto loa Israel caeng hlaihnetto uk hanah tangkhang nuiah nanghnu o toeng tih.#Mat 25:31; Luk 22:30 29Topacoengah mi boih mah kai hanih pongah a im, naukamza, tanu tangang, amno ampa, a caanawk hoi a lawk to ka caehtak loa alet cumvaito ah hnuh let ueloa dungzan hinghaih to paek ah om tih. 30To-e vaihi hmaloe koek ah ka omnawk hae hnukkhuem koek ah om o let tih; vaihi hnukkhuem koek ah ka omnawk hae hmaloe koek ah om o tih,” tiah a naa pae.#Mat 20:16; Luk 13:30
Currently Selected:
MATHAI 19: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
