ACT 26
26
Pol akare manyure mandi va wusu Agripa
1Agripa ayambile Pol re: «Yine dinyaange diwukare manyuru magu.» Ne vane Pol asiimbule googu ayambile mu wukare manyuru mandi re: 2«Maate Agripa, nemunyi mayi time ne yinyunge gi wukare manyuru mami ve wuswagu mu maambu mootsu magonetarugulu me ne Basifu. 3Mumbare yisetsiimbu bweedi kotwawu ne misosu myawu. Mu dyo, magoneleende yu, yululu me guga kubise.
4Basifu bootsu bayatsi monyu wami baande gu buleengi bwami. Basetsiimbu napakenge me baande ve dibaandu, gu Serusalem ve ganegare yitsuku gyami. 5Bayatsi me ke kale, ga baroonde barungule wuvage bumweenyi re mabege monyu wami gugare dikabu di Bafwarisi: dyo re dikabu di Basifu dibile ne migyele misakagigulu. 6Maketsuundusu nemunyi mumbare mane gitu mu ndagi yivage Nzambi gu mikoku myetu. 7Digumi ne bibaandu bi beyi bi yitsuku gyetu bayi ne gitu re Nzambi agusupule ndagyene, nudyanzile Nzambi ne gyusule, ne nyangu ne dibati. Maate Agripa, ne me gaandi mane gitu mu dyo. Re disine baane ba maame ba Basifu bagonetarigile me maambu. 8Mugi yenu Basifu disegoneroonde wusiinge re Nzambi akafwanguli babafu? 9Mabene matasenge nde re ne masuge mootsu magukubise dine di Sesu mwisi Nasarete mu wukume. 10Nane re navage me gu Serusalem. Ve mane wuveegu me dinyaange ne bivuunde bi baveegitsi ba malagu, mayenze mbili babasiinge Sesu gu tsugu. Ve benwa yawu wuboku masiinge. 11Mayendenge gu bandagu bootsu ba masaambulu ba Basifu. Matsogisenge babasiinge Sesu ne masivenge yawu mu wuseenge dine di Sesu. Mabile time ne kabu yiviogilile mu yawu ne mabingisenge yawu nguu ne gu mavule ma beenyi.
Pol anyigule maate Agrippa navesiinge yandi Sesu
12Nane re nayende me wisi wumoosi gu Damas. Bivuunde bi baveegitsi ba malagu basindige me guune ne dinyaange diwugaange babasinge Sesu. 13Maate Agripa, mabile mu nzile. Vane ne vane mu digwere dikabili dyuumbi va yulu nduunzi, malabe yiveele giruga gu yulu. Givyogilile yiveele gi dyuumbi ne gingayimenge, gikaande mane babayendenge nami. 14Yetu bootsu diberugu va tsi, ne mayulu duufi diyambilenge me gu diloongu di Basifu re: “Sol, Sol, mugi yigonetsogise me? Mugi yigonegwaarise murime ga ngoombi yigonediimbu ne fumwandi? Yiyabegolu!” 15Matombe re: “Fumu, yinde nyi?” Fumu ayagule me re: “Mare Sesu, mare wuyigonetsogise. 16Te siimbuge, teleme! Mayambili yu disine di mamatutugile yu: matsesoole yu mu wubile mudyanzitsi wami. Yigubile yimweenyi gyami mu wuyambile nave yitselabe me nemunyi. Yiguyambile gaandi mamakeritsige yu diyakene di nzime. 17Maguyobule yu va ganegare yitsuku gyagu gi Basifu ne bitsuku bimosi gu makesindige yu. 18Ne vane yigubalule miisu mawu, baguvate gu divisme mu wugabugu gu yiveele. Basakebebile mu dinyaange di Sate, te bagugabugu gu Nzambi. Ga babile ne gitu mu me, bagudile kokolu mu mabi mawu ne yitsige vaganegare yawu baba mu Nzambi.”
Pol agoneyambile navedyanzile yandi Sesu
19Maate Agripa, masagigule yivivilu girugile me gu yulu. 20Te mayambile musamu wumunyi kinde gu bisi Damas ne bisi Serusalem kere gu bisi Sudé yotsu ne gu bitsuku bimosi. Mayambile yawu mu wukaluse bitsagilitsi byawu ne mu wugyelugu gu Nzambi, ne mu wuvage maambu mabweedi mu wuritsige re yawu bamakaluse bitsagilitsi byawu. 21Mu dyo, Basifu bagaange me gu Ndagu Nzambi ne babene wuboke me. 22Te nguu ne gi nemunyi wu, Nzambi agonesike ke me ne magonekoonde ke wubile yimweenyi gyandi ve wusu bootsu, bangyebe ne bivuunde. Babigitsi ne Muyise bamane wuyambile mu maambu makeruge, me, masaandi ne dimosi diwukoonde. 23Bamane wuyambile re Wusoolu ne Nzambi agulabe maguge, agufwangugu mareege ne aguyambile musamu wu yiveele gi wuyobulu gu yitsuku gyetu ne bitsuku bimosi.»
Pol agonetsitse Agripa mu wusiinge Sesu
24Ve kare Pol manyuru mandi nane, vane re ve bwamugu Festus re: «Pol, yinde ne misube! Yivure wuneenge re mu dyo yike ne misube!» 25Pol ayagule yandi re: «Muyumene, masaandi ne misube, mabigu magoneyambile me ke ma yimwaanze ne mamanyi. 26Maate Agripa atseyulu maambu mane mootsu re disine magoneyambile guga wome va wuswandi. Mayatsi nungyenze re asetsiimbu maambu mane mootsu, mumbare mo masevyoge gu mbure yi diswele. 27Maate Agripa, yine gitu mu mabigu ma babigitsya? Masetsiimbu re yine gitu.» 28Agripa ayambile Pol re: «Yikekaluse me keriti ke mu ma dikyesi di peswa?» 29Pol ayagule re: «Aa, mbe dyo dineruge pasi wisi mu ngudi Nzambi! Yu, ne yenu badigoneyulu magoneyambile me nemunyi, maroonde re yenu dibili ga me, te guga bapaange!»
30Ne maate ne muverner ne Berenis ne bootsu bababile nawu bateleme. 31Bavate ne bayinzegenenge: «Mutu wuwu asavage dyaambu dibive dikekilusu yandi ne difu konane tsugu.» 32Re Agripa ayambile festus re: «Mbe mutu wuwu asatombe wutsuundusu ne Sesar, mbe amanyangumusu.»
Currently Selected:
ACT 26: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
