MATHAI 21

Jerusalem Ah Pazawkhaih Hoiah Akun

(Mrk 11:1-11; Luk 19:28-40; Jhn 12:12-19)

1Jesuh hoi a hnukbangnawk loa Jerusalem vangpui to phak hnaih o boah. Oliv mae ih Bethfeih vang to a phak o. A hnukbang longhnetto hma-ah patoeh moa, 2hitiah lok a taquk. “Na hma-ih vang ah caeh hoiloa laa hrang paeh ih a cata hoi na hnuh hoi tih. Aqui to khramh hoiloa kai khaeah na sin hoi ah. 3Mimah na apring hoi nahaeloa ‘Angraeng mah angtoeng,’ tiah naa pae hoi ah. Totibaloa na prawt o roep tih hmang,” tiah a naa pae.#21:3 Angraeng tihae Anihcae tawnkung tiah doeh oh thaih.

4Hi hmuen hae tahma mah a thuih sut ih acunghaih hanih ni. Tahma mah:

5“Zion vangpui to thui oh,#Zek 9:9

Khen e, sangpahrang loa nang khaeah angzoh li boah;

Anih loa tuinom kahoih kami ah oh moa laa hrang nuiah angthueng,

Laa hrang cata nuiah angthueng, tih oh,” tiah a naa.

6Topongah a hnukbang hnit loa a caeh hoi moa Jesuh mah a thuih pae batiah to a sak hoi. 7Laa hrang hoi a cata to ang sinh hoi, a nuiah kahni to baih o moa Jesuh to angthueng. 8Kami katingai mah Jesuh caeh haih han loklam ah to kahni a baih pae o moa kami kalahnawk mah thingsabu to a tuk o moa lam ah baih pae o toengh. 9Jesuh ih hma-ah ka caeh hoi ahnuk ah kabaang kaminawk boih mah nawnto ah, “David Capa to pakoeh oah! Angraeng hmin hoiah kangzo kami loa Sithaw mah tahamhoihhaih paek na soe, Sithaw to pakoeh oh,” tiah hangh o.#Sam 118:25,26

10Jesuh to Jerusalem vang thungah akun na-ah vang bum anghuen hawn moa hangh o hoiah, “Hi kami hae amimaw?” tiah minawk mah a duengh o.

11Tona-ah mipui mah, “Hi kami loa Galili prae Nazareth vang ih tahma Jesuh ni,” tiah a naa pae o.

Tempal Ah Jesuh A Caeh

(Mrk 11:15-19; Luk 19:45-48; Jhn 2:13-22)

12Jesuh loa Tempal thungah akun moa toah vawnsai ka zawnawk hoi ka qannawk to pathok king. Tangka taphrak kungnawk ih caboi hoi aapahu ka zawkungnawk mah anghnuthaih ihnawk a nuih pae king. 13Moa anihcae khaeah, “Cabu Kacai thungah Sithaw mah, ‘Ka Tempal loa khophoehhaih im tiah thui o tih,’ tiah a thuih. To-e nangcae mah loa kamqu kamcanawk anghawkhaih ih hmuenh ah na sak o,” tiah a naa.#Isa 56:7; Jer 7:11

14Mikmaengnawk hoi zapasaenawk to Tempal thungah anih khaeah angzoh o moa anihcae ih nathaih to a hoihsak. 15Qaihma angraengnawk hoi Tawklok patukkungnawk loa anih mah a sak ih dawnraihaih hmuennawk to a hnuk o na-ah nauktanawk mah doeh, “David Capa to saphaw oah,” tiah Tempal thungah a hangh o to a thaih o na-ah palung a phuii o. 16Topongah Jesuh khaeah, “A hangh o tuek to na thaih maw?” tiah a naa pae o.#Sam 8:2

Jesuh mah, “Ka thaih ca! Cabu Kacai thungah, ‘Nauktanawk hoi tahnu kanae thuemh nauktanawk khae hoitoah saphawhaih kacung to tacawtsak hanah na patuk pae boah,’ tiah tarik ih to na kroek o vaih ai maw?” tiah a naa pae.

17Jesuh loa anihcae to tacawt tak, Jerusalem vangpui hoitoah Bethani vang ah to a caeh moa toah a ih.

Jesuh Mah Thaiduet Kung Tangoeng

(Mrk 1:12-14,20-24)

18Akhawnbang khawnthaw ah Jesuh loa Jerusalem vang bangah a caeh let na-ah loklam ah zok amhlam pae. 19Lamtaeng ah thaiduet kung to a hnuk moa a caehthuih, to-e aqam khueh tiaialoa tidoeh hnuh ai. Topongah thaiduet kung to, “Natuek doeh athaii let hmah,” tiah tangoeng. Cungkhang toah thaiduet kung loa angqo hrung roeprap.

20Ato to a hnukbangnawk mah a hnuk o na-ah a dawnrai o moa, “Kawbangmaw thaiduet thing loa hitih khoekto vaipang ta-ah angqo roeprap vai?” tiah a thuih o.

21Jesuh mah, “Loktang ta-ah kang thuih o: Na taang o moa oepvawthaih ih om ai nahaeloa hi thaiduet kung nuiah ka sak ih hae nangcae mah doeh na sah o thaih tih. Hi khueh aiah hi maehung maepang doeh hae, ‘Angthuii aloa tuiculi ah angvah ah,’ na naa o nahaeloa na naa batih toengah om tih.#Mat 17:20; 1 Kor 13:2 22Na taang o tangtang nahaeloa khophoehhaih hoiah na hnik ih to kawbatih doeh na hnuh o tih,” tiah a naa.

Jesuh Ih Akaatawnhhaih

(Mrk 11:27-33; Luk 20:1-8)

23Jesuh loa Tempal ah angzoh let moa a patuk pae nathuemah qaihmanawk hoi kacoetanawk to anih khaeah angzoh o moa, “Hi hmuennawk hae sak hanah tih akaa to maw na tawnh? Mimah maw akaa na paek?” tiah a duengh o.

24Jesuh mah, “Lok maeto kang duengh o toeng moa nang pathim o thaih nahaeloa ami ih akaa hoiah maw hae hmuennawk hae ka sak tihae kang thuih o pae toengh han,” tiah a naa. 25“Johan mah Baptisma a paek ih to naabanghoiah maw angzoh? Sithaw bang hoitoah maw, tiaibaloa kami bang hoitoah maw?” tiah a duengh pae.

Tona-ah angmahcae thungah maeto hoi maeto angaekhaih ih to tacawt moa, “kawbangmaw ti o han? Sithaw ih akaa hoiah ti o nahaeloa, ‘Tipongmaw Johan to na taang o ai,’ na naa tih. 26To-e kami ih akaa hoiah tih hanih doehsoe Johan loa mi boih mah tahma ni tiah a taang o bae moa mipui mah kawbangmaw aicae nuiah na sah o tih tito mawnh han a oh bae,” a ti o. 27Topongah, “Ka panoek o ai,” tiah Jesuh to pathim pae o.

Tona-ah Jesuh mah, “Totibaloa kaimah doeh tih akaa hoiah maw hi hmuennawk hae ka sak, tito kang thuii o mak ai,” tiah a naa.

Capa Longhnetto Patahhaih

28Jesuh mah, “Kawbangmaw na dawn o? Vaito loa capa hnetto ka tawn kami longto a oh. A capa calu khaeah caeh moa, ‘Ka capa, vaihni loa misur takhaa ah caeh aloa toksah ah,’ tiah a naa. 29A capa mah, ‘Ka koeh ai,’ tiah angmak pae; to-e vaiah loa palung a dawn let moa misur takhaa ah to caeh. 30Topacoengah ampa loa a capa kalah khaeah a caeh moa totih toengtoeng toah a thuih pae bae. Anih mah, ‘Ue, angraeng,’ tiah a naa, to-e caeh ai. 31Hi capa longhnetto thungah hae amito maw ampa koehhaih ih to ka sah?” tiah a duengh.

Anihcae mah, “A capa kacoeh mah,” tiah pathim hoi.

Topongah Jesuh mah, “Kang thuih o: Tamut congkungnawk hoi takbum ka zawnawk mah Sithaw Poenghaih thungah na kun o tak tih,” tiah a naa. 32Kawmawtiah Baptisma paekkung Johan loa nangcae khaeah angzoh moa loklam kamsoem to pazui hanah anghnuksak o, to-e nangcae mah taang han na koeh o ai; tamut congkungnawk hoi takbum ka zawnawk mah to a taang o. Toto na hnuk o na-ah doeh palung na laih han na koeh o ai toengtoeng moa taang han doeh na koeh o ai.#Luk 3:12; 7:29-30

Takhaa Ah Toksahnawk Patahhaih

(Mrk 12:1-12; Luk 2:9-19)

33Jesuh mah, “Patahhaih kalah to tahngai o bae rae ah: Vaito na-ah lawk tawnkung longto a oh moa misur takhaa to a sak. To takhaa loa sipae a komh takui, misur pasawhhaih hanah tangqom khaw to takaeh moa toephaih hanah buk maeto a sak. Topacoengah misur takhaa toksahkungnawk khaeah hlaisak moa angmah to kholong ah caehtak.#Isa 5:1-2 34Misur athaih pakhrik tue phak na-ah ka hlaikungnawk khaeah angmah ih misongnawk to patoeh moa a hak o hankoi to a hnik o. 35Takhaa kahlainawk mah a misongnawk to a naeh moa longto to a boh o, longto loa a hum o moa longto to loa hlung hoiah a vah o. 36Takhaa tawnkung mah hmaloe ih pongdoeh kanoi kue ah misong kalahnawk to a patoeh let bae, to-e tangsuek batih toengah to a sak bae. 37A hnukkhuem koek ah a capa to patoeh. ‘Ka capa hae loa saiqat o kue tih hmang,’ tiah a dawn. 38To-e takhaa hlaikungnawk mah a capa to a hnuk o na-ah anihcae mah, ‘Hi kami hae takhaa tawnkung ih capa ni. Angzo oh, hum o siloa vawnsai hae la pae o si,’ a ti o. 39Topongah a naeh o moa takhaa laepbang ah to a vah o moa a hum o.

40“Totibaloa takhaa tawnkung to angzoh na-ah kawbangmaw hi takhaa hlaikungnawk hae a sah tih tiah na dawn o?” tiah Jesuh mah a duengh.

41Anihcae mah, “Ato kami kahoih ainawk to loa hum o ngaepacae ueloa atue na-ah angmah taham aquih athaih ka paek thaih kami kalah khaeah takhaa to hlaisak tih,” tiah a naa pae o.

42Jesuh mah anihcae khaeah, “Cabu Kacai mah a thuih ih hae na kroek o vaih ai maw?#Sam 118:22-23 Cabu Kacai mah:

‘Im sahkungnawk mah avang ai tiah

takhoe o ih hlung to lokpui koek ah a coengh;

hi loa angraeng mah a sak ih ni,

dawnrai kaom mikhnuk ah a oh,’ tiah a thuih to na kroek o vaih ai maw?” a naa pae.

43Topongah kang thuih o: “Sithaw Poenghaih loa nangcae khae hoitoah lak ah om ueloa athaih kahoih kathai khaeah to paek ah om tih,” tiah a naa. 44(“Ami doeh hlung nuiah ka krah loa a dip ah anghaeh dung tih, to hlung mah krakthuih ih kami longlongto loa vaiphu dip ah coeng tih,” tiah a naa pae.)

45Jesuh mah patahhaih lokthuih ihnawk to qaihma kacoeta hoi Farasinawk mah a thaih o na-ah angmahcae ih kawng a thuih tito panoek o. 46Topongah Jesuh to naeh han thuih o. To-e mipui mah Jesuh loa tahma ni a ti o pongah mipui to a zit o.

Currently Selected:

MATHAI 21: AKNT2023

Highlight

Copy