MARKA 13
13
Tempal Amrohaih Han Kawng A Thuih
(Mat 24:1-2; Luk 21:5-6)
1Jesuh loa Tempal hoitoah tacawt na-ah a hnukbang longto mah, “Patukkung, khen e! Hi hlung puipuinawk hoi im puipuinawk hae a dawnrai han oh!” tiah a naa.
2Jesuh mah, “Hi im kalen puipuinawk hae na hnuk takhae? Hi hlung puipuinawk hae maeto boe doeh a ohhaih ih ahmuenh ah ohhaih ai ih atue to pha tih, hinawk boih hae a nae king tih,” tiah a naa.
Raihaih hoi Pacaekhlaekhaih
(Mat 24:3-14; Luk 21:7-19)
3Jesuh loa Tempal sadang ah kaom Oliv mae ah to anghnut na-ah Piter, Jaem, Johan, hoi Andru cae to tamqu lamah angzoh o. 4Anihcae mah, “Ahi hae natuekah maw om tih? Na thui ah; Ato hmuennawk to na pha khaekhaeh tih, tito panoek thaih hanah ti amathaih ih to maw om tih?” tiah a duengh pae o.
5Jesuh mah anihcae khaeah, “Acoe aha oah, mita mah doeh na ling o hmah na soe,” tiah a naa. 6Kami paroeai kai hmin hoiah angzo o ueloa, ‘Anih loa kai hae boah ni,’ tiah thui o ueloa kami paroeai aling o tih. 7Moa puengkhraep dongpak ih misa angtukhaih tuenpawk hoi ahmuenh kahla ih misa angtukhaih tamthang tamlinawk na thaih o na-ah mawn o hmah. Tobatih hmuen to loa ka om han roe ni, to-e aboenghaih a phak boah, tihaih ih na ai ni. 8Prae maeto hoi maeto, caeng maeto hoi maeto misa angtuh o tih. Hmuenh kruekah talihnawh ih om ueloa takang thok tih. Hi hmuennawk hae loa naukta zah tom na-ih zokna hmaloe batih ni a oh.
9“Nangmahcae hoi nangmahcae to acoe oah. Mimah na naeh o ueloa lokcaek zung ah na hoii o tih. Sinakok thungah na bop o tih; kai pongah ukkung hoi sangpahrangnawk ih hma-ah nangdoe o ueloa anihcae khaeah Tamthang Kahoih to na thui o tih. #Mat 10:17-20; Luk 12:11-12 10To-e aboenghaih phak ai nahlanah Tamthang Kahoih to caeng boiboih khaeah thuih ah om tih. 11Nangcae to naeh o moa lokcaekhaih zung ah phak o haih na-ah timaw ka thuih han tiah tasoeh o mut hmah. Atue phak na-ah kawbatih doeh thuih hanah paek ih to thui ah. Kawmawtiah na thuih hanih lok loa nangmahcae ih lok ah om mak ai; Cai Pakhra mah thuih ih lok ah ni om tih. 12Nauk-amza tingtoi to dueksak hanah paek tih, tobatih toengah ampanawk mah a caanawk nuiah to sah tih; a caanawk mah doeh amno hoi ampanawk to misa ah suem ueloa padueksak o tih. 13Mi boih mah kai ih kawng pongah na hnumaa o tih. To-e ami doeh aboenghaih khoekto kangcak loa pahlong ah om tih.#Mat 10:22
Panuetsoeh Hmuen Zitman Kaom
(Mat 24:15-28; Luk 21:20-24)
14“Zitman koi panuetsoeh kaom hmuen loa angdoet hankoi ai ih hmuenh ah kangdoe to na hnuh o tih.” (Ka kroekkung: A thuihkoehhaih hae panoek kop ah.) “Topacoengah Judae ah kaom kaminawk mae bangah na cawnh o boih han oh.#Dan 9:27; 11:31; 12:11 15A imphu ah kaom kami longlongto mah a sinh hanih hmuen lak hanah im thungah akun na hmah soe.#Luk 17:31 16A lawk ah kaom kami longlongto mah kahni lak hanah im ah amlaem na hmah soe. 17Ato tue ni ah nauk kanaeng nongpui hoi naukta kanauk ka tawn nongpuinawk hanih loa paroeai rai tih. 18Hi hmuennawk hae sik angqai tue ah phak han aiah Sithaw khaeah khophoe oah. 19Kawmawtiah hi raihaih kangzo han hae Sithaw mah long a sak amtong tangsuek nahoiah vaihi khoekto ka om vaih ai, zitman kaom koek raihaih iah om tih. Hmabang natuek doeh tobatih to om let mak ai boah.#Dan 12:1; Lph 7:14 20To-e Angraeng mah ato ni to a duemhsak boah; duemsak ai nahaeloa ami kawbatih doeh ka sueng om mak ai. To-e a qoih tangcae ih kaminawk hanah ato ni to a duemhsak boah.
21“Tona-ah kami longlongto mah nangcae khaeah, ‘Khen o e, hiah Messiah a oh,’ ‘Khen o e, hoah Messiah a oh,’ tiah na naa nahaeloa taang o hmah. 22Kawmawtiah Messiah kaling hoi tahma kaling paroeai tacawt tih. Sithaw mah a qoih ih kaminawk mataeng doeh, angcoeng thaih soehaeloa aling hanih ah amathaih hoi dawnraihaih ihnawk to sah o tih. 23Acoe oah! Atue ni phak ai nahlanah cungri kang thuih o coek boih boah.
Kami Capa Angzohhaih
(Mat 24:29-31; Luk 21:25-28)
24“Ato raihaih tue pacoengah loa ni mah ving ueloa khra mah doeh aang mak ai boah.#Isa 13:10; Ezk 32:7; Jol 2:10,31; 3:15; Lph 6:12 25Sakaenawk van hoitoah krah tathuk ueloa van ah ka omnawk ih thaohhaih ihnawk to a oh o haih ih hmuenh hoitoah lam angkhraeng o boih tih boah.#Isa 34:4; Jol 2:10; Lph 6:13 26Tona-ah Kami Capa loa amtueng ueloa tamai thungah hmuensak thaihaih hoi, phungaeng lensawkhaih hoiah angzo tih.#Dan 7:13; Lph 1:7 27Long takii pali ah to a vanminawk to patoeh ueloa long hapbang taemh nahoi hapbang taemh khoekto Sithaw mah qoih ih kaminawk to takok o tih.
Thaiduet Kung Hoitoah Amtukhaih
(Mat 24:32-35; Luk 21:29-33)
28“Thaiduet kung hoitoah amtukhaih ih to la oah. Tanghang to hingsuer ah tadok tacawt moa aqam kanauk tacawt tahang na-ah nipui tue a hnaih boah, tito na panoek o. 29Tobatih toengah hi hmuennawk kaom to na hnuk o na-ah atue loa hnaih boah, amtawn awt boah, tito na panoek o tih.#13:29 Atue loa hnaih boah, amtawn awt boah tihae Anih loa hnaih boah, angzoh han coengcoe ah oh boah tiah doeh thuih thaih. 30Vaihi kahing kaminawk hae a duek o boih ai nahlanah hi hmuennawk boih hae na pha tih, tihae pahnet o hmah. 31Van hoi long loa anghma tih, to-e ka lok loa natuek doeh anghma mak ai.
Mimah Doeh Ani hoi Atue Panoek Ai
(Mat 24:36-44)
32“Tocadoeh natuekah maw to ni hoi tue to na pha tih, tihae mita mah doeh panoek thaih ai; van ih vanminawk mah panoek ai, Capa mah doeh panoek ai, Pa khueh mah ni panoek.#Mat 24:36 33Acoe oah, hruek oah, kawmawtiah natuekah maw atue to na pha tih, tito na panoek o ai. 34Tihoiah maw ahmong ti nahaeloa kami longto kholong ah caeh hanah amsak moa a tamtoehnawk khaeah a sak hanih tok to pazet rip moa, khongkha toepkung mah doeh hoihdak ta-ah toep hanah lok ka taquk ih im tawnkung batiah ni om tih.#Luk 12:36-38 35Im tawnkung angraeng loa natuekah maw na pha tih, tito na panoek o ai pongah acoehaih hoiah om oh. A duembang ah doeh oh thaih, qumning ah doeh oh thaih, khodai ai nahlanah doeh oh thaih, ni tacawt na-ah doeh oh thaih. 36Poeklak ai na-ah angzo moeng nahaeloa ka iip li to tongh o hmah na soe. 37Nangcae khaeah kang thuih o ih hae mi boiboih khaeah doeh ka thuih: Acoe hoi zing oah,” a naa pae.
Currently Selected:
MARKA 13: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
