MARKA 2
2
Kamkhawn Kami Longto A Hoihsak
(Mat 9:1-8; Luk 5:17-26)
1Ani setta akraa pacoengah Jesuh loa Kapernaum vang ah a phak let bae moa im ah a oh tito lok amthang. 2Topongah kaminawk angzoh o mang moa imthung loa a koi caeng, thok khonghma tasabang doeh angtawt khik. Jesuh loa anihcae khaeah tamthang lok to a thuih pae; 3a thuih li na-ah kami long palito mah kamkhawn longto to Jesuh khaeah angzawn o. 4Kami pop lawnlai pongah Jesuh khaeah to pha haih thaih ai. Topongah Jesuh ohhaih kadook ah imphu to taqawt o bawngh moa kamkhawn kami to hnibaih hoi qoek ah pakhrak o tathuk. 5Taanghaih paroeai a tawnh o tito Jesuh mah a hnuk na-ah kamkhawn kami khaeah to, “Ka capa, na zaehaih loa tahmen ah oh boah,” tiah a naa.
6Toah kanghnu Tawklok patukkung thoemto mah, 7“Kawbangmaw hitiah a thuih vam? Hi loa Sithaw thuihsaehaih ih ni! Zaehaih ka tahmen thaih loa Sithaw longto khueh ni a oh!” tiah palung thungah a dawn o.
8Anihcae dawnhaih to Jesuh mah panoek pae phrat, topongah anihcae khaeah, “Tipongmaw tobatih hmuennawk to na dawn o? 9Hi kamkhawn kami khaeah, ‘Na zaehaih tahmen ah oh boah,’ tihae maw ka zoi kue, ‘Angthawk ah, hnibaih to sin aloa caeh ah,’ tihae maw ka zoi kue? 10Topongah Kami Capa mah hi longnui ah zae tahmenhaih thaih ih akaa a tawnh tihae nangcae khaeah amtuengsak han ka koeh,” tiah a naa. Topongah kamkhawn kami khaeah, 11“Angthawk ah, hnibaih to sin loa im ah caeh ah, tiah kang naa,” tiah a naa pae.
12Mi boih mah a khet o li na-ah kamkhawn kami loa angthawk; hnibaih to a lak moa karang ah a caeh. Micae boiboih mah paroeai a dawnrai o moa Sithaw to pakoeh o moa, “Hibatih hae tita doeh ka hnuh o vaih ai,” a ti o.
Jesuh Mah Levi A Kawk
(Mat 9:9-13; Luk 5:27-32)
13Jesuh loa Galili tuilitaeng ah a caeh let bae. Mipui to anih khaeah angzoh moa patukhaih amtong. 14A caeh lamah tamut congkung, Alfias capa Levi to angmah ih zung ah kanghnu to a hnuk. Jesuh mah anih khaeah, “Kai hnukah na baang ah,” a naa. Levi loa angthawk moa a baang.
15Topacoengah Jesuh loa Levi im ah buh a cak.#2:15 Levi im ah tihae Anih im ah (Jesuh im ah) tiah doeh oh thaih. Tamut congkungnawk hoi tahnawng ih kaminawk katingai mah Jesuh hnukah baang o moa to thungih thoemto loa Jesuh a hnukbangnawk hoiah nawnto buh angvai o. 16Farasi kami Tawklok patukkung thoemto mah Jesuh to tahnawng ih kaminawk hoi tamut congkungnawk hoiah nawnto buh a cak o to a hnuk o na-ah, a hnukbangnawk khaeah, “Tipongmaw hibatih kaminawk hoiah nawnto buh a cak?” tiah a naa o.
17To lok to Jesuh mah a thaih na-ah, “Ngan katuinawk mah dawkta angtoeng ai, ngan kananawk mah khueh ni loa angtoeng o. Kami katoengnawk kawk hanah kangzo ai moa kazae kaminawk kawk hanah ni loa kangzoh,” tiah a naa.
Buhzahhaih Kawng Lokduenghhaih
(Mat 9:14-17; Luk 5:33-39)
18Vaito na-ah baptisma paekkung Johan ih hnukbangnawk hoi Farasinawk to buh a zah o. Kami thoemto Jesuh khaeah angzoh o moa, “Tipongmaw baptisma paekkung Johan ih hnukbangnawk hoi Farasinawk loa buh a zah o e nang ih hnukbangnawk loa buh doeh zah o ai?” tiah a duengh pae o.
19Jesuh mah, “Zupaluen poi ah pacae ih kaminawk to buh hoiaiah om tih, tiah na dawn o maw? Om mak ai; zulakung to anihcae hoiah nawnto oh nathung loa buh aiah om o mak ai roeroe. 20To-e zulakung to anihcae khae hoitoah lak ving ih ani to na pha tih, tona-ah buh to zah o dawdah tih.
21“Laihaw kangquem abuhaih hanah laihawngan kangtha to patoh vaih ai, kawmawtiah laihawngan kangtha mah kangquem to tathok bawng ueloa angsih ih akhaw to len aep tih. 22Misurtui kangtha to moihin tabu kangquem thungah lawn vaih ai, kawmawtiah misurtui kangtha mah moihin tabu kangquem to tapoksak ueloa misurtui hoi moihin tabu to amro maek tih. Misurtui ahmat loa moihin tabu kangtha thungah lawn hanah oh roe,” a naa pae.
Sabbath Kawng Lokduenghhaih
(Mat 12:1-8; Luk 6:1-5)
23 #
Deut 23:25
Jesuh loa Sabbath ni ah lawk thung hoitoah to a caeh. Angmah hoiah nawnto a hnukbangnawk doeh caeh o toeng moa cangqui to pahoeh pae o. 24Topongah Farasinawk mah Jesuh khaeah, “Khen e! Na hnukbangnawk mah sabbath ni ah a sak o ih hae kaicae ih Tawklok mah koeh ai ih ni,” tiah a naa pae o.
25Jesuh mah, “David mah cak han tawn ai na-ah timaw a sak tito na kroek vai ai maw? Angmah hoi angmah ih kaminawk loa zok amhlam o parai,#1 Sam 21:1-6 26topongah Sithaw im ah to caeh o moa Sithaw hanah tahlang ih to a cak o. Qaihma Kalen Abiathar dung na-ah totiah a oh. Aicae ih Tawklok batiah nahaeloa qaihmanawk khueh mah ni ato takaw to a cak thaih, to-e David loa a cak moa angmah ih kaminawk to doeh a paek bae roe vop,” tiah a naa.#Lev 24:9
27Topacoengah Jesuh mah, “Kami hoihhaih han-iah ni Sabbath hae a sak; Sabbath han-iah kami hae sah ai. 28Topongah Kami Capa hae Sabbath ih Angraeng ah doeh a oh,” tiah a naa.
Currently Selected:
MARKA 2: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
