MARKA 3
3
A Ban Kamkhawn Kami
(Mat 12:9-14; Luk 6:6-11)
1Topacoengah Jesuh loa sinakok ah to a caeh let bae moa toah to a ban kamkhawn nongpa longto a oh. 2Jesuh to zaenet han ka koeh kami thoemto doeh toah a oh o toengh; topongah Sabbath ni ah hoihsak tih vai, hoihsak han ai vai tito hoihdak ta-ah a khet o. 3Jesuh mah ato kami khaeah, “A hmabang ah tacawt ah,” tiah a naa. 4Topacoengah kaminawk khaeah, “Sabbath ni ah ti sak hanah maw aicae ih Tawklok mah ang paongh? Kami abom hanih ah maw tiaibaloa raihaih paek hanih ah maw? Kami longlongto ih hinghaih pahlong hanih ah maw tiaibaloa paro hanih ah maw?” tiah a duengh pae. To-e tita doeh thui o ai.
5Jesuh loa anihcae to a khet na-ah palung a phuii parai, to-e palung a thah o haih ih hoi a zae o haih ih to a hnuk na-ah palung a set parai let bae. Topacoengah anih khaeah, “Na ban to pazang ah,” tiah a naa. A ban to pazang moa a hoih pae let. 6Topongah Farasinawk loa sinakok to tacawt tak o moa Herod ih kami thoemto hoiah angqum o roep moa Jesuh to hum thaih hanah lok aram o.
Tuili Taengah Mipui
7Jesuh hoi a hnukbangnawk loa Galili tuili bangah to caeh o moa mipui paroeai mah a baang o. Anihcae loa Galili prae, Judea prae, 8Jerusalem vangpui, Idumea prae, Jordan tuiva niangzae bang prae, Taiar hoi Sidon vangpui taenghaek hoitoah kangzo kaminawk ni. Hi kaminawk boih mah hae Jesuh mah a sak ih hmuen to a thaih o pongah angzoh o. 9Kami pop lawnlai moa na cawh o krawt krawt moeng han aiah Jesuh mah a hnukbangnawk khaeah palong maeto coengcoe ah suek roeh hanah a thuih pae.#Mrk 4:1; Luk 5:1-3 10Kami paroeai a hoihsak moa ngan kananawk boih mah anih to sui thaih hanah ahmabang ah angnuih o. 11Taqawk kasae ka tawnnawk mah anih to a hnuk o nakruek ah a khokkung ah tabok o moa, “Nang loa Sithaw Capa ni,” tiah khoeh puiah a hangh o.
12Jesuh mah taqawk kasaenawk khaeah anih loa mimaw tito thuih han aiah kana dakah lok a paek.
Hnukbang Hlaihnetto A Qoih
(Mat 10:1-4; Luk 6:12-16)
13Topacoengah Jesuh loa maenui ah a dawh moa a koeh ihnawk to a kawk. Anih khaeah to angzoh o moa, 14kami hlaihnetto a qoih moa anihcae to ‘Kawkpatoehnawk’ tiah ahmin to a paek. Kai hoiah oh hanah kang qoih o boah. Topacoengah Tamthang lok thui hanah kang patoeh han moa 15taqawk pathokhaih thaih ih akaa to na tawn tih,” tiah a naa.
16A qoih ih hlaihnet tonawk loa: Simon (Jesuh mah Piter tiah ahmin phuii ih); 17Zebedi capa Jaem hoi amnauk Johan (Anih hnit hae Jesuh mah Boanerges tiah ahmin a phuii pae, a thuihkoehhaih loa Khopazi capa tihaih ih ni); 18Andru, Filip, Bartholomew, Mathai, Thomas, Alfaias capa Jaem, Thaddaias hoi caeng palung kana Simon hoi 19Angraeng Jesuh nuiah paipi alaekung Judas Iskariot cae hae ni.
Jesuh hoi Beelzebul
(Mat 12:22-32; Luk 11:14-23; 12:10)
20Topacoengah Jesuh loa im ah amlaem. Kami paroeai mah angzohthuih cu o let bae pongah Jesuh hoi a hnukbangnawk loa buh cak han pat doeh atue tawn o ai. 21To lok to a sanauknawk mah a thaih o na-ah, “Jesuh loa amthu boah,” tiah minawk mah a thuih o pongah angmah to khetzawn hanah a caeh o.
22Tawklok patukkung thoemto Jerusalem hoitoah kangzonawk mah doeh, “Anih thungah Beelzebul a oh, taqawk pathok hanah hmuensak thaihaih ih ka paekkung loa taqawk angraeng ni,” tiah a naa o.#Mat 9:34; 10:25
23Topongah Jesuh mah anihcae to a kawk moa patahhaih hoiah lok a thuih pae: “Kawbangmaw Setan mah Setan to haek thaih tih? 24Prae maeto thungah a bubu ah kampraek moa angmahcae hoi angmahcae to angtuh o nahaeloa to prae loa ampraek dung tih. 25Imthungtako maeto thungah a bubu ah ampraek moa angmahcae hoi angmahcae to angtuh o nahaeloa to imthungtako loa ampraek dung tih. 26Tobatih toengah Setan prae to a bubu ah ampraek dung nahaeloa angdoe thaih mak ai, angphrae dung ueloa anghma angtaa boih tih.
27“Tha kaom kami to loa taoeng rat hmaloe ai nahaeloa vawnsainawk to lomh pae thaih mak ai; totiah taoeng na-ah ni loa a im to muk pae thaih tih.
28“Loktang ta-ah kang thuih o: Kami hae a zaehaih ih boiboih hoi loksae lokkhaa apaehhaih ih boih to tahmen ah om tih.#3:28 Loksae lokkhaa apaeh tihae Sithaw koehhaih ai ih loksae apaeh tiah doeh oh thaih. 29To-e ami doeh Cai Pakhra koeh ai ih loksae ka pae loa tahmen ah om mak ai, kawmawtiah anih loa dungzan zaehaih to a sak boah,” tiah a naa.#Luk 12:10 30(“A thungah taqawk kasae akun” tiah a naa pae o pongah Jesuh mah hi lok hae a thuih).
Jesuh Ih Amno hoi Amnauknawk
(Mat 12:46-50; Luk 8:19-21)
31Topacoengah Jesuh ih amno hoi naukamzanawk to angzoh o. Tasabang ah angdoet o, imthung ah kami to patoeh moa anih to a kawksak. 32A taengah kami zetpui anghnut o moa anihcae mah, “Khen e, nam no hoi nam nauknawk hoi na tanunawk tasabang ah oh o, nang hoi angqum han koeh o,” tiah a thuih pae o.
33Jesuh mah, “Mimaw kam no loa? Kam nauknawk to doeh amimaw?” tiah a naa. 34A taenghaek ih kanghnu mipui to khet lamhoi, “Khen e! Hiah hae kam no hoi kam nauknawk to a oh. 35Ami doeh Sithaw koehhaih ka sah loa kam nauk, ka tanu hoi kam no boah ni,” tiah a naa.
Currently Selected:
MARKA 3: AKNT2023
Highlight
Share
Copy
Want to have your highlights saved across all your devices? Sign up or sign in
Asang Khongso New Testament in Eastern Khumi © Bible Society of Myanmar, 2023.
