MATHAI 22
22
Zupaluen Poi Patahhaih
(Luk 14:15-24)
1Jesuh mah patahhaih lok hoiah mipui to patuk let bae. 2“Van Poenghaih loa hitiah ni a oh. Vaito loa sangpahrang mah a capa hanah zupaluen poi a sak. 3Ato zupaluen poi ah kangzo hanah pacae ih kaminawk khaeah thuih pae hanah angmah ih tamtoehnawk to a patoeh. To-e angzoh han koeh o ai. 4Topacoengah tamtoeh kalahnawk to patoeh bae moa hitiah lok a taquk: ‘Buhraeng angvai hanah vaihi coengcoe ah oh boah. Maitaw taenawk hoi boii kathauk thauknawk to boh boih boah moa tiboih doeh coengcoe ah sak boih boah. Buhraeng cak hanah angzo o laih,’ naa pae oh,” tiah a naa. 5To-e pacae ih kaminawk mah tidoeh dawncang o ai moa tok to a sak o tak lat. Longto loa lawk ah a caeh, kalah loa vawnsai zawhhaih hmuen ah to a caeh; 6thoemto mah a tamtoehnawk to naeh o moa a boh o, a hum o. 7Sangpahrang loa katingai palungphui; topongah angmah ih risanawk to patoeh moa ato kami ka humnawk to thupsak hmen, anihcae ih vangpui to hmai a hlaeksak. 8Topacoengah a tamtoehnawk to a kawk moa, “Zupaluen poi ka sak ih loa coengcoe ta-ah oh boih boah, to-e ka pacae ih kaminawk loa pacae han doeh a krah ai. 9Vaihi lam sungqum ah caeh oloa na hnuk ih kaminawk to pacae thaih roekto kanoi ah pacae ah,” tiah a naa. 10Topongah tamtoehnawk to a caeh o moa lam ah angqum ih boiboih, kami kasae kahoih ti aiah kawk cu moa zupaluenhaih impui loa koi khik.
11“Pacae ih kaminawk to khet hanah sangpahrang loa akun moa zupaluen poi kahni kang khuk ai kami longto a hnuk. 12Sangpahrang mah, ‘Kampui, zupaluen poi kahni angkhuk aiah kawbangmaw hi hmuenh ah na kun thaih,’ tiah a duengh. To-e anih loa tidoeh thui ai. 13Topacoengah sangpahrang loa a tamtoehnawk khaeah, ‘A khok hoi a ban to taoeng oloa tasabang kaving thungah vah oh. To hmuenh ah to qah hoi haa to ta-aihhaih to om tih,’ a tih,” tiah a thuih pae o.#Mat 8:12; 25:30; Luk 13:28
14Topacoeng loa Jesuh mah, “Pacae ih kaminawk loa pop parai e qoih ih kami loa tamsi,” tiah a naa.
Tamut Paekhaih Kawng
(Mrk 12:13-17; Luk 20:20-26)
15Farasi kaminawk loa a caeh o moa lokduenghhaih hoiah Jesuh ih zaehaih to pakrong hanah angcaeng o. 16Topacoengah angmahcae ih hnukbang thoemto hoi Herod ih kami thoemto to Jesuh khaeah patoeh o moa anihcae mah, “Patukkung, nang loa loktang ni na thuih tito kang panoek o. Sithaw koeh ih loktang to mi mikhmai khen aiah na patuk. Kawmawtiah nang loa ami doeh pazit pakrawnhaih ih to na tawn ai. 17Topongah na dawnhaih hoiah na thui ah, Rom sangpahrang khaeah tamut paek hae aicae ih Tawklok mah a koeh maw koeh ai maw?” tiah a duengh o.
18Palung thungah dawnhaih kahoih ai a tawnh ih to Jesuh mah panoek pae pongah anihcae khaeah, “Nangcae laiha kaminawk! Tipongmaw thaang ah a mansak han na thuih o? 19Tamut paek hanih phoisa to na patuek oah,” a naa.
Phoisa to a paek pae o moa Jesuh mah, 20“Ami ih a tungkraang hoi ahmin maw kamtueng?” tiah a duengh.
21Anihcae mah, “Sangpahrang angraeng ih a kraang hoi ahmin,” tiah a naa pae o.
Tona-ah Jesuh mah, “Totibaloa Sangpahrang ih hmuen loa sangpahrang to paek oh, Sithaw ih hmuen loa Sithaw to paek oh,” tiah a naa pae.
22Toto a thaih o na-ah a dawnrai o moa anih khae hoitoah a caeh o ving.
Angthawklethaih Kawng
(Mrk 12:18-27; Luk 20:27-40)
23Tona ni toengtoeng ah Sadusi kami thoemto loa Jesuh khaeah angzoh o. Anihcae mah loa kami hae duek pacoeng loa angthawklet mak ai boah, ti o.#Tok 23:8 24Anihcae mah Jesuh khaeah, “Patukkung, Mosi mah patukhaih ih loa, ‘Kami longto a ca to tawn aiah dueh ving nahaeloa amnauk mah a zuqawk to angoh haih ngaepacae han oh. Totiah angoh haih moa a ca to tawn hoi nahaeloa ka dueh ih ca ah ni om tih,’ a ti.#Deut 25:5 25Hiah ka om naukamza longsarihto a oh. Calu koek loa zu a lak e a ca to tawn aiah a duek ving, topongah a zuqawk to amnauk mah amthawn haih. 26Tobatih toengah pahnithaih ih amnauk doeh a duek bae, pathumhaih ih amnauk to doeh a duek toengtoeng bae. Totitoah naukamza longsarihto to a duek o king. 27Hnukkhuem ah to nongpui to doeh a duek toeng. 28Topongah long sarihtonawk boih mah zu ah angoh o haih boih pongah kadueh kaminawk angthawklethaih ni ah ami ih zu ah maw om tih,” tiah a duengh pae o.
29Jesuh mah, “Na dawnhaih ih na pazae o tangtang! Kawmawtiah nangcae mah Cabu Kacai doehsoe, Sithaw hmuensak thaihaih ih doehsoe, na panoek o ai pongtoah ni. 30Kawmawtiah kami kadueh angthawklet na-ah loa van ih kaom vanmi batiah om o ueloa zuva angohhaih ih om mak ai boah. 31Kami kadueh angthawklethaih ih kawng pongah Sithaw mah a thuih ih to na kroek o vaih ai maw? Sithaw mah, 32‘Kai loa Abraham Sithaw, Isaak Sithaw, Jakob Sithaw ni,’ a tih. Anih loa kahing kaminawk ih Sithaw ni, kadueh kaminawk ih Sithaw na ai ni,” tiah a thuih.#Exo 3:6
33Ato lok to mipui mah a thaih o na-ah anih mah patukhaih ih hae a dawnrai o.
Lokpaek Kalen
(Mrk 12:28-34; Luk 10:25-28)
34Jesuh mah Sadusi kaminawk to lok apaeh han kanghmang sut ah a sak tito Farasi kaminawk mah a thaih na-ah angzoh o moa, 35anihcae thungih longto, Tawklok patukkung mah Jesuh to lokduenghhaih hoiah zae pakrong hanah angcaeng.#Luk 10:25-28 36Anih mah, “Patukkung, Tawklok thungah hae kawbatih lokpaek to maw kalen koek?” tiah a duengh.
37Jesuh mah, “‘Na Angraeng Sithaw to na palungthin boih, na hinghaih boih, na dawnhaih boih hoiah palung ah.’#Deut 6:5 38Toto loa kalen koek hoi lokpui koek lokpaek ni. 39Apahnithaih ih lokpui koek lokpaek loa hmaloe ih batih toengtoeng ni: ‘Na imdongpak to nangmah ih takbum na palung batih toengah palung ah.’#Lev 19:18 40Mosi ih Tawklok bum boih hoi tahmanawk mah patukhaih ih boiboih loa hi lokpaek hnetto khaeah angcu boih boah,” tiah a naa.
Messiah Kawng Lokduenghhaih
(Mrk 12:35-37; Luk 20:41-44)
41Farasinawk nawnto ah acu o kung na-ah Jesuh mah, 42“Messiah hae kawbangah maw na dawn o? Ami ih catawn ah maw a oh?” tiah a duengh.
Anihcae mah, “David ih catawn ni,” tiah pathim pae o.
43Jesuh mah, “Totibaloa tipongmaw Pakhra mah David khaeah, ‘Messiah loa ka Angraeng ni, tiah na thuih han,’ tiah a naa pae loa? David mah,
44“Angraeng mah ka Angraeng khaeah,
Na misanawk to na khoktabae hlimah kang suek airoek,
Ka bantang bangah anghnu ah,” tiah a naa.#Sam 110:1
45Topacoengah David mah Messiah to ‘Angraeng’ tiah kawk nahaeloa kawbangmaw Messiah to David ih catawn ah om thaih tih?
46Mimah doeh Jesuh to pathim o thaih ai moa to ni kazit hoiloa mita mah doeh lok to dueng o vam ai boah.
Currently Selected:
MATHAI 22: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
