MARKA 14

Jesuh Hum Han Angcaenghaih

(Mat 26:1-5; Luk 22:1-2; Jhn 11:45-53)

1Takantak Poi hoi Tae thuh ai Takaw Poi phak hanah ni hnetto khueh ni koeh boah. Qaihma kacoetanawk hoi Tawklok patukkungnawk loa Jesuh to tamqu lamah naeh moa hum thaih ih loklam to pakrong o. #Exo 12:1-27 2Anihcae mah, “Poi thungah loa sak han om ai, mipui pahrue pung moeng tih,” tiah a ti o.

Bethani Ah Jesuh To Situi A Bawh

(Mat 26:6-13; Jhn 12:1-8)

3Jesuh loa Bethani vang, ngansae kaman Simon im ah a oh moa buh a cak li na-ah nongpui longto akun moa atho kana parai nard hmuihoihtui to alabaster tabu maeto koi khik to ang sinh. Ato tabu to thaep phawt moa hmuihoihtui to Jesuh ih lu ah a bawh.#Luk 7:37-38 4Toah kaom kami thoemto mah palungphui o moa, “Tipongmaw hmuihoihtui to hitiah a soek a zak halat? 5#14:5 Maku phoisa: 6:37 khen ah.Maku phoisa cumvaithumto cang aiah zawh thaih ih ni. Ato tangka to kamtang kamlainawk to paek han a hoih!” tiah longto hoi longto a ti o moa nongpui to na thuihprong o.

6Tona-ah Jesuh mah, “Oh na duem soe! Tipongmaw khrukhrahaih na sak o? Anih loa kai hanah hmuen kahoih hoi khet kahoih to a sak boah. 7#Deut 15:11Kamtang kamlai kami loa nangcae khaeah dungzan om poe tih, na koeh o nahaeloa natuek na-ah doeh na bom o thaih. To-e kai loa nangcae khaeah ka om poe mak ai. 8A sak thaih roekto a sak boah; ka takbum nuiah hmuihoihtui bawh ih hae kai aphum hanih hmaloe ah aroep zawh boah. 9Loktang ta-ah kang thuih o: Longprae bum boih ah Tamthang Kahoih a thuih o nakruek ah hi nongpui mah a sak ih hae angmah pahnethaih thaih han aiah thui o poe tih,” a naa pae.

Judas Mah Paipi Alae Hanah Naakrak

(Mat 26:14-16; Luk 22:3-6)

10Topacoengah hnukbang hlaihnetto thungih longto Judas Iskariot loa Jesuh nuiah paipi alae hanah qaihma kacoetanawk khaeah a caeh. 11A thuih ih lok to a thaih o na-ah palung anghoe o phi moa tangka paek hanah lok amaih o. Topongah Judas loa anihcae ih ban ah Jesuh to paek hanah atue kahoih to pakrong amtong boah.

Takantak Poi Duembuh A Cak O

(Mat 26:17-25; Luk 22:7-14,21-23; Jhn 13:21-30)

12Tae thuh ai Takaw Poi ani tangsuek ni, Takantak Poi hanah tuucanawk a boh o ih ni ah a hnukbangnawk mah, “Naamaw Takantak Poi duembuh to kang sak pae o roeh han na koeh?” tiah Jesuh to a duengh o.

13Tona-ah Jesuh mah anihcae thungih longhnetto to a patoeh moa hitiah lok taquk: “Vangpui thungah caeh hoi aloa tui laom hoiah tui kadoh nongpa longto nang hnit to angqum tih. Anih hnukah baang hoi ah, 14akunhaih im ih imkung khaeah, ‘Patukkung mah angmah hoi a hnukbangnawk mah Takantak Poi duembuh cakhaih han imlaek to naamaw oh? ti’ naa pae ah. 15Tona-ah anih mah imnui akhaan kauk parai to na patuek tih. Tiboih boih aroep coek ah om ueloa toah to duembuh sah hoi ah,” a naa pae.

16A hnukbangnawk loa a caeh o, vangpui thungah akun o moa Jesuh mah a thuih ih batih toengah tiboih to a hnuk o; Toah Takantak Poi duembuh to a sak o.

17A duembang phak na-ah Jesuh loa a hnukbang hlaihnetto hoiah angzoh o. 18Caboi ah buh a cak o li na-ah Jesuh mah, “Kamnoek ta-ah kang thuih o: Nangcae thungih longto, kaimah hoiah ka caa nawn mah kai nuiah paipi alae tih,” tiah a naa. #Sam 41:9

19A hnukbangnawk loa palunghoih o ai moa longto pacoengah longto, “Kai nang naa ai hmang takhae?” tiah duengh o rip.

20Jesuh mah, “Nangcae hlaihnetto thungih longto, kai hoiah sabae thungah ka nup nawn hae ni. 21Kami Capa loa dueh tih, tiah Cabu Kacai mah thuih ih batiah dueh tih; to-e Kami Capa nuiah paipi alaekung han-iah loa hmabang khosak bingh! Tacawt aiah om ngala nahaeloa hoih kue han tomah!” tiah a naa.

Angraeng Duembuh

(Mat 26:26-30; Luk 22:14-20; 1 Kor 11:23-25)

22Duembuh a cak o li na-ah Jesuh loa takaw to a lak, kawnhaih ih khophoeh pacoengah a aeh moa a hnukbangnawk to a paek. “La oloa caa oh, hi hae kai ih takbum ni,” tiah a naa.

23Topacoengah boengloeng to doeh a lak moa Sithaw khaeah kawn lokthuih pacoengah anihcae khaeah a paek moa anihcae boih a naek o. 24Jesuh mah, “Hi hae kami paroeai hanah ka long ka thii ni, Sithaw ih loktaphaih ka caksakkung ka thii ni.#Exo 24:8; Jer 31:31-34 25Kang thuih o: Sithaw Poenghaih thungih misurtui kangtha ka nae airoek loa hi misurtui hae ka nae let mak ai boah,” tiah a naa.

26Topacoengah laa quito a sak o moa Oliv mae bangah caeh o.

Piter Angphattakhaih Han A Thuih Roeh

(Mat 26:31-35; Luk 22:31-34; Jhn 13:36-38)

27Jesuh mah anihcae khaeah, “Nangcae boih mah kai hae nang cawnh o tak king tih, kawmawtiah Cabu Kacai thungah, ‘Sithaw mah tuukroekung to hum ueloa tuunawk to loa ampraek dung tih,’ tiah tarik ah oh.#Zek 13:7 28To-e duekhaih thung hoitoah angthawksak let ah ka oh pacoengah nangcae hma-ah Galili prae ah ka caeh han,” tiah a naa.#Mat 28:16

29Piter mah, “Kalahnawk boih mah na cawn o tak langla cadoeh kai loa kang cawnhtak mak ai roeroe,” tiah a naa pae.

30Jesuh mah Piter khaeah, “Loktang ta-ah kang thuih: Vaiduem ah aa vai hnetto takhong ai na-ah ‘Kang panoek ai’ tiah vai thumto nangphat tak tih,” tiah a naa.

31Piter mah kana aep ah, “Nang hoiah duek nawn hanah om langla cadoehsoe totiah ka thuii mak ai roeroe,” tiah a pathim let bae.

Kalah hnukbangnawk boih mah doeh totiah a thuih o rip.

Gethsemani Ah Jesuh Khophoeh

(Mat 26:36-46; Luk 22:39-46)

32Gethsemani naa pae ih hmuenh to a phak o moa Jesuh mah a hnukbangnawk khaeah, “Kho ka phoeh nathung hiah anghnu oah,” tiah a naa. 33Piter, Jaem hoi Johan cae to angmah hoiah nawnto a caeh o. Dawn angpho hoi palungbet hoiah a oh moa, 34anihcae khaeah, “Palung thungah palungsethaih hoiah koi lawnlai moa tapok han tih boah. Hiah hae om oloa iip aiah na zing oah,” tiah a naa.

35A hmabang ah setta a caeh hruet, long ah tabok moa, angcoeng thaih nahaeloa ato patang khanghaih ih to tongh han aiah kho a phoeh. 36“Abba,#14:36 Abba tihae Aramaik lok moa naukta mah ampa kawk o na-ah ‘Papa’ tiah patoh o ih lok ni. Pa! Nang hanah loa hmuen boiboih hae angcoeng thaih. Hi patang khanghaih boengloeng hae na la pae ving ah. To-e kai ka koehhaih ih batiah oh na hmah soeloa na koehhaih ih batiah oh na soe,” tiah khophoeh.

37Topacoengah amlaem moa a hnukbang longthumto ka iip khruep to a hnuk. Piter khaeah, “Simon, na iih khruep ving maw? Nitue maeto thung boe doeh iip aiah na hak thaih ai khoe maw?” tiah a naa. 38Moa anihcae khaeah, “Iip aiah na zing o aloa zaepacunghaih thungah na krak o han aiah khophoe oah. Palung pakhra mah loa a koeh e takngan loa a thahnaem,” tiah a naa.

39Jesuh loa vaito a caeh let moa hmaloe ih batih toengah kho a phoeh let bae. 40Topacoengah a hnukbangnawk khaeah amlaem let moa ka iip o king to a hnuk let bae; mik doeh padai o thaih ai roeroe. Timaw ka thuih han tidoeh panoek o ai.

41Anih loa avaih pathumhaih ih amlaem let na-ah anihcae khaeah, “Vaihi khoekto na iih o moa nang hak o roe vop maw? Khawt boah! Atue loa phak boah! Khen oah, Kami Capa loa kami kazaenawk ih thaohhaih ban thungah vaihi paek ah oh boah. 42Angthawk oh, caeh o sih boah. Khen oah, kai nuiah paipi alaekung loa hiah ang phak boah!” a naa pae.

Jesuh A Naeh O

(Mat 26:47-56; Luk 22:47-53; Jhn 18:3-12)

43Jesuh loa lok apaeh li na-ah a hnukbang hlaihnetto thungih ka paa toengh Judas to ang phak. Anih hoiah nawnto ah, qaihma kacoetanawk hoi Tawklok patukkungnawk hoi kacoetanawk mah patoeh o ih mipui to songsen hoi thingboengnawk sinh o moa angzoh o. 44Paipi alaekung mah mipui to amathaih ih a paek pae boih boah moa, “Kaimah ka mok ih kami to naeh han na koeh o ih kami ah om tih. Anih to naeh oloa hoihdak ta-ah ka toepkung hoiah caeh o haih ah,” tiah a naa.

45Judas a phak rumhoi loa Jesuh khaeah a caeh moa, “Patukkung!” a naa moa a mok. 46Tona-ah Jesuh to a naeh o moa pahlet o. 47Tona thuemah anihcae taengah kangdoe longto mah Qaihma Kalen ih misong ih naa to tasaek pae pat. 48Tona-ah Jesuh mah anihcae khaeah, “Kai hae kamqu kamca batih toengah naeh hanah songsen hoi thingboengnawk hoiah nang pangh oloa? 49Nithokkruek Tempal thungah kang patuk o na-ah nang naeh o ai bae. To-e Cabu Kacai thungih lok to acung han angaih,” tiah a naa.#Luk 19:47; 21:37

50Tona-ah a hnukbangnawk boih mah a cawnh o tak king.

51Thendoeng longto, kahni khueh kang khuk mah Jesuh hnukah baang. Anih to doeh naeh han thuih o, 52to-e kahni to a caehtak moa buenhkrai ah a cawnh.

Jesuh Lokcaekhaih Kawngsi Hma-ah

(Mat 26:57-68; Luk 22:54-55,63-71; Jhn 18:13-14,19-24)

53Topacoengah Jesuh loa Qaihma Kalen ih im ah a caeh o haih moa toah to qaihma kacoetanawk, kacoetanawk hoi Tawklok patukkungnawk amkhueng o. 54Piter loa kahla hoitoah a baang moa Qaihma Kalen ih im salong ah akun. Toah to misa toepkawtnawk khaeah anghnut moa hmai angawt. 55Qaihma kacoetanawk hoi lokcaek kungnawk mah Jesuh hum koeh ah a zaehaih to pakrong o khing e hnuh o thaih ai. 56Saksi ah kangdoe kami paroeai mah amsawn lok thuih hoiah Jesuh to zae a net o, to-e anihcae ih lok thuihnawk to anghmong o ai.

57Kami thoemto angdoet o moa, 58“Anih mah ‘Kami mah sak ih Tempal to ka phraek boih moa ni thumto thungah kami mah sak ai ih maeto ka sak han,’ tiah a thuih ih to ka thaih o,” tiah Jesuh to amsawn amlai a net o. #Jhn 2:19 59To-e angmahcae doeh lokthuih ih anghmong o thaih ai.

60Qaihma Kalen to anihcae boih hma-ah angdoet moa Jesuh to, “Nang zae angnethaih ih a thuih o to na pathim han om ai maw?” tiah lok a duengh pae.

61To-e Jesuh loa angam duem moa lok pakhato doeh pathim ai. Pahnit baeah Qaihma Kalen mah anih khaeah, “Nang loa kalensawk Sithaw ih Capa Messiah maw?” tiah a duengh let bae.

62Jesuh mah, “Kai boah ni. Kami Capa hae Cungri sahthai ih bantang bangah kanghnu moa van tamai hoiah kangzo to na hnuh o tih,” tiah a naa.#Dan 7:13

63Tona-ah Qaihma Kalen loa angmah ih kahni to asih rak moa, “Saksi kalah doeh angaih ai boah! 64Sithaw thuihsae ih to na thaih o boah. Kawbangmaw lok takroekhaih ih na tawnh o?” tiah a duengh.#Lev 24:16

Anihcae boih mah, “Jesuh loa kami kazae ni duek han a tueng,” tiah palung ahmong o boih.

65Kami thoemto mah Jesuh to pathoih o, mik komh pae o moa tabaeng o. Anihcae mah, “Mimah maw tabaeng, thui ah?” tiah a naa o. Topacoengah toepkawtkung risanawk mah a caeh o haih moa tabaeng o toengh bae.

Piter Mah Jesuh Angphattak

(Mat 26:69-75; Luk 22:56-62; Jhn 1:15-18,25-27)

66Piter loa im salong ah a oh na-ah qaihma kalen ih tamtoeh nongpui longto angzoh. 67Piter hmai kang-aw to a hnuk na-ah nongpui mah a khet daptap moa, “Nang doeh hae Nazareth Jesuh hoiah nawnto ka om ni,” tiah a naa.

68To-e Piter mah angphat. “Ka panoek ai; Na thuih ih akawng to ka thaihkop ai,” tiah a naa moa khongkha bangah to caeh. Topacoeng hoiloa aa khong roep boah.

69Tamtoeh nongpui mah toah to a hnuk let bae moa a taeng ih kangdoenawk khaeah, “Hi kami hae anihcae thungah ka paa toengh ni!” tiah a naa pae bae. 70To-e piter mah angphat let bae.

Nawnetta oh pacoengah a taeng ih kangdoenawk mah Piter to, “Anihcae thungih longto toeng ni, tihae nangphat thaih mak ai, kawmawtiah nang doeh Galili kami ni,” tiah a naa pae o.

71Tona-ah Piter mah, “Loktang ni ka thuih. Amsawn amlai ka thuih nahaeloa Sithaw mah danpaek na soe! Na thuih o ih kami to panoek ai roeroe,” tiah loktaaphaih hoiah a thuih.

72Topacoeng hoiloa aa to pahnit ah takhong moa Piter loa Jesuh mah, “Aa vai hnetto takhong ai nahlanah vai thumto ‘Ka panoek ai,’ nang phattak tih,” tiah a thuih ih to a dawn hlet moa a qah.

Currently Selected:

MARKA 14: AKNT2023

Highlight

Copy